Provébiu 21 - ꞌRe Ihâimana Uꞌâsi Mono Zadawa Wasuꞌu

¹ Ti'ai ãma apito nhimirosa'rada, Uburé Danhib'apito ma waihu'u pese di, te te tãma 're i'rui mono da hã, â nima niwĩ 're praba mono da, te te sima iwẽzéb zarina, te te tãma ipisutu ne.

² Uburé marĩ i'uwaibaba na da te 're i'manharĩ za'ra mono zém na, da te 're rosa'rata za'ra mono zahã, te Uburé Danhib'apito, dapẽ'ẽ 're, da te dasima 're iwẽ za'ra mono zé iwẽ na hã iwasété na zama te te dawi 're awaihu'u.

³ I'uwaibaba na sena na si ma'ãpé marĩ hã 're ab'manharĩ mono, Uburé Danhib'apito ma ãma tãma 're rowẽ zani mono da, danhimizama zata na ãma tãma 're i'asõpru mono zém nhipai u.

⁴ Iwasété norĩ hâimana wasétézé hã ãne; 'râwi 're isi'madâ'â ze za'ra mono zé, duré tiwẽ na sina 're iwata za'ra mono zé.

⁵ Ni'wa atãma na marĩ na te te sima ãma 're irowa'õtõ wẽ mono hã te za marĩ si'utõrĩ ãna sa'ẽtẽ na sa 're simi'wara. Duré ni'wa waptu na sa'ẽtẽ te te sima ãma 're irowa'õtõ mono hã te za marĩ zô tiwi sô 're rowaptâ'â.

⁶ Senai õ na dahâimanazéb zarina, marĩ da te dasima 're iwaibui mono hã awa'awi dawi 're isi'utõrĩ za'ra mono, dadâ'â da, 're idasisitob za'ra mono zém ne hã te dama 're hâimana, abaze mramizém ne.

⁷ Iwasété norĩ, tinhimirob'manharĩ wasété zarina, te za 'râwi 're si'uprosi. E marĩ wa. I'uwaibaba na marĩ te te 're i'manharĩ za'ra mono da hã te te siwi 're wẽ'õ za'ra mono wa.

⁸ Marĩ na upai'wa norĩ hã te bâdâdi isi'oto na 're nomro. Tane nherẽ, marĩ na upai'õ'wa norĩ hã te i'uwaibaba na si marĩ te te 're 'manharĩ u'âsi za'ra.

⁹ Wẽ di, aibâ 'ri upsibi hâpâ zasé're ãma, timro nhiti 're ihâimana mono da hã, imro isimiwati pese me 'ri 're, 're isãmra mono nhipai u.

¹⁰ Iwasété norĩ ma hã i'ru zahi, marĩ te te 're i'manharĩ wasété za'ra mono zéb da hã. Ta norĩ hã duré da'ãma 're siwamri waihu'u za'ra mono õ di.

¹¹ Da'ãma 're iwa'ẽ mono ma, da te tãma rob'manharĩ wamhã, te za simirosa'rata prã na 're ihâimana mono hã, ti'rãi waihu'u wẽ zé hã waihu'u. Duré isimiza'rese wẽ ma, da te tãma 're roti mono wamhã, te za rowaihu iwẽ hã te te tãma sina 're hâimo.

¹² 'Re ihâimana u'âsi mono, sena uptabi 're ihâimana mono hã te iwasété norĩ nhorõwa hã te te 're ab'madâ'â. Taha zarina te ropipa hã te te tãma 're apisutu.

¹³ Ni'wa isimarĩ'õ norĩ hârâ te te wapari tõ da, sipo're nhidâ wamhã, õhõ hârâ zama duré da te isada'âbâ da hã mare di.

¹⁴ Ni'wa asada isahi ma, taré asõprubzé pi'uriwi tãma sõmri wamhã, asada isahizé hã te za tiwi ai'utõ.

¹⁵ Sena na i'uwaibaba na da te dasima 're rowairébé za'ra mono wamhã, te za iwẽ norĩ si te te sima 're romhu'u za'ra. Tane nherẽ, iwasété norĩ si te za duré pẽ'ẽwara na si 're hâimana za'ra.

¹⁶ Ni'wa tinhimiza'rese wẽ te te rẽme wamhã, te za 're idadâ'â za'ra mono zép te na si oto 're hâimana.

¹⁷ Ni'wa te te sima irowẽ da si niha na tihâimanazé ma, 're sisõmri mono wamhã, te za marĩ zô tiwi sô 're ro'wanhi'riti. Ni'wa duré uwa 'rãi wa'u isé, duré dasa iwẽ te te sima 're sawi mono wamhã, niwamhã simarĩ pese na 're ihâimana mono da hã mare di.

¹⁸ Sena na 're ihâimana za'ra mono norĩ hã te za robzépata hawimhã 're sisõ'reptu za'ra. Duré iwasété norĩ si te za iwẽ norĩ nhowa're'remhã te te 're robzépata za'ra.

¹⁹ Wẽ di aibâ a'ubuni wi timro nhiti 're ihâimana mono da hã, imro isimiwati pe isiwapsari zei me 're isãmra mono nhipai u.

²⁰ I'rãi waihu'u wẽ norĩ, te tinhimarĩ na ibâ na si 're hâimana za'ra, dasa norĩ iwahuré na si. Tanei õ di, isimiza'rese'õ norĩ hã. Ta norĩ hã te taré uburé tinhimarĩ marĩ na si te te 're uprosi za'ra.

²¹ Ni'wa isimizawi pe sena na 're ihâimana mono, te za 're ihâimana hâ mono zé hã duré da te dasiwi 're iwazé pese mono zé hã, duré i'uwaibaba na si da te tãma 're irowairébé mono zé hã sina uwaimra.

²² I'rãi waihu'u wẽ hã te za 'ri nho'õmo 're, isib'ru 're ihâimana za'ra mono norĩ ãma ai'uté. Te za duré i'wawi wa'ra tãma i'umnhasi za'ra hã tiwi prub za'ra.

²³ Ni'wa niha na timreme zani wi 're si'madâ'â pese mono wamhã, te za ropire te te sisô iwazere nhiti hã 're hâimana.

²⁴ 'Re isi'madâ'â ze mono waptẽrẽzé hã, da'ãma 're iwa'ẽi mono na. Ta hã te simiwazéb õ na 'râwi 're si'madâ'â zei u'âsi.

²⁵ Iwa'a, marĩ na te te sima 're irob'ruiwapari mono na te za 'râwi tinhimirosa'rata na taré 're sipãrĩ niha da ne, duré niwamhã romhuri na tinhib'rada hã te te 're nomri mono õ wa.

²⁶ Bâtâ wahuré na te ta hã marĩ zô si te te sima 're rob'ruiwapari. Tane nherẽ, iwẽ norĩ, te marĩ hã sawi ãna te te dama 're sõmri za'ra, sõprum na hã.

²⁷ Danhimizama zada iwasété norĩ, Uburé Danhib'apito ma da, te te 're isõmri za'ra mono, tãma hã 'ru ti. Duré da te dasima 're irosa'rata waima za'ra mono zarina, da te 're sõmri za'ra mono wamhã, ta hã wasété uptabi di.

²⁸ Sena na dawasu'u'õ'wa hã te za da te 're mreme nhihâri za'ra. Tane nherẽ, damreme wapari wẽ 'wa si te za da te 're wapari zei pese za'ra.

²⁹ Sena na 're ihâimana mono te za 'râwi tihâimana wẽ zém na hã 're si'wamnhasi. Tane nherẽ, iwasédé hâimana si'ahâ nherẽ, te za sadawa nhipese na tihâimana wẽ zém na 're si'wamnhasi, da te 're wẽsãmri za'ra mono da.

³⁰ Ti'ai ãma rowaihu hã duré da'rã nhimiza're hã, Uburé Danhib'apito da hã siptete waihu'u õ di.

³¹ Dasi'wapé da, te za awaru hã da te dasima 're bazadâ za'ra. Tane nherẽ, Uburé Danhib'apito si te za niha hã da'ãma ai'utézé hã te te dama 're anhomri.