Roma 9 - ꞌRe Ihâimana Uꞌâsi Mono Zadawa Wasuꞌu

Izaraéu nhihudu norĩ, 'Re ihâimana u'âsi mono te te sima 're i'apisutu mono zé wasu'u

¹ Tô sena, wa za aima rowasu'u za'ra wa'wa. Wa hã Cristuhu te, 're ĩmorĩ wa, 're ĩzadawa nhipese mono õ di. 'Re ihâimana u'âsi mono pẽ'ẽzani te te ĩma iwaihu'uzéb zarina, duré 'râwi ĩpẽ'ẽ na te ĩsi'ãma 're irosa'rata mono zéb zarina, wa tô waihu'u, dama 're ĩzadawa nhipese mono õ na hã.

^2-3 Ĩsiré zudeu norĩ ãma hã, ãma 're ĩpẽ'ẽzé uptabi za'ra mono di, Cristu hã te te siwi 're wẽ'õ za'ra mono wa. Tahawa, te duré ĩwi 're robzei'õ pese, ĩpẽ'ẽ 'remhã. Ta norĩ ãma 're ĩpẽ'ẽzé uptabi za'ra mono wa, wa aré te ĩsima 're rosa'rata u'âsi ĩpẽ'ẽ na, 'Re ihâimana u'âsi mono ma, ĩsipisutu da, i'upana za'ra te te 're ĩwẽ'õ mono da, duré Cristuhu nhiti, i'upana 're ĩhâimana u'âsi za'ra mono da. Ãne hã 'Re ihâimana u'âsi mono hã te te ĩma 'manharĩ dai õ nherẽ, wa taré ĩsiwaihu'u, ĩsiré zudeu norĩ ãma 're ĩpẽ'ẽzé uptabi za'ra mono zém na. Ãne na, wa tô aima ĩsiwasu'u za'ra wa'wa, 're ĩzadawa nhipese mono õ na hã.

⁴ Ta norĩ hã 'Re ihâimana u'âsi mono nhimipisudu, te 're hâimana za'ra. Ta norĩ ãma, ma tô 're 'ra za'ra, 'Re ihâimana u'âsi mono hã. Ta norĩ ma si, ma tô rowa'a na aré i'rata 're sãmra za'ra 'râwi, iwaihu'u pese zé hã duré ihâimana wẽ zé hã te te waihu'u za'ra da. Simisutu siré, ãma 're hâimana u'âsi za'ra mono da, ma tô duré marĩ iwẽ hã te te tãma 're apisutu. Isimiroti na Mozési te te irob'ui'érézé hã ma tô duré tãma sõmri za'ra. Ta norĩ ma, ma tô duré 're siwaihu'u za'ra, i'uwaibaba si ãma 're iwata za'ra mono zéb da hã. Ta norĩ ma, ma tô duré ahâ na te te tãma 're aropisutu, zudeu norĩ ma, za te te tãma ãma 're i'a'uwaimrami mono zém na hã.

⁵ Wahi'rata norĩ nhihudu uptabi, te ta norĩ hã 're hâimana za'ra, dama ipire uptabi za'ra norĩ nhihudu. Cristu hã zudeu hâiba na, ma tô podo, ti'ai ãma. Cristu hã ta hã, 'Re ihâimana u'âsi mono, uburé marĩ hã te te 're i'ab'madâ'â mono. Taha ãma uburé 're wawata u'âsi za'ra wa'aba mono. Tô sena, wa ãne na aima ãma rowasu'u za'ra wa'wa.

⁶ E tawamhã, Izaraéu nhihudu norĩ hã Cristu te te siwi 're wẽ'õ za'ra mono wa, te te tãma ãma 're a'uwaimrami mono õ di, 'Re ihâimana u'âsi mono, te te tãma 're iropisutu za'ra mono zém na hã. Ma tô te te tãma ãma 're a'uwaimrami, tô. Izaraéu nhihudu norĩ hã, 'Re ihâimana u'âsi mono nhimipisudu hã aihĩni 're hâimana za'ra mono õ di, isib'a'uwẽ uptabi, 're nomro mono da.

⁷ Abra'ãhã nhihudu norĩ hã uburé pese 'Re ihâimana u'âsi mono 'ra na 're hâimana za'ra mono dai õ di. Duréihã 'Re ihâimana u'âsi mono hã ma tô ãne na Abra'ãhã ma ropisutu, romhâ ré: “Izaquihi nhihudu norĩ si, te za ĩnhib'a'uwẽ uptabi hã 're hâimana za'ra.” Ãne ma tô tãma waihu'u siro, 'Re ihâimana u'âsi mono hã.

⁸ Tahawa, Abra'ãhã nhihudu mono norĩ hã 'Re ihâimana u'âsi mono 'ra, aihĩni 're inomro mono õ na, te wasu'u ã hã, duréihã Abra'ãhã ma, 'Re ihâimana u'âsi mono te te iwaihu'uzém na. Abra'ã hã 'Re ihâimana u'âsi mono nhimiropisudu hã te te ãma isaze ne, tane duré isimiropisutu na, da te 're isaze za'ra mono norĩ si, te za Abra'ãhã nhihudu ne oto 're dahâimana za'ra.

⁹ Duréihã 'Re ihâimana u'âsi mono hã Abra'ãhã ma, te te iropisutuzé hã, ãne isimiroti wasu'u hã: “Wahub amo na, wa za duré we atẽme wi, tô ã a'amo za duré iwa iwaptã'ãzém na. Tawamhã apâ we atẽme ĩwisi õ ré, te za Saraha ma i'ra podo, aibâ na.” Ãne duréihã Abra'ãhã ma, 'Re ihâimana u'âsi mono te te iropisutuzé hã.

¹⁰ Tawamhã Saraha 'ra hã ma tô tiprédu oto, Izaqui hã. Ta hã wahi'rada. Prédu wamhã, ma tô timro, Rebecaha ãma. Ta hã ma tô duré ti'ra, i'ra maparane isi'ubza hã, aibâ zahuré hã.

^11-12 Tane nherẽ, idi'i 're, zahadu hâimana zahuré nherẽ, duré marĩ iwẽ hã te te waihu'u zahuré õ nherẽ, zahadu marĩ iwasédé hã te te duré waihu'u zahuré õ nherẽ, ma tô ãne 'Re ihâimana u'âsi mono hã tãma waihu'u siro, Rebecaha ma: “Idub'rada hã te za tinoi ma wapu na 're hâimana.” Ãne ma tô 'Re ihâimana u'âsi mono hã ino si sima pisutu, tidub'rata ma, pire na 're hâimana mono da. E marĩ hã te te 're i'manharĩ wẽ zahuré mono zéb zarina, ma tô ino si sima pisutu, 'Re ihâimana u'âsi mono hã. Mare di. Taha wab õ di. Si'uihâ na te te sima iwẽzéb uwaibaba, ma tô sima pisutu, ino si.

¹³ Ãne na hã 'Re ihâimana u'âsi mono zadawa 'mahârâ'wa hã ma tô imreme na rob'ui'éré, ibaihâ na hã: “Zacoho si, ĩma sawi di. Ezauhu si hã te ĩsima wẽ õ di.” Ãne 'Re ihâimana u'âsi mono, si'uihâ na te te sima iwẽzéb zarina, Zaco te te sima ipisutuzé hã, idub'rata upana.

¹⁴ Ãté ãne na te za asima 're irosa'rata za'ra wa'aba mo: “'Re ihâimana u'âsi mono hã te te sima iwẽzéb zarina, ino si te te sima ipisutu na hã ma tô ãma upa. I'uwaibaba õ di.” Ãne na hã asima ãma 're rosa'rata za'ra wa'aba mono õ di za. I'uwaibaba si te te dama ãma 're a'uwaimrami u'âsi, 'Re ihâimana u'âsi mono hã. Te te dama ãma 're a'upai mono õ di.

¹⁵ Duréihã Mozésihi ma, ma tô ãne na siwasu'u: “Ni'wam norĩ ãma 're ĩpẽ'ẽzé za'ra mono da, te ĩsima 're wẽ za'ra mono wamhã, wa za tô ãma 're ĩpẽ'ẽzé za'ra, ãma 're ĩsiwãrĩ za'ra mono da, ta norĩ ãma hã. Duré ni'wam norĩ ãma 're ĩpẽ'ẽzé za'ra mono da, te ĩsima 're wẽ za'ra mono õ wamhã, ãma 're ĩpẽ'ẽzé za'ra mono õ di za tô, ta norĩ ãma hã, te 're apawapto mono da.” Ãne Mozésihi ma, isiwaihu'uzé hã, 'Re ihâimana u'âsi mono hã.

¹⁶ Tahawa, da te dasima 're iwẽ za'ra mono zéb zarina, te te 're da'apisutu mono õ di, da'ãma 're ipẽ'ẽzé mono zém na hã, 'Re ihâimana u'âsi mono hã. Duré dasi'uihâ na sô 're idasiwasutu za'ra mono na, te te 're da'apisutu mono õ di, da'ãma 're ipẽ'ẽzé mono zém na hã. Si'uihâ na te te sima 're ida'awẽ mono zéb zarina si, te za tô da'ãma 're pẽ'ẽzé, da'ãma 're isiwãrĩ mono zéb da hã.

¹⁷ Duréihã ma tô Mozési hã ãne na ãma rob'ui'éré, 'Re ihâimana u'âsi mono hã apito Fara'oho ma te te irowasu'uzém na, ãne: “Wa hã wa tô aipisutu, dama asi'apito da. Wa tô duré nasi ai'rãnhito, asimirosa'rata nhiptete na aihâimana mono da, a'â. Wa tô duré nasi aima rob'manharĩ wasété, ĩnhimiwaihu'u pese zém na, da te 're ĩwaihu'u za'ra mono da, duré daro mono bâ ĩnhisi na, da te 're ĩwaihu'u pese za'ra mono da oto.”

¹⁸ Tahawa, 'Re ihâimana u'âsi mono hã ni'wam norĩ ãma 're pẽ'ẽzé za'ra mono da, te te sima 're wẽ za'ra mono wamhã, te za tô ãma 're pẽ'ẽzé za'ra, ãma 're siwãrĩ za'ra mono da. Duré te te sima 're ida'awẽ mono zéb uwaibaba, te za te te 're da'a'rãnhito, danhimirosa'rata wasété nhiptete na a'â 're dahâimana za'ra mono da.

'Re ihâimana u'âsi mono, te te sima 're ida'awẽ mono zéb zarina si, marĩ hã te te dama 're i'apisutu mono zé wasu'u

¹⁹ Ãté ni'wam norĩ hã ãne wa'rãmi te za te te ĩma 're nharĩ za'ra, asiré 're aihâimana za'ra wa'aba mono norĩ hã. Ãté ãne te za ta norĩ hã te te ĩma 're nharĩ za'ra: “'Re ihâimana u'âsi mono hã danhimirosa'rata wasété nhiptete na a'â 're dahâimana za'ra mono da, te te 're da'a'rãnhito mono wamhã, ãne wamhã, e niha te za te te siwi 're da'awẽ'õ. Te te siwi 're da'awẽ'õ waihu'u mono õ di za. E 'wa hã, te 'Re ihâimana u'âsi mono nhimipisutu da, hâimana nhiptete na 're hâimana. Robaba di. Ni'wai õ di.” Ãté, ãne te za ni'wam norĩ hã te te ĩma 're nharĩ za'ra, te te 're waihu'u za'ra mono õ nherẽ.

²⁰ E a norĩ wa'wa hã 'Re ihâimana u'âsi mono ma, aipire za'ra wa'aba bâ, te za ãne na ĩma 're inharĩ za'ra wa'aba mo. Piza na zé 'manharĩ hã, e ti'manharĩ'wa te za sina sadanharĩ za'ra, ãne: “E marĩ da, ma tô ãne iwa'ab'manha.” Ãne na te te sina sadanharĩ waihu'u za'ra õ di za.

²¹ I'manharĩ'wa hã te te sima iwẽzéb uwaibaba si, te za zé hã te te 're ab'manharĩ, piza na. Zé hã te te su pese wamhã, misi te za oto sada ub'rã. Tawamhã te za sima rosa'rata, piza maparane te te sima 'manharĩ da, ãma. Tawamhã te te i'manharĩ 'rada hã, wẽ uptabi na te za 'manha, i'madâ'â ze da hã. Duré ihâiba amo hã si'aba'ré na te za 'manha, wẽ prã na, marĩ da si 're hâimana mono da, taré.

²² Tane te za duré 'Re ihâimana u'âsi mono hã wa'manharĩ'wa hã marĩ hã te te wama 're apisutu, zé 'manharĩ'wa ne. Te te sima 're iwẽ mono zéb zarina, te za uburé marĩ hã te te dama 're apisutu, iwẽ hã duré iwẽ prã hã. Ta hã te te sima 're wẽ u'âsi, tiwaihu'u pese na dapo're'õ norĩ hã te te 're ahâ za'ra mono da, taha zarina isimihâ nhiptetezém na da te dasina 're waihu'u za'ra mono da. Tane nherẽ, te te siwi 're i'awẽ'õ pese mono norĩ ãma hã, 're wa'a su'u mono õ di, za te te 're ida'uprosi za'ra mono norĩ ãma hã.

²³ Ãne hã ma tô duré te te sima 're wẽ, pire na 're ihâimana wẽ uptabi mono zém na, dama 're siwaihu'u mono da. Uburé wa'ãma 're ipẽ'ẽzé mono zéb zarina, wa'ãma 're isiwãrĩ za'ra mono norĩ ma, ma tô ãne na wama 're siwaihu'u, 'Re ihâimana u'âsi mono hã. Wa norĩ hã ma tô oto te te 're wa'apisutu siro, rowẽ uptabi ãma i'rata 're wahâimana u'âsi za'ra mono da.

²⁴ Wa norĩ hã ma tô 'Re ihâimana u'âsi mono hã te te 're wa'apisutu, isib'a'uwẽ uptabi hã oto 're wanomro mono da. E 'wam norĩ hã tawamhã, 'Re ihâimana u'âsi mono te te 're i'apisutu mono norĩ hã. Wa norĩ hã zudeu norĩ hã aihĩni õ nherẽ, duré zudeu'õ norĩ hã aihĩni õ nherẽ, ma tô wasiwazari te te 're wa'apisutu, isib'a'uwẽ oto 're wanomro mono da, wasiré.

²⁵ Duréihã 'Re ihâimana u'âsi mono zadawa 'mahârâ'wa hã ma tô imreme na rob'ui'éré, Ozéia na isisi hã. Zudeu'õ wasu'u na ma tô ãne na rob'ui'éré: “Ĩnhib'a'uwẽ'õ na aré 're inomro mono norĩ hã, wa za oto ĩnhib'a'uwẽ na te 're sisi za'ra. Aré te 're isawi za'ra mono õ norĩ hã, wa za oto ĩma isawi pese na te 're waptẽrẽ za'ra.

²⁶ Tirob ãma 're si'ubumroi mono ré, wa tô aré te tãma 're nharĩ za'ra, ãne: A norĩ wa'wa hã ĩnhib'a'uwẽ'õ na te 're aihâimana za'ra wa'aba mo. Tane nherẽ, tame 're si'ubumroi mono ré, wa za oto ĩ'ra na te 're sisi za'ra, wa hã 'Re ĩhâimana u'âsi mono 'ra na.”

^27-28 Izaia hã ma tô duré ãne na ãma rob'ui'éré, Izaraéu nhihudu norĩ ãma hã: “'Re ihâimana u'âsi mono hã Wanhib'apito hã te za sa'ẽtẽ da'ahâ za'ra waptu na, daro mono bâ dawasété na te te 're ida'awaihu'u mono zéb zarina. Tahawa, Izaraéu nhihudu norĩ hã â poré zaihâ na supara 're isimi'wara mono ne, ahâ uptabi nherẽ, te za umro na te te 're anho'reptu, 'Re ihâimana u'âsi mono hã.”

²⁹ Izaia hã ma tô duré ãne na rob'ui'éré: “Wanhib'apito hã danhipai u isiptete uptabi, te 're hâimana. Õ hã uburé wahi'rata norĩ hã zudeu norĩ hã te te wawi 're a'uprosi mono 'wa'âhã, wa aré wasiré zudeu norĩ hã 're wasi'utõrĩ pese, Sodoma ãma uburé idasi'utõrĩ ne, duré Gomora ãma idasi'utõrĩ ne. Tane nherẽ, ma tô ni'wam norĩ ãma tipẽ'ẽzé za'ra, te te sõ'reptu za'ra da, uburé si'utõrĩ tõ da, wasiré zudeu norĩ hã.”

Zudeu norĩ hã Cristu te te siwi 're iwẽ'õ za'ra mono zé wasu'u

³⁰ E marĩ te wama wasu'u za'ra, tawamhã, ã hã. E niha, wa za tawamhã ãma waihu'u za'ra ni, ãhã wasu'u na hã. Ãne, wa za ãma waihu'u za'ra ni. Zudeu'õ norĩ hã 'Re ihâimana u'âsi mono, iwasédé hã te te ãma 're i'ab'madâ'â mono õ zarina, te te 're iwẽsãmri za'ra mono zéb da hã, te te aré sô 're rob'ruiwapari za'ra mono õ nherẽ, ma tô te te 're awẽsãmri, taré te te 're isaze za'ra mono zém na si nherẽ.

³¹ Tane nherẽ, Izaraéu nhihudu norĩ hã 'Re ihâimana u'âsi mono nhimiroti 'rata na Mozési te te irob'ui'éré hã te te 're i'madâ'â pese za'ra mono na, 'Re ihâimana u'âsi mono, iwasédé te te oto ãma 're ab'madâ'â tõ mono da, duré taha zarina te te 're awẽsãmri mono da, te te sima ãma 're aroti mono newa, ma tô ta norĩ hã taré sô 're si'wapé za'ra, te te 're i'awẽsãmri mono zéb zô. 'Re ihâimana u'âsi mono hã, iwasédé hã te te ãma 're i'ab'madâ'â mono õ zarina, te te 're iwẽsãmri za'ra mono zéb da hã, te te sina tãma 're uwaimrami za'ra mono õ di, ta norĩ hã.

³² E marĩ wa, te te sina tãma 're uwaimrami za'ra mono õ di. 'Re ihâimana u'âsi mono te te 're isazei pese za'ra mono zém na si, te te 're iwẽsãmri za'ra mono zéb da hã, 're si'madâ'â za'ra mono õ wa, 'Re ihâimana u'âsi mono nhimiroti 'rata na rob'ui'éré na si 're si'madâ'â ze za'ra mono wa. Cristuhu ãma, wa za oto ẽne hã aima ãma simiré'é za'ra wa'wa. Ẽtẽ tõmo wawẽ hã bâdâdi wa, 're sa'wari mono wa, te za te te 're da'marõpãrĩ za'ra. Tahawa, te za 're dasirẽme za'ra. Tane duré, zudeu norĩ hã ma tô Cristu te te siwi 're iwẽ'õ za'ra mono zém na si'uihâ na sima 're simiza'repese za'ra, wedepo'o nhonhi'rãmi na dazada idâ'âzé hã taré newa, Cristu hã da te 're isaze za'ra mono zém na, 'Re ihâimana u'âsi mono te te 're ida'anho'reptui mono õ newa.

³³ Duréihã Izaia hã ma tô ãne na ãma rob'ui'éré, 'Re ihâimana u'âsi mono mreme na: “Ma'ãpé, ĩwapari pese za'ra wa'aba. Zeruzalẽ u, wa za ni'wa hã satõ, Siã na sa'a nhisi u. Ẽtẽ tõmo wawẽ hã bâdâdi wa, dawi 're isa'wari mono hã, te te 're da'marõpãrĩ za'ra mono wa, 're idasirẽme za'ra mono ne, 'Re ihâimana u'âsi mono 'rata 're idanomro u'âsi mono zé hã da te dasina 're uwaimrami za'ra mono õ di za, da te dasiwi 're wẽ'õ pese za'ra mono wa, 'Re ihâimana u'âsi mono Zeruzalẽ u te te isatõrĩ hã. Tane nherẽ, ni'wam norĩ hã te te sina 're umnhasi za'ra mono wamhã, taré te te sina 're umnhasi baba za'ra mono õ di za. Iwẽ hã te za tô te te tãma ãma 're a'uwaimrami, 'Re ihâimana u'âsi mono hã. Tahawa, tãma 're rowẽ u'âsi za'ra mono di za.” Ãne ma tô duréihã Izaia hã ãma rob'ui'éré siro, Cristu za da te dasiwi iwẽ'õzém na hã.