Provébiu 1 - ꞌRe Ihâimana Uꞌâsi Mono Zadawa Wasuꞌu

¹ Ã hã rowaihu iwẽ na Salomahã nhimiroti, Dawihi 'ra, Izaraéu norĩ nhib'apito.

² Ã hã te za te te 're wa'apawapto, rowaihu iwẽ hã duré rotizé iwẽ hã sõ'awi 're ihâimana mono õ hã, rosa'rata na wa te ãma 're waihu'u za'ra mono da hã,

³ wa'rã nhimiza'rese na i'uwaibaba na si sena na duré iwẽ na 're wahâimana za'ra mono da, te te wama ãma 're i'arowasu'u mono da hã.

⁴ Te za duré ni'wam norĩ hã simirosa'rata waihu'u prã na 're ihâimana za'ra mono hã te te 're pawaptob za'ra, simirowaihu'u wẽ na oto 're hâimana za'ra mono da. Aibâ ipréduptém norĩ hã marĩ i'uwaibaba si te te 're 'manharĩ za'ra mono da hã, te za te te 're pawaptob za'ra.

⁵ 'Rãi waihu'u wẽ na 're ihâimana za'ra mono zama ã hã rowaihu iwẽ hã te te 're po're 'repu'u za'ra mono wamhã, te za isimirowaihu iwẽ hã te te sina tãma 're hâimo za'ra. Te za duré tinhimirowaihu'uzé iwẽ te te ãma 're iwaihu'u ahâ za'ra mono zé hã te te 're pibui pese za'ra,

⁶ rowaihu iwẽ isima'uri pe hã te te 're waihu'u pese za'ra mono da, duré rowaihu'u wẽ 'wa norĩ nhimirowasu'u isa'rese õ na te te ãma 're saprĩ za'ra mono da, sima sô 're isõpré mono norĩ hã.

⁷ Rowaihu iwẽ hã da te 're waihu'u za'ra mono da wamhã, te za 'Re ihâimana u'âsi mono, Uburé Danhib'apito hã da te dasiwi 're wazéb za'ra. Tane nherẽ, isimiza'rese'õ norĩ hã te rowaihu'uzé iwẽ hã te te siwi 're wẽ'õ pese za'ra, taré newa. Te te 're iwaihu'u za'ra mono da hã te te sima 're wẽ za'ra mono õ di.

Aibâ ipréduptém norĩ ma rotizé wasu'u

⁸ Ĩ'ra, aimama, marĩ na te te aima 're iroti mono zé hã ma'ãpé 're wapari pese mono. Duré ana, marĩ na te te aima 're iroti mono zéb zama te za 're iwapari pese mo.

⁹ Ta norĩ nhimiroti hã te za 're i'aihâimana wẽ mono zéb da hã te te 're asiptete, marĩ i'madâ'â ze asõpre na isimnhatã ne, niha wamhã, asõ'rebzu iwẽ i'madâ'â ze, aibutu na isa'o ne.

¹⁰ Ĩ'ra, aibâ iwasété norĩ zadawa para marĩ 'manharĩ da, te te siwi aipibui wamhã, sadawa zamarĩ za'ra tõ, tô'ã!

¹¹ Ta norĩ hã te te aima nharĩ za'ra wamhã ãne: “We aimorĩ, wa te wasiwi da'maiwĩrĩ da! Taré nherẽ, rosa'rese õ ré, oto wa te wasiwi da'mairési aba, wa te ãma wasima rowẽ za'ra da, ni'wam norĩ hã marĩ te te upa za'ra õ nherẽ!

¹² Rowẽ na hâimana za'ra ré, wa te sõpẽtẽ za'ra nherẽ, wa za wasiwi uprosi ni.

¹³ Isimarĩ mono hã wa te isõpẽtẽ za'ra mono na, wa za wanhorõwa hã wa te wasiwi ãma romnhito, marĩ, wa te isimi'uri za'ra na hã.

¹⁴ Tahawa, ãma wahâiba watob za'ra na. Tawamhã marĩ wa te isimi'uri za'ra na wa za ãma wasima wasipo'o.”

¹⁵ Ĩ'ra, ã norĩ siré hã 're ane mono tõ. Romhâ na tãma 're asa'o hâ za'ra mono.

¹⁶ Waptu na te te sima 're rosa'rata za'ra, marĩ te te 're 'manharĩ za'ra mono da hã. Te te duré 're danhimroi mono da hã simire sina te õne u'â dazada 're hâimana siromo za'ra.

¹⁷ Si mramizé hã si te te 'madâ'â ré, da te sô sasõmri wamhã, marĩ dai õ di. Taré te za da'o.

¹⁸ Tanei õ di, ã hã aibâ norĩ hã. Ãma 're isi'uprosi mono zéb da hã, te tô 'râwi ãma 're siwaibu, tinhimi'manharĩ na.

¹⁹ Ãne te za tinhipãrĩ zarina isisimarĩ pese ma hã tiromhâiba: Te za tô 'râwi tihâimanazé hã siwi uprosi.

Rowaihu iwẽ na dapo're pu'uzé wasu'u

²⁰ Ma'ãpé ĩwapari za'ra wa'aba! Rowaihu iwẽ hã te 'ri nhi'riti na duré 're idasisõpẽtẽ pese za'ra mono zéb ãma 're hârâp sa'a.

²¹ 'Ridawa nho'õmo ãma duré uburé 're idasi'rã'õtõ mono zéb ãma, te ãne hârâ 'rãihâ na 're hârâ:

²² — Isimiza'rese'õ norĩ! E momo te za i'rãsutu za'ra wa'wa, asimiza'rese'õ na 're i'aihâimana za'ra wa'aba mono zé hã. E niwa te za rowaihu iwẽ na aiwa'ẽ ze zé hã iwaihu'u za'ra wa'wa. E niwamhã bété ãne na hã asiwaihu'u za'ra wa'aba õ di.

²³ Ĩwapari za'ra wa'aba, niha na aihâimanazé te aima ihiri za'ra wa'aba zém na hã. Wa hã roti iwẽ si wa za aima sõmri za'ra wa'wa. Ĩnhimirosa'rata wẽ hã wa za aima hâi'ré za'ra wa'wa.

²⁴ Asô ĩhârâ aba zé hã ma tô asiwi iwẽ'õ wa'wa. Duré asô ĩnhimiwẽ za'ra wa'aba wamhã, ni'wa hã te te ĩ'ãma sasõmri õ di.

²⁵ Uburé ma tô ĩnhimiroti hã asiwi iwẽ'õ za'ra wa'wa. Duré niha na aihâimanazé te aima hiri za'ra wa'aba da hã asima wẽ za'ra wa'aba õ di.

²⁶ Ãne te aima rowaihu'u za'ra wa'aba nherẽ, ropire asô watobro za'ra wa'aba wamhã, wa hã wa za ai'ãma aihâ za'ra wa'wa. Duré ropipa asô wisi za'ra wa'aba wamhã, wa za duré ai'ãma ĩwa'ẽ za'ra wa'wa.

²⁷ Rowa'u isiptede te te 're irowapõrĩ mono ne ropipa hã asô 're pusi za'ra wa'aba mono wamhã, wa za ai'ãma 're ĩwa'ẽ za'ra wa'wa. Wa za duré ai'ãma 're ĩsihâ za'ra wa'wa, za 're irobzépata za'ra wa'aba mono zé aima 're hâimana za'ra wa'aba mono wamhã.

²⁸ Tahawa, ĩzô aihârâ za'ra wa'aba wamhã, wa hã Rowaihu iwẽ hã te ãma i'asada'âbâ za'ra wa'aba da hã mare di za. Duré ĩzô 're airĩtĩ za'ra wa'aba mono nherẽ, asiwi ĩnhopẽtẽ aba da hã mare di za.

²⁹ A norĩ wa'wa hã rowaihu iwẽ hã asima 're wẽ za'ra wa'aba mono õ wa, te õne u'â 'Re ihâimana u'âsi mono, Danhib'apito wazébzé hã asiwi 're iwẽ'õ za'ra wa'aba mo.

³⁰ Ĩnhimiroti wẽ na 're ĩzaze za'ra wa'aba mono õ di. Duré niha na aihâimanazé te aima 're sa'ra za'ra wa'aba mono da wamhã, asiwi 're ĩwapari aba mono õ di.

³¹ Tahawa, marĩ 're i'manharĩ za'ra wa'aba mono zéb zarina te za tô iwasété na si 're asaihuri aba mo.

³² Isimiza'rese'õ norĩ hã te za 're dâ'â za'ra, rowaihu iwẽ hã te te siwi 're wẽ'õ za'ra mono wa. Duré ta norĩ hã rowaihu iwẽ zô 're isi'wapé za'ra mono õ norĩ hã te za 'râwi 're si'uprosi.

³³ Tane nherẽ, ni'wam norĩ te te 're ĩwapari za'ra mono norĩ hã te za hâtâ'â ãna sima iwẽ na 're hâimana za'ra, ipahi hã te te 're 'rãmi za'ra mono ãna.