Provébiu 24 - ꞌRe Ihâimana Uꞌâsi Mono Zadawa Wasuꞌu

¹ Rowasété 'manharĩ zei 'wa norĩ hâimanazéb zô hã asima 're rob'ruiwapari mono tõ. Duré ta norĩ siré 're i'aihâimana mono da hã asima 're rosa'rata mono tõ.

² Ta norĩ hã te te dama 're irob'manharĩ wasété za'ra mono da si, te tô te te sima 're rosa'rata za'ra. Te te da'ãma 're iro'wa'rutu za'ra mono na si te duré sima te te 're robzanhamri za'ra.

³ Rowaihu iwẽ zarina te danhorõwa hã da te dasima 're 'ri wẽ za'ra. Duré danhimiza'rese wẽ zarina te 'ri nhiptete na hã 're simasa.

⁴ I'rãi waihu'u wẽ nhorõwa 'remhã 'ri 're wa'õtõ mono na hã te marĩ i'madâ'â ze si duré iwa'âbâ za'ẽtẽ si 're simasa.

⁵ 'Rãiwaihu'u na 're ihâimana mono hã wẽ uptabi di, danhiptete nhipai u hã. Duré danhimiza'rese na dahâiba hã pire uptabi di, danhiptete nhipai u.

⁶ Dasi'wapéi u 're danhisisi mono wana ré hã te za a'â da te dasima 're rowa'õtõ wẽ za'ra. Duré dama roti ahâ na hã wapure di, da te da'ãma 're i'ai'uté za'ra mono zéb da hã.

⁷ Rowaihu iwẽ hã isimiza'rese'õ norĩ ma hã pire uptabi di, te te 're iwaihu'u za'ra mono da hã. Tawamhã dasi'rã'õtõ ãma niha na robzanhamri ãma hã te te 're inharĩ waihu'u za'ra mono da hã mare di.

⁸ Ni'wa hã marĩ iwasédé te te 're i'manharĩ mono da si, te te sima 're irosa'rata u'âsi mono, te za ro'wa'rutu poto'wa na da te 're waptẽrẽ za'ra.

⁹ Hâimana nhimiza'rese ãna 're ihâimana za'ra mono norĩ nhimirowa'õno hã ta hã dawasédé. Duré da'ãma 're iwa'ẽi za'ra mono norĩ hã, uburé dama 'ru za'ra di.

¹⁰ Ropire hã bâtâ na asô iwatobro zarina, asib'uwa na aihâimana wamhã, te za tô asib'uwa na u'â 're aihâimana mo.

¹¹ Ni'wa tiwasédé te te 'manharĩ õ nherẽ, da te dasiwi wĩrĩ da, da te saprõni wamhã, te za sô airĩtĩ mo, sõ'reptu da hã.

¹² Tawamhã a hã ãté te za inha, niha na iromhâimanazé atei õ na hã. Tane nherẽ, 'Re ihâimana u'âsi mono ma hã waihu'u pese di, aipẽ'ẽ 're niha na we asima irosa'rata mono zé hã. Tahawa, te za tô õ hã imono bâ marĩ da te 're i'manharĩ za'ra mono zéb zarina, te te dama 're awa'âbâ.

¹³ Ĩ'ra, ma'ãpé ropĩ hã 're 'mai'upsõmri u'âsi mono, wẽ uptabi wa. Mohõnire sara hawi ipĩni wa'u a'a hã te te 're i'asoto zei pese mono ne,

¹⁴ tane te duré asimirowaihu'u wẽ hã aipẽ'ẽzani ma, ise ne hã 're hâimana. A hã ãne na asina 're uwaimrami mono wamhã, te za iwẽ hã aima 're hâimana. Duré marĩ iwẽ aima 're hâimana mono da, sô 're i'asimipari mono hã niwamhã isimini da hã mare di.

¹⁵ Iwasété norĩ te te 're i'manharĩ za'ra mono ne, a hã, sena na 're ihâimana za'ra mono norĩ nhorõwa tiwi 're arési mono da hã, asima 're ai'aba'réi mono tõ, duré sada 're asiwamnhasi mono tõ, asimirosa'rata na hã.

¹⁶ E marĩ wa. Sena na 're ihâimana za'ra mono ahâ na tihâimanazém na 're rere'e mono nherẽ, te za apâ hã 're wahutu za'ra, hâiwi tipẽ'ẽ 'remhã para na 're simasa mono da hã. Tane nherẽ, iwasété norĩ si hã te za ropipa sô 're iwairébé mono hã te te 're uprosi.

¹⁷ Asitob'ru norĩ niha na tãma 're romhâimana za'ra mono wamhã, ãma asima 're rowẽ za'ra mono tõ.

¹⁸ E marĩ wa. Ãne na asima 're irowẽ mono zé hã Uburé Danhib'apito te te aiwi waihu'u wamhã, te te tãma rowẽ õ di za. Tawamhã ãté te te ãma 'rãiwa'õmo õ di za, te te tãma irob'manharĩ wasété zém na hã.

¹⁹ Iwasété za'ra zarina te te aiwi 're ro'wa'ré za'ra mono õ di za. Duré niha na 're ihâimana za'ra mono zéb zô asima 're rob'ruiwapari mono õ di za.

²⁰ E marĩ wa. Niwa apto'o ré niha na 're ihâimana za'ra mono zéb da hã marĩ õ uptabi wa za, aiwa rob'uiwẽzé idâ'â pesere ne wa za.

²¹ Ĩ'ra, ma'ãpé Uburé Danhib'apito hã 're wazé mono, duré dama ipire norĩ zama. Duré ã norĩ da, sada 're ihâimana za'ra mono norĩ siré hã 're aihâimana mono tõ.

²² E marĩ wa. Ta norĩ hã sa'ẽtẽ waptu na za te te sima rob'manharĩ wasété za'ra õ'umnhasite. E wapu bâ aré, Uburé Danhib'apito nhimirob'manharĩzé hã, duré dama ipire norĩ nhimirob'manharĩzé hã.

Nima norĩ rowaihu'u wẽ hâimanazé wasu'u

²³ Ã hã, duré aibâ i'rãiwaihu'u wẽ norĩ nhimiroti: Da'ãma rowairébé'wa norĩ, danhiniwĩ ihâimana da hã mare di.

²⁴ Ni'wa marĩ na upai'wa nherẽ, i'upai'õ'wa na te te dama wasu'u wamhã, te za da te tãma 're inharĩ wasété za'ra mono zé hã sina 're adu. Te za duré uburé sina da'anhiti'ru zani.

²⁵ Tane nherẽ, marĩ na i'upai'wa norĩ ma, i'uwaibaba na niha na te te tãma pisutu za'ra wamhã, te za rowẽzé hã tãma 're hâimana za'ra.

²⁶ Sena na dazadawa nhipese ãna dazada'âbâzé hã dasiwaihu'u uptabi na sena na dasima 're idahâimana za'ra mono, te wasu'u.

²⁷ Uimrehẽne asima 'ri tõ, asima rob're pari a'â. Tawamhã a hã i'uwaibaba na te za we i'manha, i'aihâimana mono zéb da hã.

²⁸ Da'ãma rowairébézéb ãma, asiré hã dama wasu'u wasété tõ, marĩ ãma hâimana õ nherẽ. Asadawa nhipese na asahâi na hã dama wasu'u tõ.

²⁹ Niwamhã ãne hã nharĩ tõ: “Aiwab da, wa za ãma tãma wa'rã, taha na te te ĩma wa'âbâ da hã, asa!”

³⁰ Wa hã, aibâ iwa'a isimiza'rese'õ buru wa'waibaba hã wa tô ro'razâ, duré uwa 'ru na ite buru wa'waibaba na zama.

³¹ Uburé, ma te ro'wa wede hã duré warõno hã te te suwa. Duré ẽtẽ na i'wawi wara siprum haré hã te nomro.

³² Tawamhã ta hã te 'madâ'â wamhã, wa tô ãma rosa'rata. Taha zarina wa tô duré waihu'u, ãne:

³³ Ãté ãne te za inha, “Suru na wa za a'â nhono. Duré wa za nasi a'â ĩnhamra sina ĩ'rãi waptã'ãre, aptâ'â zé te. Wa za duré a'â ĩsitété sina suru na ĩwa'utu da hã nomro.”

³⁴ Tane nherẽ, asõtõ ré, te za ro'wa na isimisaihuri te te 're idasusi za'ra mono ne, 're asimarĩ mono õ zé hã oto asusi.