Provébiu 12 - ꞌRe Ihâimana Uꞌâsi Mono Zadawa Wasuꞌu

¹ Ni'wa hã tihâimanazém na te te upai wa, da te tãma roti wamhã, te za sima wẽ upta, te te iwaihu'u wẽ da si. Simiza'rese ãna 're ihâimana mono si tihâimana pese zé te te sina 're i'uzei mono da hã mare di za. Te za te te sina 're wẽ'õ.

² Iwẽ norĩ hã te Uburé Danhib'apito hã te te 're awẽsãmri. Tane nherẽ, wasété na te te sima 're irowa'õtõ za'ra mono norĩ si te te siwi 're awẽ'õ pese, niha hã te te tãma 're apisutu mono da hã.

³ Ni'wa iwasété si te te 're i'manharĩ mono hã te za sima romnhimimnhasi na si hã 're hâimana. Tane nherẽ, ni'wa sena na 're hâimana mono wamhã, da te irési da hã mare di, wede isari tede, rowa'u te te 're isa'o'o waihu'u mono õ ne.

⁴ Pi'õ damro hã iwẽ na si 're hâimana mono wamhã, te za imro tãma 're ipẽ'ẽ toi mono zarina ãma 're wata. Tane nherẽ, imro rowazé te te sina tãma 're isani mono hã, aiwa ihi na ihâzé pire te te 're ihi ware mono wam ne hã, te te 're hi uprosi mono wa.

⁵ Sena na 're ihâimana za'ra mono norĩ nhimirowa'õno hã i'uwaibaba na si te 're hâimana. Tane nherẽ, iwasété norĩ nhimiroti hã da'rãiwamnarĩ da si te 're hâimana.

⁶ Iwasété norĩ mreme hã simimnhasi uptabi di, dapãrĩ'wa norĩ hã rosa'rese õ ré, dazô 're iwairébé mono ne. Tane nherẽ, i'uwaibaba na si 're ihâimana za'ra mono norĩ mreme hã te za marĩ isimimnhasi hawimhã te te 're da'anho'reptu.

⁷ Iwasété norĩ 're si'utõrĩ mono wa, te za oto sô 're robaba za'ra. Tane nherẽ, sena na i'uwaibaba na si 're ihâimana za'ra mono nhorõwa si te za uburé marĩ da hã siptete na 're simasab u'âsi.

⁸ I'rãi waihu'u wẽ norĩ hã te da te dasima 're wasu'u wẽ za'ra. Tane nherẽ, ipẽ'ẽ 'remhã wasété na 're ihâimana za'ra mono norĩ hã te za dama wazéb ãna 're hâimana za'ra.

⁹ Wẽ di, ni'wa wapu na 're hâimana mono nherẽ, tihâimanazéb da, te te 're iromhuri mono hã, dama pire na 're hâimana mono ne, rési ãna 're isãmra mono, ta hã mra te te 're isépata mono nhipai u hã.

¹⁰ Sena na 're ihâimana za'ra mono norĩ hã tinhimizama hã te te 're 'madâ'â wẽ za'ra mono di. Tane nherẽ, iwasété norĩ nhimirob'manharĩzé hã wasété uptabi di.

¹¹ Ni'wa hã tiburu na te te 're romhuri pese mono wamhã, te za sa 're romnhimi'wara, sa'ẽtẽ na isazéb da hã. Tane nherẽ, ni'wa marĩ iwapure zô si 're irĩtĩ mono na taré bâdâ te te sina 're uprosi mono wamhã, ta hã isimiza'rese'õ.

¹² Iwasété norĩ hã tô iwasété hâiba amo, marĩ hâimana nhipese na te te dawi 're iwaibui mono na hã te te 're 'ruiwapari za'ra, te te tiwi sima 're waibui mono da hã. Tane nherẽ, wẽ na 're ihâimana za'ra mono norĩ hã te siptete na si marĩ te te 're 'manharĩ wẽ u'âsi za'ra, dawaprã.

¹³ Wasété na 're ihâimana za'ra mono norĩ hã te 'râwi timreme wasété na 're sisitob za'ra. Tane nherẽ, wẽ na i'uwaibaba na si 're ihâimana za'ra mono norĩ si te ropire hawi 're iwairébé mono zém na hã te te 're 'rãiwa'õmo za'ra.

¹⁴ Ni'wa hã timreme wẽ zarina, te za iwẽ hã te te sima 're azani. Tinhib'rata na te te 're iromhuri wẽ mono zéb zarina, te za duré iwẽ hã te te sima ãma 're azani.

¹⁵ Isimiza'rese'õ, te marĩ i'uwaibaba na te te 're i'manharĩ za'ra mono ne hã te te sina 're rosa'rata u'âsi za'ra. Tane nherẽ, i'rãi waihu'u wẽ norĩ hã te roti iwẽ te te 're iwapari za'ra mono zé hã te te sina 're uze za'ra.

¹⁶ Isimiza'rese'õ hã niha dazada ihâimanazém na hã te za awa'awi te te dama ãma 're ropé. Tane nherẽ, i'rãi waihu'u wẽ ãma, da te 're iwasété mono zé hã te te sina 're mrami waihu'u mono õ di.

¹⁷ Sena na 're ihâimana za'ra mono norĩ hã te za tô sadawa nhipese ãna te te dama 're dawasu'u za'ra, dasisõ'a. Tane nherẽ, senai õ na te te 're idawasu'u za'ra mono norĩ hã, te za sadawa nhipese na hã te te 're rowasu'u za'ra.

¹⁸ Dasi'aba'ré na damreme zani hã aiwa, sib'ézé 'wa pa 'wa 'rãsutu ne hã te 're hâimana za'ra. Tane nherẽ, i'rãi waihu'u wẽ norĩ mreme hã te te 're da'a'rãzéptâ'â waihu'u pese mono di.

¹⁹ Dazadawa nhipe hã hâimana hâ õ di. Õne haré te za ai'utõ. Sena na damreme si te za 're hâimana hâ u'âsi.

²⁰ Wasété na te te 're irowa'õtõ za'ra mono norĩ pẽ'ẽ 'remhã te isadawa nhipese na isimirosa'ratazép si tãma 're hâimana za'ra. Tane nherẽ, rowẽ na 're dahâimana za'ra mono da, te te dama 're iromhuri za'ra mono norĩ hã te za robze na 're ihâimana za'ra mono zép si te te 're sõpẽtẽ za'ra.

²¹ Ropire hã i'uwaibaba na si 're ihâimana za'ra mono norĩ zô, 're iwairébé mono da hã, mare di. Tane nherẽ, wasété na 're ihâimana za'ra mono norĩ si te ropire hã te te 're sõpẽtẽ u'âsi za'ra.

²² Uburé Danhib'apito ma, isadawa nhipese norĩ hã tãma 'ru ti. Tane nherẽ, sena na te te 're inharĩ za'ra mono norĩ si, tãma isawi pe hã.

²³ Isimiza'rese wẽ norĩ hã mreme wadi õ di, tinhimirowaihu'u na hã. Tane nherẽ, simiza'rese ãna 're ihâimana za'ra mono norĩ hã te za simiza'rese ãna niha na tihâimanazé hã te te dama 're hâi'ré za'ra.

²⁴ Ni'wa hã tinhiptede te te sima 're 'manharĩ mono wamhã, te za dama i'rãnho'õmo na 're hâimana. Tane nherẽ, iwa'a norĩ hã te za danhib'a'uwẽ na hã te te dama 're romhuri za'ẽtẽ u'âsi za'ra.

²⁵ Marĩ na dapẽ'ẽ 're, 're idahâtâ'â za'ra mono zé hã te za te te 're dahâiba pire za'ra. Tane nherẽ, te za damreme iwẽ hã te te dama 're robze zani za'ra.

²⁶ Sena na 're ihâimana mono hã te za tisiré zaprõni wẽ 'wa na 're hâimana. Tane nherẽ, iwasété norĩ hã te tihâimanazém na 're sisimini za'ra.

²⁷ Aba'wa iwa'a hã tinhisõpãrĩ nhi hã te te sima 're isebre za'ra mono da hã mare di. Romhuri pese 'wa norĩ si te za sibro pese na 're hâimana za'ra.

²⁸ Sena na iwẽ na si 're idahâimana za'ra mono zé hã, rowẽ na 're idahâimana u'âsi za'ra mono zé, te wasu'u. Taha si te za 're idadâ'â za'ra mono zé wi, te te 're da'anhimro.