Roma 10 - ꞌRe Ihâimana Uꞌâsi Mono Zadawa Wasuꞌu

¹ Ĩsisãnawã norĩ, 'Re ihâimana u'âsi mono te te 're ida'anho'reptui mono zé hã, uburé ĩsiré zudeu norĩ hã te te sina tãma 're uwaimrami za'ra mono da, wa tô ĩsima wẽ uptabi za'ra. Taha da, wa ta norĩ ãma 're ĩmreme u'âsi za'ra, 'Re ihâimana u'âsi mono ma.

² Ta norĩ hã te te sima 're wẽ uptabi za'ra, 'Re ihâimana u'âsi mono ma, 're sisõmri u'âsi za'ra mono da, õhõ ma si, te te 're romhuri pese za'ra mono da. Ãne na, wa tô ĩsi'uihâ na ãma waihu'u pese za'ra, tô sena na. Tane nherẽ, 'Re ihâimana u'âsi mono ma, da te 're iromhuri pese za'ra mono zé hã te te waihu'u pese za'ra õ wa, te te sina tãma 're uwaimrami za'ra mono õ di.

³ 'Re ihâimana u'âsi mono, dawasédé te te oto da'ãma 're i'ab'madâ'â mono õ zarina, te te 're ida'awẽsãmri mono zé hã, tãma waihu'u pese za'ra õ di. Te te 're ida'awẽsãmri mono zéb da, 'Re ihâimana u'âsi mono te te tãma 're ipisutu za'ra mono zé hã, te te 're 'madâ'â pese za'ra mono õ di, ta norĩ hã. Si'uihâ na te te sima 're ipisutu za'ra mono zéb zarina si, ma tô 'râwi sô 're si'wapé za'ra, taha na te te 're wẽsãmri za'ra mono da newa.

⁴ 'Re ihâimana u'âsi mono nhimiroti na Mozési te te irob'ui'éré hã da te 're i'madâ'â pese za'ra mono na, da te ãma 're rosa'rata u'âsi za'ra mono õ di za oto, taha zarina 'Re ihâimana u'âsi mono, te te sima da'ãma 're aroti mono newa, dawasédé te te oto da'ãma 're ab'madâ'â tõ mono da, duré taha zarina te te 're ida'awẽsãmri mono zéb da hã. Tâibâ. Ãne hã ma tô Cristu hã dawi uprosi. Ta hã Danho'reptui'wa na te te sina 're i'umnhasi za'ra mono norĩ si, te za 'Re ihâimana u'âsi mono hã te te 're awẽsãmri, iwasédé hã te te oto ãma 're i'ab'madâ'â mono õ zarina, po're'õ nherẽ, te te 're ahâ za'ra tõ mono da.

'Re ihâimana u'âsi mono te te 're ida'anho'reptui mono zé wasu'u

⁵ Duréihã Mozési hã ma tô ãne na rob'ui'éré: “Ni'wa hã isimiroti na rob'ui'éré hã uburé te te 're 'madâ'â pese uptabi mono wapsi, nimahã na marĩ na misi isimiroti na te te upai õ wapsi, tawapsi te za rowẽ na 're hâimana u'âsi, 'Re ihâimana u'âsi mono 'rata.”

^6-8 Tane nherẽ, ni'wa hã ãne te te 'manharĩ waihu'u õ di, isimiroti zarina uptabi hã. Ni'wa hã isimiroti upai'õ'wa hã 're morĩ õ di. Robaba di. Ãté ãne na te za 'râwi asima 're inharĩ za'ra wa'aba mo: “E 'wa hã te za hâiwa u mo, Cristu hã apâ we te te saprõni da, wa'upana wazada idâ'â za'ra da hã.” Ãne hã asima 're nharĩ za'ra wa'aba mono õ di za, Cristu hã Danho'reptui'wa da, 'Re ihâimana u'âsi mono te te ipisudu hã wei morĩ õ newa, ti'ai u. Ãté te za duré ãne na 'râwi asima 're inharĩ za'ra wa'aba mo: “E 'wa hã te za mo, adâ 're ihâimana za'ra mono zéb u, Cristu hã te te hâiwa'utu da apâ.” Ãne hã asima 're nharĩ za'ra wa'aba mono õ di za duré, Cristu hã apâ hâiwa'utu õ newa, ab're hawi. 'Re ihâimana u'âsi mono, da te 're saze za'ra mono wapsi, te te 're ida'awẽsãmri mono zém na, ma tô Mozési hã ãne na ãma rob'ui'éré, duréihã: “'Re ihâimana u'âsi mono zadawa wasu'u hã ma tô aipẽ'ẽ 're, 're isazei pese za'ra wa'aba mo, 'râwi. Taha na, ma tô duré dama 're asiwasu'u u'âsi za'ra wa'aba mo, asadawa na.” Taha na, wa tô duré wa norĩ hã wa te dama 're sadawa wasu'u za'ra, Cristu, da te 're sazei pese za'ra mono wapsi, 'Re ihâimana u'âsi mono te te 're ida'awẽsãmri mono zém na, dawasédé te te oto da'ãma 're i'ab'madâ'â mono õ zarina.

⁹ Zezusi hã Asib'apito uptabi na, asadawa na danho'a 're sisi za'ra wa'aba mono wamhã, duré 'râwi aipẽ'ẽ 're, 'Re ihâimana u'âsi mono, Zezusi te te ihâiwa'utuzém na, 're sazei pese za'ra wa'aba mono wamhã, tawapsi te za te te 're asõ'reptu za'ra wa'wa, 'Re ihâimana u'âsi mono hã.

¹⁰ Zezusi hã wapẽ'ẽ 're, wa te wasina 're i'umnhasi za'ra mono zém na, 'Re ihâimana u'âsi mono hã te te 're iwa'awẽsãmri mono zé hã. Zezusi hã Wanhib'apito na danho'a, wa te dama 're isisi za'ra mono zém na, 'Re ihâimana u'âsi mono te te 're iwa'anho'reptui mono zé hã.

¹¹ Duréihã Izaia hã ma tô duré ãne na ibaihâ na rob'ui'éré: “'Re ihâimana u'âsi mono hã, Danho'reptui'wa da, te te ipisudu hã da te dasina 're umnhasi za'ra mono wamhã, niwamhã te te sina 're umnhasi baba za'ra mono õ di za. Te za te te dama ãma 're a'uwaimrami u'âsi.” Ãne Izaia hã te te ãma irob'ui'érézé hã.

¹² Zudeu norĩ hã zudeu'õ norĩ me, 'Re ihâimana u'âsi mono ma hã, tô õhõ si, tãma 're ihâimana za'ra mono zé hã. Siwanhizari, tãma 're hâimana za'ra mono õ di oto ta norĩ hã. 'Re ihâimana u'âsi mono, uburé Danhib'apito uptabi, te dama 're hâimana. Tahawa, ni'wam norĩ hã 'Re ihâimana u'âsi mono te te 're sõ'reptu za'ra mono da, te te tiwi 're waptẽrẽ za'ra mono wamhã, ta norĩ ma, te za tô te te tãma ãma 're a'uwaimrami, dama 're isõpru mono zéb zarina.

¹³ Duréihã 'Re ihâimana u'âsi mono zadawa 'mahârâ'wa hã ma tô duré ãne na rob'ui'éré: “Ni'wam norĩ hã Danhib'apito uptabi te te 're sõ'reptu za'ra mono da, te te tiwi 're waptẽrẽ za'ra mono wamhã, te za norĩ hã te te tô 're anho'reptu, ihâiba mono bâ.”

¹⁴ E niha te za tawamhã da te tiwi 're waptẽrẽ za'ra, te te 're da'apawapto mono da hã, Cristu, da te dasina 're umnhasi za'ra mono õ nherẽ. Ãne wamhã, dama waihu'u õ di. Duré Zezusihi wasu'uwẽ hã dapo're na da te 're wapari za'ra mono õ ré hã, e niha te za da te dasina 're umnhasi za'ra, Zezusi hã. Da te dasina 're umnhasi waihu'u za'ra mono õ di. E niha te za duré Zezusihi wasu'uwẽ na, da te 're dapawaptob za'ra mono õ nherẽ, da te 're wapari za'ra. Dama waihu'u õ di.

¹⁵ Duré, e niha te aré Zezusihi zadawa wasu'u'wa norĩ hã daro mono bâ datẽme 're nomro, imreme na te te 're dapawaptob za'ra mono da, 'Re ihâimana u'âsi mono hã te te datẽme 're satõrĩ za'ra mono õ nherẽ. Ãne wamhã, te te ãma 're dapawapto waihu'u za'ra mono õ di aré. Tane nherẽ, 'Re ihâimana u'âsi mono, ma tô te te datẽme 're satõrĩ za'ra tô. Duréihã Izaia hã ma tô ãne na ãma rob'ui'éré: “Rowasu'u wẽ hã nima hawi da te dama 're ãwisi za'ra mono wamhã, dama 're rowẽ uptabi za'ra mono di za.”

¹⁶ Zezusihi wasu'uwẽ hã, uburé da te dasima 're waibui wẽ mono õ di, wẽ nherẽ. Izaia hã ma tô duré ãne na ãma rob'ui'éré, 'Re ihâimana u'âsi mono ma, te te inharĩzém na: “Wanhib'apito, wa te dama 're asadawa wasu'u za'ra mono wamhã, e ma tô aiwasu'u na da te 're wazaze za'ra. Mare di. Da te ãma 're wazaze za'ra mono õ di.”

¹⁷ Tane nherẽ, Cristuhu wasu'uwẽ na, da te ãma 're dapawaptob za'ra mono õ nherẽ, da te ãma 're sasõmri waihu'u za'ra mono õ di. Cristuhu wasu'uwẽ hã dapo're na da te 're wapari za'ra mono wapsi, te za da te 're saze za'ra.

¹⁸ E zudeu norĩ hã zahadu iwasu'uwẽ hã te te 're wapari za'ra mono ã bâ bété. Iwasu'uwẽ hã ma tô te te 're wapari za'ra aré ta norĩ hã, tô sena na. Duréihã Dawi hã ma tô ãne na ãma rob'ui'éré: “Isadawa wasu'u'wa norĩ mreme hã ma tô daro mono bâ te te 're ropé. Ta hã ma tô ropâ dapo're na hã da te 're wapari za'ra.”

¹⁹ E tawamhã, Izaraéu nhihudu norĩ hã iwasu'uwẽ te te 're wapari za'ra mono wamhã, e te te 're waihu'u za'ra mono õ di bété. Ma tô te te 're waihu'u za'ra. Tane nherẽ, tipẽ'ẽ na te te sima 're wẽ za'ra mono õ di, te te 're isaze za'ra mono da hã. Zudeu'õ norĩ si, ma tô te te sima 're wẽ za'ra, te te 're saze za'ra mono da. Ãne na, ma tô Mozési hã duréihã ãma rob'ui'éré 'rata, zudeu norĩ ma 'Re ihâimana u'âsi mono te te tãma irowaihu'u za'ra zém na hã: “Ĩnhib'a'uwẽ'õ aré 're inomro mono norĩ hã oto ãma 're ĩnhib'a'uwẽ za'ra mono wa, te za oto ta norĩ hã asiwi 're i'ruiwapari za'ra wa'aba mo, ĩzadawa parab õ nherẽ. Ta norĩ hã te te 're ĩwaihu'u pese za'ra mono õ nherẽ, wa tô ãma 're ĩnhib'a'uwẽ za'ra aré. Tahawa, te za asib'ru na sada 're aihâimana u'âsi za'ra wa'aba mo, ĩzadawa parab õ nherẽ.”

²⁰ Izaia hã ma tô duré ãne na isa'u ãma rob'ui'éré, zudeu'õ norĩ wasu'u na hã. Zudeu norĩ hã te te siwi 're iwẽ'õ pese za'ra mono zém na, ma tô siptete sina ãma rob'ui'éré, 'Re ihâimana u'âsi mono mreme na: “Ni'wam norĩ hã aré ĩzô 're sõpré u'âsi mono õ nherẽ, ma tô te te siwi 're ĩsãmri za'ra. Ĩzô 're sinharĩ za'ra mono õ nherẽ, wa tô ta norĩ ma 're ĩsiwaihu'u za'ra.”

²¹ Ãne na ma tô duré Izaia hã zudeu norĩ ãma rob'ui'éré, 'Re ihâimana u'âsi mono mreme na: “Wa hã wa tô aré Izaraéu nhihudu norĩ zô 're ĩnhimiwẽ u'âsi za'ra, te 're azawi pese mono wa, apâ ĩtẽme we 're sihutu mono da. Ta norĩ hã po're ãna 're nomro u'âsi mono wa, te te siwi 're ĩwẽ'õ pese za'ra mono nherẽ, wa tô aré sô 're ĩnhimiwẽ u'âsi za'ra, te 're isawi pese za'ra mono zéb zarina.”