Provébiu 16 - ꞌRe Ihâimana Uꞌâsi Mono Zadawa Wasuꞌu

¹ Dapẽ'ẽ 're da te 're irowa'õtõ za'ra mono ré hã te za 're dahâimana za'ra. Tane nherẽ, te za Danhib'apito 'Re ihâimana u'âsi mono si niha hã te te dama 're apisutu.

² Uburé marĩ i'uwaibaba na da te 're i'manharĩ za'ra mono zém na da te 're rosa'rata za'ra mono zahã, te Uburé Danhib'apito, dapẽ'ẽ 're, da te dasima 're iwẽ za'ra mono zé iwẽ na hã iwasété na zama hã te te dawi 're awaihu'u.

³ Ma'ãpé 'Re ihâimana u'âsi mono wi, asimirowa'õtõ na iwẽ na te te 're aipawapto mono da, tiwi 're waptẽrẽ mono. Tawamhã iwẽ na te za tô asimirowa'õno hã aima 're hâimana.

⁴ Marĩ da hã, Uburé Danhib'apito, uburé marĩ hã ma tô te te 're ab'manharĩ. Taha zarina, iwasété norĩ ma, ma tô bâdâ isi'utõrĩzéb da hã te te tãma 're apisutu.

⁵ Uburé Danhib'apito ma, 'râwi tipẽ'ẽ na 're isi'madâ'â ze za'ra mono norĩ hã tãma 'ru ti. Tahawa te te tãma irob'manharĩ za'ẽtẽ za'ra zé wi hã tô sena tiwi simani waihu'u za'ra õ di za.

⁶ Ni'wa hã 'Re ihâimana u'âsi mono te te 're sawi pese mono wamhã, duré sena na tãma 're hâimana mono wamhã, iwasédé hã te te ãma 're ab'madâ'â mono õ di za. Duré ni'wa, Uburé Danhib'apito te te 're iwazé mono hã te za marĩ iwasété wi hã tiwi sina 're hâiba za'o u'âsi, romhâ na.

⁷ Uburé Danhib'apito hã, ni'wa ihâimanazém na te te wẽsãmri wamhã, te za isitob'ru norĩ ime rowẽ na 're hâimana za'ra mono da hã te te ãma tiwi 're azaprĩ, ihâimanazém na hã.

⁸ Sena na 're idahâimana za'ra mono norĩ ma, suru na marĩ dama 're ihâimana za'ra mono hã wẽ uptabi di, senai'õ na 're idahâimana za'ra mono norĩ ma, marĩ ahâ na tãma 're ihâimana za'ra mono nhipai u.

⁹ 'Râwi danhimirowa'õtõ 'manharĩ na hã te tô 're dahâimana za'ra. Tane nherẽ, te 'Re ihâimana u'âsi mono si 're idahâimana za'ra mono zé hã te te dama 're anhimro.

¹⁰ Apito norĩ hã te tizaihâ na mreme pire na hã te te dama 're nharĩ za'ra, tizaihâ na te te 're daza'réi wasété za'ra mono ãna.

¹¹ Sena uptabi marĩ pire pibuzé hã Uburé Danhib'apito hawimhã te 're hâimana za'ra, i'uwaibaba na si uburé marĩ da te dasima 're ipire pibu za'ra mono zéb da hã.

¹² Apito norĩ ma, iwasédé da te 're i'manharĩ za'ra mono zé hã tãma 'ru ti. E marĩ wa. I'uwaibaba na si te te 're ida'a'madâ'â mono zé u'âbâ hã siptete na 're hâimana mono wa.

¹³ Apito norĩ hã sena na 're imreme zusi mono norĩ ãma te za te te sima 're rowẽ. Duré i'uwaibaba na si 're imreme zusi mono norĩ si tãma isawi pese za'ra hã.

¹⁴ Apito 're isiti'rui mono zé hã dama simimnhasi uptabi di, dadâ'â da hã. Tane nherẽ, i'rãiwaihu'u wẽ hã te za te te 're hâimana wahâ, atãma na hã.

¹⁵ Apito ubu to sina ihâimanazé hã dahâimanazé iwẽ te te dama 're i'apisutu mono zé, te wasu'u. Duré te te 're ida'awẽsãmri mono zé hã tã a'ẽ ta'a wi hâiwa nhirõtõ hawi 're ita'a za'ra mono zém ne hã te 're hâimana.

¹⁶ Wẽ uptabi di ẽtẽ waipo pré oru nhipai u, da'rãiwaihu'u wẽ, da te 're iwaihu'u za'ra mono da hã. Duré wẽ uptabi di ẽtẽ waipo prã prata nhipai u, danhimirowaihu'u wẽ na 're idahâimana za'ra mono zé hã.

¹⁷ Sena na i'uwaibaba na 're ihâimana za'ra mono norĩ hã te za bâdâdi iwẽ na hã iwasété nhiti 're nomro. Duré ni'wa bâdâdi na timorĩzé te te sima 're i'madâ'â pese mono hã te za tihâimanazém na 're sisõ'reptu.

¹⁸ 'Râwi 're idasi'madâ'â ze za'ra mono zé hã, te za da'uprosizéb u te te 're da'ãwisi za'ra. Duré dasina 're idawata za'ra mono zé hã, te za dahâimanazém na 're idarere'e mono zé hã dama 're hâimana za'ra.

¹⁹ Dapẽ'ẽ na 're dasi'madâ'â ze za'ra mono õ zarina isibrob'õ norĩ siré 're idahâimana za'ra mono zé hã wẽ uptabi di, 're isi'madâ'â ze za'ra mono norĩ siré danhimarĩ u 're idahâimana za'ra mono zém nhipai u.

²⁰ Ni'wa rotizé te te wapari pese wamhã, te za rowẽzé hã tãma 're hâimana. Duré ni'wa Uburé Danhib'apito te te sina 're i'umnhasi mono hã te za robze na si 're hâimana.

²¹ Ni'wai ma ipẽ'ẽ na rowaihu iwẽ tãma 're ihâimana mono hã ta hã isimirowaihu'u wẽ uptabi. Duré ni'wa timreme wẽ na te te dama 're roti mono wamhã, te za da te ãma 're saze su'u za'ra.

²² Rowaihu'u wẽ hã te i'rãiwaihu'u wẽ norĩ ma, rowẽ na 're idahâimana za'ra mono na'rata zém na tãma 're hâimana za'ra. Tane nherẽ, simiza'rese ãna 're ihâimana za'ra mono norĩ hã te ti'ahârizép si te te sisô 're sani za'ra, tinhimiza'rese'õ zarina.

²³ 'Rãi waihu'u wẽ na 're ihâimana za'ra mono norĩ hã te te 're nharĩ za'ra mono wana ré, te za te te sima 're rosa'rata pese za'ra a'â, waimri na. Tahawa te te dama 're i'awaihu'u mono zém na hã te za da te ãma 're saze su'u.

²⁴ Damreme iwẽ hã aiwa ropĩ isei uptabi ne te 're hâimana, dapẽ'ẽzani ma hã. Duré dahâiba pesezéb da hã wẽ uptabi di, damreme iwẽ hã.

²⁵ Bâdâdi i'uwaibaba na iharé newa ãma 're danomro mono zahã, te za dadâ'âzéb u hã te te 're da'a'ãwisi.

²⁶ Mra, da te 're isépata za'ra mono zarina, te za dasima iwẽ na da te sô 're romhuri pese za'ra. Mrap tõ da hã, te tô sô 're dasiwasutu za'ra.

²⁷ Iwasété norĩ hã marĩ iwasédé te te 're i'manharĩ za'ra mono da si, te sima sô 're sõpré u'âsi. Timreme na te unhama ro'o ne dahâimanazé hã te te dawi 're uprosi za'ra iwẽ hã.

²⁸ Iwasété norĩ hã te za damreme na dasi'ahâri hã te te 're sani za'ra. Te za duré dasiwaihu'u iwẽ siré 're idahâimana za'ra mono zém hawimhã da'ãma 're siwãnhizari za'ra.

²⁹ Rowasété 'manharĩ zei 'wa hã te za tisiwaihu hã te te sitẽme 're 'wani za'ra, bâdâdi iwasété na te te siré 're anhimroi mono da.

³⁰ Ni'wa hã dama 're tomre mono wamhã, duré dama 're saihâ si'rãmi mono wamhã, marĩ iwasédé te te 're i'ab'manharĩ mono da si, te tô te te sima 're rosa'rata.

³¹ Sena na i'uwaibaba na 're ihâimana za'ra mono norĩ hã te za 're ihâimana hâ za'ra mono zé hã te te sina 're sõ'õtõ za'ra. Tahawa te isi'a zarob'a hã danhoprezé iwẽ uptabi na hã tãma 're hâimana za'ra.

³² Iwa'ro su'u õ norĩ hã wẽ uptabi di, isib'ru norĩ, isiptete norĩ nhipai u. Duré 'ri ahâ ãma da te 're i'ai'uté mono zém nhipai u, marĩ da te 're 'manharĩ za'ra mono tõ da, dasiwi 're idanhimi'rãmi za'ra mono zé hã wẽ uptabi di.

³³ Ẽtẽre ui'éré ré iwazéb zahi hã te za da te 're sãmra, niha marĩ, da te 're i'manharĩ za'ra mono zé, da te 're waihu'u za'ra mono da hã. Tane nherẽ, Uburé Danhib'apito hawip si marĩ pisutuzé hã te 're hâimana.