Salmu 104 - ꞌRe Ihâimana Uꞌâsi Mono Zadawa Wasuꞌu

Ropoto'wai ãma danho're na dawatazé wasu'u

¹ Uburé Danhib'apito, ĩpẽ'ẽ na wa ĩnho're na ai'ãma si 're ĩwata! Ĩte Uburé Danhib'apito 'Re ihâimana u'âsi mono, e niha tô sena i'asa'ẽtẽ uptabi! Da'uza wẽ na 're idasi'uza za'ra mono ne, te õne u'â aiwaihu'u pese na duré aiwẽ uptabi na 're aihâimana mo.

² Te duré rowa'a na 're asi'ubu mo. A hã ma tô duré hâiwa, romhâ 'manharĩ na 'ri, da te 're i'wani za'ra mono ne, i'wani misi haré.

³ Â 're isa'wari mono nhisiwimhã 're i'asãmra mono zé 'ri hã ma tô isã. Duré wedewara zapore na dasi'wapézém na 're idasisa'rei mono ne, te hâiwa'a na 're ane mo. Te duré asaripi na ne rowa'u'u nhisiwi 're asamroi mo.

⁴ A hã te duré rowa'u'u ma, asadawa wasu'u'wa da hã tãma 're i'apisutu mo. Te duré tã si'ubuzi ma, aima romhuri'wa da, tãma 're i'apisutu mo.

⁵ Ti'a, a hã ma tô isãna'rata nhisiwimhã ihi, tete na 're sa'wari mono da, rési ãna. Ãne wa, niwamhã sirési waihu'u õ di za.

⁶ Ti'a, â poré na ma tô isuwa, dasi'ubuzé ihâ pa na ãma 're idasi'ubu za'ra mono ne. Ãne wa, ma tô â hã ẽtẽ nhisiwi wahuré 're sa'wari.

⁷ Tane nherẽ, tãma nharĩ pipa te, ma tô â hã aima aimani. Tãi rãrã'ã ne, aimreme rãrã te te wapari pipa za'ra wa, ma tô si'aba'ré na ti'âpraba za'ra, â hã.

⁸ Ẽtẽ mono na â hã ma tô te te sai'uri. Duré ta hawimhã ẽtẽ siwa'aba wa romharé 're ihâimana mono na hã ma tô tipraba, ro hã tãma i'apisutu mono zéb u.

⁹ A hã, â sisu'u pese na isada'ré 're simi'wara mono da hã ma tô tãma ipisutu za'ra, niwa ti'a te te upsibi na sahu za'ra tõ da.

¹⁰ A hã ma tô duré â nhana'rata u siro ẽtẽ siwa'aba mono na i'a'âpu'u mo. Tahawa, te oto pa nho'õmo norĩ hã 're âpraba za'ra, ẽtẽ nhi'riti mono wa'waibaba.

¹¹ Taha â na te oto uburé abaze norĩ hã te te 're âhuri. Duré taha na te awaru po're pore i'aba'ẽi'õ, 'rubu hã te te sima 're simro.

¹² Pa zaihâi mono na te si norĩ hã wede na te te sima 're zasi za'ra. Te duré wede panhipti mono na 're sadawasituri.

¹³ Hâiwa ãma 're i'aihâimana mono zém hawi, te tãi ma hã we 're irob'rui u'âsi mo, ẽtẽ nhisi 're ta'a mono da hã. Tahawa, te ti'a hã marĩ iwẽ na 'masisi na 're sa'wari, asimiromhuri wẽ zéb zarina.

¹⁴ A hã te duré dui ma hã 're inharĩ mo, 're prédub za'ra mono da, powawẽ, ãma 're saihuri mono da. Te duré rob're ma 're inharĩ mo, da te 're zuri mono wa, dasazé hã da te ãma dasima 're sani za'ra mono da.

¹⁵ Te duré ti'ai ma 're inharĩ mo, uwa 'ru 're 'rãi pese mono da, iwa'u zô, taha na dama 're rowẽ za'ẽtẽ za'ra mono da. Azeitona wa'u tob zô zama, te duré tãma 're inharĩ mo, te te sina 're da'ubu waipo za'ra mono da. Te duré i'u'ẽtẽ wapu zô zama tãma 're ĩnharĩ mo, danhiptede hã te te dama 're sõmri za'ra mono da.

¹⁶ Uburé Danhib'apito te, wede norĩ hã te tã te te 're di'i wẽ pese za'ra, Libanu na romnhisi ãma wede nhinihã cedru na wede nhisi norĩ te te 're i'a're mono hã.

¹⁷ Tame te si norĩ hã tizasi te te sima 're 'manharĩ za'ra. Te duré sõ'rehõ norĩ hã tizasi, pinheiru na wede nhisi na te te sima 're 'manharĩ za'ra.

¹⁸ Ẽne i'rãihâ norĩ nhisiwi te pone'ẽrebâ zéré uzé i'madâ'â'õ norĩ hã iwamhã 're simasa. Te duré 'rupo'rere norĩ hã ẽtẽ nhi'riti wa tiza'rui 're, sima'uri sina 're hâimana za'ra.

¹⁹ A hã ma tô duré a'amo hã i'manha, rob'ré waihu'uzéb da hã, duré a'ẽ ta'a waihu'uzéb da hã. Duré bâtâ ma hã waihu'u pese di, niha hã 're izasi mono zéb da hã.

²⁰ A hã 're mara mono da hã ma tô duré ipisu. Tawamhã oto 're mara mono sidâpâsi, te uburé abaze norĩ hã robra na 're sihâi'ré za'ra.

²¹ Hu'u zérépa ihâiba tém norĩ hã te duré wairõ sina te te 're aba za'ra, 'Re ihâimana u'âsi mono isa te te tãma 're isõmri za'ra mono zô 're rĩtĩ za'ra mono sina.

²² Tane nherẽ, bâdâ oto 're pusi mono wamhã, te duré apâ 're nomro, tinhorõwa u.

²³ Tô tawamhã, te danhimiromhuri u 're dawairébé, hâiwahâ tẽme da te 're romhuri za'ra mono da.

²⁴ Uburé Danhib'apito, a hã ma tô marĩ ahâ uptabi na i'a'manharĩ mo! Asimirowaihu'u za'ẽtẽ na ma tô uburé marĩ hã i'apoto mo. Tahawa, ti'a asimipoto mono na hã 'masisi uptabi di.

²⁵ Tame te â poré isada'ré waihu'u'õ isa'ẽtẽ uptabi hã 're sa'wari. Taha 're, te asimipodo ihâiba ré norĩ hã iwa 're nomro isa'ẽtẽ norĩ, duré isurure norĩ, sa'rata waihu'u ãna.

²⁶ Taha na, te duré uba're wawẽ te te ãma 're ro'rahâri za'ra. Leviatã na asimipoto siwamnarĩ nhisi norĩ hã te duré i'remhã sima te 're rowẽ za'ra.

²⁷ Uburé te abaze norĩ hã aihawim na si 're hâimana za'ra. Tahawa, bâtâ uwaibaba isa tãma 're isõmri za'ra mono zô hã, te duré 're sõpré.

²⁸ A hã te tô isa hã tãma 're i'anhomri mo. Tahawa, tisa te te 're huri mono wa, te te 're 'mahâpãrĩ za'ra mono wamhã, te duré te te sima ãma 're rowẽ za'ra.

²⁹ A hã tiwi 're ai'rã sipizari za'ra mono wamhã, te pahi na 're hâimana za'ra. Duré aipẽ'ẽzani tãma 're i'anhomri mono, tiwi 're anhihâri mono wamhã, te za 're dâ'â za'ra. Tawamhã te za apâ 're siti'azaprub za'ra.

³⁰ Tane nherẽ, duré 're aza'uri mono wa, aipẽ'ẽzani tãma 're anhomri mono wamhã, te za ta norĩ hã hâiba ré 're poto za'ra. Ãne wamhã, te za ti'ai manawawi ma, marĩ ité hã tãma 're i'anhomri mo.

³¹ Uburé Danhib'apito waihu'u pe iwẽ uptabi hã 're ihâimana u'âsi mono da si, iwẽ hã! Tahawa, duré tinhimi'manharĩzé ma, 're itoi mono da si, iwẽ hã!

³² Uburé Danhib'apito, ti'a te te 're 'madâ'â nhib'rui mono wamhã, te za 're popo'o. Duré ẽne te te 're a'upi nhib'rui mono wamhã, te za romnhizé ihawimhã 're wairébé.

³³ Uburé Danhib'apito ãma, 're ĩhâimana mono ré, wa za ĩnho're na hã ãma 're ĩwata, ĩte 'Re ihâimana u'âsi mono ãma hã.

³⁴ Uburé Danhib'apito, ĩnho're na te te ãma sima 're irowẽ mono da si, wa ĩsima te 're wẽ. E marĩ wa. Ihawi wa, rowẽzé ĩma 're ihâimana mono hã.

³⁵ Ti'ai ãmab ré, tiwasété si te te 're i'manharĩ za'ra mono norĩ hã tô si'utõrĩre, iwasété uptabi norĩ hã! Ĩpẽ'ẽ na, Uburé Danhib'apito ãma 're ĩwata mono da si, ĩma iwẽ hã!