Roma 4 - ꞌRe Ihâimana Uꞌâsi Mono Zadawa Wasuꞌu

Abra'ãhã wasu'u, 'Re ihâimana u'âsi mono te te 're isazei pese mono zém na

¹ E niha wa za tawamhã wa te wasima 're wasu'u 'rãzarõtõ za'ra, Abra'ã wasiré zudeu norĩ hi'rada hã. E niha ihâimanazé hã.

² Ta hã uburé marĩ hã te te 're i'ab'manharĩ wẽ mono na, 'Re ihâimana u'âsi mono, iwasédé hã te te oto ãma 're 'madâ'â mono tõ da, te te sima ãma roti 'wa'âhã, duré taha zarina Abra'ã hã 'râwi tiwẽ na sina 're wata mono 'wa'âhã, te aré tô sena 'râwi sina 're wata. Tane nherẽ, marĩ hã te te 're i'ab'manharĩ wẽ mono na, 'râwi sina 're wata waihu'u mono õ di Abra'ã hã, taha zarina 'Re ihâimana u'âsi mono hã te te sima ãma roti õ wa, iwasédé hã te te oto ãma 're i'madâ'â mono õ zarina, te te iwẽsãmrizéb da hã.

³ Duréihã ibaihâ na ma tô ni'wa hã Abra'ãhã wasu'u na ãma rob'ui'éré, ãne na: “Abra'ã hã 'Re ihâimana u'âsi mono si, ma tô te te sina 're umnhasi u'âsi, te te tãma iropisutuzém na hã. Taha ãma si, ma tô sasõ. Tahawa, ma tô 'Re ihâimana u'âsi mono hã sima ãma roti, iwasédé hã te te oto ãma 're 'madâ'â tõ mono da, duré taha zarina si te te oto wẽsãmri da. Tahawa, tãma wẽ uptabi di, 'Re ihâimana u'âsi mono ma hã.” Ã hã Abra'ã hã, marĩ hã te te 're i'ab'manharĩ wẽ mono na, 'râwi sina 're iwata mono õ zé wasu'u.

⁴ Ni'wam norĩ hã te te dama 're romhuri za'ra mono wamhã, da te 're ipawa'âbâ za'ra mono ré, te 're hâimana za'ra. E sõpru wa, te za taré isib'apito hã rob'uiprazé hã te te tãma 're sõmri za'ra. Mare di. Sõpru wa, te te tãma 're sõmri za'ra mono õ di za. Te te tãma 're iromhuri za'ra mono zé wa'rãmip si, te za te te tãma 're sõmri za'ra, ipawa'â hã.

⁵ Tanei õ di, 'Re ihâimana u'âsi mono hã. Marĩ hã da te 're i'manharĩ wẽ za'ra mono na, te 'râwi 're dasi'madâ'â ze za'ra, taha na si 'Re ihâimana u'âsi mono hã dawasédé hã te te oto da'ãma 're i'ab'madâ'â mono õ na, te te sima da'ãma 're aroti mono newa. Tane nherẽ, te te sima da'ãma 're aroti mono õ di, taha na dawasédé hã te te oto da'ãma 're ab'madâ'â tõ mono da, taha zarina te te oto 're ida'awẽsãmri mono zéb da hã. 'Re ihâimana u'âsi mono hã da te dasina 're umnhasi za'ra mono wapsi, te za te te sina 're da'awẽsãmri, dawasédé hã za oto te te da'ãma 're ab'madâ'â mono õ wa, duré dawasété na 're danomro mono nherẽ, te te 're da'ahâ za'ra mono tõ da.

⁶ 'Re ihâimana u'âsi mono te te sima da'ãma 're aroti mono õ di tô, uburé marĩ hã da te 're i'manharĩ wẽ za'ra mono zéb zarina, dawasédé hã te te oto da'ãma 're i'ab'madâ'â mono õ zéb da hã, taha zarina te te oto duré 're ida'awẽsãmri mono zéb da hã. Da te 're isaze za'ra mono zém na si te oto te te 're da'awẽsãmri tô. Taha zarina, dama 're irowẽ uptabi za'ra mono zém na hã, ma tô Dawi hã ãne na ãma rob'ui'éré, duréihã:

⁷ “Ni'wam norĩ ãma hã, 'Re ihâimana u'âsi mono iwasédé te te oto ãma 're i'a'madâ'â mono õ norĩ ma si hã tãma 're rowẽ za'ra mono di za, iwasété za'ra na oto 're sipo're pu'u mono õ wa.

⁸ 'Re ihâimana u'âsi mono iwasédé hã te te oto ãma 're sa'rata za'ra mono õ wa, tãma 're rowẽ za'ra mono di.”

⁹ Ãne hã, e sihâiwata nhihâri ré 're inomro mono norĩ si, te za rowẽ uptabi na 're nomro. E ã norĩ si, te wasu'u, Dawi hã. Mare di. Sihâiwata nhihâri ãna 're inomro mono norĩ zama, te wasu'u za'ra. Ãne na, wa tô aima waihu'u pari za'ra wa'wa, Abra'ãhã wasu'u na rob'ui'éré hã, duréihã: “Abra'ã hã 'Re ihâimana u'âsi mono si, ma tô te te sina 're umnhasi u'âsi, te te tãma iropisutuzém na hã. Taha ãma si ma tô sasõ. Tahawa, ma tô 'Re ihâimana u'âsi mono hã sima ãma roti, iwasédé hã te te oto ãma 're 'madâ'â tõ mono da, duré taha zarina si te te oto wẽsãmri da. Tahawa, tãma wẽ uptabi di, 'Re ihâimana u'âsi mono ma hã.”

¹⁰ E tawamhã Abra'ã hã sihâiwata nhizâri siromo, ma tô 'Re ihâimana u'âsi mono hã sima ãma roti, te te wẽsãmri da. Mare di. Sihâiwata nhizâri õ ré, ma tô wẽsã.

¹¹ 'Re ihâimana u'âsi mono hã, Abra'ã hã te te sina i'umnhasi pese zém na si, ma tô wẽsã, sihâiwata nhizâri õ nherẽ. Tahawa, sihâiwata nhizâri õ ré, Abra'ã hã, 'Re ihâimana u'âsi mono te te iwẽsãmrizém na hã, te wama wasu'u za'ra, tô sena na uburé da te 're iwaihu'u za'ra mono zéb da hã. Tahawa, Abra'ã hã uburé 'Re ihâimana u'âsi mono, da te dasina 're i'umnhasi za'ra mono norĩ hi'rada, ta hã. Duré sihâiwata nhihâri õ nherẽ, 'Re ihâimana u'âsi mono te te 're i'awẽsãmri mono norĩ hi'rada.

¹² Duré, isihâiwata nhihâri ré norĩ hi'rada, zudeu norĩ hi'rada. E tawamhã sihâiwata nhihâri ré 're hâimana za'ra mono wa, te ta norĩ hi'rada hã 're hâimana, Abra'ã hã. Mare di. Abra'ã hã sihâiwata nhizâri õ ré, 'Re ihâimana u'âsi mono te te isazei pese ne, isine te te 're isazei pese za'ra mono norĩ hi'rata si, te 're hâimana, Abra'ã hã.

Abra'ãhã ma, 'Re ihâimana u'âsi mono te te iropisutuzé wasu'u

¹³ Duréihã 'Re ihâimana u'âsi mono hã Abra'ãhã ma, ma tô ropisutu, uburé danhipti'ai mono bâ te te tãma 're anhomri mono da, isihudu norĩ ma ropibu ma, isihudu sidâpâsi. E isimiroti hã uburé te te 're 'madâ'â pese uptabi mono wa, duré nimahã na marĩ na misi isimiroti na te te upai õ wa, ma tô ãne na tãma ropisutu. Mare di. Taha wab õ di. 'Re ihâimana u'âsi mono te te isazei pese na, te te wẽsãmri wa, ma tô ãne na tãma ropisutu siro.

¹⁴ 'Re ihâimana u'âsi mono nhimiroti 'madâ'â'wa norĩ hã zudeu norĩ hã, isimiroti te te 're i'madâ'â pese za'ra mono zéb zarina, 'Re ihâimana u'âsi mono, ta norĩ ma, uburé danhipti'ai mono bâ te te tãma 're i'anhomri mono da hã, te te ropisutu 'wa'âhã, taré te aré da te 're saze za'ra, 'Re ihâimana u'âsi mono hã. Marĩ dai õ di aré. Taré te aré 'Re ihâimana u'âsi mono hã dama ropisutu, daro hã te te dama 're i'anhomri mono zém na hã. Dama hã, aré marĩ õ di.

¹⁵ 'Re idahâimana wẽ za'ra mono zéb da hã, dasi'uihâ na da te dasima 're ipisutu za'ra mono zé hã dama 're hâimana za'ra mono õ 'wa'âhã, aré da te ãma 're upai waihu'u za'ra mono õ di. Tane, 'Re ihâimana u'âsi mono nhimiroti na Mozési te te irob'ui'érézé hã dama 're hâimana za'ra mono õ 'wa'âhã, aré da te ãma 're upai waihu'u za'ra mono õ di duré. Tane nherẽ, te tô dama 're hâimana, isimiroti na rob'ui'éré 'rada hã. Tahawa, da te 're waihu'u pese za'ra mono nherẽ, da te 're 'madâ'â pese za'ra mono õ wamhã, 'Re ihâimana u'âsi mono te te 're ida'ahâ za'ra mono zé, te wasu'u.

¹⁶ Tawamhã e marĩ hawi, ma tô 'Re ihâimana u'âsi mono hã Abra'ãhã ma ropisutu, isihudu norĩ ma ropibu ma. Abra'ã hã te te isazei pese zém hawi, ma tô tãma ropisutu. Te te tãma iropisutuzé wa'rãmi, asa tãma isiwa'âbâzéb zô 're isimnhasi mono õ na, da te dasina 're iwaihu'u pese za'ra mono zéb da hã, ma tô 'Re ihâimana u'âsi mono hã Abra'ã te te isazei pese zém hawip si, tãma ropisutu. E Mozésihi nhimi'ui'éré 'madâ'â'wa norĩ ma si, te 'Re ihâimana u'âsi mono nhimiropisutuzé hã tãma 're hâimana za'ra, zudeu norĩ te te 're isazei pese za'ra mono norĩ ma si. Mare di. Abra'ã hã, 'Re ihâimana u'âsi mono si te te sina i'umnhasi ne, uburé 're idahâimana za'ra mono norĩ ma zama, te tãma 're hâimana za'ra, 'Re ihâimana u'âsi mono nhimiropisutuzé hã. E marĩ wa. Abra'ã hã uburé wahi'rata wa, uburé wasiré isazei'wa norĩ hi'rata wa.

¹⁷ Duréihã ni'wa hã ma tô ãne na 'Re ihâimana u'âsi mono mreme na rob'ui'éré, Abra'ãhã ãma hã: “Wa hã wa tô aipisutu, daro mono bâ da te dasina 're ĩ'umnhasi za'ra mono norĩ hi'rata na, da te 're asisi za'ra mono da.” 'Re ihâimana u'âsi mono nhimiropisutuzé hã, tô sena. Pire uptabi di. E marĩ wa. Õ hã tô sena, 're hâimana mono wa. Taha si, ma tô Abra'ã hã te te sina 're umnhasi u'âsi. Taha si, 're dadâ'â za'ra mono nherẽ, dahâiwa'utu'wa hã te 're hâimana. Taha si duré marĩ õ ré, Ropoto mono 'wa hã.

^18-19 Duréihã Abra'ã hã 100 na ãma iwahubzéb u hã romhutu na ma tô 'Re ihâimana u'âsi mono hã tãma ropisutu, ãne: “Asihudu sidâpâsi, da'ahâ uptabi di za.” Ãne rob'ui'éré 'rata na iwasu'u hã. Abra'ã hã romhutu na ma tô tidâ'âzé hã sina waihu'u, ihâiba isib'uware na hã oto. Timro zama ma duré waihu'u, 'ra waihu'u õ na, Sara hã. Tane nherẽ, siptete sina ma tô 'Re ihâimana u'âsi mono si saze, za i'ra te te tãma isõmrizém na hã. Te te 're wawãi mono ãna, te sô 're simipari u'âsi, 'Re ihâimana u'âsi mono nhimiropisutuzéb zô hã, marĩ hã tãma hâimana õ nherẽ, sô 're isimipari mono zéb da hã. Tahawa, ma tô 'Re ihâimana u'âsi mono hã pisutu, daro mono bâ da te 're isazei pese za'ra mono norĩ hi'rata na, da te 're sisi za'ra mono da.

²⁰ 'Re ihâimana u'âsi mono te te tãma iropisutuzém na hã te te ãma wawãi õ di. Imreme hã te te isazei pese zéb zarina, ma tô siptete uptabi na 're hâimana. Te duré ãma 're wata u'âsi.

²¹ 'Re ihâimana u'âsi mono te te tãma iropisutuzé hã za te te tãma ãma i'uwaimramizéb zô, te te duré 're sazei pese u'âsi. Te te sazei utõrĩ ãna, Abra'ã hã.

²² Tahawa, te te isazei pese na ma tô sima ãma roti 'Re ihâimana u'âsi mono hã, iwasédé hã te te oto ãma 're 'madâ'â mono tõ da, taha zarina te te wẽsãmri da, duré po're'õ nherẽ, za te te azâri tõ da, dame.

²³ Duréihã rob'ui'éré 'rata na Abra'ãhã wasu'u hã, 'Re ihâimana u'âsi mono te te iwẽsãmrizém na hã, taha wasu'u si õ di.

²⁴ Wa norĩ zama, wa te wasina 're i'umnhasi za'ra mono norĩ hã te za duré te te 're wa'awẽsãmri, Wanhib'apito Zezusihi hâiwa'utu'wa, wa te wasina 're i'umnhasi za'ra mono norĩ hã.

²⁵ 'Re ihâimana u'âsi mono hã ma tô Zezusi hã dama tisõ, da te dasiwi wĩrĩ da, wawasété na 're wanomro mono wa. Ma tô duré hâiwa'utu, taha na te te 're wa'awẽsãmri mono da, wawasédé hã te te oto wa'ãma 're ab'madâ'â tõ mono da, 'Re ihâimana u'âsi mono hã.