Provébiu 20 - ꞌRe Ihâimana Uꞌâsi Mono Zadawa Wasuꞌu

¹ Ni'wa â wa're te te 're hâsi za'ẽtẽ mono wamhã, te za da'ãma 're wa'ẽ. Duré â siwamnarĩ te te 're ihâsi mono zarina, te za dasi'ahâri hã te te 're azani. Â siwamnarĩ ma isib'uwa norĩ hã isimiza'rese wẽ tãma 're hâimana za'ra mono õ di.

² Apito 're isahi mono zé hã aiwa hu'u zérépa wairõ ne te 're hâimana. Duré apito ni'wa te te sina siti'rui wazere wamhã, te za 'râwi romnhimimnha hã sisada waze, tihâimanazéb da.

³ Uburé isimiza'rese'õ norĩ te waptu na tisi'wapé na hã dame 're hâimana za'ra. Ni'wa dasi'wapé nhiti 're ihâimana mono si dama wazéb u'âsi di.

⁴ Rob're'wa iwa'a hã, rob'rezé uwaibaba te te iti'ai hâipo'o mono õ hã, te te dame 're iroptehâri mono da hã mare di.

⁵ Dapẽ'ẽ 're, 're idanhimirosa'rata za'ra mono zé hã aiwa ab're 'rehâ 're, â ihâimana ne hã. Tane nherẽ, ni'wa i'rãi waihu'u wẽ ma hã tãma waihu'u pese di, te te dawi 're i'ahâi'ré mono da hã.

⁶ Da'ahâ na te dasiwaihu i'umnhasi na 're dasiwasu'u za'ra. Tane nherẽ, e 'wa dasiwaihu umnhasi uptabi na 're ihâimana mono, da te isõpẽtẽ da bâ. Waihu'u õ di.

⁷ Aibâ sena na 're ihâimana mono hã te i'uwaibaba na si 're hâimana. Tahawa te i'ra norĩ hã robze sina 're hâimana za'ra.

⁸ Apito te te dama 're arowairébé mono da, tinhamrazém na 're simasisi mono wamhã, te za awa'awi marĩ na da te 're i'upai mono zé hã te te 're ab'madâ'â.

⁹ E 'wa ãne hã te te nharĩ waihu'u pese di: “Wa tô ĩsipese, ĩpẽ'ẽ 'remhã; tahawa ĩwasété ãna wa oto 're ĩhâimana.”

¹⁰ Uburé Danhib'apito ma, senai õ na marĩ pire pibuzé hã tãma 'ru ti.

¹¹ Ai'uté marĩ te te 're i'manharĩ za'ra mono zéb zarina 're ihâimana za'ra mono zé hã te za da te 're waihu'u za'ra, isadawa nhipese õ na duré iwẽ na zama.

¹² Uburé Danhib'apito ma tô wato hã te te wama 're ab'manharĩ, wa te ãma 're irob'madâ'â za'ra mono zéb da hã. Duré wapo're, ãma 're iwanhimipari za'ra mono zéb da hã ma tô te te wama 're ab'manharĩ.

¹³ Aptâ'â si hã asima 're sawi mono tõ. Ãnei õ wamhã, asimarĩ ãna te za 're aihâimana mo. 'Re atopo'o su'u mono, asa 're romnhimi'wara mono da, asazéb da hã.

¹⁴ Rob'uipra'wa hã te za tinha ãne: “Wa'âbâ za'ẽtẽ di ã hã”. Tane nherẽ, oto watobro parimhã, 'râwi isi'madâ'â ze zarina te za dama siwasu'u, te te irob'uipra wẽ na hã.

¹⁵ Ẽtẽ waipo pré oru hã ahâ na te 're hâimana za'ra, duré ẽtẽ waipo iwa'âbâ za'ẽne hã. Tane nherẽ, da'rãi waihu'u wẽ zarina damremezé hã iwa'âbâ za'ẽtẽ uptabi, ta hã.

¹⁶ Ni'wa dasiré a'uwẽ'õ hâiba wapto'wa na marĩ wa'âbâ'wa da, dama 're hâimana mono da, te te sima wẽ wamhã, te za ti'uza hã sena na te te ãma 're idapawa'âbâ mono zé te te roptété da hã aima tisõ.

¹⁷ Sena na dahâimana õ zarina dasa da te dasima 're iwaibui mono hã, isei uptabi. Tane nherẽ, da te 're huri mono parimhã, te za oto dazadawa na supara ne hã 're simi'wara.

¹⁸ Dama roti pire 'manharĩzé hã wẽ di, danhimirowa'õtõ 'manharĩzéb da hã. Duré ni'wa dasi'wapéi u watobro da wamhã, te za a'â marĩ na tãma rowasu'uzé hã dawi waptẽ, iwẽ hã.

¹⁹ Dabâsi zei'wa norĩ hã te za dasi'rep si marĩ dama 're ihâimana za'ra mono na hã te te ãma dawi 're aropé. Tahawa imreme hâ norĩ nhiti romhâ na 're aihâimana mono.

²⁰ Ni'wa timama ãma, duré tina ãma te te dama ãma wasété zahuré wamhã, te za ihâimanazé hã tiwi ai'utõ, rob'uiwẽzé hã da te 're simroi mono wa, robra uptabi si oto ihâimana mono ne.

²¹ Waptu na 're idasisimarĩ pese za'ra mono hã niwamhã te te ãma dama 're irowẽ zani za'ra mono da hã mare di.

²² Ãne hã nharĩ tõ: “Ĩma rob'manharĩ wasété 'wai ma, wa za ãma tãma wa'rã, ĩsi'ruiwa'âbâ da!” Uburé Danhib'apito si 'madâ'â, niha hã taha si te te aima hiri wẽ da, aihâimanazé hã.

²³ Uburé Danhib'apito ma, senai õ na marĩ pire pibuzé hã tãma 'ru ti.

²⁴ Uburé Danhib'apito si te tô te te 're da'anhimro. Ãne wa, e niha te za bété ni'wa 're imorĩzé hã sina waihu'u.

²⁵ 'Re ihâimana u'âsi mono ma, marĩ na ropisutu wana ré, a'â ãma rosa'rata pese. E marĩ wa. Taha parimhã za asiwẽ'õ dâ'âsina.

²⁶ Apito i'rãi waihu'u pe, te za tiwasédé te te 're i'manharĩ za'ra mono norĩ wi hã te te tiwi 're a'upsibi nhamra. Ãne wamhã, te za ãma siwamri za'ra ãna, te te tãma 're arob'manharĩ.

²⁷ Uburé Danhib'apito ma tô dapẽ'ẽ 're danhimirosa'rada hã dama tisõ, ãma 're idasiwaihu'u za'ra mono zéb da hã. Tahawa, ni'wa 'râwi tihâimanazém na hã siwi simani waihu'u õ di.

²⁸ Dama i'rãnho'õmo nhimizawizém na 're ihâimana mono zé hã duré dama i'umnhasizém na 're ihâimana mono zé hã te za te te 're siptete, tinhimi'madâ'âzém na te te ãma uzusi da hã.

²⁹ Ipréduptém norĩ nhiptetezém na ãma datob'uzu za'ẽtẽ za'ra di. Duré ihi norĩ nhi'a zéré rã na zama hã ãma datob'uzu za'ẽtẽ za'ra di.

³⁰ Da'ahârizé te za danhimi'manharĩ wasétézé hã te te dama 're apari, iwẽ na si we 're dahâimana za'ra mono da oto.