Provébiu 8 - ꞌRe Ihâimana Uꞌâsi Mono Zadawa Wasuꞌu

Rowaihu iwẽ, da te iwẽsãmrizé wasu'u

¹ Asiwi wapari aba! Rowaihu iwẽ hã te hârâ 'rãihâ na te te 're da'a'mahârâ, duré i'rãi waihu'u pese zama hã.

² Rowaihu iwẽ hã te ẽtẽ nhisiwi 're hâimana, bâdâdi zada'ré ãma, duré bâdâdi norĩ hã isi'rahâri za'ra ãma.

³ 'Ri nho'õmo tẽme bâdâdi wa, 'ridawa nho'u ihâimana 'rata te hârâ 'rãihâ na te te da'a'mahârâ, ãne:

⁴ “Uburé wa ai'mahârâ za'ra wa'wa, ropâ 're i'aihâimana za'ra wa'aba mono norĩ hã.

⁵ Asimirowaihu'u wẽ prã na 're i'aihâimana za'ra wa'aba mono norĩ, ma'ãpé rowaihu iwẽ hã 're waihu'u za'ra wa'aba mono. Duré asimiza'rese ãna 're i'aihâimana za'ra wa'aba mono norĩ, asimiza'rese wẽ zé hã te za oto 're iwaihu'u za'ra wa'aba mo.

⁶ Asiwi ĩwapari aba, marĩ ipire na te aima inharĩ za'ra wa'aba zém na hã. Uburé marĩ na te inharĩ mono zé hã i'uwaibaba si.

⁷ Sena na wa ĩzaihâ na te 're nharĩ u'âsi. E marĩ wa. Dazadawa nhipese da, 're ĩnhiti'rui mono wa.

⁸ Uburé wa marĩ na sena na ãma rowasu'u. Ĩzadawa nhipese na hã, duré senai õ na hã te ãma nharĩ mono õ di.

⁹ Ni'wam norĩ ma, i'rãi waihu'u wẽ, tãma 're hâimana za'ra mono wamhã, ĩmreme hã tãma pibu pese za'ra di. Duré rowaihu'u wẽ 'wa norĩ ma hã, tãma wapu za'ra di, te te 're iwaihu'u za'ra mono da hã.

¹⁰ Ma'ãpé aima ĩnhimirotizé, ẽtẽ waipo prã prata nhibrob're, asima 're wẽ za'ra wa'aba mono. Duré ĩnhimirowaihu, ẽtẽ waipo pré oru uptabi nhibrob're, asima 're pisutu za'ra wa'aba mono.

¹¹ “E marĩ wa. Rowaihu iwẽ hã ẽtẽ'ubuzi waipo nhipai u hã wẽ uptabi di. Uburé marĩ 're i'ruiwapari za'ra wa'aba mono hã tarére õhõ ma hã.

¹² Wa hã, Rowaihu iwẽ, wa tô 're ĩhâimana, ĩ'rãi waihu'u wẽ siré, duré ĩnhimiza'rese wẽ siré.

¹³ Uburé Danhib'apito, da te 're wazéb za'ra mono wamhã, uburé marĩ iwasété da, 're idanhiti'ru za'ra mono zé, te wasu'u. 'Râwi 're idasi'madâ'â ze za'ra mono zé hã ĩma 'ru ti, dasina 're idawata za'ra mono zéb zama, dahâimana wasété zama, duré damreme wasété zama.

¹⁴ Ĩnhimiroti iwẽ zarina, wa tô te 're da'apawapto, marĩ iwẽ hã da te ãma 're 'manharĩ wẽ za'ra mono da. Ĩnhimiza're hã te ĩma 're hâimana. Ĩnhiptete di, duré wa hã.

¹⁵ Ĩnhimiwaihu'u pese zarina danhib'ihâ'a norĩ nhimi'madâ'âzé hã. Wa duré dama i'rãnho'õmo norĩ hã te 're apawapto, roti iwẽ te te dama 're 'manharĩ za'ra mono da ãma.

¹⁶ Dama i'rãnho'õmo na 're ihâimana za'ra mono norĩ, duré uburé ti'ai mono bâ dama ipire na 're ihâimana za'ra mono norĩ zama, te ĩnhimipawaptobzéb zarina te te 're da'madâ'â za'ra.

¹⁷ “Ĩzawi pese 'wa norĩ hã ĩma sawi pese di. Ni'wa ĩzô rĩtĩ wamhã, te za ĩnhopẽtẽ.

¹⁸ Ĩhawip si danhimarĩ pe, dawazébzé hã, duré 're idasisimarĩ ahâ pese za'ra mono zé hã.

¹⁹ Uburé te dama 're i'anhomri mono hã wẽ uptabi di, ẽtẽ waipo pré oru nhipai u hã, duré ẽtẽ waipo prã prata nhipai u hã.

²⁰ Wa hã bâdâdi sena na 're ĩhâimana mono na wa 're mo. Duré i'uwaibaba zarina si wa 're mo.

²¹ Ĩzawi pese 'wa norĩ hã wa te te 're pisutu u'âsi za'ra, 're simarĩ ahâ pese za'ra mono da hã. Wa duré isimirob za'ra zé isõrõwa 'remhã te tãma ãma 're a'rinhito.

²² “Uburé Danhib'apito, uburé marĩ te te apoto mono wana ré, duré marĩ poto na duréi uptabi te te ãma sãna'rata wana ré, ma tô wa hã ĩ'manha.

²³ Duréi uptabi ma tô, tô ĩ'manha, zahadu ropodo hã sãna'rata mono õ ré.

²⁴ Zahadu â poré mono hã duré â na'rata mono hã hâimana za'ra õ ré, wa tô podo.

²⁵ Ẽtẽ 'rãihâ norĩ hã duré ẽtẽ 'rãihâ prã norĩ hã zahadu 're isimasa mono zéb da hã te te tãma pisutu za'ra wana ré, wa tô podo,

²⁶ 'Re ihâimana u'âsi mono, zahadu ti'a hã, ti'ai haré hã duré ti'a zapru hã te te 'manharĩ za'ra wana ré.

²⁷ Wa hã hâiwa 're sa'wari mono da, te te ipisutuzéb ãma, duré â poré norĩ nhisiwi 're sa'wari mono da, te te iparapo ãma wa tô ĩhâiba.

²⁸ Hâiwa'a hã romnhisiwi 're sa'wari mono da, te te tãma ipisutuzéb ãma, duré â na'rada te te tãma i'ridawazéb ãma, wa tô ĩhâiba.

²⁹ Isada'ré za'ra nhipai u â hã 're pu'u za'ra mono tõ da, te te tãma iwaihu'u za'ra zéb ãma, duré ti'a nhana'rata da, te te i'anhorézéb ãma zama wa tô ĩhâiba.

³⁰ Rob'manharĩ nhipese 'wa na hã wa tô isababamhã 're ĩhâimana. Bâtâ sidâpâsi wa tô duré tãma rowẽ zani'wa na hã 're ĩhâimana. Duré wa hã isõ'remhã wa tô ĩtoi u'âsi na 're ĩhâimana.

³¹ Te te i'aropoto mono zém na hã ma tô ãma ĩma te te 're arowẽ zani, a'uwẽ norĩ na zama, uburé hã.

³² “Tahawa, ipréduptém norĩ, asiwi ĩwapari pese aba! Te aima irowasu'u za'ra wa'aba zé 're 'manharĩ za'ra wa'aba mono wamhã, te za rowẽ uptabi na hã 're aihâimana za'ra wa'aba mo.

³³ Ma'ãpé aima ĩnhimiroti za'ra wa'aba zé hã wapari pese za'ra wa'aba. Ai'rãi waihu'u wẽ na 're aihâimana za'ra wa'aba mono. Te aima irowaihu'u za'ra wa'aba zé hã asiwi rẽme aba tõ.

³⁴ Ni'wa hã te te 're ĩwapari pese mono hã te za tãma robze sina 're hâimana, ĩnhorõwa 'ridawa ãma tame ĩzô bâtâ sidâpâsi 're isimipari mono hã.

³⁵ E marĩ wa. Ni'wa hã te te ĩnhopẽtẽ wamhã, te za rowẽ na 're ihâimana u'âsi mono zé hã sõpẽtẽ. Ãne wamhã, Uburé Danhib'apito tãma ipẽ'ẽto zarina, te za wẽsã.

³⁶ Tane nherẽ, ni'wam norĩ hã ĩwi sina 're ipahâ za'ra mono hã te za 'râwi 're siwamnarĩ za'ra. Uburé ĩzada 're isiti'rui wairébé mono hã te tidâ'âzép si hã te te sima 're sawi za'ra.”