Salmu 110 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono, apito da, te te ipisutu wasu'u

Dawihi nho're

¹ Uburé Danhib'apito, ma tô ĩnhib'apito ma tinha ãne: “Ma'ãpé ĩnhimire niwĩ ĩzababamhã asãmra, aipara zahâpâ asitob'ru norĩ za te isõrézéb u.”

² Uburé Danhib'apito, te za asiptete na Siã hawi 're ida'a'madâ'â mono zéb da hã aima 'wani, poré daro mono bâ hâimana da. Uburé te za asitob'ru norĩ nhipai u asiptete na 're aihâimana mo.

³ Nimahã na asitob'ru norĩ zada aihâimana da, bâdâ pisutu wamhã, te za asib'a'uwẽ norĩ hã oto aima sihâi'ré za'ra, sihawim na isipisutu za'ra norĩ hã. Awẽ wi atébré 're ihâimana mono ne, te za ihâiba tém norĩ hã ẽne iwazéb zahi ãma siwi asõpẽtẽ.

⁴ Uburé Danhib'apito uptabi, tinhimiropisutu na apâ te te ãma isiri waihu'u õ na, ma tô mreme pire na ropisutu, ãne: “A hã sasedoti norĩ, dama 're ihâimana za'ra mono ne, te za dama 're aihâimana u'âsi mo, duréihã Mequizédéqui hã sasedoti na pire na dama 're ihâimana mono zéb zarina.”

⁵ Uburé Danhib'apito te asimire niwĩ asababamhã 're sãmra. Ta hã te za isiti'rui watobrozé bâtâ na apito norĩ hã ahâpâ pese.

⁶ Te za dapoto mono bâ te te dama 're arowairébé, dahâimanazém na te te 're ida'awaihu'u mono zéb zarina. Duré te za rom na dasi'wapéi wa, idadâ'â za'ra 'rãtâ na ro hã te te ãma upsibi. Te za duré uburé dama i'rãnho'õmo norĩ hã ahâpâ pese, daro mono bâ 're idahâimana za'ra mono.

⁷ Duré tawamhã bâdâdi na morĩ sina, panho'õmo â te te zâ'rẽne wamhã, te za 'rãiwahudu, te te da'ãma ai'uté wẽ te.