Roma 3 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono hã, tô sena na te te dama 're i'aropisutu mono zém na rowasu'u

¹ Tawamhã zudeu na 're i'aihâimana za'ra wa'aba mono zé, e taré, te bété asihâiwata nhihâri ré hã 're anomro aba mo. E taré, te duré 'Re ihâimana u'âsi mono ma hã 're hâimana.

² Mare di. Tô sena tãma hã, zudeu na 're aihâimana za'ra wa'aba mono zé hã. Tãma wẽ di, 'Re ihâimana u'âsi mono ma hã. E niha, wa za tawamhã ãne hã waihu'u za'ra ni, zudeu norĩ 're ihâimana za'ra mono zé hã. Duréihã 'Re ihâimana u'âsi mono hã ma tô zudeu norĩ si te te sima 're awẽ, isimiroti na rob'ui'éré 'rada hã uburé da'udâna te te 're 'madâ'â pese za'ra mono da, dawi simani tõ da.

³ Tane nherẽ, ni'wam norĩ hã zudeu norĩ hã 'Re ihâimana u'âsi mono nhimiroti zarina 're inomro mono na hã te te tãma ãma 're uwaimrami za'ra mono õ di. E tawamhã 'Re ihâimana u'âsi mono hã asa te te tãma ãma 're uwaimrami za'ra mono õ di za, uburé marĩ na te te tãma ãma 're iropisutu za'ra mono zéb zarina.

⁴ Te za tô te te tãma ãma 're uwaimrami u'âsi za'ra, te te tãma 're i'aropisutu mono zéb zarina. Uburé ti'ai ãma dazadawa nhipese na dasima 're dahâimana za'ra mono nherẽ, 'Re ihâimana u'âsi mono si, sadawa nhipese õ di, tô sena hã. Duréihã ma tô ãne na ãma rob'ui'éré Dawi hã, 'Re ihâimana u'âsi mono ãma hã: “A hã marĩ na dama 're roti mono wamhã, tô sena asadawa nhipese õ na te za da te 're aiwaihu'u za'ra, tô sena asimiroti na hã. Duré ni'wam norĩ hã asadawa nhipe te te ai'ãma 're sa'ra mono wamhã, ta norĩ si isadawa nhipese na te za da te dasiwi 're waihu'u za'ra, ai'upana.”

⁵ Ni'wam norĩ hã te ãne na te te si'ãma 're rosa'rata upa za'ra: “Wa norĩ hã wahâimana wasété na si, wa za oto 're wahâimana za'ra, 're iwanomro wasété uptabi mono na, da te 're wawaihu'u za'ra mono wa, 'Re ihâimana u'âsi mono si wasété ãna 're imorĩ wẽ uptabi na, da te 're waihu'u za'ra mono da, wanhipai u. Tawamhã wahâimana wasété na 're wahâimana za'ra mono nherẽ, e te za te te 're wa'ahâ za'ra, 'Re ihâimana u'âsi mono hã. Mare di. Te te 're wa'ahâ za'ra mono õ di za.” Ãne te ni'wam norĩ hã te te si'ãma 're rosa'rata upa za'ra.

⁶ E tawamhã i'uwaibaba te ta norĩ hã ãne na hã te te 're rosa'rata za'ra. Mare di. I'uwaibaba õ di. 'Re ihâimana u'âsi mono hã te tô i'uwaibaba si te te 're da'ahâ za'ra. I'uwaibaba na si te marĩ na te te dama 're arowairébé. Ãne zarina te te dama 're arowairébé mono õ 'wa'âhã, aré te te da'awẽ'õ waihu'u õ di, za da'ãma isipo'ozéb ãma, 'Re ihâimana u'âsi mono hã.

⁷ Ãté ni'wam norĩ hã te za duré ãne na te te si'ãma 're rosa'rata upa za'ra: “Wa norĩ hã wawasédé, wa te 're 'manharĩ za'ra mono wamhã, ãté te za ãne na da te wa'ãma 're rosa'rata za'ra: ‘Õ norĩ hã wasété uptabi na te 're nomro. 'Re ihâimana u'âsi mono si, te wẽ uptabi na 're hâimana, õhõ si siwaprosi.’ Ãne na te za 'Re ihâimana u'âsi mono si 're imorĩ wẽ uptabi na, da te dasiwi 're waihu'u za'ra, wawasété si, wa te 're i'manharĩ za'ra mono na, da te 're iwawaihu'u za'ra mono zém na hã. E tawamhã i'uwaibaba, 'Re ihâimana u'âsi mono, wawasédé te te wa'ãma 're i'aza'ra mono zéb da hã. Mare di. I'uwaibaba õ di.” Ãne na te duré ni'wam norĩ hã te te si'ãma 're rosa'rata upa za'ra.

⁸ Taha zarina te duré te te sima 're nharĩ za'ra: “Wawasété si, wa za tô wa te 're 'manharĩ u'âsi za'ra, 'Re ihâimana u'âsi mono si iwẽ uptabi na, da te dasiwi 're waihu'u za'ra mono da.” Ni'wam norĩ hã ma tô ãne na ĩnhimiroti wasédé hã ĩ'ãma sa'ra, ĩsi'uihâ na ãne hã te ãma waihu'u za'ra newa. Ma tô ĩ'ãma wasété za'ra. Tahawa, te za 'Re ihâimana u'âsi mono hã ta norĩ si siwi wẽ'õ pese za'ra, i'uwaibaba.

Dahâimana wasété na 're idahâimana za'ra mono na rowasu'u

⁹ Tawamhã wa norĩ hã zudeu norĩ hã e taré zudeu na 're wahâimana za'ra mono wa, te za, zudeu'õ norĩ hâimanazém nhipai u, te te 're wa'awẽsãmri, 'Re ihâimana u'âsi mono hã. Mare di. Uburé aiwapsi tãma 're idahâimana za'ra mono zé hã. Uburé dahâimana wasédé hã da te 're i'manharĩ za'ra mono na si te 're dahâimana za'ra, zudeu norĩ hã duré zudeu'õ norĩ zama. Dawasété hawi, dasi'uihâ na 're dawairébé waihu'u mono õ di, dama siptete wa, dawasédé hã. Ãne, wa tô aima waihu'u pari za'ra wa'wa.

¹⁰ Duréihã ma tô ãne na ni'wam norĩ hã ãma rob'ui'éré za'ra: “Ni'wam norĩ hã si'uihâ na 're inomro wẽ mono zém na, 'Re ihâimana u'âsi mono te te 're iwẽsãmri za'ra mono zéb da hã, robaba di. Uburé te 're danomro wasété, 're idahâimana za'ra mono hã.

¹¹ Duré ni'wam norĩ hã ãne te te waihu'u za'ra õ di, dawẽ na 're idanomro mono zé hã. Duré ni'wam norĩ hã 'Re ihâimana u'âsi mono zô 're sõpré mono õ di, ihâimanazém na te te 're iwaihu'u za'ra mono zéb da hã. Ãne hã tãma robaba uptabi di, 'Re ihâimana u'âsi mono ma hã.

¹² A'uwẽ mono bâ ma tô 'Re ihâimana u'âsi mono wi, 're dasipizari za'ra, dahâimanazé iwẽ nhiti. Dasi'uihâ na marĩ iwẽ hã da te 're 'manharĩ waihu'u za'ra mono õ di. Taré ma tô 're danomro. Ni'wam norĩ hã marĩ iwẽ hã te te 're 'manharĩ za'ra mono õ di. Mare uptabi di.

¹³ Uburé danhoto hã wasété di. Wasété uptabi di. Danhoto wasété na te dazadawa nhipese na, da te dasima 're nharĩ wasété za'ra. Duré wahi hã te te 're dahâzu mono wa, ti'wa wa'u na te te 're idanhimroi mono ne, te damreme na da te dasima 're nharĩ wasété za'ra, rowẽ hã da te dasiwi ãma 're uprosi za'ra mono da.

¹⁴ Damreme iwasété uptabi na si te dasi'ãma da te 're wasété za'ra.

¹⁵ Dasi'aba'ré na te duré 're dasi'u'a za'ra. Waptui pese na te duré 're dasisimro.

¹⁶ Daro mono bâ 're danomro mono sidâpâsi, te da te dasiwi 're rowamnarĩ u'âsi za'ra. Tahawa, te dasisa'u hã robzei'õ u'âsi 're dahâimana za'ra.

¹⁷ Rowẽ na 're idahâimana za'ra mono zéb da hã, dama sa'rese õ di.

¹⁸ 'Re ihâimana u'âsi mono zama, da te dasiwi 're hâimana wazé mono õ di.”

¹⁹ Duréihã 'Re ihâimana u'âsi mono nhimiroti na ma tô Mozési hã rob'ui'éré, zudeu norĩ ma, õhõ na si ãma 're hâimana za'ra mono da. Tahawa, 'Re ihâimana u'âsi mono nhimiroti 'rata na rob'ui'éré hã 're hâimana siromo mono wa, ni'wa hã tiwẽ na 're imorĩ wasété õ na dama 're siwasu'u waihu'u mono õ di. Uburé dawasété na 're dasisãmri za'ra mono da si, te dama 're hâimana, rob'ui'éré 'rada hã, duré 'Re ihâimana u'âsi mono, dawasété na te te 're ida'awẽ'õ mono zé hã da te dasina 're waihu'u za'ra mono da.

²⁰ E 'Re ihâimana u'âsi mono nhimiroti 'rata na rob'ui'éré zarina, marĩ hã da te 're i'manharĩ wẽ za'ra mono na, te za te te sima da'ãma 're aroti, dawasédé hã te te oto da'ãma 're ab'madâ'â tõ mono da, taha zarina te te oto 're da'awẽsãmri mono da, dapo're'õ nherẽ, te te 're da'ahâ za'ra mono tõ da. Mare di. Taha nai õ di. Uburé marĩ hã da te 're i'manharĩ wasété za'ra mono na, 'râwi 're dasiwaihu'u za'ra mono da si, te dama 're hâimana, rob'ui'éré 'rada hã.

'Re ihâimana u'âsi mono te te 're ida'awẽsãmri mono zém na rowasu'u

²¹ Tane nherẽ, 'Re ihâimana u'âsi mono ma tô oto dama waihu'u, te te 're ida'awẽsãmri mono zém na hã, sõ'awi da te oto 're iwaihu'u za'ra mono zéb da hã. 'Re ihâimana u'âsi mono hã te te sima da'ãma 're aroti mono õ di, uburé marĩ hã da te 're i'manharĩ wẽ za'ra mono zéb zarina, dawasédé hã te te oto da'ãma 're i'ab'madâ'â mono õ zéb da hã, taha zarina te te oto 're ida'awẽsãmri mono zéb da hã. Duréihã 'Re ihâimana u'âsi mono nhimiroti 'rata na rob'ui'éré'wa norĩ hã ma tô ãne na ãma rob'ui'éré za'ra, 'Re ihâimana u'âsi mono te te 're ida'awẽsãmri mono zém na hã.

²² Zezu Cristu, Danho'reptui'wa na da te dasina 're i'umnhasi za'ra mono zém na si, ma tô 'Re ihâimana u'âsi mono hã te te sima da'ãma 're aroti, dawasédé hã te te oto da'ãma 're ab'madâ'â tõ mono da, taha zarina si te te oto 're da'awẽsãmri mono da, dawasété na 're danomro mono nherẽ, te te oto 're da'ahâ za'ra mono tõ da. Uburé Zezu Cristu te te 're isaze za'ra mono norĩ si, te te oto 're awẽsãmri. Ãne hã aiwapsi te uburé tãma 're hâimana za'ra, zudeu norĩ hã, duré zudeu'õ norĩ zama.

²³ Uburé te dawasété na a'uwẽ mono bâ 're danomro. Tahawa, te 'Re ihâimana u'âsi mono 're imorĩ wẽ uptabi zém nhiti 're dahâimana za'ra, 'râwi da te dasina 're tété waihu'u za'ra mono ãna.

²⁴ Tane nherẽ, 'Re ihâimana u'âsi mono nhiti 're dahâimana za'ra mono nherẽ, Zezusi te te 're isaze za'ra mono norĩ hã te te 're awẽsãmri, da'ãma 're ipẽ'ẽzé mono zéb zarina, asa tãma 're idasiwa'âbâ za'ra mono zéb zô, sina 're simnhasi mono ãna. Cristu Zezusi hã tidâ'âzém na ma tô da'awa'â. Tahawa, ma tô dawasété hawi te te 're da'awaibu. Taha na si te oto 'Re ihâimana u'âsi mono hã te te 're da'awẽsãmri, dawasédé hã za oto te te da'ãma 're i'ab'madâ'â mono õ zéb zarina.

²⁵ 'Re ihâimana u'âsi mono hã ma tô Zezusi hã pisutu, dazada idâ'âzém na dawasédé, da te 're i'manharĩ za'ra mono zé hã te te dama 're apari mono da, taha zarina tiwi 'rusimani da, iwa'rãmi da'ãma 're pẽ'ẽzé mono da. Duré taha na si te te 're ida'awẽsãmri mono zé hã, 'râwi da te dasina 're waihu'u za'ra mono da, ma tô ãne da pisutu, Zezusi hã. Zezusi hã da te 're sazei pese za'ra mono wapsi, te za dawasédé hã te te dama 're apari. 'Re ihâimana u'âsi mono hã da'ãma 're wa'a su'u mono õ wa, dawasédé hã te te da'ãma 're ab'madâ'â mono õ di aré.

²⁶ Tane nherẽ, ãhã na hã dawasédé hã da te 're i'manharĩ za'ra mono zém na, te te da'ãma 're ab'madâ'â mono ãna 're hâimana mono õ di oto. Te oto te te da'ãma 're ab'madâ'â u'âsi, uburé marĩ hã i'uwaibaba si te te 're i'ab'manharĩ wẽ mono na, da te dasina 're waihu'u za'ra mono da, duré uburé Zezusi hã da te 're isazei pese za'ra mono norĩ hã te te 're ida'awẽsãmri mono na, da te dasina 're waihu'u za'ra mono da.

²⁷ E tawamhã wasi'uihâ na, wa za wawẽ na wasina 're wawata za'ra, 'Re ihâimana u'âsi mono te te 're iwa'awẽsãmri mono na hã. Mare di. E marĩ wa. 'Re ihâimana u'âsi mono nhimiroti si, wa te 're i'madâ'â pese za'ra mono na, te te sima wa'ãma 're aroti mono õ na dâ'âsina, taha zarina wawasédé hã te te wa'ãma 're ab'madâ'â tõ mono da. Taré, Zezusi hã wa te 're isazei pese za'ra mono na, te te sima wa'ãma 're aroti, taha zarina wawasédé hã te te oto wa'ãma 're ab'madâ'â tõ mono da, taha zarina te te duré 're wa'awẽsãmri mono da.

²⁸ Ãne hã wa tô wasina waihu'u pese za'ra ni oto. Tô sena, Zezusi hã da te dasina 're umnhasi za'ra mono wapsi, te za tô 'Re ihâimana u'âsi mono hã te te sima da'ãma 're aroti, dawasédé hã te te oto da'ãma 're i'ab'madâ'â mono õ zéb zarina, te te oto 're ida'awẽsãmri mono zéb da hã. Ta hã te te sima da'ãma 're aroti mono õ di, isimiroti na rob'ui'éré 'rata zarina, marĩ hã uburé da te 're i'manharĩ wẽ za'ra mono na, dawasédé hã te te oto da'ãma 're i'ab'madâ'â mono õ zéb da hã, taha zarina te te duré 're ida'awẽsãmri mono zéb da hã. Ãne wasu'u zarina, wa tô wa norĩ hã wasina waihu'u pese za'ra ni oto.

²⁹ E zudeu norĩ nhib'apito si, te 'Re ihâimana u'âsi mono hã 're hâimana. E zudeu'õ norĩ ma hã, 're hâimana mono õ di bété. Ta norĩ ma zama te duré 're hâimana.

³⁰ 'Re ihâimana u'âsi mono hã tô sena, misire uburé Danhib'apito uptabi. Zezusi hã te te 're isazei pese za'ra mono zéb zarina si, te za te te sima ãma 're aroti, iwasédé hã te te oto ãma 're ab'madâ'â tõ mono da, taha zarina si te te oto 're awẽsãmri mono da, zudeu norĩ hã, duré zudeu'õ norĩ hã.

³¹ Zezusi hã da te dasina 're i'umnhasi za'ra mono zém na si, 'Re ihâimana u'âsi mono hã dawasédé hã te te oto da'ãma 're ab'madâ'â tõ mono da, te te sima da'ãma 're aroti mono wamhã, e tawamhã, 'Re ihâimana u'âsi mono nhimiroti 'rata na rob'ui'éré hã, wama za'ra hã taré hã. E wa te 're 'madâ'â pese za'ra mono õ di za bété. Wa za tô taha zama, wa te 're 'madâ'â pese za'ra, tô sena wa.