Roma 6 - ꞌRe Ihâimana Uꞌâsi Mono Zadawa Wasuꞌu

'Re idanomro mono zép té wasu'u, Cristuhu siré

¹ 'Re ihâimana u'âsi mono hã, simizawi pese uptabi di. Te wa'ãma 're pẽ'ẽzé u'âsi. Tahawa, wawasédé hã wa te 're 'manharĩ za'ra mono nherẽ, tinhimizawizé hã te te wawi 're azawi mono õ di. Wawasédé, wa te 're i'manharĩ za'ra mono zé hã, te duré te te wama 're apari. E tawamhã, wawasédé, wa te 're i'manharĩ za'ra mono zé hã te te wama 're apari mono nherẽ, wa za bété wawasédé hã duré apâ wa te 're 'manharĩ u'âsi za'ra, apâ te te duré wama 're apari zahu mono da. E taha da, wa za wawasété u'âsi 're wahâimana za'ra.

² Mare di. 'Re dadâ'â za'ra mono wa, marĩ zô, da te oto 're irob'ruiwapari za'ra mono õ ne, wa norĩ hã wawasété zô, wa te oto 're rob'ruiwapari za'ra mono õ di za. Tahawa, wawasédé hã wa te duré 're 'manharĩ zahu za'ra mono õ di za oto.

³ Wa norĩ hã â dawabzuri, wa te 're 'manharĩ za'ra mono wamhã, Cristu Zezusihi siré, 'râwi oto 're iwanomro mono zé, te wasu'u. Isiré oto 're iwanomro mono ne, wa tô duré isiré 're wadâ'â za'ra, ihâiba zu. Ãne hã aima waihu'u pese za'ra wa'aba di.

⁴ Tawamhã â dawabzuri hã oto wa te 're 'manharĩ za'ra mono wamhã, â da te 're iwanhamra mono zé, Cristuhu siré 're iwadâ'â za'ra mono zé, te wa'ãma simiré'é za'ra. Ab're 're, isiré da te 're iwanheme mono zéb zama, te wa'ãma wasu'u za'ra. E marĩ da, wa tô bété Zezusihi siré 're wadâ'â za'ra. Cristu hã dâ'â nherẽ, Imama hã tiwaihu'u pese na te te ihâiwa'utu ne, 're iwanomro mono zép tém na si, oto 're wahâimana za'ra mono da hã, wa tô isiré 're wadâ'â za'ra, wa norĩ hã. Ãne wa'ãma isimiré'é za'ra zé hã te wasu'u.

⁵ Wa norĩ hã Cristuhu siré, wa tô 're wadâ'â za'ra, wawasété zô, wa te oto 're rob'ruiwapari za'ra mono õ wa, 're dadâ'â za'ra mono wa, marĩ zô, da te oto 're irob'ruiwapari za'ra mono õ ne. Ãne hã simisutu ma tô 'Re ihâimana u'âsi mono hã wahâiba na atob za'ra, Cristuhu hâiba tẽme. Duré Cristu hã dâ'â uptabi nherẽ, Imama te te ihâiwa'utu ne, te za duré wa norĩ hã te te 're wa'ahâiwa'utu. Taha na te za duré Cristuhu hâiba tẽme wahâiba na hã atob za'ra, 'Re ihâimana u'âsi mono hã.

⁶ Wawasété na 're iwanomro 'rata mono zé hã, tâibâ oto. Cristu hã wedepo'o nhonhi'rãmi na idâ'â siré, ma tô 'Re ihâimana u'âsi mono hã te te wama 're a'uprosi, 're iwanomro 'rata mono zé hã. Marĩ iwasétére si, wa te wasima 're i'ruiwapari u'âsi za'ra mono zém hawi, te te 're wa'anho'reptui mono da, ma tô te te wama 're a'uprosi, 're iwanomro 'rata mono zé hã. Wawasédé hã wa te 're sahâri waihu'u za'ra mono ãna, 're wanomro mono tõ da, ma tô te te wawi 're a'uprosi. Ãne hã wama waihu'u pese za'ra di.

⁷ 'Re dadâ'â za'ra mono wamhã, dawasédé hã da te 're 'manharĩ waihu'u za'ra mono õ di oto. Tane, 're idâ'â za'ra mono norĩ ne, Cristuhu siré 're wadâ'â za'ra mono wa, wawasédé hã wa te 're 'manharĩ u'âsi za'ra mono õ di za oto.

⁸ Tahawa, Cristuhu siré 're wadâ'â za'ra mono wa, wa za wa te wasina 're umnhasi za'ra tô sena na, za isine 're iwahâiwa'utu za'ra mono zéb da hã, duré isiré za 're iwahâimana u'âsi za'ra mono zém na hã.

⁹ Ãne na, wa tô duré wasina waihu'u pese za'ra ni. Cristu hã dâ'â uptabi nherẽ, 'Re ihâimana u'âsi mono te te hâiwa'utu wa, tahawa, niwamhã tidâ'â na te te sahu õ di za, idâ'âzé hã tãma siptete õ wa oto.

¹⁰ Dâ'â wamhã, misi haré ma tô dawasété nhiptetezé hã uprosi. Tahawa, oto dâ'â parimhã, Timama ma, te oto 're hâimana u'âsi, Cristu hã.

¹¹ Tahawa, te za ãne na asi'ãma 're irosa'rata za'ra wa'aba mo: “'Re dadâ'â za'ra mono wa, marĩ zô, da te oto 're irob'ruiwapari za'ra mono õ ne, wawasété zô, wa te oto 're rob'ruiwapari za'ra mono õ di za, wa norĩ hã. 'Re ihâimana u'âsi mono ma, wa te oto 're iromhuri za'ra mono da si, wa za oto 're wahâimana za'ra. Cristu Zezusihi ãma si, wa za oto 're wahâimana za'ra.” Ãne si te za asima ãma 're irosa'rata za'ra wa'aba mo.

¹² 'Râwi marĩ na asima 're irosa'rata wasété za'ra wa'aba mono zé hã 're 'madâ'â za'ra wa'aba mono tõ da, te za aiwasété wi asina 're asiptete za'ra wa'aba mo, aipẽ'ẽ na.

¹³ Duré marĩ iwasédé hã 're 'manharĩ za'ra wa'aba mono tõ da, te za aihâiba hã 're i'madâ'â pese za'ra wa'aba mo, aihâiba hawim na marĩ 're 'manharĩ za'ra wa'aba mono tõ da. 'Re atâ'â za'ra wa'aba mono wa, 'Re ihâimana u'âsi mono te te 're i'aihâiwa'utu za'ra wa'aba mono ne, te 're aihâimana za'ra wa'aba mo, 're anomro aba mono zép tém na hã. Tahawa, te za 'Re ihâimana u'âsi mono ma si, 're asisõmri u'âsi za'ra wa'aba mo, misi haré. Taha ma si, te za aihâiba hã duré 're isõmri u'âsi za'ra wa'aba mo õne haré, marĩ iwẽ si ãma 're i'manharĩ za'ra wa'aba mono zéb da hã.

¹⁴ 'Re ihâimana u'âsi mono nhimiroti 'rata na rob'ui'éré hã asina tãma ãma 're i'uwaimrami za'ra wa'aba mono zéb zarina, aiwasédé hã te te oto ai'ãma 're ab'madâ'â aba mono tõ da, 're asi'madâ'â za'ra wa'aba mono õ di za. Tinhimizawi pese zém na si, ma tô 'Re ihâimana u'âsi mono hã ai'ãma 're pẽ'ẽzé za'ra wa'wa, aiwasété na 're aihâimana za'ra wa'aba mono nherẽ. Taha zarina si, ma tô te te 're aiwẽsãmri za'ra wa'wa. Tahawa, te za aiwasété wi asina 're asiptete u'âsi za'ra wa'aba mo oto.

'Re ihâimana u'âsi mono ma, 're idasisõmri za'ra mono zé wasu'u

¹⁵ Tawamhã ãté ãne te za asima 're inharĩ za'ra wa'aba mo: “'Re ihâimana u'âsi mono nhimiroti na Mozési te te irob'ui'érézé hã wa te 're i'madâ'â pese za'ra mono zéb zarina, te te sima wa'ãma 're aroti mono õ di, taha zarina wawasédé hã te te oto wa'ãma 're ab'madâ'â tõ mono da, taha zarina te te 're wa'awẽsãmri mono da. Tinhimizawi pese zéb zarina si, ma tô te te 're wa'awẽsãmri, wawasété na 're wahâimana za'ra mono nherẽ, wa'ãma 're pẽ'ẽzé za'ra mono wa. Tahawa, wa za wawasédé hã duré apâ wa te 're 'manharĩ u'âsi za'ra õne u'â, 'Re ihâimana u'âsi mono hã dawasété nherẽ, simizawi pese wa.” Ãne na asima 're rosa'rata za'ra wa'aba mono õ di za. Tô'ã.

¹⁶ A norĩ wa'wa hã dama 're romhuri za'ra wa'aba mono da, aihâiba hã dama 're sõmri za'ra wa'aba mono wamhã, taha nhimiwada'uri na si, te za tô 're aihâimana za'ra wa'aba mo. Ãne hã aima waihu'u pese za'ra wa'aba di. Tane, aihâiba hã aiwasété ma, 're sõmri za'ra wa'aba mono wamhã, te za tô ãma 're asiwasété za'ra wa'aba mo. Taha zarina te za atâ'â u'âsi ne, 're aihâimana za'ra wa'aba mo, aipẽ'ẽ 're, 'Re ihâimana u'âsi mono nhiti. Tane nherẽ, 'Re ihâimana u'âsi mono ma, aihâiba hã 're sõmri za'ra wa'aba mono wamhã, taha nhimiwada'uri na si te za 're aihâimana za'ra wa'aba mo. Tawapsi te za oto te te 're aiwẽsãmri za'ra wa'wa.

¹⁷ Aiwasété na si, ma tô aré 're aihâimana u'âsi za'ra wa'aba mo, 're sahâri waihu'u za'ra wa'aba mono ãna. Tane nherẽ, ãne 're aihâimana za'ra wa'aba mono õ di oto. 'Re ihâimana u'âsi mono te te aima 're iroti za'ra wa'aba mono zép si, te oto 're i'madâ'â pese za'ra wa'aba mo. Tahawa, 'Re ihâimana u'âsi mono ãma si, wa za 're wawata za'ra.

¹⁸ 'Re ihâimana u'âsi mono hã tinhiptetezé hã ma tô te te aima 're sõmri za'ra wa'wa, aiwasété ãna oto ãma 're anomro aba mono da. Ma tô duré aima si'apito za'ra wa'wa, aiwẽ na si oto tãma 're aihâimana za'ra wa'aba mono da.

¹⁹ 'Re idahâimana za'ra mono zém na, wa tô aima ãma romnhimiré'é za'ra wa'wa, ĩnhimirowasu'u na hã asi'uihâ na sada asimirosa'rata nhiptete waihu'u za'ra wa'aba õ wa. Aihâiba hã aiwasété ma, ma tô 're isõmri za'ra wa'aba mo aré, taha na si 're aihâimana za'ra wa'aba mono da, aihâiba na asina 're aiwasété za'ra wa'aba mono da. Tane nherẽ, aihâiba hã 'Re ihâimana u'âsi mono ma si, te za oto 're isõmri za'ra wa'aba mo, taha nhimiroti na si oto 're aihâimana za'ra wa'aba mono da, aihâimana wẽ uptabi na.

²⁰ Aiwasédé hã 're sahâri waihu'u za'ra wa'aba mono ãna, 're aihâimana za'ra wa'aba mono ré, 'Re ihâimana u'âsi mono te te aima 're iroti za'ra wa'aba mono zéb zarina 're aihâimana za'ra wa'aba mono õ di aré.

²¹ Aiwasété na si 're aihâimana za'ra wa'aba mono ré, e marĩ ma tô aima 're hâimana za'ra wa'wa, 're i'manharĩ za'ra wa'aba mono zé wa'rãmimhã, ãma aima 're irowẽ za'ra wa'aba mono zéb da hã. Robaba di. Taha na asimi'manharĩ wasété za'ra wa'aba zém na ãma 're aséb za'ra wa'aba mono di oto. Ãne si, da te 're 'manharĩ u'âsi za'ra mono wamhã, dapẽ'ẽ 're, dadâ'â u'âsi ne, te za tô 're dahâimana za'ra.

²² Tane nherẽ, 'Re ihâimana u'âsi mono hã tinhiptetezé hã ma tô te te aima 're sõmri za'ra wa'wa oto, aiwasété ãna ãma 're anomro aba mono da oto. Ma tô duré aima si'apito za'ra wa'wa, taha ma si oto 're romhuri za'ra wa'aba mono da. Tahawa, ma tô, tiwi 're asisawi za'ra wa'aba mono ãna, aihâiba hã tãma 're isõmri za'ra wa'aba mo. Taha wa'rãmi te za rowẽ uptabi na i'rata 're aihâimana u'âsi za'ra wa'aba mono zé hã te te aima 're apisutu 'wa oto.

²³ Dawasété na si 're idanomro mono zé wa'rãmi, te za dadâ'â u'âsi ne 're dahâimana za'ra dapẽ'ẽ 're, 'Re ihâimana u'âsi mono nhiti. Wanhib'apito Cristu Zezusihi ãma si 're danomro mono wapsi, te za 'Re ihâimana u'âsi mono hã sõpru wa, te te dama 're apisutu, i'rata 're idahâimana u'âsi za'ra mono zéb da hã, asa tãma 're idasiwa'âbâ za'ra mono zéb zô, sina 're simnhasi mono ãna.