Provébiu 22 - ꞌRe Ihâimana Uꞌâsi Mono Zadawa Wasuꞌu

¹ Danhisi wasu'u wẽ hã wẽ uptabi di, danhimarĩ pese na 're idahâimana za'ra mono zém nhipai u. Ẽtẽ waipo prã prata nhipai u, duré ẽtẽ waipo pré oru nhipai u we uptabi di, da te 're idawazé wẽ za'ra mono zé hã.

² Isimarĩ pe, duré isimarĩ'õ hã aiwab zahuré. E marĩ wa. Uburé Danhib'apito si'uiwa na aiwa te te da'apoto wa.

³ Isimiza'rese wẽ, marĩ isimimnha te te 'madâ'â wamhã, te za tãma ai'ré, romhâ na ré. Tanei õ di, isimiza'rese'õ hã. Ta hã te za õne haré itẽme mo. Tahawa, te za robzépada hã sisô waze.

⁴ Ni'wa, Uburé Danhib'apito te te 're wazé mono wamhã, duré wapu na dama 're si'madâ'â mono wamhã, te za tinhimarĩ hã te te sima 're azani. Taha zarina te za duré da te dasiwi 're wazé pese. Te za duré 're hâimana hâ, ta hã.

⁵ Iwasété norĩ nhibâdâdi na te 'wabzéré hã sô 're hâimana za'ra, duré abazei mramizé hã. Ni'wa hã ihâimanazé tãma sawi wamhã, te za tãma 're hâiba za'o.

⁶ Ai'uté hâimana prédum na 're ihâimana mono zéb da hã, tãma 're roti pese mono. Tawamhã tãma simirẽme ãna te za ãma 're mo, tihâimanazéb 'rãsutu u.

⁷ Isibro pese norĩ hã isimarĩ'õ norĩ ma, siptete uptabi di. Duré ni'wa taré ropisutu na rob'uiprazé te te dawi i'mai'âri hã, te za te te tiwi i'âri zapari, wapu na 're hâimana.

⁸ Ni'wa hã marĩ iwasété na te te dama irob're zarina, te za ropipazéb si te te sima 're atehâri. Tawamhã marĩ iwasédé hã te za sô aipi'ra.

⁹ Ni'wa sõprum na 're hâimana mono wamhã, te za iwẽ si tãma ipisudu hã 're hâimana. E marĩ wa. Tisa hã isimarĩ'õ norĩ ma, te te 're a'a mono wa.

¹⁰ Da'ãma iwa'ẽ ze, õne haré satõrĩ wamhã, te za damreme na dasi'ahâri hã ai'utõ, duré dasisada dazahi zarina da te dasi'ãma 're iwasété za'ra mono zé hã.

¹¹ Ni'wa i'uwaibaba na si sena na dahâimanazé te te sima 're sawi pese mono wamhã, duré isimizawi pese zarina 're mreme wẽ u'âsi mono wamhã, te za apito siwaihu'u na 're hâimana.

¹² Uburé Danhib'apito tõmobre, te rowaihu iwẽ hã 're hâimana. Tane nherẽ, te senai'õ na 're ihâimana za'ra mono norĩ nhimirowa'õno hã te te tiwi 're awa'rutu.

¹³ Iwa'a hã te za tinha ãne: “'Ripara hawi rob u ĩwatobro wamhã, hu'u zérépa te za ĩ'â.”

¹⁴ Pi'õi wasété nhimirobzanhamrizé hã, ab're i'rehâ uptabi ne hã te 're hâimana. Taha 're, te ni'wam norĩ da, Uburé Danhib'apito, sada 're isiti'ru za'ra mono hã 're rere'e.

¹⁵ Ai'uté norĩ iharé na te tô simiza'rese ãna marĩ hã te te 're 'manharĩ za'ra. Tane nherẽ, i'ahâri zarina te za tinhimiza'rese wẽ zé hã te te 're waihu'u za'ra.

¹⁶ Ni'wa, isimarĩ'õ norĩ te te 're iwati pese za'ra mono zarina, 're sisimarĩ pese mono wamhã, niha wamhã, isibro pese norĩ ma, taré ro te te tãma 're sõmri za'ra mono wamhã, te za 're sisimarĩ õ pese za'ra.

30 na da'rã nhimiza're ihâimana wasu'u

¹⁷ Ĩwapari pese, rowaihu iwẽ norĩ te te inharĩ za'ra zém na hã. Ma'ãpé isimirowasu'u za'ra na ãma 're romnhoré mono.

¹⁸ 'Re i'awaihu'u mono na, ãma 're asipo're pu'u u'âsi mono wamhã, aima 're rowẽ uptabi mono di za.

¹⁹ Uburé Danhib'apito asina 're umnhasi mono da, wa za ãma aima rowasu'u, ãhã na hã.

²⁰ 30 na ãma 're idahâimana wẽ za'ra mono zéb da hã, ãma 're idasipo'repu'u za'ra mono zém na wa tô aima rob'ui'éré. Ta norĩ hã rowaihu iwẽ hã duré roti iwẽ hã te wasu'u za'ra,

²¹ te te 're i'aipawaptob za'ra mono zéb zarina sena rotizé i'uwaibaba na 're awaihu'u mono da. Ãne wa, marĩ na da te 're asadanharĩ za'ra mono wamhã, te za i'uwaibaba na 're ida'azada'âbâ mo ãma hã.

²² Isimarĩ'õ norĩ wi, simapa waihu'u õ wẽ te, tiwi 're arĩ mono tõ, isimarĩ hã. Duré da'ãma rowairébézéb ãma, isipawapto waihu'u õ norĩ ma hã tãma 're arob'manharĩ mono tõ.

²³ E marĩ wa. Uburé Danhib'apito i'wawib za'ra isimapa'wa na 're hâimana mono wa za. Ta hã te za isimarĩ'õ norĩ ma, te te tãma 're irob'manharĩ za'ra mono norĩ ma hã te te 're arob'manharĩ wasété.

²⁴ Ihâimana wa'ro su'u siré hã 're aihâimana mono tõ.

²⁵ E marĩ wa. A hã 're ihâimana wasété mono zé isizusi na ãma romhõsi wamhã, tiwi aiwatobro dai õ wa.

²⁶ Marĩ wa'âbâ na ni'wa hâiba wapto'wa na 're aihâimana mono da hã asima wẽ õ di za.

²⁷ E marĩ wa. Da'upana marĩ wa'âbâ waihu'u õ wamhã, te za asimiwaptâ zama dasiwi âri ni, asimarĩ zu hã.

²⁸ Aihi'rata norĩ ti'a nhizârizém na ẽne te te siwi isa'ra mono hã apraba tõ, aima rob're wairob da hã.

²⁹ E aima waihu'u pese di, ni'wa sipese na te te 're iromhuri wẽ mono na hã. Ta hã tô danhipai u simiromhuri wẽ uptabi di. Tahawa tô ibâre te aré apito norĩ siré si 're hâimana.