Ruti 1 - ꞌRe Ihâimana Uꞌâsi Mono Zadawa Wasuꞌu

Elimelequi norĩ hã Moabi ãma ihâimana za'ra zé wasu'u

¹ Izaraéu na ti'ai wa'õtõ nho'õmo nhisi ãma, Mozésihi nhimiroti zarina, da'ãma rowairébé'wa norĩ te te 're da'madâ'â za'ra mono ré, ma tô mra hã da te 're sépata za'ẽtẽ za'ra. Tahawa, Belẽ hawimhã aibâ hã, Zuda na danhipti'a nho'õmo hawimhã, ma tô timro me tineb zahuré. Duré i'ra norĩ te isiré hã tineb zahuré, Moabi na ti'ai wa'õtõ nho'õmo nhisi ãma a'â 're hâimana zahuré mono da.

² Aibâ nhisi hã Elimelequi na, duré imro nhisi hã Noẽmi na. I'ra norĩ nhisi hã Marõ na duré Quiri'õ na. Ã norĩ hã Efrata na 'ri wa'õtõ nhisi hawimhã, Belẽ na 'ri nho'õmo nhisi 'ratamhã, Zuda ãma hã. Moabi u ma tô ai'aba'ré, tame 're hâimana za'ra mono da a'â.

³ Tame 're hâimana za'ra mono ré, ma tô Elimelequi hã dârâ. Tahawa, te Noẽmi hã ti'ra norĩ ma siwaprosi oto 're hâimana.

^4-5 Tawamhã i'ra si'aibâ norĩ ma tô oto timro zahuré, moabita norĩ nhipi'õi hâzarutu na. Azarutu hâiba amo nhisi hã Orpa na, duré ihâiba amo nhisi hã Ruti na. Tawamhã tame 're ihâimana za'ra mono zém na 10 na ãma wahub za'ra pari, ma tô Marõ norĩ hã tidâ'â zahuré, Quiri'õhõ me hã. Tahawa, te Noẽmihi si siwaprosi oto 're hâimana, 'ra ãna, duré mro ãna.

Belẽ u apâ te te sina isiri za'ra zé wasu'u

⁶ Nimahã bâtâ na ma tô Noẽmi hã waihu'u, Uburé Danhib'apito tinhib'a'uwẽ te te 're i'apawapto mono zém na hã, amnho 'rãi pese na. Tahawa, ma tô sima robza'ra pese, Moabi hawi tisani'aba norĩ ré, watobro da hã.

⁷ Tahawa, ma tô oto wairé, Zuda u te te sina siri za'ra da. Tane nherẽ, bâdâdi na si'aba'réi ré,

⁸ te Noẽmi hã tisani'aba norĩ ma tinha ãne: — Apâ te za asina isiri 'wa, asa'ru u, ana siré 're aimasisi aba mono da. Ĩma hã Uburé Danhib'apito te za iwẽ na aima 're sõprub u'âsi 'wa. A norĩ wa'wa hã 're ĩpawapto wẽ wa'aba mono ne, duré ĩwi idâ'â zahuré norĩ hã 're ipawapto wẽ wa'aba mono ne, te za Uburé Danhib'apito hã te te 're aipawapto wẽ u'âsi 'wa.

⁹ Wa ai'ãma rosa'rata 'wa, Uburé Danhib'apito aibâ hã te te aima sõmri aba da, aimro té wa'aba da apâ, aihâiba si'uiwa na wa'aba, duré asiré 're aihâimana za'ra wa'aba mono da. Tawamhã Noẽmi ma tô tisani'aba norĩ, sisa'u tob'rata hârâ na irẽme ma sawi zahuré, tãma pâ zahuré da oto. Tane nherẽ, ma tô tiwawa zahuré, wawa 'rãihâ na.

¹⁰ Tahawa, ma tô timaprebaba ma nharĩ zahuré, ãne: — Waneb õ di za apâ. Wa za tô ãma asiré wanem ni, asiré a'uwẽ norĩ 'rata 're wahâimana mono da.

¹¹ Tane nherẽ, Noẽmi ma tô tãma nharĩ zahuré, ãne: — Ĩsani'aba norĩ, apâ te za ane wa'wa. E tihai wa, te bété asima iwẽ wa'wa, ĩsiré ãma ane wa'aba da. E ma tô ĩ'ãma irosa'rata 'wa, apâ za ĩ'ra zahu wa, ta norĩ ãma si aimro wa'aba da hã.

^12-13 Apâ te za tô ane wa'wa, asõrõwa wa'aba u. E tihai wa. Wa hã oto ĩhire. Apâ ĩmro téb zahu da hã maze di. Ĩmro téb da, ĩsi'madâ'â wamhã, duré ã bara na ĩmro da wamhã, duré ĩ'ra da wamhã apâ, e te aré 're isapari zei wa'aba mo, iprédub zahuré zéb u, ãma aimro wa'aba da hã. Maze di. Aré 're sapari zei wa'aba mono õ di. Uburé Danhib'apito hã ma tô ĩzada tihâiba. Tahawa, wa hã ĩma rosa'rata zé uptabi di. E tihai wa. A norĩ wa'aba zama ĩsiré robzépata wa'aba wa.

¹⁴ Tawamhã ãne wa, ma tô duré isani'aba norĩ hã tiwawa na sahu zahuré, wawa 'rãihâ na. Tawamhã Orpa hã ma tô sisa'u timaprewa hã sawi, tob'rata hârâ na. Taha pari, te oto mo, tisiré a'uwẽ u. Rutihi si te isa'u za.

¹⁵ Morĩ za'u si, te Noẽmi hã Rutihi ma tinha, tisani'aba ma: — Ma'ãpé 'madâ'â. Asidaimama mro hã apâ te oto mo, tisiré a'uwẽ norĩ u, duré ihâiba'õ norĩ ãma 're iwata za'ra mono norĩ u hã. Tahawa, azama ma'ãpé apâ isiré aimorĩ, asa'ru u hã.

¹⁶ Tane nherẽ, ma tô Ruti tãma tinha, ãne: — Ĩwi rosawi õ di za, asiré ãma ĩmorĩ tõ da hã. Duré ĩ'ãma rosa'rata õ di za, za te i'airẽmezém na hã. Nimomo aimorĩ da wamhã, wa za tô ãma asiré mo. Duré nimomo 're aihâimana mono da wamhã, wa za wa hã asiré 're ĩhâimana. Asiré a'uwẽ norĩ hã ĩsiré a'uwẽ te za 're hâimana za'ra. Duré Asib'apito ãma wa za wa hã ĩnhib'apito, 'Re ihâimana u'âsi mono ãma.

¹⁷ Nimame atâ'â wamhã, wa za tamemhã wa hã dârâ, atâ'âzéb ãma. Tame te za ĩnherẽ ni za. Ĩdâ'â õ ré, te airẽme da wamhã, Uburé Danhib'apito te te tô ĩ'azâri za. Tihai õ di. Tahawa, te i'airẽme da hã, maze uptabi di.

¹⁸ Ãne wamhã, Ruti hã te te sima irowairébézém na Noẽmi hã te te waihu'u wamhã, niha hã te te tãma nharĩ zahu õ di oto.

¹⁹ Tawamhã ma tô timorĩ na ãma uzusi zahuré oto, Belẽ u. Tawamhã oto simasisi wamhã, 'ri ahâ 're, 're idahâimana za'ra mono norĩ hã ma tô nemo 're dasiwairõtõ, simasisi zahuré wẽ te. Tawamhã ma tô pi'õ norĩ hã ãma sisadanharĩ za'ra, ãne: — E õ hã Noẽmi hã.

²⁰ Tawamhã Noẽmi hã te te sina dawapari wamhã, ma tô dama si'mahâ, ãne: — Noẽmi na hã asiwi ĩ'mahârâ aba tõ, Robzezém na hã. Mara na si te za oto asiwi 're ĩ'mahârâ aba mo, Robzé na ĩnhisi tém na si. E tihai wa. 'Re ihâimana u'âsi mono hã danhipai u iwaihu'u pese uptabi hã ĩhâimanazé isé hã te te ĩma pisutu wa.

²¹ Ã hawi ĩwatobro wamhã, uburé te tiha hã ĩma tihâimana za'ra. Tazahã Uburé Danhib'apito ma tô ãne hã ĩma 'manha, ĩnhiptihai ãna we apâ te ĩsina siri da. E tihai wa, ma tô bété nasi asiwi ĩ'mahârâ 'wa, Robzezém na hã. 'Re ihâimana u'âsi mono hã danhipai u iwaihu'u pe hã ma tô ĩma pisutu, robzépatazé hã, duré robzei'õ zépatazéb zama.

²² Ãne Noẽmi te te sina isirizé wasu'u hã, Moabi na darom nhisi hawimhã, Rutihi me, isani'wa hã, moabita norĩ nhipi'õ. Amnho itehâri na da te dasima ãma isãna'rata za'ra zém na ma tô aimasisi zahuré, Belẽ u hã oto.