Provébiu 23 - ꞌRe Ihâimana Uꞌâsi Mono Zadawa Wasuꞌu

¹ Dama ipire siré asa da, isiré asãmra wamhã, õhõ ãma hã aipo're si'âri õ di za, taréi õ wa, ta hã.

² Sa'ẽtẽ hã asa tõ, mram nherẽ.

³ Dasa iwẽ te te aima a'âri wamhã, waptu na sa'ẽtẽ hã 'rẽne tõ, marĩ pese di, niha na ãma aima simiza're pese õ'umnhasite.

⁴ Asisibro pese da, 're asipãrĩ mono tõ, romhuri na hã. Asimiza'rese wẽ zarina te za ãma 're irosahâri mo.

⁵ E marĩ wa. Rob'uiprazé hã waptu na za aiwi 're simani mono wa, ipaihi si'uiwa na isaribi tãma 're pa za'ra mono wa, si'u romhâ na oto 're isisa'rei mono ne.

⁶ Aibâ isõti nhorõwa ãma hã 're asai mono tõ. Tô'ã! Duré dasa iwẽ te te aima i'a'âri hã waptu na sa'ẽtẽ hã 'rẽne tõ.

⁷ Te za nasi aima tinha, ãne: “Suru na, nasi asi na”. Tane nherẽ, sena na hã te te nasi aima nharĩ õ di.

⁸ Suru na asa nherẽ, te za tô oto aso'o. Duré tarére za oto, iwasu'u wẽ zé, õ hã.

⁹ Isimiza'rese'õ ma 're irobzanhamri mono da hã, marĩ dai õ di. E marĩ wa. Ai'rãiwaihu'u wẽ hawim na tãma irobzanhamrizém na hã za te te aiwazéb õ dâ'âsina.

¹⁰ Aihi'rata norĩ ti'a nhizârizé mono na ẽne te te siwi isa'ra mono hã apraba tõ, aima rob're wairob da hã. Duré imama'õ norĩ nhipti'a hã tiwi 're awaibui mono tõ.

¹¹ E marĩ wa, 'Re ihâimana u'âsi mono hã isiptete uptabi, imama'õ norĩ 'wawi 're isimapa mono 'wa na 're hâimana mono wa. Tahawa te za tô õ norĩ 'wawi 're isimapa mono zém na hã asada 're hâimana.

¹² Ma'ãpé da te aima 're iroti mono zé hã 're wapari pese mono, 're iwaihu'u pese mono zéb da hã.

¹³ Ai'uté hâimana pese zéb da, ahâri ãna 're hâimana za'ra mono da hã ãma 're arosa'rata mono tõ. Wedehu na i'azâri na hã ãma wĩrĩ dai õ di.

¹⁴ Wedehu na 're i'ahâri mono zarina, te za a hã dâ'â u'âsi 're imorĩzém hawimhã isõ'reptu.

¹⁵ Ĩ'ra, ai'rãi waihu'u wẽ na 're aihâimana mono wamhã, ĩma hã 're rowẽ uptabi mono di za.

¹⁶ Asimirowaihu'u wẽ zarina 're nharĩ mono wamhã, aima ĩto za'ẽtẽ di za, ĩpẽ'ẽ na hã.

¹⁷ Tiwasédé te te 're i'manharĩ za'ra mono hâimanazéb zô hã asima 're rob'ruiwapari mono tõ, aipẽ'ẽ na hã. 'Re ihâimana u'âsi mono si te za 're iwazéb u'âsi mo.

¹⁸ Ãne 're aihâimana mono wamhã, te za iwẽ hã aima 're hâimana. Duré marĩ iwẽ aima 're hâimana mono da, sô 're i'asimipari mono hã niwamhã isimini da hã mare di za.

¹⁹ Ĩ'ra te za ĩwapa. Ai'rãi waihu'u wẽ na te za 're aihâimana mo. Te za duré sena na 're i'aihâimana wẽ mono zéb da hã asima 're irosa'rata mo.

²⁰ Âzézei'wa norĩ siré, duré isa zahâri'õ norĩ siré 're ane mono tõ.

²¹ E marĩ wa. Âzézei'wa norĩ hã, duré mra'wa norĩ hã 're sisibrob'õ za'ra mono wa. Duré aptâ'â si te te 're i'manharĩ u'âsi za'ra mono zarina, te ti'uza waima na si 're si'uza za'ra.

²² Aimama hã 're wapari pese mono, õ hã te te tô aipoto wa. Ana zama niwa si'ihi wamhã, 're iwazé mono õ na hã 're aihâimana mono õ di za.

²³ Sena hã rowaihu iwẽ hã duré danhimiza'rese wẽ hã ma'ãpé dawi 're i'a'uipra mono ne hã asima 're awaibui mono. Duré dama 're i'awede mono ne hã niwamhã 're arẽme mono tõ.

²⁴ Sena na i'uwaibaba na si 're ihâimana mono mama hã te za te te sima ãma 're rowẽ. Te za duré isabâdâ hã te te sima 're romhu'u, 'rã waihu'u wẽ na 're hâimana mono wa.

²⁵ Ma'ãpé aimama norĩ ma, ana me, ãma tãma 're irowẽ zani zahuré mono zéb da hã tãma 're 'manharĩ zahuré mono. Pi'õ zé're hawimhã aipoto dâ'âsina, te za rowẽzép si tãma 're i'azani mo, asina.

²⁶ Ĩ'ra, te aima 're iroti mono zé ma hã ma'ãpé 're aipo're pese mono. Duré 're ĩhâimana wẽ mono zéb zarina si 're aihâimana mono.

²⁷ Pi'õ iwa'âbâ zô 're isisõmri za'ra mono hã duré pi'õ marĩ 'manharĩ wasété 'wa hã ab're i'rehâ uptabi ne.

²⁸ Aiwa isimisaihuri, dazô sima'uri wa, simire sina 're isi'ubumroi mono ne, te ta norĩ hã aibâ zô te te 're rob'madâ'â za'ra, sima. Taha nhimi'manharĩ wasété u'âbâ, te za aibâ norĩ, timro ma tinhimiropisutuzé te te siwi ãma 're iwati'i za'ra mono norĩ hã sina 're hâ'â.

²⁹ E 'wa hã bété hâzé te, 're isadari mono 'wa hã. Duré e 'wa hã robzei'õ na si 're ihâimana mono. E 'wa hã bété 're si'wapéi u'âsi mono wa, 're isiwapsari mono 'wa hã. E 'wa hã bété 're ito pré pusi u'âsi mono hã, duré da te 're i'u'a mono 'wa hã ãne na hã 're hâimana mono dai õ nherẽ, aré.

³⁰ Ã hã âzézei'wa. Ã hã te âzé hã marĩ na da te 're iwazari mono zô hã 're mo, taha zô si sima 're rĩtĩ mono wa.

³¹ Uwa 'rãi wa'u isé hã asima 'madâ'â ze tõ, wa'u pré wẽ nherẽ, hâsizé 're si'ubuzi wẽ nherẽ, duré dazadai'ré 'remhã wara wẽ nherẽ.

³² E marĩ wa. Wahi nhipsari ne, ai'ãma awẽ wamhã, za te te ai'u'a wa.

³³ Tawamhã a hã âzé hã zâ'rẽne wamhã, siwa'ru te za niha na marĩ i'ab'madâ. Te za duré asimiza'rese'õ zarina siwa'ru oto irobzanha.

³⁴ Te za â wa'wa uba're 're, i'asõtõ ne, niha na hã tô asiwaihu, duré hâimo danhipai u i'asãmra ne, te te airé isi'ese mono ne hã.

³⁵ Tawamhã te za inha, ãne: “Ãté ma tô ni'wa hã ĩ'azâ. Ãté duré da te dasiwi ĩpré'é nherẽ, te sa'rese õ di. E niwa wa za apâ hã ĩ'rãi wẽ, te duré zâ'rẽne na sahu da hã.”