Roma 13 - ꞌRe Ihâimana Uꞌâsi Mono Zadawa Wasuꞌu

Ti'ai ãma dama ipire norĩ nhimiroti, da te 're iwapari pese za'ra mono zéb da na rowasu'u

¹ Ti'ai ãma dama ipire norĩ hã, roti'wa norĩ hã si'uihâ na 're sipisutu za'ra mono õ di, dama 're si'apito za'ra mono da hã. 'Re ihâimana u'âsi mono te te 're i'apisutu mono zarina si, te dama 're hâimana za'ra uburé. Tahawa, te za uburé aihĩni 're iwapari pese za'ra wa'aba mo, isimiroti hã.

² Ni'wam norĩ hã dama ipire norĩ nhimiroti te te siwi 're wẽ'õ za'ra mono wamhã, taha si te te siwi 're wẽ'õ za'ra mono õ di za. I'u'âbâ te za duré 'Re ihâimana u'âsi mono te te 're i'apisutu mono zé hã te te siwi 're wẽ'õ za'ra. Ãne hã ni'wam norĩ te te 're 'manharĩ wasété za'ra mono wamhã, 'râwi te za si'uihâ na te te sisada 're sani za'ra, ti'ai ãma dama ipire norĩ nhimihâzé hã, 'Re ihâimana u'âsi mono zadawa para.

³ Ni'wa norĩ, marĩ te te 're i'manharĩ wasété za'ra mono norĩ si, te za dama ipire norĩ nhimihâzé ma, 're pahi za'ra. Tanei õ di, marĩ te te 're i'manharĩ wẽ za'ra mono norĩ hã. Dama ipire norĩ ma, 're pahi za'ra mono õ di za. Tahawa, te za iwẽ si 're i'manharĩ za'ra wa'aba mo, dama ipire norĩ ma, tãma 're aipahi za'ra wa'aba mono ãna, 're aihâimana za'ra wa'aba mono da. Tawapsi te za te te 're aiwẽsãmri za'ra wa'wa, ti'ai ãma dama roti'wa norĩ hã.

⁴ Ta norĩ hã te 'Re ihâimana u'âsi mono zadawa para, te te 're romhuri za'ra, iwẽ na si te te 're aipawaptob za'ra wa'aba mono da, taha zarina, rowẽ na 're asimroi wa'aba mono da. Tane nherẽ, marĩ iwasété si 're 'manharĩ u'âsi za'ra wa'aba mono wamhã, te za tô tãma 're aipahi za'ra wa'aba mo. E marĩ wa. Dama ipire norĩ hã tô sena siptete uptabi wa, te te 're idahâ za'ra mono zéb da hã. 'Re ihâimana u'âsi mono zadawa para, te isimipari'õ norĩ hã te te 're hâ za'ra.

⁵ Ãne wa, te za uburé ti'ai ãma dama roti'wa norĩ nhimiroti hã 're iwapari pese za'ra wa'aba mo, asimipari õ wa, 'Re ihâimana u'âsi mono te te 're aiwẽ'õ pese za'ra wa'aba mono zéb zarina, te te 're aihâ za'ra wa'aba mono tõ da. Duré 're aihâimana wẽ za'ra wa'aba mono zém na, 'Re ihâimana u'âsi mono ma, tãma ãma 're i'uwaimrami za'ra wa'aba mono na, aipẽ'ẽ 're asimirosa'rata na asina 're waihu'u pese za'ra wa'aba mono da, te za isarina dama ipire norĩ nhimiroti hã 're iwapari pese za'ra wa'aba mo.

⁶ Tahawa, dama ipire norĩ nhimipisutuzéb zarina te za duré rob'uiprazé hã suru na tãma 're i'arĩ za'ra wa'aba mo, ti'ai ãma dama ipire norĩ ma. E marĩ wa. Dama ipire norĩ hã 'Re ihâimana u'âsi mono zadawa para, te te 're romhuri za'ra mono wa.

⁷ Tahawa, te za tô isarina tãma 're i'arĩ za'ra wa'aba mo, aipawa'âbâzé hã duré uburé marĩ uiprazé hã. Te za duré tãma 're aihâimana prédub za'ra wa'aba mo, dama roti'wa norĩ ma.

'Re idasisawi pese za'ra mono zé wasu'u

⁸ Marĩ a'â taré dawi 're iwaibui wa'aba mono hã, apâ iwa'rãmi dama 're isõmri za'ra wa'aba mono da na ãma ronomro õ ré, te za dama ãma 're i'uwaimrami za'ra wa'aba mo. Asimizawizém na si te za 're idazawi pese za'ra wa'aba mo. 'Re dazawi pese za'ra wa'aba mono wamhã, uburé 'Re ihâimana u'âsi mono nhimiroti 'rata na Mozési te te irob'ui'érézém na te za asina tãma ãma 're i'uwaimrami za'ra wa'aba mo.

⁹ Duréihã 'Re ihâimana u'âsi mono, Mozésihi ma, te te iwaihu'uzéb zarina te te ãma dama irob'ui'érézé hã, ãne: “Aimro na asiwi 're asimisaihuri za'ra wa'aba mono õ di za. Duré 're danhimroi wa'aba mono õ di za. Duré dawi 're asimisaihuri za'ra wa'aba mono õ di za. Duré marĩ iwẽ hã dawi 're 'ruiwapari za'ra wa'aba mono õ di za.” Ã norĩ hã, duré aimawi hã isimiroti hã ahâ uptabi nherẽ, simisutu haré te wasu'u isimiroti hã, ãne: “Te za 're idazawi pese za'ra wa'aba mo, aihâimanazé hã 'râwi asima 're isawi pese za'ra wa'aba mono ne.”

¹⁰ Ni'wam norĩ hã te te 're dazawi pese za'ra mono wamhã, marĩ iwasédé hã te te dama 're 'manharĩ waihu'u za'ra mono õ di za. Tahawa, ni'wam norĩ hã te te 're dazawi pese za'ra mono wamhã, ta hã uburé 'Re ihâimana u'âsi mono nhimiroti 'madâ'â pese 'wa, te za 're hâimana za'ra.

¹¹ Zezusi hã we apâ wazô imorĩzéb u hã romhuture di oto, te te iwanho'reptu za'ra zé hã te te oto wama i'rãsutu za'ra da hã. Cristu hã duréi, wa te wasina 're i'umnhasi na'rata za'ra mono hawim nherẽ, romhuture di oto, wama hã. Tahawa, te za oto asimiza'rese 're aihâimana za'ra wa'aba mo, darési ãna 're idanhotõ za'ra mono ne, asimiza'rese ãna 're aihâimana tõ za'ra wa'aba mono da. Ãne na ti'ai ãma 're iwahâimana hutu za'ra mono zé hã aima waihu'u pese za'ra wa'aba di. Ãne wa, te za 're idazawi pese za'ra wa'aba mo.

¹² Robra isi'utõrĩzéb u hã romhuture di oto, ti'ai ãma ré dawasédé, da te 're i'manharĩ za'ra mono hã. Tâibâ za oto. Cristu hã we apâ morĩ wapsi, rowa'a si te za oto 're hâimana u'âsi, robra wa'rãmi. Tahawa, robra 'rowi dawasédé, da te 're i'manharĩ za'ra mono ne, 're wanomro mono õ di za oto. Wawasédé hã wa za oto wa te 're sahâri pese za'ra. Duré Zezusihi nhimirowa'a na si wa za 're wanomro, robra wi wanhiptete sina ãma 're iwahâimana za'ra mono zéb da hã, danhimnhi'ãsi na dawi 're idasisõpa za'ra mono ne.

¹³ Wawasété ãna, wa za oto 're wanomro wẽ, rowa'a na 're idanomro mono ne. Âzé wa te dame 're âhuri mono õ di za, dato iwasété u 're dasi'rã'õtõ mono wa, siwa'ru da te 're i'âhuri mono ne, 're wa'rã siwamnarĩ tõ za'ra mono da. Duré siwa'ru wahâimanazé iwasédé hã wa te 're 'manharĩ u'âsi za'ra mono õ di za, pi'õ na aibâ na zama. Duré marĩ na 're iwasiwẽ'õ za'ra mono hawi, wa te wasima 're nharĩ za'ra mono õ di za. Duré marĩ na 're wasi'ruiwapari za'ra mono õ di za.

¹⁴ Siwa'ru 'râwi asima iwẽzéb zarina, aipẽ'ẽ 're asimirosa'rata wasété aba na ãma 're rosa'rata za'ra wa'aba mono õ di za. Wanhib'apito Zezu Cristu 're imorĩzém na si te za oto 're aihâimana za'ra wa'aba mo, isine.