Provébiu 10 - ꞌRe Ihâimana Uꞌâsi Mono Zadawa Wasuꞌu

Salomahã nhimirotizé wasu'u, rowaihu iwẽ na hã

¹ Da'ra i'rãi waihu'u wẽ, te za tihâimanazém na timama ma hã te te ãma 're rowẽ zani pese. Tane nherẽ, da'ra isimiza'rese'õ niha na 're ihâimana mono hã te za tina wi te te ãma 're robzei'õ zani.

² Senai õ na 're idahâimana za'ra mono zarina, 're idasisimarĩ pese za'ra mono hã taré uptabi, marĩ dai õ di. Tane nherẽ, sena na 're idahâimana za'ra mono na hã te za dadâ'âzé wi ãma 're dasisani za'ra.

³ Uburé Danhib'apito, wẽ na 're ihâimana za'ra mono norĩ hã, mra te te 're sépata za'ra mono da, te te 're i'a'madâ'â rẽme mono da hã, mare di. Tane nherẽ, te za wasété na 're inomro mono norĩ wi, marĩ te te sima 're iwẽ uptabi za'ra mono hã te te tiwi 're anhito.

⁴ Tinhib'rata na iwa'a norĩ te te 're iromhuri za'ra mono õ hã te za tinhimarĩ na hã te te ãma siwi 're ti'awi pese za'ra. Tane nherẽ, ni'wa siptete na tinhib'rata na te te 're iromhuri pese mono si te za tinhimarĩ hã te te ãma sima 're azani.

⁵ I'rã waihu'u wẽ norĩ hã te za amnho itehârizé bâtâ uwaibaba na te te 're roptehâri za'ra. Tane nherẽ, ni'wa roptehârizé bâtâ na 're isõtõ mono hã, te za rowazém na 're ihâimana mono zé hã te te sima 're sani 'râwi.

⁶ Wẽ na 're ihâimana za'ra mono ma si, te za iwẽ hã da te tãma 're pisutu za'ra. Tane nherẽ, iwasété norĩ te te 're idawamnarĩ za'ra mono da hã te simirosa'rata udâ pese na si 're hâimana za'ra.

⁷ Wẽ na 're ihâimana za'ra mono norĩ ãma, te za 're dasipo're pu'u wẽ u'âsi za'ra ãma hã. Tane nherẽ, te za iwasété norĩ ãma hã awa'awi 're dapo're simrami za'ra.

⁸ I'rãi waihu'u wẽ 're ihâimana za'ra mono hã te za rotizé iwẽ hã te te sina 're uze za'ra. Tane nherẽ, timreme na 'râwi 're isi'madâ'â pese mono õ hã te za robzei'õ na tihâimana wẽ zé hã siwi uprosi.

⁹ Sena na 're ihâimana za'ra mono norĩ hã te za sima iwẽ na to sina 're nomro. Tane nherẽ, senai õ na 're ihâimana za'ra mono norĩ hã te za da te dasiwi 're upsibi nhamra.

¹⁰ Ni'wa hã sena na niha na 're iromhâimana mono zé hã te te dawi 're tété mono wamhã, te za niha na romhâimanazé hã te te dazada 're azani. Tane nherẽ, ni'wa hã sena na marĩ na te te dama 're arowasu'u mono wamhã, te za te te ãma 're da'apẽ'ẽ nomri.

¹¹ Sena na 're ihâimana za'ra mono norĩ mreme hã, rowẽ na 're idahâimana za'ra mono zém na'rata da hã te tô dama 're hâimana. Tane nherẽ, iwasété norĩ te te 're idawamnarĩ za'ra mono da hã te timreme zô simrami pese na hã 're hâimana za'ra.

¹² Danhiti'ru hã te za dasisada dahâimana wasété zé hã te te dazada 're sani za'ra. Tane nherẽ, danhimizawizé hã te za dawasédé da te 're i'manharĩ za'ra mono zé hã te te 're azuwa, te te da'ãma 're i'a'madâ'â mono õ zarina.

¹³ I'rãi waihu'u wẽ norĩ hã te za rowaihu iwẽ na si 're mreme zusi. Tane nherẽ, niha na simiza'rese ãna 're ihâimana za'ra mono norĩ hã te za da te tãma 're rob'manharĩ wasété za'ra.

¹⁴ Rowaihu'u wẽ na 're ihâimana za'ra mono norĩ hã te za uburé tinhimiza're wẽ hã te te sima ãma 're hâimo za'ra. Tane nherẽ, isimiza'rese'õ hã 're mreme zusi mono wamhã, te za ropire hã sisada te te 're sani za'ra.

¹⁵ Isimarĩ pese norĩ 'wawimhã te za isibro hã 're simapa za'ra. Tane nherẽ, isimarĩ'õ norĩ hã te za isibrob'õ hã te te 're uprosi, simapa waihu'u õ wa, marĩ na.

¹⁶ Sena na iwẽ na si 're idahâimana za'ra mono zé pawa'â hã, rowẽ na 're idahâimana hâ za'ra mono zé, te wasu'u. Tane nherẽ, dawasété na si 're idanomro mono zé wa'â hã dawasédé da te dasima ãma 're ihâimo za'ra mono zép si, te wasu'u.

¹⁷ Ni'wa hã tihâimana pesezé te te sina 're i'uzei mono hã te za rowẽ na 're idanomro mono zép te bâdâdi na hã 're mo. Tane nherẽ, ni'wa te te sina 're i'uzei mono õ hã te za bâdâdi te te 're i'upai mono zém na hã isiti 're pusi.

¹⁸ Ni'wa hã 're isiti'rui mono zé te te dawi 're udâ mono wamhã, isadawa nhipese na isimirobzanhamrizé, te wasu'u. Duré ni'wa hã dabâsi na te te ãma 're iropéi mono hã, te simiza'rese'õ na si 're hâimana.

¹⁹ Ni'wa hã te te 're robzanhamri hâ mono wamhã, te za tiwasédé te te 're i'manharĩ mono zéb u hã 'râwi pesere oto 're hâimana. Tane nherẽ, ni'wa hã niha na 'râwi timreme na 're si'madâ'â mono wamhã, te za ta hã 'rãi waihu'u wẽ ré 're hâimana.

²⁰ Iwẽ norĩ mreme hã te aiwa ẽtẽ waipo prã prata uptabi ne hã 're hâimana za'ra. Tane nherẽ, iwasété norĩ nhimirosa'rada hã tarére hã, marĩ dai õ di.

²¹ Iwẽ norĩ mreme hã, te za da'ahâ uptabi ma hã te te 're rob'manharĩ wẽ za'ra. Tane nherẽ, isimiza'rese'õ norĩ hã 'rãi waihu'u wasété wa, te za 're idadâ'â za'ra mono zéb u hã 're sisimro.

²² Uburé Danhib'apito nhimipawaptobzé wẽ zarina te za danhimarĩ hã dama 're wairébé. Tahawa, duré ni'wa 'râwi tinhiptete na hã te te ãma sisiwi waihu'u õ di, tinhimarĩ na hã.

²³ Isimiza'rese'õ norĩ ma hã marĩ 'manharĩ wasété zé hã se ti, tãma hã. Tane nherẽ, i'rãi waihu'u wẽ norĩ ma hã rowaihu iwẽ si tãma ise za'ra hã.

²⁴ Iwasété norĩ hã marĩ ma, 're ipahi za'ra mono zéb zarina, te za tô tãma hã 're romhâimana za'ra. Tane nherẽ, sena na iwẽ na 're ihâimana za'ra mono norĩ si, te za te te sima 're iwẽ za'ra mono hã te te sima 're sani za'ra.

²⁵ Rowa'u isiptede iwatobro ne, ropire hã sô 're wairébé mono wamhã, te za iwasété norĩ hã 're si'utõrĩ. Tane nherẽ, te za sena na iwẽ na 're ihâimana za'ra mono norĩ hã tihâimana u'âsi zém na siptete na te te ãma 're uzusi za'ra.

²⁶ Iwa'a hã marĩ te te 're 'manharĩ mono da, da te 're satõrĩ mono wamhã, aiwa â warĩrĩ vinagri te te 're ida'wanhihâ za'ra mono ne, duré unhama nhizé hã te te 're idatõmo rĩrĩ za'ra mono ne, te za dapẽ'ẽ 'remhã te te dawi 're ro'wa'ré za'ra.

²⁷ Uburé Danhib'apito, da te 're wazéb za'ra mono wamhã, te za 're idahâimana za'ra mono zé bâdâ hã dama 're si'wani za'ra. Tane nherẽ, iwasété norĩ hã te za 're idâ'â za'ra mono zé bâtâ wana ré hã 're dâ'â za'ra.

²⁸ Sena na 're ihâimana za'ra mono norĩ hã iwẽ uptabi zô 're isimipari za'ra mono zéb zarina te za robzei uptabi hã te te sima 're sani za'ra. Tane nherẽ, iwasété norĩ hã te te sima 're irowa'õtõ za'ra mono zé hã marĩ hã te te sima ãma 're sani za'ra mono dai õ di.

²⁹ Uburé Danhib'apito, i'uwaibaba na si 're ihâimana za'ra mono norĩ 'wawimhã te 're simapa. Tane nherẽ, marĩ iwasédé te te 're i'manharĩ za'ra mono norĩ ma hã te za te te 're i'uprosi za'ra mono zéb da si, te te tãma 're apisutu.

³⁰ Sena na i'uwaibaba na si 're ihâimana za'ra mono norĩ hã te 'madâ'â pese na hã õne u'â 're hâimana za'ra. Tane nherẽ, iwasété norĩ hã ti'ai ãma 're hâimana hutu za'ra mono di.

³¹ Sena na 're ihâimana za'ra mono norĩ hã te rowaihu iwẽ na si te te dama 're waihu'u za'ra. Tane nherẽ, ni'wa hã timreme wasété na si 're mreme mono wamhã, te za da te 're mreme nhihâri.

³² Sena na 're ihâimana za'ra mono norĩ ma hã tãma waihu'u pese di, da te 're iwapari ze za'ra mono zém na, te te dama 're inharĩ za'ra mono zé hã. Tane nherẽ, iwasété norĩ ma hã senai'õ na imreme si duré imreme wasété si tãma waihu'u pese di.