Salmu 102 - ꞌRe Ihâimana Uꞌâsi Mono Zadawa Wasuꞌu

Aibâ, robzépata 're, 're ihâimana mono, 'Re ihâimana u'âsi mono ma imremezé wasu'u

¹ Uburé Danhib'apito, ma'ãpé ãma aima ĩmremezé hã wapari. Duré ĩzadari sina ĩpawaptobzé te aiwi iwaptẽrẽzé hã ma'ãpé asitẽme âri wẽ na!

² Ma'ãpé ĩwi ai'rã sipi'ra tõ, te robzépata ré, ĩ'madâ'â tõ da hã. Ma'ãpé we ai'u'rata nhi'ese, te ãma i'ai'mahârâzé wapari da hã, waptu na we ãma ĩzada'âbâ da hã.

³ 'Re ĩhâimana mono zé, te atãma na te te ĩwi sina ti'awi, romnhizé atãma na 're isi'utõrĩ mono ne. Duré ĩhi norĩ hã te pré'a ne te te 're ĩhâiba wa'ro pese.

⁴ Ĩpẽ'ẽ 'remhã, duroire 'ré wa, da te 're sihâri za'ra mono wa, dapara na da te oto 're iwati'i za'ra mono ne, wa 're ĩhâimana. Tahawa, duré wa ĩsa na 're ĩpo're simrami pese.

⁵ Ĩwazidi 'rãihâ na 're ĩwazidi mono wa, wa ĩhâiba hâi ré si, duré ĩhi ré si nhamra.

⁶ Wa hã, prorotore rop si 're irosa'wari mono ãma 're ihâimana za'ra mono ne hã wa ĩhâiba. Duré prorotore, danhorõwa, da te 're irẽme za'ra mono wa, oto ãma 're isõrõwa za'ra mono ne, wa wa hã ĩhâiba.

⁷ Ĩnhotõ waihu'u õ di. Sire, 'ri nhisiwi siwaprosi isam ne, wa 're ĩhâimana.

⁸ Ĩnhitob'ru norĩ hã te bâtâ bâre ĩ'ãma 're wa'ẽi u'âsi za'ra. Duré te te ĩ'ãma 're iwasété za'ra mono norĩ, te ĩnhisi hã te te siwi 're wabzuri, tô õ norĩ te te ĩma 're rob'manharĩ wasété za'ra mono da hã.

^9-10 Ĩzada 're i'asiti'rui mono zarina, te 'ru'a ĩsazém na hã ĩma 're hâimana. Ĩtõmo'u hã te duré 're siwazari zahuré, marĩ te 're ihâsi mono me. A hã ĩ'âri ne, duré asisiti romhâ na ĩme ne, ma tô asiwi ĩwẽ'õ pe.

¹¹ 'Re ĩhâimana mono zé hã mara da, oto 're irowawã mono ne, te 're hâimana. Duré du 're 'ré za'ra mono wa, 're imre za'ra mono ne, wa 're ĩhâimana.

¹² Tane nherẽ, a hã Uburé Danhib'apito, asimi'madâ'âzém hawi te õne u'â 're ida'a'madâ'â mo. Tahawa, te za danhihudu sidâpâsi we 're idapoto za'ra mono hã ai'ãma 're sipo're pu'u u'âsi za'ra.

¹³ Ma'ãpé aiwahutu, Siã ãma aiwamri da. E marĩ wa. Ãma i'aiwamrizé bâdâ wisi wa oto, i'uwaibaba uptabi hã.

¹⁴ 'Ri nho'õmo na 'rizé ẽtẽ za'ra mono, siprum na 're sa'wari mono nherẽ, asib'a'uwẽ norĩ ma sawi u'âsi za'ra di. Te duré 'ri sipru za'wari 'rãihâ na ãma 're siwamri za'ẽtẽ u'âsi za'ra.

¹⁵ Dawamri mono bâ 're idahâimana za'ra mono hã te za Uburé Danhib'apito nhisi hã te te siwi 're wazéb za'ra. Duré uburé ti'ai mono bâ danhib'apito norĩ te za isiptetezém na 're ihâimana mono na hã te te siwi 're wazé.

¹⁶ Uburé Danhib'apito, niwa apâ Siã 'ri te te wahutu wamhã, te za ta hã waihu'u pese na 're ihâimana mono na hã te te dama 're hâi'ré.

¹⁷ Ta hã te za tinhib'a'uwẽ upari ãna romnhiwasi 're ihâimana za'ra mono norĩ mreme hã te te 're awapari. Duré isimirowaptẽrẽ za'ra zé, te te tiwi 're i'awẽ'õ mono da hã mare di za.

¹⁸ Ãne na da te ãma irob'ui'éré da si iwẽ hã, wanhihudu norĩ Uburé Danhib'apito te te 're i'a'manharĩ mono zé hã te te 're waihu'u za'ra mono da, duré romhutu'õ za 're ipoto za'ra mono norĩ, tinho're na ãma 're wata za'ra mono da hã!

¹⁹ Uburé Danhib'apito, hâimo uptabi ro iwazéb zahi wa, 're isãmra mono zé hâiwa hawi, ma tô ti'ai u hã we te te 're rob'madâ'â,

²⁰ da te 're iwaibui mono norĩ wazidi te te 're awapari mono wa, te te 're sani za'ra mono da, 're dâ'â za'ra mono da, sada 're idahâimana za'ra mono norĩ hã.

^21-22 Ãne wa, Uburé Danhib'apito, Siã ãmamhã te za da te dasima 're wasu'u wẽ za'ra. Te za duré ãma 're dawata za'ra, Zeruzalẽ ãma, dawamri mono bâ a'uwẽ danhib'apito norĩ me 're si'rã'õtõ mono wamhã.

²³ Zahadu ĩhâiba tém na 're ĩhâimana mono ré, ĩnhiptetezé hã ma tô ĩwi waze, 'Re ihâimana u'âsi mono hã. Ma tô duré 're ĩhâimana hutu mono zéb da hã ĩma pisutu.

²⁴ Ĩte 'Re ihâimana u'âsi mono, õne u'â 're i'aihâimana mono, ma'ãpé awa'awi na hã a'â ĩ'âri tõ, ĩsi'ihi wana ré!

²⁵ Romna'rata hawimhã, ti'a norĩ hã hâiwa me ma tô i'manha zahuré, asib'rata na.

²⁶ Ti'a norĩ hã hâiwa me, za si'utõrĩ zahuré nherẽ, a hã te za tane nherẽ, õne u'â 're aihâimana mo. Ti'a norĩ hã hâiwa me, da'uza 're ihâi wasété za'ra mono ne, te za ai'utõrĩ zahuré. A hã, da'uza na da te ãma 're isaprĩ za'ra mono ne, te za ãma isaprĩ zahuré. Tahawa, te za tô oto õ norĩ hã iwabzu.

²⁷ Tane nherẽ, a hã te za tô õhõ u'â 're aihâimana mo, ãma saprĩ ãna 're i'aihâimana mono zém na hã. Duré asibâdâ hã si'utõrĩ waihu'u ãna te za tô 're hâimana u'âsi, õne u'â.

²⁸ Asib'a'uwẽ 'ra norĩ hã romhutu'õmhã te za sima iwẽ na 're hâimana za'ra. Duré ta norĩ nhihudu norĩ hã te za õne u'â asimi'madâ'âzéb 'remhã 're hâimana za'ra.