Provébiu 18 - ꞌRe Ihâimana Uꞌâsi Mono Zadawa Wasuꞌu

¹ Ni'wa dasiré 're hâimana mono da, te te sima 're iwẽ mono õ hã te za tihâimanazém na si 're si'madâ'â. Te za duré uburé roti iwẽ hã te te siwi 're awẽ'õ.

² Isimiza'rese'õ marĩ te te iwaihu'u da hã te te sima 're wẽ mono õ di. Taré te za tinhimirosa'rata si te te dama 're anhamra.

³ Dawasété zarina, danhisi wasédé. Duré dawazéb õ zarina, danhisi upto.

⁴ Da'rãi waihu'u wẽ zarina, damreme hã aiwa â 'rehâ ne hã te 're hâimana. Duré rowaihu'u pese 'wai mreme hã â 're ipraba u'âsi mono ne, 'ré waihu'u õ di.

⁵ I'uwaibaba õ di, marĩ 'manharĩ wasété 'wa norĩ niwĩ, da'ãma rowairébé'wa 're ihâimana mono da hã, duré marĩ 'manharĩ wasété õ 'wa norĩ ma, ibâ na rowairébé te te i'manharĩ õ na ihâiba hã.

⁶ Isimiza'rese'õ, timreme zahi zarina, te za dasi'wapé hã te te 're azani. Te za duré ti'ahârizé hã te te sisada ãma 're azani.

⁷ Isimiza'rese'õ nhimirobzanhamrizéb zarina te za ti'uprosizé hã te te sima ãma 're sani. Duré timreme na te za sisõwada, abaze mramizém na.

⁸ Dabâsi zei'wa norĩ mreme hã aiwa dasai wa'õtõre ise, dapẽ'ẽ u 're isisisi mono ne hã te 're hâimana.

⁹ Ni'wa isimiromhuri 'wamnha'a hã aiwa dawi marĩ wamnarĩ'wa ne hã te 're hâimana.

¹⁰ Uburé Danhib'apito nhisi hã aiwa 'ri 'rãihâ dasimapazé isiptete ne hã te 're hâimana. Taha tẽme te sena na i'uwaibaba na si 're ihâimana za'ra mono norĩ hã 're nomro, sima iwẽ na iwa 're hâimana za'ra mono da hã.

¹¹ Isimarĩ pese norĩ hã te te 're rosa'rata za'ra, isimarĩ i'wawib za'ra 're isimapa za'ra mono na hã, aiwa 'ri nho'õmo 'wawi wa'ra 'rãihâ isiptede 're ihâimana za'ra mono ne.

¹² 'Râwi 're idasi'madâ'â ze za'ra mono na hã te za ãma 're dasiwamnarĩ za'ra. Tane nherẽ, ni'wa dama wapu na 're isi'madâ'â mono zarina, te za da te dasiwi 're wazé pese.

¹³ Ni'wa te te dawapari 'rãiwa'õmo õ ré, timreme na õne haré te te ãma dazada'âbâ wamhã, te za tinhimiza'rese'õ na hã sihâi'ré. Te za duré tiwi tirowazé.

¹⁴ Dapẽ'ẽ 're rowẽzém na danhiptede hã te za dahâzé wamhã, te te 're da'a'upari. Tane nherẽ, dapẽ'ẽ 're dawi 're irobzei'õ za'ra mono wi hã ni'wa tiwi 're sima'wara waihu'u mono õ di.

¹⁵ I'rãiwaihu'u wẽ 're ihâimana mono hã te õne u'â tipẽ'ẽ na marĩ te te 're iwaihu'u mono da hã sô 're si'wapé.

¹⁶ Dama ipire ma nharĩ da, asima wẽ wamhã, asibzari taré tãma âri, sitẽme te te ai'âri su'u da.

¹⁷ Ni'wa hã imorĩ'rata na si'wawi simapa da isiwasu'u na hã te za sena newa ãma rosa'rata za'ra ni. Tane nherẽ, isiré ihâiba amo te te oto sadanharĩ wamhã, te za niha hã aimawi hã ãma waihu'u za'ra ni.

¹⁸ Te te dama 're irowairébé za'ra mono 'ri 'remhã isiptete norĩ sisada sima'wara wamhã, te za ẽtẽre ui'éré ré iwazéb zahi hã da te 're wabzuri, taha zarina te te tãma ãma 're rowairébé zahuré mono da hã.

¹⁹ 'Ri nho'õmo 'wawi wa'ra isiptete na da te ãma 're i'ai'uté za'ra mono nhipai u pire uptabi di, dasiwaihu'u me da te dasima 're pẽtẽ za'ra mono wa, apâ dasina 're idasihâibatob za'ra mono da hã. Damreme na dasi'wapé hã 'ri nho'õmo tẽme danhisisizé 'ridawa za'ẽne da te dawi 're itété tete za'ra mono ne hã te 're hâimana.

²⁰ Uburé marĩ na 're inharĩ mono zéb zarina, te za marĩ hã asô 're pusi, iwẽ hã duré iwasété zama.

²¹ Danhoto na damreme hã siptete di, isiminho'reptu zarina, ãma 're idahâimana za'ra mono zéb da hã. Duré ãma dapãrĩ da hã tô siptete di. Tahawa, damreme zarina te za tô niha hã da te dasima 're sani za'ra, iwẽ hã.

²² Ni'wa timro da, pi'õ te te 'manhopẽtẽ wamhã, tãma irowẽ uptabi zép si, te za sõpẽtẽ. Ta hã, Uburé Danhib'apito, aibâ te te iwẽsãmrizé te wasu'u.

²³ Isimarĩ'õ norĩ hã te za wapu na dawi rowaptẽ. Tane nherẽ, isimarĩ pe hã te za timreme tete na hã ãma sada'â.

²⁴ Marĩ u'âbâ si dasisawizé hã, õne u'âsi ãma 're dasisawi za'ra mono õ di. Tane nherẽ, dasiwaihu'u uptabi te dama 're hâimana, dasisãnawã 'râwi nhipai u hã.