Roma 2 - ꞌRe Ihâimana Uꞌâsi Mono Zadawa Wasuꞌu

Ipo're'õ norĩ, 'Re ihâimana u'âsi mono te te siwi 're i'awẽ'õ mono zé wasu'u

¹ A norĩ wa'wa hã, dapo're'õ na 're idanomro mono norĩ ãma, iwasédé hã ãma 're sa'ra za'ra wa'aba mono wamhã, te za 're aiwasété za'ra wa'aba mo. E marĩ wa. Dasine aiwasédé hã 're 'manharĩ za'ra wa'aba mono wa, aiwa. Tahawa, dasine 're aihâimana za'ra wa'aba mono nherẽ, dawasédé hã da'ãma 're sa'ra za'ra wa'aba mono wamhã, te za 'Re ihâimana u'âsi mono hã te te 're aiwẽ'õ pese za'ra wa'wa dasiré. Tahawa, aiwasété ãna 're aihâimana za'ra wa'aba mono zém na 're asi'madâ'â waihu'u za'ra wa'aba mono õ di za.

² 'Re ihâimana u'âsi mono hã dapo're'õ na 're idanomro mono norĩ hã te te 're i'awaihu'u mono zéb zarina, te tô te te 're awẽ'õ pese, i'uwaibaba si. Ãne hã, uburé wama waihu'u pese za'ra di.

³ Tane nherẽ, a norĩ wa'wa hã dawasédé hã da'ãma 're isa'ra za'ra wa'aba mono na, te aiwasédé hã 're i'manharĩ za'ra wa'aba mo. E 'Re ihâimana u'âsi mono nhimihâzé wi, 'râwi 're asisõ'reptu za'ra wa'aba mono da bâ, te ãne 're i'manharĩ za'ra wa'aba mo.

⁴ Ãté te za ãne asima 're inharĩ za'ra wa'aba mo: “'Re ihâimana u'âsi mono hã simizawi pese uptabi di. Dasi'uihâ na dawasédé hã da te 're 'manharĩ u'âsi za'ra mono nherẽ, da'ãma 're wa'a su'u mono õ di. Tahawa, ĩwasédé te 're 'manharĩ mono nherẽ, te te 're ĩ'ahâri su'u mono õ di.” Ãne hã asi'uihâ na asi'ãma 're rosa'rata za'ra wa'aba mono õ di za. 'Re ihâimana u'âsi mono hã aiwasété wi 're aipizari za'ra wa'aba mono da si, te simi'ẽ na te te 're ai'madâ'â za'ra wa'wa, simizawi pese uptabi na. E ãne hã zahadu aima waihu'u za'ra wa'aba õ di bété.

⁵ A norĩ wa'wa hã aipẽ'ẽ tete u'âsi, te 're aihâimana za'ra wa'aba mo. Tahawa, 'Re ihâimana u'âsi mono hã te za ropsi'utõrĩzéb u hã nimahã na bâdâ hã iwa iwaptã'ãzéb ãma, dazu aihâ za'ra wa'wa, dawasété wa, za te te ida'awẽ'õzéb ãma hã. Tame te za oto tinhimihâzé hã dama ãma uwaimra, i'uwaibaba si.

⁶ Marĩ hã da te 're i'manharĩ za'ra mono zéb uwaibaba, te za 'Re ihâimana u'âsi mono hã te te dama 're awa'âbâ, iwẽ na hã duré iwasété na hã.

⁷ Ni'wam norĩ si te marĩ hã simi'ẽ na te te dama 're 'manharĩ u'âsi za'ra, iwẽ hã. Ta norĩ hã 'Re ihâimana u'âsi mono si te te 're wẽsãmri za'ra mono da, te sina 're simipari za'ra, duré i'rata 're isi'ubumroi u'âsi mono zé, te te tãma 're apisutu mono da. Ta norĩ ma si, te za tô 'Re ihâimana u'âsi mono hã te te 're apisutu, 're isi'ubumroi u'âsi mono zéb da hã, i'rata.

⁸ Duré ni'wam norĩ hã sima si te marĩ na te te 're rosa'rata za'ra, hâiba pisutu ãma 're hâimana za'ra mono da. Ta norĩ hã uburé marĩ iwẽ hã te te siwi 're wẽ'õ za'ra, marĩ iwasété na si 're hâimana za'ra mono da. Ta norĩ si te za 'Re ihâimana u'âsi mono hã sa'ẽtẽ te te 're ahâ za'ra, po're õ wa.

⁹ Uburé dawasété si, da te 're i'manharĩ za'ra mono norĩ hã te za te te 're robzépata za'ẽtẽ za'ra, zudeu norĩ hã, duré zudeu'õ norĩ zama.

^10-11 E ni'wam norĩ hã taré zudeu na 're hâimana za'ra mono wa, te za tinhimihâzé hã te te tãma 're ba'a za'ra, 'Re ihâimana u'âsi mono hã. Mare di. Taha zarina, tinhimihâzé hã te te tãma 're ba'a za'ra mono õ di za. Duré e ni'wam norĩ hã taré zudeu na 're hâimana za'ra mono wa, te za iwẽ hã te te tãma 're anhomri, danhipai u. Mare di. Uburé aiwapsi 'Re ihâimana u'âsi mono ma hã, dapoto mono bâ. Tane nherẽ, uburé iwẽ si te te 're i'manharĩ za'ra mono norĩ ma si, te za 'Re ihâimana u'âsi mono hã iwẽ hã te te tãma 're anhomri, zudeu norĩ ma, duré zudeu'õ norĩ ma zama. Rowẽ uptabi si, te za ta norĩ ma si te te 're apisutu. Ta norĩ si te za te te 're awẽsãmri.

¹² 'Re ihâimana u'âsi mono nhimiroti na, duréihã Mozési te te irob'ui'érézé hã zudeu'õ norĩ ma, tãma 're hâimana za'ra mono õ di. Tãma 're hâimana za'ra mono õ nherẽ, tiwasété na si 're hâimana za'ra mono wamhã, e 'Re ihâimana u'âsi mono 'rata 're isi'ubumroi u'âsi mono zéb da hã, te za te te sina 're uwaimrami za'ra. Mare di. Te te sina 're uwaimrami za'ra mono õ di za. 'Re ihâimana u'âsi mono nhimiroti 'rata na rob'ui'éré hã zudeu norĩ ma si, te 're hâimana za'ra. Tahawa, ta norĩ hã tiwasédé te te 're 'manharĩ za'ra mono wa, te za 'Re ihâimana u'âsi mono hã tinhimiroti na rob'ui'éré zarina, te te tãma 're arowairébé, iwasété na te te 're i'awaihu'u mono zéb uwaibaba.

¹³ E 'Re ihâimana u'âsi mono nhimiroti 'rata na rob'ui'éré hã, taré dapo're na da te 're wapari za'ra mono nherẽ, te za 'Re ihâimana u'âsi mono hã te te 're da'awẽsãmri. Mare di. Isimiroti zarina 're dahâimana wẽ za'ra mono wapsi, te za te te 're da'awẽsãmri, 'Re ihâimana u'âsi mono hã.

¹⁴ 'Re ihâimana u'âsi mono nhimiroti na Mozési te te irob'ui'érézé hã zudeu'õ norĩ ma, tãma 're hâimana za'ra mono õ di. Tãma 're hâimana za'ra mono õ nherẽ, si'uihâ na isimiroti zarina 're hâimana wẽ za'ra mono wamhã, 'Re ihâimana u'âsi mono ma, te za te te tãma ãma 're uwaimrami za'ra, tãma 're hâimana za'ra mono õ nherẽ, 'Re ihâimana u'âsi mono nhimiroti na ibaihâ hã.

¹⁵ Ta norĩ hã si'uihâ na 're hâimana wẽ za'ra mono wamhã, 'Re ihâimana u'âsi mono nhimiroti hã ipẽ'ẽ 're, tãma 're ihâimana u'âsi za'ra mono zé, te wasu'u. Duré iwẽ hã te te dama 're 'manharĩ za'ra mono wamhã, 'râwi te za tipẽ'ẽ na 're sisaze za'ra. Duré marĩ iwasédé hã te te 're 'manharĩ za'ra mono wamhã, 'râwi te za tiwasété na 're sisãmri za'ra. Tahawa, tipẽ'ẽ na 'râwi 're sisaze za'ra mono wamhã, duré 'râwi tiwasété na 're sisãmri za'ra mono wamhã, 'Re ihâimana u'âsi mono nhimiroti, ipẽ'ẽ 're, tãma 're ihâimana u'âsi za'ra mono zé, te wasu'u.

¹⁶ Ãne hã iwasu'uwẽ na te dama 're irowasu'u mono zéb zarina, te za tô nimahã na tiromhâiba, 'Re ihâimana u'âsi mono nhimipisutuzéb zarina, Zezu Cristu hã da'ãma isipo'ozéb da hã. 'Râwi dasima si da te 're irosa'rata za'ra mono na te za oto da'awaihu'u. Taha zarina te za dama arowairébé oto, Cristu hã.

Mozési hã 'Re ihâimana u'âsi mono nhimiroti na te te irob'ui'érézém na rowasu'u

¹⁷ Zudeu norĩ, ãhã na wa za ai'ãma rob'ui'éré za'ra wa'wa. A norĩ wa'wa hã, danhipai u 'Re ihâimana u'âsi mono te te 're asawi pese uptabi za'ra wa'aba mono na, te dama 're asiwasu'u za'ra wa'aba mo, isib'a'uwẽ 're anomro aba mono wẽ te. 'Re ihâimana u'âsi mono nhimiroti na Mozési te te irob'ui'érézé hã, aima wa'aba si 're hâimana za'ra wa'aba mono wẽ te, te ato sina 're anomro aba mo, aima wa'aba si 're hâimana za'ra wa'aba mono wa, 'Re ihâimana u'âsi mono hã te te 're aiwẽsãmri za'ra wa'aba mono da newa, aiwasédé hã te te oto ai'ãma 're i'ab'madâ'â za'ra wa'aba mono õ zarina.

¹⁸ 'Re ihâimana u'âsi mono te te aima 're i'apisutu aba mono zéb zarina 're i'manharĩ za'ra wa'aba mono zéb da hã, aima waihu'u pese za'ra wa'aba di. Duré 'Re ihâimana u'âsi mono nhimiroti 'rata na rob'ui'éré hã ma tô 're iwaihu'u za'ra wa'aba mo, ãma 're anomro wẽ wa'aba mono da.

¹⁹ Ãne na te duré asi'ãma si 're irosa'rata upa za'ra wa'aba mo: “Wa norĩ si datob'a ne 're idanomro mono norĩ hã, wa wa te 're simro, tô sena. Robra u'âsi 're idanomro mono norĩ ma, wa wa te 're rowa'a za'ra.

²⁰ Duré 're idahâimana wẽ za'ra mono zéb da hã, da te 're iwaihu'u za'ra mono õ norĩ ma hã, wa wa te 're roti za'ra iwẽ na, duré ai'uté ne hâimana nhimiza'rese ãna 're ihâimana za'ra mono norĩ ma zama.” Ãne na te asi'ãma 're irosa'rata upa za'ra wa'aba mo. Duré 'Re ihâimana u'âsi mono nhimiroti 'rata na rob'ui'éré hã aima 're hâimana za'ra wa'aba mono wẽ te, te duré ãne na asi'ãma 're irosa'rata upa za'ra wa'aba mo: “Wa norĩ ma si, wama waihu'u pese za'ra di, uburé roti iwẽ hã tô sena uptabi hã.” Ãne na te duré asi'ãma 're aiwata za'ra wa'aba mo.

²¹ E marĩ wa, a norĩ wa'wa hã dama 're roti za'ra wa'aba mono nherẽ, 'râwi duré asima zama 're roti za'ra wa'aba mono õ di. Marĩ na dawi 're danhipsaihuri za'ra mono tõ da, dama 're roti za'ra wa'aba mono nherẽ, te a norĩ wa'aba zama marĩ na dawi 're asipsaihuri za'ra wa'aba mo.

²² Duré damro na dasiwi 're danhipsaihuri za'ra mono tõ da, dama 're roti za'ra wa'aba mono nherẽ, te duré a norĩ wa'wa hã aimro na asiwi 're asipsaihuri za'ra wa'aba mo. Duré uburé romhâiba 'manharĩ hã 'Re ihâimana u'âsi mono upana, ãma 're idawata za'ra mono zé hã asiwi 're wẽ'õ pese za'ra wa'aba mono nherẽ, te 'ri para 're isimasa mono zéb u 're asisisi aba mo, marĩ, 're simi'uri za'ra wa'aba mono da.

²³ A norĩ wa'wa hã zudeu na da te 're aiwaptẽrẽ za'ra wa'wa, 'Re ihâimana u'âsi mono nhimiroti 'rata na rob'ui'éré hã aima wa'aba si 're hâimana mono wẽ te, te dama asina 're iwasu'u za'ra wa'aba mo. Tane nherẽ, isimiroti si 're 'madâ'â za'ra wa'aba mono õ di. Duré asiwi 're wazéb za'ra wa'aba mono õ di. Taha zarina, zudeu'õ norĩ ma hã tãma wẽ za'ra õ di, 'Re ihâimana u'âsi mono hã.

²⁴ Ãne ma tô duréihã ai'ãma rob'ui'éré siromo za'ra wa'wa, 'Re ihâimana u'âsi mono zadawa 'mahârâ 'rata 'wa hã: “A norĩ wa'wa hã zudeu na 're aihâimana za'ra wa'aba mono, 'Re ihâimana u'âsi mono nhimiroti zarina si 're aihâimana za'ra wa'aba mono õ wa, te zudeu'õ norĩ hã 'Re ihâimana u'âsi mono ãma te te 're wasété za'ra.”

²⁵ 'Re ihâimana u'âsi mono nhimiroti 'rata na rob'ui'éré hã 're 'madâ'â pese za'ra wa'aba mono wamhã, i'uwaibaba te za 're asisihâiwata nhihâri za'ra wa'aba mo. Tane nherẽ, isimiroti si 're 'madâ'â pese za'ra wa'aba mono õ wamhã, sihâiwata nhihâri ãna 're inomro mono norĩ ne, te za tãma 're aihâimana za'ra wa'aba mo, 'Re ihâimana u'âsi mono ma hã aiwa.

²⁶ Zudeu'õ norĩ hã sihâiwata nhihâri ãna 're nomro mono nherẽ, isimiroti 'rata na si 're hâimana wẽ za'ra mono wamhã, isib'a'uwẽ ne, te za 'Re ihâimana u'âsi mono hã te te 're 'madâ'â za'ra, zudeu norĩ ne.

²⁷ A norĩ wa'wa hã zudeu na 're aihâimana za'ra wa'aba mono hã, 'Re ihâimana u'âsi mono nhimiroti 'rata na rob'ui'éré hã 're 'madâ'â pese za'ra wa'aba mono õ di, ibaihâ na rob'ui'éré hã aima 're hâimana za'ra wa'aba mono nherẽ, duré asihâiwata nhihâri ré 're aihâimana za'ra wa'aba mono nherẽ. Tane nherẽ, ni'wam norĩ hã zudeu'õ norĩ hã sihâiwata nhihâri ré, 're hâimana za'ra mono õ nherẽ, te 'Re ihâimana u'âsi mono nhimiroti 'rada hã te te 're 'madâ'â pese za'ra. Taha zarina te za 'Re ihâimana u'âsi mono hã te te siwi 're aiwẽ'õ pese za'ra wa'wa, te te 're aihâ za'ra wa'aba mono da, zudeu'õ norĩ si isimiroti hã te te 're 'madâ'â pese za'ra mono wa, ai'upana za'ra wa'aba.

^28-29 A norĩ wa'wa hã, e asihâiwata nhihâri ré 're anomro aba mono wa, te 'Re ihâimana u'âsi mono nhib'a'uwẽ uptabi na 're aihâimana za'ra wa'aba mo. E danho'a uburé marĩ hã zudeu hâimanazéb zarina si 're 'manharĩ za'ra wa'aba mono wa, te za 'Re ihâimana u'âsi mono nhib'a'uwẽ uptabi hã 're anomro aba mo. Mare di. Ãne hã i'uwaibaba nherẽ, i'uwaibaba õ di, 'Re ihâimana u'âsi mono ma hã. 'Râwi aipẽ'ẽ 're, isimiroti hã aima 're hâimana u'âsi za'ra wa'aba mono wapsi, tawapsi te za isib'a'uwẽ uptabi na 're aihâimana za'ra wa'aba mo, 'Re ihâimana u'âsi mono pẽ'ẽzani nhimipawaptob zarina si. 'Re ihâimana u'âsi mono nhimiroti 'rata na rob'ui'éré hã danho'a 're iwapari za'ra wa'aba mono zém na, tawamhã, isib'a'uwẽ uptabi na 're anomro aba mono õ di za. 'Râwi aipẽ'ẽ 're, isimiroti hã aima 're hâimana u'âsi za'ra wa'aba mono wapsi, tawapsi te za isib'a'uwẽ uptabi na 're aihâimana za'ra wa'aba mo. Isib'a'uwẽ uptabi na 're ihâimana za'ra mono norĩ hã ti'ai ãma ré, da te 're wẽsãmri za'ra mono dai õ nherẽ, te 'Re ihâimana u'âsi mono si te te sima 're wasu'u wẽ za'ra.