Salmu 103 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono ãma isimizawi wẽ na danho'rezé wasu'u

Dawihi nho're

¹ Uburé Danhib'apito, ĩpẽ'ẽ na ai'ãma 're ĩwata mono da si, wa ĩsima te 're 'ruiwapari u'âsi! 'Re ihâimana u'âsi mono, marĩ iwasédé, ai'ãma 're ihâimana mono õ ãma, uburé ĩnhiptede ĩma 're ihâimana mono na, ai'ãma 're ĩwata mono da si, duré ĩma iwẽ hã!

² Uburé Danhib'apito, ĩpẽ'ẽ na tô ai'ãma 're ĩwata mono da si, wa ĩsima te 're 'ruiwapari! Duré marĩ iwẽ na 're ĩpawapto mono zém na 're ĩpo're simrami tõ mono da, wa tô ĩsima te 're wẽ u'âsi!

³ Uburé Danhib'apito, ma'ãpé ĩpẽ'ẽ 're, uburé 're ĩwasété mono zé hã ĩ'ãma 're ab'madâ'â mono tõ. Duré ma'ãpé ĩpese, uburé 're ĩhâzé mono hawimhã.

⁴ Õ hã ma tô te te 're ĩnho'reptui u'âsi, ab're 're, adâ da te 're iséme mono zé wi. Duré tinhimizawizéb zarina ĩ'ãma 're siwamri mono wa, te iwẽ si te te ĩma 're anhomri.

⁵ Õ hã te duré marĩ iwẽ na ĩpẽ'ẽ 'remhã te te ĩma 're sa'ẽtẽ. Ãne wa, wa tô ĩhâiba tém na 're ĩhâimana mono zém na, te ãma uzusi u'âsi, si'õmo wawẽ siptete na 're ihâimana mono ne.

⁶ Uburé Danhib'apito, te i'uwaibaba na si da te 're iwati pese za'ra mono norĩ ma, te te 're arowairébé, iwẽ na si. Ta norĩ 'wawimhã te duré 're simapa u'âsi.

⁷ Ta hã, niha na te te sima irowa'õtõzé hã Mozésihi ma, ma tô tãma hâi'ré. Ma tô duré tiwaihu'u pese na tinhimi'manharĩzé hã Izaraéu nhihudu norĩ ma hâi'ré, ta norĩ te te siwi 'madâ'â da hã.

⁸ Uburé Danhib'apito, iwẽ si te te dama 're ab'manharĩ u'âsi. Te duré da'ãma 're siwamri u'âsi. Te duré simizawi uptabi na 're hâimana.

⁹ Õ hã te te dama 're ipẽtẽ u'âsi mono na, 're hâimana mono õ di. Duré dazada 're isiti'rui u'âsi mono na, 're hâimana mono õ di.

¹⁰ Wawasédé, wa te 're i'manharĩ za'ra mono zarina te te 're wahâ za'ra mono õ di, ibâ zarina. Te nasi te te wama ãma 're ati'awi, tinhimihâzém na. Duré wawasété zarina, ibâ na te te duré wama 're awa'âbâ mono õ di.

¹¹ Hâiwa, ti'a nhisiwi romhâ uptabi na 're isa'wari mono ne, te isimizawizé hã sa'ẽtẽ na 're hâimana, te te 're iwazéb za'ra mono norĩ ãma hã.

¹² Bâtâ pusizém niwĩ ti'a, bâtâ zasizém niwĩ ti'ai me romhâ uptabi na siwi 're isa'wari zahuré mono ne, tane te wawasédé hã romhâ na wanhiti te te wama 're azatõrĩ.

¹³ Damama, ti'ra norĩ ãma 're isiwamri pese mono ne, te duré Uburé Danhib'apito te te 're iwazéb za'ra mono norĩ ãma hã sa'ẽtẽ na 're siwamri.

¹⁴ E marĩ wa. Õhõ ma hã waihu'u pese di, niha na we iwasi'manharĩ za'ra zé hã. Te duré ti'a zapru 'manharĩ na hã wa'ãma 're sipo're pu'u za'ra.

¹⁵ Dahâimanazé hã aiwa du ne hã. Duré dahâimanazé hã aiwa rom na romnhirãrã wede 're iprédub za'ra mono ne hã, duré 're isirãrã wairébé mono ne.

¹⁶ Tawamhã rowa'u watobro wa, te te wapõrĩ wamhã, te za oto sirãrã haimani za'ra. Nimame isirãrã nhimi'warazé hã dama waihu'u õ di oto.

¹⁷ Uburé Danhib'apito nhimizawizé te si'utõrĩ ãna te te 're iwazéb za'ra mono norĩ ãma hã 're hâimana u'âsi. Ta norĩ 'ra nhihudu norĩ ma sidâpâsi, te õne u'âsi i'uwaibaba na si te te tãma 're i'ab'manharĩ mono zé hã 're hâimana,

¹⁸ isimiropisutu zahi te te sima 're itété za'ra mono norĩ ma, duré isimiroti te te 're iwapari pese za'ra mono norĩ ma.

¹⁹ Uburé Danhib'apito, hâiwa ãma tisimasisizéb da hã ma tô pisutu, pire na te te ãma 're ida'a'madâ'â mono zéb da hã. Ta hã te uburé marĩ 're ihâimana za'ra mono hã pire na te te 're ab'madâ'â, apito na õ hã.

²⁰ Uburé Danhib'apito ãma si 're aiwata za'ra wa'aba mono, hâiwa ãma romhuri'wa asiptete na 're i'aihâimana za'ra wa'aba mono norĩ, duré imreme 're iwapari pese za'ra wa'aba mono na 're i'aihâimana za'ra wa'aba mono norĩ hã!

²¹ Uburé Danhib'apito ãma si, tô uburé ãma 're aiwata za'ra wa'aba mono, uburé hâiwa ãma romhuri'wa norĩ, duré uburé isib'a'uwẽ na 're i'aihâimana za'ra wa'aba mono norĩ, marĩ te te sima 're iwẽ mono zéb zarina 're i'manharĩ za'ra wa'aba mono norĩ hã!

²² Uburé Danhib'apito ãma tô isimipoto mono bâ, 're dawata za'ra mono, ropâ te te 're ida'a'madâ'âzé mono bâ! Uburé Danhib'apito ãma, wa hã ĩpẽ'ẽ 'rem na ãma 're ĩwata mono da si, wa ĩsima te 're wẽ!