Provébiu 3 - ꞌRe Ihâimana Uꞌâsi Mono Zadawa Wasuꞌu

Aibâ ipréduptém norĩ ma rotizé wasu'u

¹ Ĩ'ra, ĩnhimiroti na hã aipo're si'âri tõ. Aipẽ'ẽ 're asima tété.

² Aima ĩnhimiroti wẽ zé hã, te za 're i'aihâimana hâ mono zéb da hã, duré asima 're irowẽ za'ẽtẽ mono zéb zama aima tisõ.

³ Asimizawizé hã, duré dama ai'umnhasizé hã 're rẽme mono õ di za. Te za õne u'â aipẽ'ẽ na asima 're itété u'âsi mo.

⁴ Ãne hã 're 'manharĩ mono wamhã, te za 'Re ihâimana u'âsi mono ma, sa'ẽtẽ na asina tãma 're irowẽ zani mo. Duré ti'ai ãma zama te za asina dama 're irowẽ zani mo. Te za duré da te dasima 're aiwasu'u wẽ za'ra.

⁵ Ma'ãpé aipẽ'ẽ na Uburé Danhib'apito si, asina 're umnhasi za'ẽtẽ mono. 'Râwi asimirowaihu'u na si 're asi'madâ'â mono tõ.

⁶ Uburé marĩ 're i'ab'manharĩ mono na 'Re ihâimana u'âsi mono ãma 're aipo're pu'u mono. Taha wamhã bâdâdi awa'awi inomro hã te za te te aima 're hâi'ré u'âsi.

⁷ Ai'rãi waihu'u pese na, asina 're rosa'rata mono tõ. Uburé Danhib'apito hã 're wazé mono. Aiba niwĩ uburé marĩ iwasété wi hã tãma 're aipâi mono, marĩ 're ab'manharĩ tõ mono da.

⁸ Ãne wamhã, te za aihâzé'õzé hã aima tisõ. Te za duré te te 're aihi nhiptete u'âsi.

⁹ Ma'ãpé 'Re ihâimana u'âsi mono 're wazé mono, asimarĩ na duré amnho iwẽ imorĩ'rata na 're i'atehâri mono 'rã na tãma 're i'asõpru mono zém na.

¹⁰ Ãne hã 're 'manharĩ mono wamhã, te za ate amnho ubumrozém norĩ hã 'masisi na 're simasa. Te za duré uwa 'rãi wa'u isé nhemezé 'masisi tâi wa, isadawa hawimhã 're pu'u za'ra.

¹¹ Ĩ'ra, niwa Uburé Danhib'apito te te 're ai'ahâri mono wamhã, asina 're wẽ'õ mono tõ. Duré te te aima 're nharĩ mono wamhã, aiwi 're robzei'õ mono tõ.

¹² E marĩ wa. Uburé Danhib'apito te tô tãma isawi norĩ hã te te 're hâ za'ra, damama norĩ ti'ra te te 're ihâ za'ra mono ne, ihâimanazé te te tãma 're sa'ra wẽ za'ra mono da.

¹³ Ni'wa hã rowaihu iwẽ hã te te sõpẽtẽ wamhã, duré ti'rãi waihu'u wẽ na marĩ te te 're awaihu'u mono wamhã, tãma 're rowẽ mono di za.

¹⁴ Ã hã iwẽ uptabi te te ãma dama 're irowẽ zani mono zéb da hã, ẽtẽ waipo prã prata nhipai u hã, duré ẽtẽ waipo pré oru nhipai u hã.

¹⁵ Rowaihu iwẽ hã, ẽtẽ waipo iwa'âbâ za'ẽtẽ mono nhipai u hã wẽ uptabi di. Uburé marĩ zô 're irob'ruiwapari mono hã tarére tãma hã, marĩ dai õ wa.

¹⁶ Rowaihu iwẽ hã te za 're i'aihâimana hâ mono zé hã, duré asimarĩ pese zé hã duré da te 're i'aiwazé mono zém na hã te te aima 're anhomri.

¹⁷ Te za dapẽ'ẽ 'remhã dahâimanazé iwẽ ise hã te te dama 're anhomri. Te za duré rowẽ na dasima iwẽ na 're idahâimana za'ra mono zé hã te te 're da'anhimro.

¹⁸ Rowaihu iwẽ hã te za 're idahâimana hâ za'ra mono zé hã te te dama 're sõmri za'ra, aiwa wede 're isimasam hâ mono ne. Ni'wa te te sima sawi wamhã, te za rowẽ na 're hâimana.

¹⁹ Uburé Danhib'apito ma tô tinhimirowaihu'u wẽ na ti'a hã poto. Ma tô duré tiwaihu'u pese zarina hâiwa ma hã pisutu, iwa 're isa'wari mono da hã.

²⁰ Tinhimirowaihu'u wẽ na ma tô â mono hã 're ipraba za'ra mono da hã pisutu. Ma tô duré hâiwa nhirõtõ hawi tã, ti'ai u 're ita'a mono da hã pisutu.

²¹ Ĩ'ra, asimirowaihu'uzé iwẽ, duré ai'rãi waihu'u pe hã aipẽ'ẽ 'remhã asima 're tété mono. Niwamhã romhâ na aiwi 're hâimana mono tõ da hã, rẽme tõ.

²² Ta hã te za aihâimana hâ zé hã aima te te 're ãwisi. Tawamhã aibutu na danho'rebzu dama i'madâ'â ze ne hã te za aihâimanazé hã da te 're 'madâ'â ze za'ra.

²³ Tahawa, ai'marõwĩrĩ ãna te za ate bâdâdi iwẽ na si 're ane mo.

²⁴ 'Re asa'wari mono wamhã, aipahi ãna te za asimiwaptâ ãma hã 're asa'wari mo. Te za duré mara bâre asima iwẽ na aptâ hã 're i'mahâpãrĩ mo.

²⁵ 'Re aihâtâ'â mono õ di za, marĩ ipipa hã sa'rese õ ré waptu na asô 're ipusi mono ma hã, duré iwasété norĩ wi, marĩ te te 're irowamnarĩ pese za'ra mono ma hã.

²⁶ E marĩ wa. Uburé Danhib'apito te za 're irob'umnhasi mono zé hã aima te te 're anhomri. Duré niwamhã te te airẽme waihu'u õ di za, romnhiwasi rosa'rese õ ré niha hã ai'ârizé hã asisiwi waptã'ã tõ da.

²⁷ Marĩ hã aima 're hâimana mono wamhã, marĩ zô tiwi 're irowaptâ'â za'ra mono norĩ hã te za 're i'apawapto wẽ u'âsi mo.

²⁸ Aiwaptoma 're isãmra mono ma hã tãma nharĩ õ di za, awẽb da si simipari da hã, pawaptob da wamhã. Pawapto waihu'u pese wamhã, te za tô taha bâtâ na hã ipawapto, marĩ aima hâimana wa.

²⁹ Aiwaptoma 're ihâimana mono ma, marĩ iwasédé tãma 're 'manharĩ mono da hã 're rosa'rata mono tõ. E marĩ wa. Aiwaptoma 'râwi ai'umnhasi sina ta hã 're hâimana mono wa.

³⁰ Siwa'ru hã 're da'awasu'u wasété mono tõ, marĩ, da te aima 'manharĩ wasété nherẽ.

³¹ Rowasété 'manharĩ zei 'wa norĩ hâimanazéb zô hã asima 're rob'ruiwapari mono tõ. Duré õ norĩ te te 're irob'manharĩ za'ra mono si ne hã 're rob'manharĩ mono tõ.

³² E marĩ wa. Uburé Danhib'apito ma hã, ihâimana nhipese norĩ hã tãma 'rui wa. Tane nherẽ, i'uwaibaba na si 're ihâimana wẽ za'ra mono norĩ si te isiwaihu hã tãma 're hâimana za'ra.

³³ Iwasété norĩ nhorõwa 're, 're idahâimana za'ra mono ma hã te Uburé Danhib'apito ropipa hã te te tãma 're apisutu. I'uwaibaba na 're ihâimana za'ra mono nhorõwa 'rep si, te iwẽ hã te te tãma 're apisutu.

³⁴ Da'ãma 're iwa'ẽ za'ra mono norĩ ãma te za 're wa'ẽ iwa'rãmi. 'Râwi 're isi'madâ'â ze za'ra mono õ norĩ si te za te te 're apawapto.

³⁵ Isimiza'rese wẽ norĩ hã te za da te 're iwazéb za'ra mono zé hã te te sina tãma 're hâimo za'ra. Tane nherẽ, duré niha na simiza'rese ãna 're ihâimana za'ra mono norĩ ãma, te za sidâpâsi isisé hã da te ãma 're sa'ra.