Roma 12 - ꞌRe Ihâimana Uꞌâsi Mono Zadawa Wasuꞌu

'Re ihâimana u'âsi mono ma, 're idasisõmri za'ra mono zé wasu'u

¹ Ĩsisãnawã norĩ, 'Re ihâimana u'âsi mono hã e wa'ãma 're pẽ'ẽzé mono õ di, wa'ãma 're isiwãrĩ mono zéb da hã. Wa'ãma 're ipẽ'ẽzé mono zé hã, tãma sa'ẽtẽ uptabi di. Tahawa, wa za oto aima roti pese za'ra wa'wa, ãne na hã. 'Re ihâimana u'âsi mono ma si, te za 're asisõmri u'âsi za'ra wa'aba mo, tiwi 're asisawi za'ra wa'aba mono ãna. Taha ma si, te za aiwẽ uptabi na tãma 're aihâimana za'ra wa'aba mo, te te 're ai'madâ'â wẽ u'âsi za'ra wa'aba mono da. Ãhã zarina, ãma 're anomro wẽ u'âsi aba mono wamhã, taha si tô sena, ãma 're i'aiwata za'ra wa'aba mono zé hã.

² Ti'ai ãma dahâimana wasété na 're idanomro mono norĩ ãma hã, 're sasõmri za'ra wa'aba mono õ di za. 'Re ihâimana u'âsi mono wi si, te za 're irowaptẽrẽ u'âsi za'ra wa'aba mo, asimirosa'rata wẽ na si, aipẽ'ẽ 're, 're aihâimana za'ra wa'aba mono zé hã te te aima 're pisutu za'ra wa'aba mono da, 're aihâimana za'ra wa'aba mono zép tém na si, oto 're anomro aba mono da. Tawapsi te za 'Re ihâimana u'âsi mono, te te aima 're ipisutu za'ra wa'aba mono hã asina 're iwaihu'u pese za'ra wa'aba mo, marĩ iwẽ si tãma 're i'manharĩ za'ra wa'aba mono zém na hã.

³ 'Re ihâimana u'âsi mono hã tinhimizawi pese zéb zarina, ma tô ĩpisutu, isadawa wasu'u'wa na oto 're ĩhâimana mono da. Tahawa, wa za oto ãne na aima roti pese za'ra wa'wa. Dama aipire na, duré dama aiwẽ na 're aihâimana za'ra wa'aba mono õ nherẽ, 'râwi aipire na 're asi'madâ'â za'ra wa'aba mono õ di za. 'Re ihâimana u'âsi mono, ma tô te te sima 're aipisutu za'ra wa'wa, õhõ ãma si oto 're anomro aba mono da. Tane nherẽ, aihĩni isazei'wa, asiré 're anomro aba mono nherẽ, ni'wam norĩ si te isazei pese 'wa hã 're hâimana za'ra. Duré ni'wam norĩ hã isazei prãi 'wa, te 're hâimana za'ra. Isazei prãi 'wa norĩ hã 're sazei pese za'ra wa'aba mono newa, 'râwi asi'ãma 're rosa'rata za'ra wa'aba mono õ di za, 're sazei pese za'ra wa'aba mono õ nherẽ.

⁴ Dahâiba misi nherẽ, dahâiba na marĩ hã dama 're ihâimana za'ra mono hã ahâ di, tite mono bâ te te 're iromhuri za'ra mono zéb da hã, dapara norĩ hã duré danhib'rada, duré dato, uburé iré 're idahâimana za'ra mono hã.

⁵ Tane hã wa oto wa norĩ hã wasiré isazei'wa norĩ hã Cristuhu ãma, wa'ahâ nherẽ, 're wahâimana za'ra, simisutu. Dahâiba misi nherẽ, dahâiba na marĩ hã ahâ na dama 're ihâimana za'ra mono hã, tite mono bâ te te 're iromhuri za'ra mono ne, wa oto wa norĩ hã wasiré isazei'wa norĩ hã wanhimiromhuri mono bâ sipu'u pese na, wa te 're romhuri za'ra, 'Re ihâimana u'âsi mono ma, dahâiba misi na 're idahâimana za'ra mono ne, simisutu wasiré 're wahâimana za'ra mono wa oto.

⁶ Tahawa, 'Re ihâimana u'âsi mono hã simizawi pese uptabi wa, romhuri te te wama 're i'apisutu mono zéb zarina, wasipu'u pese na, wa za wa te tãma 're romhuri za'ra, wate mono bâ, ãma 're iwasipawaptob za'ra mono zéb da hã. 'Re ihâimana u'âsi mono zadawa wasu'u na, sena na isazei'wa norĩ ma si te te ãma 're irowasu'u za'ra mono zéb da, te te sima 're wa'apisutu mono wamhã, taha zarina si, wa za tô ãma 're wasipawaptob u'âsi za'ra. Isimiroti zarina si, wa za wa te 're sadawa wasu'u za'ra, wasiré isazei'wa norĩ ma.

⁷ Duré ni'wam norĩ hã isazei'wa norĩ pawapto'wa da, te te sima 're apisutu mono wamhã, ta norĩ zama te za tô taha zarina si te te tãma 're dapawaptob u'âsi za'ra. Duré 'Re ihâimana u'âsi mono nhimiroti na dama rowahutu'wa da, te te sima 're i'apisutu mono norĩ hã te za tô ta norĩ zama isarina si te te ãma 're dapawaptob za'ra.

⁸ Duré ni'wam norĩ hã 'Re ihâimana u'âsi mono hã te te sima 're apisutu mono wamhã, te za isazei'wa norĩ ma, isimiroti zarina si te te 're rowahutu za'ra, te te 're wapari za'ra mono wa, pẽ'ẽ toi u'âsi, ãma 're hâimana za'ra mono da, siptete sina. Duré ni'wam norĩ hã tinhibrom na dama 're sõprub za'ra mono da, te te sima 're apisutu mono wamhã, te za tô ta norĩ hã dawi 're sõti za'ra mono ãna, dama ãma 're sõprub za'ra, sa'ẽtẽ na. Duré ni'wam norĩ hã isazei'wa norĩ 'madâ'â'wa da, te te 're apisutu mono wamhã, te za tô simi'ẽ na te te 're 'madâ'â u'âsi za'ra, ta norĩ zama. Duré ni'wam norĩ hã te te sima 're apisutu mono wamhã, ta norĩ zama te za da'ãma 're pẽ'ẽzé za'ra, dahâzé ré norĩ ãma, duré dawi 're irobzei'õ za'ra mono norĩ ãma. To sina, te za ãne zarina te te 're dapawaptob za'ra, ta norĩ hã. Ãne wa za wa te wasima 're rob'ma'wamarĩ, romhuri mono bâ, dahâiba hã misi nherẽ, dahâiba na marĩ hã ahâ na dama 're ihâimana za'ra mono hã tite mono bâ te te sima 're iromhuri za'ra mono ne.

⁹ Taré asimizawizé hã aima 're hâimana za'ra wa'aba mono tõ da, te za tô sena na asimizawi pese zé hã aima 're hâimana u'âsi za'ra wa'wa. Uburé marĩ wasété nhiti, te za 're aihâimana za'ra wa'aba mo, asiwi 're wẽ'õ pese za'ra wa'aba mono sina. Uburé aihâimanazé iwẽ na si te za oto 're aihâimana za'ra wa'aba mo.

¹⁰ Dasisãnawãi uptabi 're idasisawi pese za'ra mono ne, te za a norĩ wa'wa hã 're asisawi pese za'ra wa'aba mo, Cristuhu ãma asisãnawã oto asiré 're aihâimana za'ra wa'aba mono wa. Te za duré 're asiwazé pese za'ra wa'aba mo.

¹¹ Aiwa'a ãna, te za duré 're iromhuri pese za'ra wa'aba mo. Wanhib'apito ma si, te za asimi'ẽi uptabi na 're iromhuri u'âsi za'ra wa'aba mo, aihâiba tiwi 're sawi za'ra wa'aba mono ãna.

¹² Uburé marĩ iwẽ hã 'Re ihâimana u'âsi mono, za te te wama 're i'apisutu mono zéb zô, wa za wanhimipari nhimi'ẽ na sô 're wahâimana za'ra, wato sina. Zezusihi zazei'wa oto 're anomro aba mono wa, da te 're ai'ruiwapari za'ra wa'aba mono nherẽ, te za asiptete sina ãma 're anomro u'âsi aba mo. 'Re ihâimana u'âsi mono ma, te za 're aimreme zusi u'âsi aba mo.

¹³ Asiré isazei'wa norĩ wi, marĩ zô tiwi 're irowaptâ'â za'ra mono zéb zarina, te za asimarĩ na 're ipawaptob za'ra wa'aba mo. Duré darob amoi hawi atẽme wa'aba 're dasihutu mono wamhã, te za sô 're atob'uzu za'ra wa'aba mo, asiré isazei'wa norĩ zô hã, asõrõwa u 're 'mazasi za'ra wa'aba mono da.

¹⁴ 'Re rowaptẽrẽ za'ra wa'aba mono, 'Re ihâimana u'âsi mono wi, te te aima 're irob'manharĩ wasété za'ra wa'aba mono norĩ hã te te 're apawapto wẽ mono da. Rowẽ hã te te tãma 're i'apisutu mono da si, te za tãma ãma 're aimreme zusi aba mo, ropipa hã te te tãma 're apisutu mono tõ da.

¹⁵ Ni'wam norĩ hã toi uptabi na 're hâimana za'ra mono wamhã, isine te za 're atoi uptabi za'ra wa'aba mo, isiré. Duré ni'wam norĩ hã pẽ'ẽzé uptabi na 're hâimana za'ra mono wamhã, isine te za duré aipẽ'ẽzé uptabi na isarina 're aihâimana za'ra wa'aba mo.

¹⁶ Duré simisutu te za asimirosa'rata na 're asisazei pese za'ra wa'aba mo, asiré isazei'wa nherẽ, asisada 're rosa'rata wasété za'ra wa'aba mono tõ da. Duré aiwẽ na 'râwi asina 're aiwata za'ra wa'aba mono õ di za. Duré dama ipire norĩ zapari, marĩ na romhuri wapu na da te dasima 're iromhuri za'ra mono zé hã asiwi 're wẽ'õ za'ra wa'aba mono õ di za, 're 'manharĩ za'ra wa'aba mono tõ da. Duré asiré norĩ nhipai u aiwaihu'u pese na 'râwi asi'ãma 're rosa'rata za'ra wa'aba mono õ di za.

¹⁷ Duré da te aima 're rob'manharĩ wasété za'ra wa'aba mono wamhã, asa dama ãma 're wa'rãmi wasété za'ra wa'aba mono õ di za, aiwab da. Marĩ iwẽ si 're i'manharĩ za'ra wa'aba mono na si, te za asima 're asõpré u'âsi aba mo, isazei'wa 're anomro aba mono wa, da te ai'ãma 're rosa'rata wasété za'ra wa'aba mono tõ da.

¹⁸ Asada 're dahâimana za'ra wa'aba mono nherẽ, rowẽ na si dasiré 're aihâimana u'âsi za'ra wa'aba mono da, te za asina 're irosa'rata wẽ u'âsi za'ra wa'aba mo.

¹⁹ Ĩsisãnawã ĩma asawi pese aba norĩ, da te aima 're rob'manharĩ wasété za'ra wa'aba mono wamhã, 'Re ihâimana u'âsi mono upana asi'uihâ na 'râwi 're asi'ruiwa'âbâ za'ra wa'aba mono õ di za. Taha si, tinhimihâzém na te te 're ai'ruiwa'âbâ za'ra wa'aba mono da, te za õhõ si 're i'madâ'â za'ra wa'aba mo. Duréihã ãne na ma tô Wanhib'apito mreme na rob'ui'éré, Mozési hã: “Wa hã ĩsiwaprosi, wa za te 're da'a'ruiwa'âbâ. Ĩwétési, wa za te dama ãma 're awa'rãmi, marĩ, da te 're i'manharĩ wasété za'ra mono zém na hã.”

²⁰ Duré ãne 'Re ihâimana u'âsi mono nhimiroti amo na rob'ui'éré wasu'u hã: “Asitob'ru norĩ hã mra te te 're sépata za'ra mono wamhã, isa na te za 're ipawaptob za'ra wa'aba mo. Duré 'rubu wamhã, te za tãma 're i'õb za'ra wa'aba mo. Ãne zarina, asitob'ru norĩ ma, 're 'manharĩ wẽ za'ra wa'aba mono wamhã, ta norĩ hã 'râwi 're siwaihu'u za'ra mono wa, te za aima 're siséb za'ra wa'wa.” Ãhã zarina si te za dama 're i'manharĩ wẽ u'âsi za'ra wa'aba mo. Tahawa, a norĩ wa'wa hã 'râwi asi'uihâ na 're asi'ruiwa'âbâ za'ra wa'aba mono õ di za.

²¹ Ãhã wasu'u na, wa za oto ĩnhimirowasu'u na hã aima 'rãsutu za'ra wa'wa. 'Râwi dasi'uihâ na 're idasi'ruiwa'âbâ za'ra mono zém na hã da'ãma 're sasõmri za'ra wa'aba mono õ di za. Marĩ iwẽ si te za dama 're i'manharĩ wẽ u'âsi za'ra wa'aba mo, taha na dahâimana wasédé hã dawi 're uprosi za'ra wa'aba mono da, duré taha zarina, tô sena oto ai'ãma 're dasiwadi za'ra wa'aba mono da.