Provébiu 14 - ꞌRe Ihâimana Uꞌâsi Mono Zadawa Wasuꞌu

¹ Pi'õ i'rãi waihu'u wẽ hã tinhorõwa 'madâ'â wẽ 'wa na te za 're hâimana. Tane nherẽ, isimiza'rese'õ sihawim na tinhib'rata na tinhorõwa 'remhã romhâimanazé iwẽ te za te te 're a'uprosi pese.

² Ni'wa sena na 're ihâimana mono hã te za Uburé Danhib'apito te te 're wazé pese. Tane nherẽ, hâimana nhipese na bâdâdi aimawi na 're imorĩ hã te Uburé Danhib'apito te te 're wazé mono ãna 're hâimana.

³ Simiza'rese ãna 'râwi 're isi'madâ'â ze za'ra mono norĩ hã te timreme zarina robzépada hã te te sitẽme 're ãwisi za'ra. Tane nherẽ, isimiza'rese wẽ norĩ hã te 'râwi timreme na si'wawi 're simapa za'ra.

⁴ Powawẽ ti'ai hâipo'o'wa da, dama hâimana õ wamhã, amnho hã dama watobro õ di za. Tane nherẽ, powawẽ isiptede dama ihâimana zarina amnho tehârizé hã sa'ẽtẽ di za.

⁵ Sena na dama dawasu'u hã dazadawa nhipese na hãi õ di. Tane nherẽ, senai'õ na dama dawasu'u hã te dazadawa nhipese na hã da te 're nhipti ahâ za'ra.

⁶ Uburé marĩ na da'ãma 're iwa'ẽ za'ra mono ti'rãi waihu'u wẽ zô 're isi'wapé za'ra mono norĩ hã, niha hã ti'rãi waihu'u wẽ na tihâimanazé te te 're isõpẽtẽ za'ra mono da hã, mare di. Tane nherẽ, simiza'rese wẽ na 're ihâimana za'ra mono norĩ ma hã wapure di, te te 're iwaihu'u za'ra mono da hã.

⁷ Tahawa, ma'ãpé simiza'rese ãna 're ihâimana za'ra mono norĩ nhiti romhâ na 're aihâimana za'ra wa'aba mono. E marĩ wa. Ta norĩ nhimirowasu'u na hã rowaihu iwẽ hã za ãma 're sõpẽtẽ za'ra wa'aba mono õ wa.

⁸ Simiza'rese na 're ihâimana mono ma si tãma waihu'u pese di, ti'rãi waihu'u wẽ zarina, i'uwaibaba na si, za 're imorĩ da hã. Tane nherẽ, simiza'rese ãna 're ihâimana mono hã te za 'rãi waihu'u'õ zarina 're sisimini.

⁹ Simiza'rese ãna 're ihâimana za'ra mono norĩ, tiwasédé te te 're 'manharĩ za'ra mono wamhã, 're isiwẽ'õ za'ra mono da hã mare di, tarére tãma za'ra hã. Tane nherẽ, iwẽ norĩ si te za tô tiwasété pari zéb zô hã sima 're sõpré u'âsi.

¹⁰ Dapẽ'ẽ 're marĩ zépata pire hã dasi'rep si dama waihu'u pese di. Tane duré date robze hã ni'wai ma, da te ipo'o da hã waihu'u õ di.

¹¹ Iwasété norĩ nhorõwa hã te za 're siprub za'ra. Tane nherẽ, romhâ 'manharĩ na iwẽ norĩ nhib'ri si te za hâiwim haré 're simasab u'âsi.

¹² Bâdâdi i'uwaibaba na iharé newa ãma 're danomro mono zahã, te za dadâ'âzéb u hã te te 're da'a'ãwisi.

¹³ Ni'wai pẽ'ẽ 're robzei'õ tãma 're hâimana mono nherẽ, 're isihâ mono na si, ãté te za taré te te 're suwa. Duré ni'wa toi u'âsi 're ihâimana mono zé tiwi si'utõrĩ wamhã, ãté te za robzei'õ hã itẽme 're simasisi, isõwa're're tãma ihâimana da hã.

¹⁴ Iwẽ hawi 're isipizari za'ra mono norĩ hã tiwasété 'manharĩ na te te 're i'upa za'ra mono zéb zarina, te za romnhi'esezé hã te te sima 're sani za'ra. Tane nherẽ, wẽ na 're ihâimana za'ra mono norĩ hã te za ro iwẽ hã te te sima 're sani za'ra.

¹⁵ Simirosa'rata waihu'u prã na 're ihâimana za'ra mono norĩ hã te za uburé marĩ na te te 're dazaze su'u za'ra. Tanei õ di, isimiza'rese norĩ hã. Te sisõwamhã te te 're rob'madâ'â wẽ za'ra.

¹⁶ I'rãi waihu'u wẽ norĩ hã te za ropire tãma 're hâimana za'ra mono tõ da, 're si'madâ'â pese za'ra. Tanei õ di, isimiza'rese'õ norĩ hã. Te rosa'rata ãna si'aba'ré na marĩ hã te te 're 'manharĩ za'ra.

¹⁷ Ni'wa i'rãi wa'ro su hã te tô marĩ iwẽ'õ hã te te 're ab'manharĩ, isimiza'rese'õ zarina. Tane nherẽ, te 'rã nhimiza'rese na 're ihâimana za'ra mono norĩ hã atãma na 're hâimana za'ra.

¹⁸ Simiza'rese ãna 're ihâimana za'ra mono norĩ hã te tô tinhimiza'rese'õ zarina romnhi'esezé hã te te sima 're sani za'ra. Tane nherẽ, isimiza'rese norĩ hã te za i'rãi waihu'u wẽ zarina iwẽ si te te sitẽme 're sani za'ra.

¹⁹ Iwasété norĩ hã te za wẽ na 're ihâimana za'ra mono norĩ nho'remhã tãma 're siwẽ'ẽ za'ra, wapu na 're isi'madâ'â za'ra mono zarina tãma hã, tipawaptobzé te te tiwi 're waptẽrẽ za'ra mono da hã.

²⁰ Isimarĩ'õ waptoma 're idahâimana za'ra mono norĩ ma hã tãma wẽ'õ za'ra di. Tane nherẽ, isimarĩ pese norĩ si te siwaihu'u ahâ na 're hâimana za'ra.

²¹ Ni'wa tisiré hã te te 're a'ruiwapari mono wamhã, te za tiwasédé hã te te ãma 're ab'manharĩ. Tane nherẽ, ni'wa hã isimarĩ'õ norĩ ma, te te 're 'manharĩ wẽ mono wamhã, te za tô, toi u'âsi na 're hâimana.

²² E i'uwaibaba õ di bété, marĩ iwasété na si da te 're irosa'rata za'ra mono zarina, 're idasisimini za'ra mono zé hã. Tô i'uwaibaba. Tane nherẽ, marĩ iwẽ na si te te sima 're irowa'õtõ za'ra mono norĩ hã te za da te 're isawi za'ra mono zé hã, duré dasina da te 're i'umnhasi za'ra mono zé hã te te sina 're uwaimrami za'ra.

²³ Ni'wa hã simi'ẽ na te te 're romhuri pese mono wamhã, te za tihâimanazéb da hã te te sima 're azani. Tane nherẽ, ni'wam norĩ robzanhamri ma si 're hâimana za'ra mono wamhã, te za marĩ zô tiwi 're irowaptâ'â za'ra mono zé hã te te sisô 're sani za'ra.

²⁴ I'rãi waihu'u wẽ norĩ hã te za tinhimarĩ hã te te sima 're sani za'ra. Tane nherẽ, isimiza'rese'õ norĩ hã te za tinhimiza'rese õ zarina niha na romhâimanazé hã te te sima 're sani za'ra.

²⁵ Ni'wa hã sena na te te dama 're da'awasu'u mono wamhã, te za dahâimanazém na te te ãma 're da'anho'reptu. Tane nherẽ, duré ni'wa, senai õ na te te dama 're ida'awasu'u mono 'wa hã te za te te 're da'ahâiba za'ré, tizadawa nhipese na hã.

²⁶ Ni'wa hã Uburé Danhib'apito te te 're wazé mono wamhã, te za isiptete uparizé hã tãma 're hâimana, duré i'ra norĩ 'wawi dasimapazéb zama.

²⁷ Uburé Danhib'apito da te 're iwazéb za'ra mono zé hã rowẽ na 're idahâimana za'ra mono zém na'rata da hã te dama 're hâimana. Te duré 're dadâ'â za'ra mono da, 're idasisitob za'ra mono hawimhã te te 're da'azani.

²⁸ Danhib'apito hã da'ahâ uptabi ma, isi'i'rãnho'õmo na 're hâimana mono wamhã, taha si te sa'ẽtẽ na hã dama 're hâimana. Tahawa, marĩ dai õ di, da'umro ma nherẽ, 're idasi'i'rãnho'õmo za'ra mono hã.

²⁹ Ni'wa simirosa'rata ré 're ihâimana mono hã, 'rãi waihu'u wẽ ré 're ihâimana mono zé, te wasu'u. Tane nherẽ, i'rãi wa'ro su'u norĩ hã, te simiza'rese ãna 're ihâimana za'ra mono zém na hã 're sihâi'ré za'ra.

³⁰ Dapẽ'ẽ 're rowẽzé hã te za dahâiba nhiptetezé hã te te dama 're sõmri. Tane nherẽ, marĩ zô, da te dasima 're irob'ruiwapari za'ra mono zé hã aiwa dahi na dazépu'u pire te te 're idahi ware za'ra mono ne hã.

³¹ Ni'wa isimarĩ'õ norĩ ãma te te 're iro'wa'rutu mono hã, Tipoto'wai ãma te te 're iwasété mono zé, te wasu'u. Tane nherẽ, isimarĩ'õ norĩ ma, te te 're i'manharĩ wẽ za'ra mono hã, 'Re ihâimana u'âsi mono hã te te 're iwazéb za'ra mono zé, te wasu'u.

³² Ropire hã iwasété norĩ zô 're pusi mono wamhã, te za te te 're uprosi. Tane nherẽ, sena na 're ihâimana za'ra mono norĩ, tãma romnhimimnhasi na 're hâimana za'ra mono nherẽ, te i'uwaibaba na si 're ihâimana za'ra mono zéb zarina isimapazé hã tãma 're hâimana za'ra.

³³ Isimirowaihu'uzé iwẽ norĩ pẽ'ẽ 'remhã te rowaihu iwẽ hã tãma 're hâimana za'ra. Tane nherẽ, simiza'rese ãna 're ihâimana za'ra mono norĩ ma hã ãne hã tãma sa'rese za'ra õ di.

³⁴ Sena na 're idahâimana za'ra mono zé hã te za dama da'madâ'â za'ẽtẽ zé hã te te 're ab'manharĩ. Tane nherẽ, 're idasiwasété za'ra mono zé hã te za dama rowazébzé hã te te dama 're azani.

³⁵ Apito ma romhuri'wa norĩ hã te za tinhimiromhuri na te te ãma tãma 're rowẽ zani za'ra. Tane nherẽ, siséb ãna te te 're iromhuri za'ra mono norĩ hã te za isimihâzé hã te te sisada 're sani za'ra.