Provébiu 4 - ꞌRe Ihâimana Uꞌâsi Mono Zadawa Wasuꞌu

Danhipai u rowaihu iwẽ uptabi wasu'u, dapawaptobzéb da hã

¹ Ĩ'ra norĩ, aimama nhimiroti hã 're wapari pese za'ra wa'aba mono. 'Re asimipari pese za'ra wa'aba mono wamhã, te za asimirowaihu'uzé iwẽ hã 're iwaihu'u za'ra wa'aba mo.

² Aima ĩnhimiroti za'ra wa'aba zé hã wẽ uptabi di. Tahawa, ma'ãpé ãma 're aipo're pu'u u'âsi za'ra wa'aba mono, ĩnhimiroti na hã.

³ Wa hã zahadure ré ĩmama 'ra misi na 're ĩhâimana mono ré, ĩna ma ĩzawi uptabi na 'watébrémi na 're ĩhâimana mono ré hã,

⁴ ma tô ĩmama hã te te ĩma 're roti ãne: — Ma'ãpé uburé aipẽ'ẽ na ĩmreme hã asima 're tété u'âsi mono, niwamhã ãma aipo're si'âri ãna. Ãne na ãma 're aihâimana mono wamhã, te za rowẽ na si 're aihâimana mo.

⁵ Ma'ãpé asimirowaihu'u wẽ na, duré asimiza'rese wẽ na 're i'aihâimana mono zô si, te za asima 're airĩtĩ mo. Te aima irowaihu'u mono zém na hã ãma aipo're si'âri tõ. Rẽme tõ.

⁶ Rowaihu iwẽ hã rẽme tõ tô. Ãne wamhã, te za ai'wawimhã 're simapa. Duré 're sawi pese mono wamhã, te za asima iwẽ na 're i'aihâimana mono zé hã aima te 're anhomri.

⁷ Rowaihu iwẽ hã danhipai u iwẽ uptabi, da te 're iwaihu'u za'ra mono da hã. Duré asimiza'rese wẽ wa'âbâzéb da hã tô ibâre aré, uburé marĩ aima 're ihâimana mono wa'âbâzém na ãma asima iwa'âbâ da hã.

⁸ Rowaihu iwẽ hã asima 're sawi pese mono wamhã, ta hã te za iwa'rãmi aipire na 're i'aihâimana mono zéb da hã te te ai'ãma 're hâimo. Duré iré 're aipa sito mono wamhã, te za dama aiwazém na 're aihâimana mo.

⁹ Asimirowaihu iwẽ hã te za danhoprezé iwẽ uptabi ne aima 're hâimana, ai'rãiwapto'wa na.

¹⁰ Ĩ'ra, ma'ãpé ĩwapari pese. Marĩ na te aima inharĩzé mono na hã ãma ĩzaze na. Taha wamhã, te za 're aihâimana hâ mo.

¹¹ Wa hã wa tô te 're asaprõni, rowaihu iwẽ te, bâdâdi awa'awi na hã, i'uwaibaba na si tô 're aihâimana mono da hã.

¹² Asimirowaihu'u wẽ na si 're aimorĩ wamhã, niwamhã ate bâdâdi iwẽ hã asiwi i'wa'rutu da hã mare di. Duré niwa 're asamroi mono wamhã, 're i'ai'marõpãrĩ mono da hã mare di za.

¹³ Õne u'â ãma 're aipo're pu'u mono, i'awaihu'u mono zém na hã. Asima 're tété wẽ u'âsi mono, ta hawim na za 're aihâimana wẽ mono wa.

¹⁴ Iwasété norĩ 're inomro mono zém ne hã 're aimorĩ tõ. Duré 're ihâimana za'ra mono zém na hã, ãma 're aihâimana mono tõ.

¹⁵ Ta norĩ te te 're i'manharĩ za'ra mono zé hã, duré 're 'manharĩ mono tõ. Tiwi 're asa'o hâ za'ra mono. Duré tiwi hã 're apa za'ra mono, nima niwĩ 're ane mono da.

¹⁶ Iwasété norĩ hã 're sõtõ waihu'u za'ra mono õ di, marĩ iwasédé te te 're 'manharĩ za'ra mono õ ré hã. 'Re sõpré mono haré, te za tô 're simi'wara, te te da'ãma 're irob'manharĩ wasété za'ra mono zéb u.

¹⁷ E marĩ wa. Ta norĩ ma hã marĩ 'manharĩ wasétézé hã, duré da'ãma rowamnarĩzé hã tãma za'ra hã isa za'ra ne hã, duré uwa 'rãi wa'u isé te te 're i'âhuri mono ne hã.

¹⁸ I'uwaibaba na si 're inomro mono norĩ nhibâdâdi hã te tãma 're hâimana za'ra, bâtâ ro te te 're irowapré mono wim ne, te te 're irowa'a pese mono zéb u hã.

¹⁹ Tane nherẽ, iwasété norĩ nhibâdâdi, i'rãdâ'â ra, 're imara 'rã pese mono ne hã. Ta norĩ hã te te 're i'marõpãrĩ za'ra mono zé hã te te 're 'madâ'â waihu'u za'ra mono õ di, duré te te sina 're 'madâ'â waihu'u za'ra mono õ di.

²⁰ Ĩ'ra, ĩwapari pese, te aima inharĩ mono zém na hã.

²¹ Niwamhã aima ĩnhimirotizé 're 'madâ'â mono ãna 're aihâimana mono tõ. Duré aipẽ'ẽ 'rem hã asima 're tété u'âsi mono.

²² Rowaihu iwẽ hã ni'wam norĩ te te 're waihu'u za'ra mono wamhã, te za 're ihâimana hâ za'ra mono zé hã te te tãma 're sõmri za'ra, duré hâzé ãna 're ihâimana za'ra mono zé hã.

²³ Ma'ãpé marĩ na asimirosa'rata na hã ãma 're pibui pese mono. E marĩ wa. Asimirosa'rada hã aihâimanazé zaprõni'wai wa.

²⁴ Niwamhã asadawa nhipese na hã 're nharĩ mono tõ. Duré aimreme si'ahâ na iwasété na zama 're nharĩ mono tõ.

²⁵ Asisõwap si 're rob'madâ'â u'âsi mono, 're irob'umnhasi mono zéb zarina.

²⁶ Marĩ hã 're i'manharĩ mono da hã asima 're rosa'rata wẽ mono. Tawamhã asima 're irowa'õtõ mono zé hã te za i'uwaibaba na si te te ãma aima 're uwaimrami.

²⁷ Tiwi 're ai'a're nhi'oto mono tõ õwamhã, duré ãwamhã. Iwasété ma hã, duré 're asa'o hâ mono.