Provébiu 15 - ꞌRe Ihâimana Uꞌâsi Mono Zadawa Wasuꞌu

¹ 'Re dazahi za'ra mono nherẽ, damreme wẽ na da te ãma 're idazada'âbâ za'ra mono zé hã, te za atãma na dahâimanazéb u hã dawi ãma saprĩ ni. Tazahã, damreme tete na dazada'âbâzé hã te za dazahi hã ãma dama hâimo ni.

² I'rãi waihu'u wẽ mreme hã da te 're wapari za'ra mono wamhã, te za rowaihu iwẽ hã da te dasima 're wẽ za'ra. Tazahã, isimiza'rese'õ norĩ hã te za siwa'ru timreme wasété na si 're mreme zusi.

³ Uburé Danhib'apito, titõmo na te ropâ te te 're rob'madâ'â. Iwẽ norĩ hã te duré iwasété norĩ me uburé te te 're a'madâ'â.

⁴ Damreme iwẽ hã te za rowẽ na 're idahâimana za'ra mono zé hã te te dama 're sõmri za'ra. Tazahã, dazadawa nhipe hã robzei'õ te te ãma dama 're isani za'ra mono na hã te za te te ãma 're danhimro, dapẽ'ẽ 'remhã.

⁵ Isimiza'rese'õ hã te timama nhimiroti hã te te siwi 're wẽ'õ pese. Tazahã, ni'wa tihâimanazé pese zé te te sina 're i'uzei mono hã, te 'rãi waihu'u wẽ na 're hâimana.

⁶ Wẽ na 're ihâimana mono nhorõwa 'remhã te marĩ ahâ na hã 're simi'wara. Tazahã, iwasété norĩ ma, te isimarĩ tãma 're ihâimana za'ra mono hã ropire te te tãma 're sõmri za'ra.

⁷ I'rãi waihu'u wẽ mreme hã te rowaihu iwẽ na hã te te ãma dama 're ropé za'ra. Tazahã, isimiza'rese'õ norĩ, ãne hã te te dama 're 'manharĩ za'ra mono õ di.

⁸ Danhimizama zada iwasété norĩ, Uburé Danhib'apito ma, te te 're isõmri za'ra mono hã tãma 'ru ti. Tane nherẽ, iwẽ norĩ, tãma 're imreme zusi mono zép si, tãma wẽ uptabi di.

⁹ Uburé Danhib'apito hã te iwasété norĩ hâimanazé hã te te siwi 're awẽ'õ pese. Tazahã, i'uwaibaba na si 're ihâimana za'ra mono hã te te 're azawi pese.

¹⁰ Ni'wa hã bâdâdi iwẽ te te rẽme zahi wamhã, te za rob'manharĩ pipa zé hã sitẽme ãwisi. Duré ni'wa tihâimanazé pese zé hã te te sina 're uzei mono õ wamhã, te za duré dârâ.

¹¹ Uburé Danhib'apito nho'remhã, 're idadâ'â za'ra mono zéb u hã, te 'ridawa haré na 're romhâimana. E niha te aré bété ni'wa tipẽ'ẽ 're tinhimirosa'rada hã tiwi suwa.

¹² Da'ãma 're iwa'ẽ mono ma hã tãma wẽ'õ di, ihâimanazé, da te tãma ipese da hã. Tahawa, niwamhã i'rãi waihu'u wẽ norĩ nhimirotizéb zô hã sima 're tob'uzui mono õ di.

¹³ Dapẽ'ẽ 're rowẽzé hã te za da'ubu zei pese. Tazahã, robzei'õ hã te za niha na dapẽ'ẽzei'õ hã dama tisõ.

¹⁴ I'rãi waihu'u wẽ norĩ hã te rowaihu iwẽ zô si sima 're sõpré. Tane nherẽ, simiza'rese ãna 're ihâimana za'ra mono hã te tizaihâ na si te te 're rob'masi za'ra, tinhimiza'rese'õ zarina.

¹⁵ Robzei ãna 're ihâimana za'ra mono norĩ hã te za bâtâ bâre ropire na 're hâimana za'ra. Tane nherẽ, pẽ'ẽ toi u'âsi 're ihâimana za'ra mono norĩ hã te za tihâimana ze zém na 're hâimana u'âsi za'ra.

¹⁶ Wẽ uptabi di, danhimarĩ'õ, Uburé Danhib'apito da te 're iwazé pese mono zé hã, danhimarĩ pe dasina dahâtâ'â za'ẽtẽ na 're idahâimana mono zém nhipai u.

¹⁷ Wẽ uptabi di duré, dasai wa'aba zém norĩ 're idasisawi pese za'ra mono siré da te 're ihuri mono da hã, dasisada 're idanhiti'ru za'ra mono ãma powawẽ hâi pese nhi hã da te 're ihuri mono nhipai u hã.

¹⁸ I'rãi wa'ro su'u norĩ hã te za damreme na dasi'wapé hã te te 're poto za'ra. Tane nherẽ, atãma na 're ihâimana za'ra mono hã te za atãma na te te 're da'rãiwahâ za'ra.

¹⁹ Iwa'a norĩ 're inomro mono zé bâdâdi na hã 'wabzéré hã ahâ di. Tane nherẽ, sena na 're ihâimana za'ra mono norĩ nhibâdâdi hã iharé na si.

²⁰ Da'ra i'rãi waihu'u pe hã te za timama ma, te te ãma tãma 're rowẽ zani. Tane nherẽ, da'ra isimiza'rese'õ hã te za tarére na tina te te 're i'madâ'â mono zarina hã iwazéb õ na 're hâimana.

²¹ Isimiza'rese'õ norĩ te tinhimirosa'rata'õ zarina, marĩ na te te sima ãma 're rowẽ za'ra. Tane nherẽ, i'rãi waihu'u wẽ hã te za bâdâdi awa'awi na 're mo, sipi'rai ãna marĩ zô hã.

²² Ni'wam norĩ hã tãma roti ãna 're hâimana za'ra mono wamhã, te za marĩ na simirowa'õtõ nhib'uwa na hã 're hâimana za'ra. Tane nherẽ, tãma roti pese na 're ihâimana za'ra mono norĩ hã te za iwẽ na te te sima 're romhâimana za'ra.

²³ Marĩ na da te 're dazada'âbâ wẽ za'ra mono wamhã, te za dama ãma rowẽ wazere ni. Duré danhimiroti wẽ bâtâ zarina da te dama ãma 're irowasu'u za'ra mono hã wẽ uptabi di.

²⁴ Isimiza'rese wẽ norĩ hã bâdâdi na rowẽ na 're idahâimana hâ za'ra mono zém na si te 're nomro. Bâdâdi, 're idadâ'â za'ra mono zép te na 're inomro mono da hã mare di.

²⁵ Uburé Danhib'apito hã te 'râwi 're isi'madâ'â ze za'ra mono norĩ nhorõwa hã te te tiwi 're apru. Tane nherẽ, te imrotõ norĩ nhimarĩ hã te te tãma 're ab'madâ'â pese.

²⁶ Uburé Danhib'apito, iwasété norĩ nhimirosa'rada hã te duré te te siwi 're awẽ'õ pese. Tãma iwẽ hã, damreme wẽ na da te dasima 're irobzanhamri za'ra mono si.

²⁷ Ni'wa senai õ na 're ihâimana mono zéb zarina, marĩ zô si sima 're rĩtĩ mono wamhã, te za ropire hã isõrõwa 're, 're ihâimana za'ra mono norĩ ma hã te te 're azani. Tane nherẽ, ni'wa dama rowairébézéb da, dama ipire norĩ ma, pi'uriwi danhibzari te te siwi 're awẽ'õ mono wapsi, te za tô rowẽ na hã 're hâimana hâ.

²⁸ I'uwaibaba na si 're ihâimana za'ra mono norĩ hã te za te te 're dazada'âbâ za'ra mono wana ré, te te sima 're rosa'rata za'ra a'â, waimri na. Tane nherẽ, iwasété norĩ zadawa hawimhã te imreme wasédé hã 're wairébé.

²⁹ Uburé Danhib'apito romhâ na te iwasété norĩ nhiti 're hâimana. Tane nherẽ, te iwẽ norĩ tãma 're imreme zusi mono zé hã te te 're awapari.

³⁰ Ni'wa ubu toi u'âsi na da te 'madâ'â wamhã, te za dapẽ'ẽ 'remhã ãma dama rowẽ waze. Duré rowasu'u wẽ hã da te wapari za'ra wamhã, dama rowẽ za'ra di.

³¹ Ni'wa hã tihâimana pese zé iwẽ hã te te sina 're uzei mono wamhã, te za i'rãi waihu'u wẽ norĩ me hã 're hâimana u'âsi.

³² Ni'wa roti iwẽ te te siwi wẽ'õ wamhã, te za 'râwi tihâimanazé hã siwi wamna. Tane nherẽ, ni'wa tihâimana pese zé te te sina i'uzei pe hã te za rowaihu iwẽ hã te te sima 're sa'ẽtẽ u'âsi mono.

³³ Ni'wa hã Uburé Danhib'apito te te 're wazé pese mono wamhã, te za tinhimiza'resezé hã waihu'u. Duré ni'wa dama wapu na 're isi'madâ'â mono zarina, te za da te dasiwi 're wazé.