Provébiu 30 - ꞌRe Ihâimana Uꞌâsi Mono Zadawa Wasuꞌu

Aguhu mreme wasu'u

¹ Ã hã, Agu, Zaquihi 'ra, ãma idatoi waihu'u'õ na imremezé ãne: “'Re ihâimana u'âsi mono, ĩsiré hã hâimana õ di, 'Re ihâimana u'âsi mono, ĩsiré hã hâimana õ di. Tahawa wa tô romnhiwasi ĩhâiba.

² Wa hã abaze ne ĩnhimiza'rese õ pese na wa oto 're ĩhâimana. Ĩnhimirowaihu'uzé hã ĩma hâimana õ di, dama 're ihâimana za'ra mono ne hã.

³ Niwa rowaihu'u wẽ hã te iwaihu'u õ. Duré 'Re ihâimana u'âsi mono, marĩ iwasédé, ãma 're ihâimana mono õ, ĩma sa'rese õ di.

⁴ E 'wa, ma tô hâiwa u morĩ wa, we apâ hã si'ra. Duré e 'wa, ma tô rowa'u tinhib'rata na hã ubumro. E 'wa, ma tô ti'uza hâpa na â hã ubumro. Duré e 'wa, ma tô ti'a zada'ré mono hã te te 're anhihâri, daro mono bâ hã. E niha isisi. Duré i'ra nhisi hã, e niha. Aima waihu'u pese wamhã, ĩma wasu'u na.

⁵ “Uburé marĩ na 'Re ihâimana u'âsi mono te te inharĩzé hã tô sena. Õ hã uburé i'wawi 're simapa za'ra mono da, sô 're isõpré mono norĩ ma hã, te ibaihâ zapoto 'manharĩ na dasi'wawi dasimapazém na hã tãma 're hâimana za'ra.

⁶ Niwamhã 'Re ihâimana u'âsi mono te te inharĩzéb upana hã ãma 're anhisiwi mono õ di za. Ãne hã 're 'manharĩ mono wamhã, te za te te aima 're pri'i. Te za duré te te 're aihâi'ré, asadawa nhipese na hã.”

Rowaptẽrẽzé wasu'u

⁷ 'Re ihâimana u'âsi mono, ĩdâ'â wana ré wa maparane marĩ hã aiwi waptẽrẽ zahuré:

⁸ Ĩzadawa nhipese na 're ĩhâimana mono da hã, ma'ãpé ĩma sa'ré tõ. Duré ĩnhibro pese na, niha wamhã duré ĩnhimarĩ'õ pese na 're ĩhâimana mono da hã ĩma sa'ré tõ. Ĩnomo wabre dasa na 're ĩhâimana mono da si, te za ĩma 're isõmri mo.

⁹ 'Re ĩnhimarĩ pese mono 'wa'âhã, wa aré ai'udâ. Wa aré airẽ. Ãne wa aré duré tinha: “Uburé Danhib'apito, te ai'ãma irosa'rata da hã mare di, marĩ dai õ wa.” Duré ĩnhimarĩ ãna 're ĩhâimana mono 'wa'âhã, wa aré 're ĩnhimisaihuri mono da hã 're ĩne. Tawamhã taha zarina wa aré asisi hã te 're upto, ĩte 'Re ihâimana u'âsi mono nhisi hã.

Ihâiba amo rowaihu'u wẽ 'wa norĩ wasu'u

¹⁰ Niwamhã isib'ihâ'a ma, romhuri'wa 're wasu'u wasété mono tõ, ta hã te te aima rob'manharĩ wasété tõ da, duré ãne zarina marĩ na i'upai'wa na 're aihâimana mono tõ da, a hã.

¹¹ Timama ma, te te 're irob'manharĩ wasété za'ra mono hã te 're hâimana za'ra, duré tina ma, iwẽ te te 're i'manharĩ za'ra mono õ hã.

¹² Ni'wam norĩ hã te tiwẽ na 're ihâimana za'ra mono na te te sina 're rosa'rata za'ra. Tane nherẽ, zahadu 're isi'uptob za'ra mono pari zé hã tãma 're hâimana za'ra mono õ di, ipẽ'ẽ 'remhã.

¹³ Ni'wam norĩ 're isi'madâ'â ze za'ra mono zarina, te tô wata tete na te te 're da'madâ'â za'ra.

¹⁴ Ni'wam norĩ, te isimarĩ'õ norĩ ãma 're siwamri za'ra mono ãna, te te 're wati pese za'ra, isi'utõrĩ pese za'ra zéb u.

¹⁵ 'Re dawaprui hârâ mono 'wai 'ra, te maparane 're hâimana zahuré. Isisi zahuré hã ãne: We ĩma sõmri! Tô we ĩma sõmri! Tawamhã duré maparane si'uiwa na ihâimana za'ra hã õne u'â marĩ te te sima 're i'ruiwapari za'ra mono hã, ãne:

¹⁶ adâ 're ihâimana za'ra mono zé; pi'õ i'ra waihu'u'õ, õne u'â 're ihâimana mono; ti'a i'ré, tã zô 're isimnhasi u'âsi mono; duré uzâ marĩ na te te 're isazui mono.

¹⁷ Ni'wa timama ãma 're wa'ẽi mono wamhã, duré ina si'ihi wa, te te 're wazé mono õ wamhã, te za sipahudu hã siwi ti'rẽ. Niha wamhã, te za duré sitoro corvo na isisi hã siwi tõmo zani.

¹⁸ Maparane si'uiwa na marĩ ĩma isa'rese za'ra õ hã te waihu'u õ di:

¹⁹ hâiwi si'õmo wawẽ iwarazé hã; wahi ẽtẽ nhisi baba imorĩzé hã; uba're â poré wa'wa â nhisi baba iwarazé hã; duré aibâ norĩ pi'õi me 're sisawi zahuré mono wa, siré 're ihâimana zahuré mono zé hã.

²⁰ Damro aibâ na 're isimisaihuri mono zé hã ãne: Ta hã tihâimanazém na te te upai wa, si'upsõi pari, te za ãne tinha: “Tiha na hã te upai õ di!”

²¹ Maparane si'uiwa na marĩ ihâimana za'ra hã daro mono bâ aihĩni ma iwẽ'õ hã:

²² pawa'âbâ ãna dama romhuri'wa isi'apito; isimiza'rese'õ, sima iwẽ na dasa te te 're i'masi mono;

²³ pi'õ dama iwẽ'õ uptabi, imrozé hã; duré pi'õi ma romhuri'wa sipi'õ, tinhib'ihâ'a nhowa're're isébré hã.

²⁴ Abaze norĩ te maparane si'uiwa na 're hâimana za'ra, surure nherẽ, i'rãi waihu'u pe hã:

²⁵ 'rãti norĩ sib'uware na 're hâimana za'ra mono nherẽ, rob'ré na tisazéb da, te te sisa 're irobza'ra mono;

²⁶ 'rupo'rere norĩ sib'uware na 're hâimana za'ra mono nherẽ, ẽtẽ nhi'riti wa tiza'ru te te sima 're i'manharĩ za'ra mono hã;

²⁷ 'riti norĩ si'apito ãna 're hâimana za'ra mono nherẽ, sisarina sõré pese na 're isi'aba'réi mono;

²⁸ duré 'rezuihâ norĩ, danhib'rata na da te 're waibui pibui pese mono nherẽ, danhib'apito nhimiromhurizé 'ri 'remhã sima iwẽ na 're ihâimana za'ra mono hã.

²⁹ Abaze norĩ te maparane si'uiwa na 're hâimana za'ra, morĩ ré, ãma 're idatob'uzu za'ra mono hã:

³⁰ hu'u zérépa, uburé abaze norĩ nhipai u isiptede, ni'wai ma iwara waihu'u õ hã;

³¹ pone'ẽrebâ zéré uzé si'aibâ; si'a si'aibâ, sõ'utu za'a na si 're imorĩ hã; duré apito, tinhib'a'uwẽ norĩ nho're 're isimi'wara mono hã.

³² Asimiza'rese'õ zarina 'râwi 're asi'madâ'â zei mono wamhã, niha wamhã, duré marĩ iwasédé 'manharĩ da, asima 're rosa'rata wasété mono wamhã, te za asib'rata na hã 're asisadawa nhidâ mo, tô'ã da.

³³ Powawẽ hâiwa'u, da te 're iwasi za'ra mono hawimhã te i'u'ẽtẽ wapu uptobzé hã 're hâimana. Duré danhisi're wi da te 're idahâ za'ra mono zarina, te dawapru hã dawi 're pu'u za'ra. Tane duré 're dasisahi zani za'ra mono zarina, te dasi'wapé hã 're poto.