Roma 16 - ꞌRe Ihâimana Uꞌâsi Mono Zadawa Wasuꞌu

Paulu, tisiwadi norĩ te te i'azawizé wasu'u

¹ Ãne, wa za aima wasu'u za'ra wa'wa, wahidiba Febi na isisi hã. Ta hã simizawi pese di. Sẽcréia na 'ri nho'õmo nhisi ãma, te isazei'wa norĩ hã te te 're apawaptob u'âsi.

² Da'ahâ na ma tô te te 're da'apawapto pese. Ĩzama te duré te te 're ĩpawapto. Tahawa, ma'ãpé asiwi âri wẽ wa'aba za, wasiré Wanhib'apito zazei'wai wa, 'Re ihâimana u'âsi mono nhib'a'uwẽ, 're isiwaibui wẽ mono zém na. Marĩ zô tiwi rowaptâ'â wamhã, te za duré marĩ na asiwi ipawaptob za'ra wa'wa.

³ Ma'ãpé, duré ĩma sawi za'ra wa'aba za, Prisila norĩ hã Aquiraha me, te ãma isawi zahuré zéb zarina, rob'ui'éré na.

⁴ Ta norĩ hã ĩsiré te te 're iromhuri pese zahuré mono, Cristu Zezusihi wasu'u na. Ta norĩ hã da te pãrĩ da nherẽ, ma tô sisawi ãna te te 're ĩpawaptob u'âsi zahuré, pahi ãna. Tahawa, te te 're ĩpawaptob zahuré mono zém na, wa tô te 're uzei u'âsi zahuré. Tane nherẽ, ĩwétési te ãma 're uze zahuré mono õ di. Uburé zudeu'õ norĩ hã isazei'wa norĩ hã te duré te te ãma 're uzei u'âsi za'ra, daro mono bâ siré 're isi'rã'õtõ mono norĩ hã.

⁵ Ma'ãpé, duré uburé ĩma sawi za'ra wa'aba, Prisila norĩ nhorõwa u isazei'wa, siré 're isi'rã'õtõ mono norĩ hã, rowahutu u. Duré asiwi ĩma sawi za'ra wa'aba, ĩsiwadi ĩma isawi pe hã, Epenetu na isisi hã. Ta hã ma tô saze na'rata Cristu hã, Azia na danhipti'a nho'õmo nhisi ãma.

⁶ Duré Maria hã asiwi ĩma sawi wa'aba. Ta hã te te aima 're romhuri pese za'ra wa'wa, simi'ẽi uptabi na.

⁷ Duré asiwi ĩma sawi zahuré wa'aba, Ãdronicu norĩ hã, Zuniasihi me. Ta norĩ hã ĩsiré zudeu norĩ, ma tô ĩsiré tihâimana zahuré, dazazéb 'remhã. Cristuhu zadawa wasu'u'wa norĩ siré te te 're romhuri zahuré mono wa, tãma waihu'u pese za'ra di, isiré romhuri'wa norĩ ma hã. Ta norĩ hã ma tô ĩwana saze na'rata zahuré, Cristu hã.

⁸ Ma'ãpé duré asiwi ĩma sawi wa'aba, ĩsiwadi uptabi hã, Ãpriatu na isisi hã. Ta hã te Cristu ãma si 're hâimana.

⁹ Duré Urbanuhu zama asiwi ĩma sawi wa'aba, wasiré romhuri'wa hã Cristuhu ma. Estaqui hã ĩsiwadi zama te za duré asiwi ĩma isawi wa'wa, ĩma isawi pese uptabi hã.

¹⁰ Ma'ãpé duré asiwi ĩma sawi wa'aba, Aperi hã. Ta hã marĩ na da te 're pibui ahâ mono nherẽ, niwa Cristuhu wi sipi'rai waihu'u õ di. Duré asiwi ĩma sawi za'ra wa'aba, Aristoburuhu nhorõwa 're, 're ihâimana za'ra mono norĩ hã.

¹¹ Duré, Erodiã hã asiwi ĩma sawi za'ra wa'aba, ĩsiré zudeu hã. Duré wasiré isazei'wa norĩ hã Nasizuhu nhorõwa 're, 're ihâimana za'ra mono norĩ hã asiwi ĩma sawi za'ra wa'aba duré.

¹² Trifena norĩ hã te za duré asiwi ĩma isawi zahuré wa'wa, Trifozaha me. Ta norĩ hã te Wanhib'apito ma, te te 're romhuri zahuré. Duré wahidiba hã ĩma isawi pe hã asiwi ĩma sawi wa'aba, Pérzidi na isisi hã. Ta hã simi'ẽ na te duré Wanhib'apito ma, te te 're romhuri pese, wa'a ãna.

¹³ Ma'ãpé duré asiwi ĩma sawi wa'aba, Rufu hã. Ta hã te duré te te 're romhuri pese, Wanhib'apito ma. Ina zama te za duré asiwi ĩma isawi wa'wa. Ta hã ĩna õ nherẽ, ma tô te te 're ĩpawapto pese, dana hã ti'ra te te 're ipawapto pese za'ra mono ne.

¹⁴ Asĩcritu norĩ hã te za duré asiwi ĩma isawi za'ra wa'wa, Flegõtihi me, duré Hermesi, duré Patorobasi, duré Hermasi. Duré uburé itẽme 're isi'rã'õtõ mono norĩ hã asiwi ĩma sawi za'ra wa'aba, isazei'wa norĩ hã.

¹⁵ Ma'ãpé duré asiwi ĩma sawi za'ra wa'aba, Filologu norĩ hã, Zuliaha me, duré Nere'u norĩ hã ihidiba me, duré Orĩpasi. Duré ta norĩ siré 're isi'rã'õtõ mono norĩ hã te za asiwi ĩma isawi za'ra wa'wa, 'Re ihâimana u'âsi mono nhib'a'uwẽ norĩ hã.

¹⁶ Uburé asiré isazei'wa 're aihâimana za'ra wa'aba mono wa, te za asõ'utu na asisawi sina 're asitob'rata hârâ za'ra wa'aba mo. Ãmemhã uburé Cristuhu zazei'wa norĩ hã, i'upsãtã mono bâ sitẽme 're isi'rã'õtõ mono norĩ hã te duré ãma asawi za'ra wa'wa.

Paulu hã, roti na za oto te te i'rãsutuzém na rowasu'u

¹⁷ Ĩsisãnawã norĩ, wa za oto ĩnhimiroti na aima 'rãsutu za'ra wa'wa. Ni'wam norĩ hã te aimawi tinhimirosa'rata prã na te te 're 'wa'rutu za'ra, isazei'wa norĩ wi. Te te tiwi ãma 're 'wa'rutu za'ra mono wa, te isazei'wa norĩ hã imreme hã te te 're wapari za'ra. Taha zarina, te duré sima ãma 're siwanhizari. Ta norĩ nhimirob'manharĩ wasété zéb zarina, te isazei'wa norĩ hã 're si'marõpãrĩ za'ra, tiwasété na. Zezusihi nhimiroti na, da te aima 're iroti za'ra wa'aba mono zéb upana, te ta norĩ hã te te dama 're roti za'ra, aimawi na si. Tahawa, te za tiwi 're asisawi pese za'ra wa'aba mo, ta norĩ siré 're aihâimana za'ra wa'aba mono tõ da.

¹⁸ Ta norĩ hã Wanhib'apito Cristuhu ma, te te 're romhuri za'ra mono õ di. Te te sima 're iwẽ za'ra mono zéb zarina si, te marĩ iwasétére zô si hã sima 're sõpré. Ta norĩ hã sadawa nhipese nherẽ, te isimiroti hã sena newa da te 're wapari ze za'ra, danhimirosa'rata nhib'uware na 're idahâimana za'ra mono norĩ hã. Mreme wapari zei wa, duré asa imreme hã da te dasima 're wẽ za'ra mono da, te taré timreme amo na te te dama 're rowasu'u za'ra, da'ãma 're wata za'ra mono sina. Tawamhã taha zarina, te za awa'awi imreme na da te 're saze za'ra.

¹⁹ Tanei õ di, a norĩ wa'wa hã. Zezusihi wasu'uwẽ 're iwapari pese za'ra wa'aba mono zém na, ma tô daro mono bâ isazei'wa norĩ hã aiwasu'u za'ra wa'wa hã te te 're wapari ze za'ra. Tahawa, ma tô ãma asina ĩma 're irowẽ zani za'ra wa'aba mo. Ãne wa, wa za duré aima roti za'ra wa'wa. Asimiza'rese sina, te za marĩ iwẽ hã 're i'manharĩ za'ra wa'aba mono zéb da si, asina 're asõpré wa'aba mo. Marĩ iwasédé hã 're 'manharĩ za'ra wa'aba mono da, asima 're 'madâ'â za'ra wa'aba mono õ di za. Te za tiwi 're asiptete za'ra wa'aba mo, aiwasété wi hã.

²⁰ Rowẽ na 're idanomro mono zé hã, 'Re ihâimana u'âsi mono hawimhã. Ta hã te za rowẽzé hã te te aima 're anhomri 'wa. Wahi hã dapara na da te 're iwati'i za'ra mono ne, te za Satanasihi nhiptetezé hã romhutu na te te tiwi 're a'uprosi 'Re ihâimana u'âsi mono hã, tô õ hã Satanasi hã asahâpâ 're hâimana za'ra wa'aba mono da oto. Wanhib'apito Zezusihi wi, wa wa te tiwi 're rowaptẽrẽ u'âsi, tinhimipawaptobzé hã te te aima 're sõmri za'ra wa'aba mono da, ai'rata 're hâimana u'âsi za'ra wa'aba mono da.

²¹ Timotiu hã, ãme ĩsiré romhuri'wa hã te duré ãma asawi za'ra wa'wa. Duré ĩsiré zudeu norĩ te duré ãma asawi za'ra wa'wa, Luciu norĩ hã, Zasãhã me, duré Sosipatruhu me.

²² Wa hã, Téciu hã wa duré ãma asawi za'ra wa'wa, Wanhib'apito ãma wasiré 're wahâimana za'ra mono wa. Wa hã Paulu te te ĩma i'awaihu'u mono zéb zarina, wa tô rob'ui'éré, ã ibaihâ na hã.

^23-24 Wa hã Paulu, ãne wa za duré ãma aima waihu'u za'ra wa'wa. Gaiu hã tinhorõwa u te te ĩ'mazébré hã, te duré ãma asawi za'ra wa'wa. Taha nhorõwa ãma, te wasiré isazei'wa norĩ hã 're si'rã'õtõ u'âsi. Duré Erastu hã ãme 'ri nho'õmo ãma danhib'apito ma, rob'uiprazé za'rata na romhuri'wa hã, te ãma asawi za'ra wa'wa. Wasisãnawã Quartu na isisi zama, te duré ãma asawi za'ra wa'wa.

Paulu hã, 'Re ihâimana u'âsi mono ãma iwatazé wasu'u

^25-26 'Re ihâimana u'âsi mono ãma si, wa za 're wawata u'âsi za'ra. Taha ma si, tãma waihu'u pese di, te te 're iwa'apawapto mono zéb da hã, Zezu Cristuhu wasu'uwẽ hã wa te 're isaze za'ra mono zé hã wa te 're rẽme za'ra mono ãna, wanhiptete u'âsi ãma 're iwanomro mono zéb da hã. Taha wasu'uwẽ hã wa tô te dama 're wasu'u u'âsi. Duréihã iwasu'uwẽ hã, 'Re ihâimana u'âsi mono te te dama 're awaihu'u mono õ di. Iwasu'uwẽ hã dama sa'rese ãna, ma tô aré 're danomro. Tane nherẽ, ma tô 'Re ihâimana u'âsi mono hã iwasu'uwẽ hã dama waihu'u oto, isadawa 'mahârâ'wa norĩ nhimi'ui'éré hawimhã. Tahawa, te oto isimiwada'urizéb zarina si, da te 're waihu'u za'ra daro mono bâ, da te ãma 're isazei pese za'ra mono zéb da hã, duré da te 're iwapari pese za'ra mono zéb da hã oto.

²⁷ 'Re ihâimana u'âsi mono hã misire te 're hâimana. Õhõ si siwaprosi uburé marĩ hã tãma waihu'u pese di, taha ma si. Tahawa, taha ãma si, wa za 're wawata u'âsi za'ra, Zezu Cristu te te wama 're i'ab'manharĩ wẽ mono zéb zarina si. Tane tô.