Provébiu 27 - ꞌRe Ihâimana Uꞌâsi Mono Zadawa Wasuꞌu

¹ Asi'madâ'â ze zéb zarina, za awẽb da, asima irowa'õtõzé hã dama wasu'u tõ. E marĩ wa. Aima waihu'u õ wa, awẽm na za marĩ asô iwatobrozé hã.

² Asi'uihâ na 'râwi hã asina 're aiwata mono õ di za, aimawi norĩ si ai'ãma 're wata pibui pese za'ra mono da.

³ Ẽtẽ norĩ, supara me hã pire uptabi zahuré di. Tane nherẽ, isimiza'rese'õ norĩ nhimirob'manharĩ wasété zarina ro'wa'rutuzé hã pire uptabi di, isipai u zahuré.

⁴ Danhiti'ru hã, da'ãma dasiba'õzé, te 're hâimana. Dahâimana wẽ uprosi'wa, te duré 're hâimana. Tane nherẽ, marĩ na da te 're ida'ruiwapari za'ra mono zé hã wasété uptabi di, isipai u.

⁵ Wẽ di, ni'wai ma, isawi zarina sõ'awi da te tãma 're ipri'i za'ra mono zé hã. Da te 're dazawi za'ra mono nherẽ, da te dama 're ipri'i za'ra mono õ zép si hã wẽ õ di.

⁶ Ni'wa wasiwaihu te te wama ipẽtẽ zarina, te te wa'u'a nherẽ, wama hã umnhasi u'âsi di. Tane nherẽ, asi'ru tinho'utu te te ai'âri wamhã, te za asi'madâ'â pe.

⁷ Ni'wa, te te 'mahâiwĩrĩ wamhã, ropĩ hã te za tô wẽ'õ. Tane nherẽ, ni'wai ma, mrab uptabi wamhã, te za dasa hã sé nherẽ, ise na hã tãma tihâiba.

⁸ Ni'wa, tinhorõwa nhiti romhâ na 're ihâimana mono hã, aiwa sire tizasi nhiti sina 're ipahâ za'ra mono ne hã te 're hâimana.

⁹ Dasisadazezém na 're dasi'mawamarĩ za'ra mono wa, te te dama 're irowẽ zani za'ra mono ne, te sena na 're idasisawi za'ra mono zé hã te te dama 're rowẽ zani za'ra.

¹⁰ Asiwaihu hã aimama siwaihu'u me hã, rẽme zahuré tõ. Tô'ã! Duré ropire na aihâimana wamhã, asisãnawã te te aipawaptob da hã tiwi rowaptẽrẽ tõ. E marĩ wa. Asisãnawã romhâ na 're ihâimana mono nhipai u, 'râwi aiwaptoma 're ihâimana mono hã sa'ẽtẽ dâ'âsina aima hã.

¹¹ Ĩ'ra, ai'rãi waihu'u wẽ na hã 're aihâimana mono. Tawamhã ĩma 're rowẽ mono di za. Duré ãhã wamhã, ĩma waihu'u pese di, ĩma ipẽtẽ'wa norĩ ma, niha na iwẽ na te ãma 're i'azada'âbâ mono da hã.

¹² Isimiza'rese wẽ, marĩ isimimnha te te 'madâ'â wamhã, te za tãma ai'ré, ãma wati na ré. Tane nherẽ, isimirosa'rata prã hã te za õne haré itẽme mo. Ãhã wamhã, te za robzépada hã sitẽme 'wani.

¹³ Ni'wa, dasiré a'uwẽ'õ hâiba wapto'wa na marĩ wa'âbâ'wa da, dama 're hâimana mono da, te te sima wẽ wamhã, te za ti'uza hã sena na te te ãma 're idapawa'âbâ mono zé te te roptete da hã dama tisõ.

¹⁴ Ni'wa robza'rã ré iwaptoma 're ihâimana mono hã hârâ 'rãihâ na te te sawi wamhã, tame te za hârâ 'rãihâ na te te isawizém na hã marĩ iwasété da ne, ãma rosa'rata.

¹⁵ Damro pi'õ timreme na isimiwati pe hã aiwa tã 're pĩni nhimizahâri mono õ wa, tã'a'a 're itoptõrĩ nhimizahâri za'ra mono õ ne hã te 're hâimana.

¹⁶ E ari'iwi 're ihâimana mono da hã tãma 'manharĩ waihu'u pese di. Mare di, waihu'u õ di, rowa'u simizazâri da, da te tãma i'manharĩ waihu'u õ ne, duré wedewa'u to danhib'rata na da te i'âri waihu'u õ ne.

¹⁷ Isi'uwazi tete na ro'wa, 're isi'wa si'uiwa za'ra mono ne, te dasiré norĩ me hã rosa'rata wẽ na 're dasipawaptob si'uiwa za'ra.

¹⁸ Ni'wa figuera wede te te 're 'madâ'â wẽ mono wamhã, te za i'rã hã te te 're 'masi. Duré ni'wa tinhib'ihâ'a te te 're 'madâ'â wẽ mono wamhã, te za isimi'madâ'â wẽ zé hã da te ãma 're wazéb za'ra.

¹⁹ Â na 're idasi'ubu 'madâ'â waihu'u pese za'ra mono ne, te za dapẽ'ẽ 're danhimirosa'rada hã te te dama 're ahâi'ré, dawẽ na, duré dawasété na 're idahâimana za'ra mono zé hã.

²⁰ Niha hã dasihawim na marĩ da te 're i'ruiwapari za'ra mono zé hã sitõ waihu'u õ di, adâ 're ihâimana za'ra mono zéb u, 're idanhisisi 'rãsutu waihu'u mono õ ne hã.

²¹ Ẽtẽ waipo pré oru hã, ẽtẽ waipo prã prata me, te za unhama na da te 're pibu za'ra, i'uptabi zô. Tane te za duré iwẽ norĩ hã sena zô da te 're pibu za'ra.

²² Trigu 'rã hã wa'ĩni na da te 're isu pese za'ra mono ne, isimiza'rese'õ, a hã 're wati mono nherẽ, te za õ hã iwana 're ihâimana mono zém ne tinhimiza'rese õ na hã te te ãma 're uzusi u'âsi.

²³ Ate pone'ẽrebâ norĩ hã, duré powawẽ norĩ hã niha na aima ihâimana za'ra zô 're awaihu'u mono da hã sada 're asiptete mono.

²⁴ E marĩ wa. Danhimarĩ za'ẽne hã duré apito si'uirĩ na ti'ra ma, da'madâ'âzép te tinhoprezé nhomrizé hã õne u'â dama 're hâimana za'ra mono õ na dâ'âsina.

²⁵ Imorĩ'rata na te za danhimizama sazé hã 're i'anhihâri mo. Tawamhã ta hã apâ i'wanhipré zô 're rob'madâ'â mono ré, te za duré sa'a na du hã 're i'anhihâri mo.

²⁶ Tawamhã te za pone'ẽrebâ zéré mapure na da'uzazé hã ãma 're i'ab'manharĩ mo. Te za duré pone'ẽrebâ zéré uzé wa'âbâ na hã ti'a 're i'mai'uipra mo.

²⁷ Tawamhã te za pone'ẽrebâ hâiwa'u 'manharĩ u'ẽne hã 're isi mono da hã sa'ẽtẽ na aima 're hâimana, ai'ra norĩ ma zama, duré aima romhuri'wa norĩ sipi'õ si'uparizéb da zama.