Provébiu 13 - ꞌRe Ihâimana Uꞌâsi Mono Zadawa Wasuꞌu

¹ Da'ra i'rãi waihu'u wẽ hã te za timama nhimiroti hã te te sina 're uzei pese. Tane nherẽ, uburé da'ãma 're iwa'ẽ za'ra mono norĩ hã marĩ na te te 're i'upa za'ra mono zé hã te te sina 're iwapari za'ra mono da hã mare di.

² Ni'wa hã timreme wẽ zarina, te za iwẽ hã te te sima 're azani. Tane nherẽ, senai'õ na 're ihâimana za'ra mono norĩ hã te te dama 're irob'manharĩ wasété za'ra mono da si, tãma iwẽ hã.

³ Ni'wa tinhimirobzanhamri wasété wi, 're sisadawa uwati mono wamhã, te za tihâimana wẽ zém na hã 're si'madâ'â. Tane nherẽ, ni'wa siwa'ru te te 're robzanhamri hâ mono wamhã, te za 'râwi tihâimana wẽ zé hã te te siwi 're uprosi.

⁴ Iwa'a hã marĩ te te sima 're 'ruiwapari u'âsi mono nherẽ, marĩ hã te te sima iwazere da hã mare di. Taré te za te te 're ro'wapé. Tane nherẽ, ni'wa simi'ẽ na siptete sina marĩ te te 're 'manharĩ mono wamhã, te za tô te te sima 're iwẽ mono hã te te sima ãma 're a'uwaimrami.

⁵ Sena na 're ihâimana za'ra mono norĩ ma hã dazadawa nhipe hã tãma 'ru ti. Tane nherẽ, iwasété norĩ hã te za dama rowazébzé hã te te dama 're sani za'ra.

⁶ Sena na 're idahâimana za'ra mono zé hã te za wasété ãna 're ihâimana za'ra mono norĩ 'wawimhã 're simapa. Tane nherẽ, dawasédé da te 're i'manharĩ za'ra mono zé hã te za te te 're da'a'uprosi.

⁷ Ni'wam norĩ hã sibro pese ne dama 're sihâi'ré za'ra mono zahã, te tô simarĩ ãna hã 're hâimana za'ra, i'uptabi na hã. Duré isiré norĩ hã simarĩ'õ ne dama 're sihâi'ré za'ra mono zahã, te duré tô sibro pese na 're hâimana za'ra, iwa'rãmi.

⁸ Isibro pese norĩ, tite rob'uiprazém na te 're sihâiba wa'âbâ za'ra, da te tãma 're amhâzépa za'ra mono wamhã. Tane nherẽ, isimarĩ'õ ma, da te i'amhâzépa da hã mare di.

⁹ I'uwaibaba na si 're ihâimana za'ra mono norĩ hã te rob'uiwẽzé te te 're irowa'a pese mono zém ne 're hâimana za'ra. Tane nherẽ, iwasété norĩ hã aiwa rob'uiwẽzé idâ'â pese ne hã te 're hâimana za'ra.

¹⁰ 'Râwi 're idasi'madâ'â ze za'ra mono zé hã te za damreme na dasi'wapézép si hã te te 're poto za'ra. Tane nherẽ, rowaihu iwẽ hã te roti iwẽ wapari zei 'wa norĩ ma si hã 're hâimana.

¹¹ Rob'uiprazé senai'õ na waptu na da te dasima 're isa'ẽtẽ za'ra mono hã te za i'arĩ na dawi sina te te 're ti'awi za'ra. Tane nherẽ, ni'wam norĩ hã atãma na suru nherẽ, te te sima 're ubumroi u'âsi za'ra mono wamhã, te za tãma sina 're hâ'â za'ra.

¹² Marĩ iwẽ zô 're idanhimipari za'ra mono zé hã dawi sô 're rowaptâ'â hâ za'ra mono wamhã, te za robzei'õ uptabi na dahâimanazé hã dama 'manha. Tane nherẽ, da te dasima 're iwẽ za'ra mono zé, i'manharĩ na, da te dasima ãma 're uwaimrami za'ra mono wamhã, dapẽ'ẽ 'remhã dama rowẽ za'ẽtẽ di za.

¹³ Ni'wa roti iwẽ te te 're wazé mono õ wamhã, te za tihâimana wasété na 'râwi 're si'u'a. Tane nherẽ, ni'wa hã roti iwẽ te te 're wazé mono wamhã, te za iwẽ si te te sima 're azani.

¹⁴ I'rãiwaihu'u wẽ norĩ nhimiroti hã rowẽ na 're idahâimana za'ra mono zém na'rata da hã te dama 're hâimana. Ta hã te za dadâ'â da, 're idasisitob za'ra mono zé wi, te te 're da'apawapto, roti iwẽ hã.

¹⁵ Isimiza'rese norĩ hã da te 're iwazéb za'ra mono zé te te si'ãma 're sani za'ra. Tane nherẽ, iwasété norĩ hã te dawaprã 're isi'utõrĩ mono zéb u 're nomro.

¹⁶ Isimiza'rese wẽ norĩ hã te uburé marĩ hã tinhimirowaihu'u wẽ zarina si te te 're 'manharĩ za'ra. Tanei õ di, simiza'rese ãna 're ihâimana za'ra mono norĩ hã. Ta norĩ hã te za õne haré tihâimana nhimiza'rese'õzé hã te te dama 're hâi'ré za'ra.

¹⁷ Romreme 'wapéi'wa norĩ iwasédé i'umnhasi'õ hã te za ropire u 're rere'e. Tane nherẽ, i'umnha hã da te 're isatõrĩ za'ra mono norĩ hã te za dahâzé'õzé hã te te dama 're ãwisi za'ra.

¹⁸ Ni'wai ma, ihâimanazém na rotizé te te 're wẽ'õ mono wamhã, te za tinhimarĩ'õzé hã sitẽme waze, duré da te 're iwazé mono õ zama.

¹⁹ Marĩ hã da te dasima 're iwẽ zahi za'ra mono, da te oto 're uwaimrami za'ra mono wamhã, wẽ uptabi di. Tane nherẽ, isimiza'rese'õ norĩ hã marĩ iwasédé te te 're irẽme za'ra mono da hã tãma wẽ'õ uptabi za'ra di.

²⁰ Ni'wa hã i'rãi waihu'u wẽ norĩ siré 're morĩ wamhã, te za i'rãi waihu'u wẽ zé hã te te sina tãma 're hâimo u'âsi. Tane nherẽ, isimiza'rese'õ norĩ siré 're imorĩ hã te za tihâimana wasété na hã 'râwi ãma 're si'u'a.

²¹ Iwasété na si 're ihâimana za'ra mono norĩ, ropire te te 're sitob za'ra mono da hã te isarina 're hâimana u'âsi za'ra. Tane nherẽ, i'uwaibaba na si 're ihâimana za'ra mono norĩ hã te za iwẽ hã te te sima 're sani za'ra.

²² Ni'wa te za iwẽ hã si'uirĩ na tisi'watébré 'ra ma, tinhimarĩ iwẽ hã tãma rẽme za'ra. Tanei õ di, iwasété norĩ nhimarĩ hã. Te za sena na 're ihâimana za'ra mono norĩ zô si, da te 're ubumro za'ra.

²³ Isimarĩ'õ norĩ nhipti'ai wamhã, ãté amnho sa'ẽtẽ na te za 're wairébé. Tane nherẽ, senai õ na 're ihâimana za'ra mono norĩ hã te te tiwi 're sawi za'ra mono wa, te za te te 're irobzuri mono hã te te 're simini za'ra.

²⁴ Ni'wa, ti'ra te te 're ahâri mono õ wamhã, tãma isawi'õzé hã te wasu'u. Duré ni'wa ti'ra te te 're sawi pese mono wamhã, te za tô simiza'rese prãi wi zahadu ré te te 're ahâri.

²⁵ Sena na 're ihâimana za'ra mono norĩ hã te tisa hã te te 're 'mahâpãrĩ u'âsi za'ra. Tanei õ di, iwasété na 're ihâimana za'ra mono norĩ hã. Te za mra hã te te 're sépata u'âsi za'ra, ta norĩ hã.