Provébiu 25 - ꞌRe Ihâimana Uꞌâsi Mono Zadawa Wasuꞌu

Saloma, rowaihu'u wẽ hâiba amo na te te ãma irowasu'uzé wasu'u

¹ Ã hã Salomahã nhimirowaihu'u wẽ zé hâiba amo, Zuda ti'ai wa'õtõ nho'õmo 're, apito Ezequiaha nhib'a'uwẽ te te i'rã'õtõ za'ra zé hã ãne:

² 'Re ihâimana u'âsi mono hã dama iwaihu'u'õ te te wawi 're isuwa za'ra mono zarina, wa wasiwi wa te 're wazé pese. Duré dama ipire norĩ te te marĩ wama 're iwasu'u hâi'ré za'ra mono zarina, wa duré wa te wasiwi 're wazéb za'ra.

³ Apito nhimirosa'rada hã dama waihu'u õ di. Hâiwa duré ti'a zahâpâ uptabi hã romhâ uptabi wa, da te i'uwe waihu'u õ ne, dama waihu'u za'ra õ di, apito nhimirosa'rada hã.

⁴ Ẽtẽ waipo prã prata tõmo upto, da te dasima sani za'ra wamhã, ãma iromhuri'wai ma hã waihu'u pese di, marĩ iwẽ te te ãma i'manharĩ da hã.

⁵ Tane duré, apito hawi iwasété norĩ da te 're sani za'ra mono wamhã, te za sena na i'uwaibaba na si te te 're ida'a'madâ'â mono zéb zarina, siptete na hã 're hâimana.

⁶ Dama ipire norĩ nho're 're aihâimana mono wamhã, aipire na 're asi'madâ'â mono tõ. Tô'ã!

⁷ Wẽ uptabi di aré, dama ipire hã ãne te te aima inharĩ da hã: “We ĩzababa asãmra hâ.” Tane nherẽ, wasété di aré, õ hã uburé ipire norĩ nho'a te te aima rowazé wazere wamhã.

⁸ Ai'aba'ré na da'ãma rowairébézéb u aimorĩ tõ, marĩ i'madâ'âzé wasu'u da hã. E marĩ wa. Nimahã na za iwasu'uzém na ãma i'upa na hã da te aiwi upsibi me dâ'âsina. Ãhã wamhã, e marĩ te za i'manha.

⁹ Aiwapto ma 're isãmra mono me si marĩ na 'râwi asima rowairébé aba. Tane nherẽ, marĩ dama iwaihu'u'õ te te aima iwasu'uzé hã dama hâi'ré õ di za.

¹⁰ Ãnei õ wamhã, a hã niha marĩ asima itété waihu'u õ na te za uburé aiwaihu'u za'ra ni. Taha zarina niwamhã aiwasu'u wasédé isi'utõrĩ da hã mare di.

¹¹ Damreme iwẽ hã aiwa bâtâ uwaibaba na da te dama 're iroti za'ra mono zé hã, aiwa ẽtẽ waipo pré oru na ropodo ẽtẽ waipo prã prata 'manharĩ na da te ãma isa'ra ne hã.

¹² Ni'wai ma, i'rãiwaihu'u wẽ te te tãma ipẽne hã te te iwapari ze zé hã, danhiptõmo hi wasisizé oru na i'manharĩ nhipai u iwẽ uptabi, duré oru na marĩ da te 're i'manharĩ za'ra mono norĩ nhipai u zama iwẽ.

¹³ Rowa'ro na da te 're iroptehâri za'ra mono siwaprã, â idi'idi, dama 're ihâimana mono ne, te rowasu'u'wa i'umnha hã isatõrĩ'wai ma, te te ãma tãma 're rowẽ zani apâ.

¹⁴ Ni'wa te te ropisutu nherẽ, tinhibzari te te dama isõmri õ hã, aiwa hâiwa nhirõtõ hawi rowa'u tã 're ta'a mono da, te te 're isani mono õ ne hã.

¹⁵ Dahâimana wahâ zarina, te za dama ipire norĩ hã marĩ na te te ãma 're dazaze za'ra. Duré danhimirobzanhamri wẽ hã te za ropire hã te te 're uprosi za'ra.

¹⁶ Ropĩni hã 'mai'upsõmri za'ẽtẽ tõ, asõ'o'o õ'umnhasite.

¹⁷ Bâtâ bâre aiwaptoma 're ihâimana mono u hã 're ane mono tõ. E marĩ wa. Ai'ãma wa'a wa, asada siti'rui õ'umnhasite.

¹⁸ Sadawa nhipese na dahâiba na te te 're irobzanhamri za'ra mono hã simimnhasi uptabi di, aiwa sib'ézé 'wapa ne, duré ti i'wanhimoi 'wa pese ne, duré brutu'umo 'wanhiséré ne hã.

¹⁹ Ropire hã dazô 're pusi mono wa, dama i'umnhasi'õ da te 're umnhasi za'ra mono wamhã, da'wa 're isiwamnarĩ za'ra mono ne, duré imorĩ'õ para'õtõ uwa na 're inomro mono ne, te ta hã marĩ dai õ na dama 're hâimana.

²⁰ Rowahâ zé bâtâ na ni'wai wi, i'uza da te tiwi iwazere ne, duré da'wa're, sa na da te ãma i'aba'ré ne, te za tiwi irobzei'õ ma hã taré pese danho're na hã tãma 're danho're za'ra.

²¹ Asi'ru mram na hâimana wamhã, isa hã tãma sõmri; duré 'rubu na hâimana wamhã, â hã tãma sõmri.

²² Ãne 're 'manharĩ mono wamhã, te za asi'rui ma hã rowazé tãma 're isani mo. Taha zarina te za Uburé Danhib'apito iwẽ na hã te te aima 're awa'âbâ.

²³ Hâiwa nhimi'e hawi rowa'u, tã te te 're isani u'âsi mono ne, te da'madâ'â nhiti'ru na da'madâ'âzé hã te te dama 're sani za'ra.

²⁴ Wẽ di, aibâ 'ri upsibi hâpâ zasé're ãma, timro nhiti 're ihâimana mono da hã, imro isimiwati pese me 'ri 're, 're isãmra mono nhipai u.

²⁵ Rowasu'u wẽ, romhâ hawi datẽme 're isihutu mono hã, aiwa 'rubu ré â wahâ da te 're i'âhuri mono ne hã.

²⁶ Â 're ipu'u na'rata mono zéb ãma â 're isiwamnarĩ mono ne, te sena na 're ihâimana za'ra mono hã, iwasété norĩ hâimanazém na hã te te 're sasõmri za'ra.

²⁷ Ropĩ da te 're i'upsõmri hâ za'ra mono hã wẽ õ di. Tane duré wẽ õ di, ni'wai ãma dawata zô simire sina 're imorĩzé hã.

²⁸ Dahâimana wa'ro zarina 're idasitété waihu'u mono õ, te 'ri 'wawi wa'ra 'rãihâ 're isipru pese mono ne hã 're hâimana.