Provébiu 11 - ꞌRe Ihâimana Uꞌâsi Mono Zadawa Wasuꞌu

¹ Uburé Danhib'apito ma, senai õ na marĩ pire pibuzém na te te dama 're iromhuri za'ra mono norĩ hã tãma 'ru ti. Sena na marĩ pire pibuzém na te te dama ãma 're iromhuri za'ra mono norĩ si tãma iwẽ hã.

² 'Râwi 're isi'madâ'â ze za'ra mono norĩ hã te za waptu na 're siwazéb za'ra. Tane nherẽ, wapu na 're isi'madâ'â za'ra mono norĩ hã te za rowaihu iwẽ ré hã 're hâimana za'ra.

³ I'uwaibaba na si 're ihâimana za'ra mono norĩ hã te za sena na tihâimanazém na si 're sisimro. Tane nherẽ, iwasété norĩ, senai õ na 're ihâimana za'ra mono zéb zarina, te 'râwimhã 're si'uprosi.

⁴ 'Re ihâimana u'âsi mono, niha na te te dama i'arowairébézé bâtâ 'remhã, danhimarĩ hã marĩ dai õ di. Tane nherẽ, i'uwaibaba na si 're idahâimana za'ra mono zép si te za 're idadâ'â za'ra mono zé wi te te 're da'azani.

⁵ Iwasédé, da te ãma 're isa'ra waihu'u mono õ norĩ hã i'uwaibaba na si 're ihâimana za'ra mono zéb zarina, te za bâdâdi irui'õ ne na 're nomro. Tane nherẽ, iwasété norĩ si te za ropire hã te te sisô 're sani za'ra.

⁶ I'uwaibaba na si 're ihâimana za'ra mono norĩ hã te za sena na 're ihâimana za'ra mono zéb zarina, uburé marĩ wi 're sisani za'ra. Tane nherẽ, sadawa nhipese na 're ihâimana za'ra mono norĩ hã te za marĩ iwasédé te te sima 're iwẽ za'ra mono zarina, 'râwi 're sisitob za'ra.

⁷ Ni'wa hã iwasédé 're ihâimana mono hã oto dâ'â wamhã, te za rowẽ zô 're isimipari mono zé hã isiré ai'utõ. Marĩ dai õ di oto tawamhã.

⁸ Sena na 're ihâimana za'ra mono norĩ hã te za robzépata hawimhã 're sisõ'reptu za'ra. Tane nherẽ, te za iwẽ norĩ upana iwasété norĩ ma hã 're hâimana za'ra, ropipa hã.

⁹ Iwasété norĩ hã te za timreme na siwaptoma siré 're ihâimana za'ra mono norĩ hã te te ãma 're uprosi za'ra. Tane nherẽ, rowaihu iwẽ hã te za sena na 're ihâimana za'ra mono norĩ hã, marĩ isimimnhasi hawimhã te te 're sõ'reptu za'ra.

¹⁰ Sena na 're ihâimana za'ra mono norĩ ma, iwẽ si tãma 're hâimana za'ra mono wamhã, te za 'ri nho'õmo 're, 're idahâimana za'ra mono norĩ hã da te ãma dasima 're rowẽ za'ra. Tane nherẽ, iwasété norĩ 're dâ'â za'ra mono wamhã, te za rowẽ te hã 're dazadari za'ra.

¹¹ Sena na 're ihâimana za'ra mono norĩ hã iwẽ na 'ri nho'u te te 're pawaptob za'ra mono wamhã, te za dama 'madâ'â pire na 're hâimana, 'ri nho'u hã. Tane nherẽ, iwasété norĩ mreme si te za te te dawi 're uprosi, 'ri ahâ nho'u hã.

¹² Ni'wa isimiza'rese'õ te za iwaptoma 're ihâimana mono ãma 're to, timreme wasété na. Isimiza'rese si te za mreme wasété tõ da hã siwi 're pẽ'ẽ hâ, te te nharĩ tõ da hã.

¹³ Dabâsi zei'wa norĩ hã te za dasi'rep si marĩ dama 're ihâimana za'ra mono na hã te te ãma dawi 're aropé. Tane nherẽ, dama i'umnha hã te za si'rep si te te sima 're tété.

¹⁴ Nimahã ti'ai wa'õtõ nho'õmo ãma, da'madâ'â wẽ na dama i'rãnho'õmo norĩ te te 're da'madâ'â za'ra mono õ wamhã, te za daza'ru norĩ 'mahârâ hã waptãrã. Dama roti wẽ 'wa norĩ ahâ na 're hâimana za'ra mono wapsi, te za dasima iwẽ na hã oto 're dahâimana za'ra, rowẽ na.

¹⁵ Ni'wa hã dahâiba wapto'wa na marĩ wa'âbâ'wa da, dama 're hâimana mono wamhã, te za te te 're robzépata. Ni'wa te te ãne hã 'manharĩ õ wapsi, te za sima iwẽ na rowẽ na hã 're hâimana.

¹⁶ Pi'õ iwẽ na 're ihâimana mono hã te za da te 're iwazé mono zé hã te te sina 're uwaimrami. Tane nherẽ, aibâ iwasété norĩ hã te za tinhimarĩ pese si te te sina 're uwaimrami za'ra.

¹⁷ Ni'wa hã iwẽ te te dama 're 'manharĩ u'âsi mono wamhã, te za tô taha zarina 'râwi iwẽ hã te te sima 're ab'manharĩ. Tane nherẽ, isimirob'manharĩ wasété zé hã te za 'râwi tinhimirob'manharĩ wasété na 're si'u'a.

¹⁸ Iwasété norĩ pawa'â hã, tô senai'õ i'uptabi'õ, duré iprãire. Tane nherẽ, marĩ i'uwaibaba si te te 're i'manharĩ za'ra mono norĩ hã te za tipawa'â hã sena uptabi hã te te sima 're waibu, i'uwaibaba na si da te 're robzuri mono wa, sa'ẽtẽ na amnho da te dasima 're itehâri za'ra mono ne.

¹⁹ Ni'wa iwẽ na si 're hâimana mono wamhã, te za rowẽ na hã 're hâimana u'âsi. Tane nherẽ, marĩ iwasété si ni'wa te te 're i'manharĩ mono zô si, 're ne mono wamhã, te za tidâ'âzéb u oto 're si'ãwisi.

²⁰ Uburé Danhib'apito ma hã, ipẽ'ẽ 're wasété na 're ihâimana za'ra mono norĩ hã tãma 'ru za'ra di. Tane nherẽ, i'uwaibaba na si 're ihâimana za'ra mono norĩ ma hã, 're to za'ẽtẽ uptabi mono di.

²¹ Tô sena wa waihu'u: Iwasété ma, te za tô rob'manharĩ wasété zé hã tãma 're hâimana za'ra. Tane nherẽ, wẽ na 're ihâimana za'ra mono norĩ si te za ti'ahârizé wi hã 're sisani za'ra.

²² Pi'õ, dama 'madâ'â ze nherẽ, simiza'rese ãna 're hâimana mono wamhã, aiwa ẽtẽ waipo pré oru 'manharĩ na danhiptõmohi wasisizém ne uhâbâ nhisi're za'ruzé isisi're ãma 're isimnhatã mono ne hã te 're hâimana.

²³ I'uwaibaba na si 're ihâimana za'ra mono norĩ uburé marĩ te te sima 're iwẽ za'ra mono hã te za rowẽ hã te te dama 're sani za'ra. Tane nherẽ, iwasété norĩ hã marĩ zô 're isimipari za'ra mono zé hã te za danhiti'ru si te te sima ãma 're sani za'ra.

²⁴ Ni'wam norĩ tinhimarĩ na dama ãma 're sõprub za'ra mono wamhã, te za iwa'rãmimhã isimarĩ hã te te tãma sina 're hâimo u'âsi za'ra. Tane nherẽ, ni'wam norĩ, marĩ we te te sima 're itété za'ra mono hã te za iwa'rãmimhã te te tiwi sina 're ti'awi za'ra za, we tiwi 're isi'utõrĩ za'ra mono zéb u.

²⁵ Ni'wa hã dama 're sõpru mono wamhã, te za 're sisibro pese. Duré ni'wa te te 're da'apawapto mono wamhã, te za da te dasiwi 're pawapto.

²⁶ Ni'wa hã amnho zub'a trigu wa'â te te sina hâimo da, te te dawi 're itété mono hã te za da te tãma 're nharĩ wasété za'ra, isõti na hã. Tane nherẽ, te te dama 're i'awede su'u mono ãma hã te za ãma 're dawata za'ra, isõprum na hã.

²⁷ Iwẽ zô sima 're irĩtĩ mono hã te za da te dasiwi 're wazé. Tane nherẽ, iwasété zô si sima 're irĩtĩ mono hã te za tô iwasédé hã sitẽme te te 're a'wani.

²⁸ Ni'wa, tinhimarĩ te te 're i'umnhasi mono hã te za 're waptã'ã. Tane nherẽ, sena na 're ihâimana za'ra mono norĩ si te za wesuirã isu tém ne rowẽzé hã te te sina tãma 're hâimo za'ra.

²⁹ Ni'wa, sisada za'ra marĩ te te 're azani u'âsi mono wamhã, te za rowa'u te te 're irowapõrĩ mono si tãma 're hâimana, tiwi 're idâ'â za'ra mono norĩ nhimarĩ, tãma 're 'maihâimana mono ãna hã. Isimiza'rese'õ norĩ hã te za i'rãi waihu'u wẽ ma romhuri'wa na tãma 're hâimana u'âsi za'ra.

³⁰ Sena na 're ihâimana za'ra mono norĩ hã te za rowẽ na 're idahâimana za'ra mono zé hã te te dama 're ãwisi za'ra. Duré i'rãi waihu'u wẽ norĩ hã te za tisiwaihu'u norĩ na hã ãma 're hâ'â.

³¹ Iwẽ norĩ hã ti'ab ré 're ihâimana wẽ za'ra mono wa'â te te 're waibui mono da wamhã, te za tô duré 're iwasété za'ra mono norĩ zama isimirob'manharĩ wasété zé wa'â hã dasiré te te 're waibu, tiwasédé te te 're i'manharĩ u'âsi za'ra mono norĩ hã.