Neemia 9 - ꞌRe Ihâimana Uꞌâsi Mono Zadawa Wasuꞌu

Dawasété na idasiwẽ'õ za'ra zé wasu'u

¹ Tawamhã a'amo 24 bâtâ ãma ma tô Izaraéu nhihudu norĩ hã si'rã'õtõ, sai ãna a'â hâimana za'ra da. Tahawa, ma tô duré sa'u ihâiro na si'uza za'ra. Ma tô duré ti'a na hã si'rã zazub za'ra.

² Izaraéu nhihudu norĩ na 're ihâimana za'ra mono norĩ hã ma tô uburé tisiré a'uwẽ'õ norĩ nhiti sisani za'ra. Tawamhã tite mono bâ tisi'ubumrozém hawi para na oto hâiwi simasa wamhã, ma tô tiwasété na hã duré tihi'rata norĩ wasété na hã siwẽ'õ za'ra.

³ Tawamhã hâiwi simasam haré ma tô duré Uburé Danhib'apito, ite za'ra 'Re ihâimana u'âsi mono nhimiroti na rob'ui'éré hã sõré za'ra, si'ubdatõ bâtâ pibuzé ãma isi'utõrĩ za'ra 're. Ma tô duré tawamhã si'ubdatõ bâtâ pibuzé ãma timorĩ za'ra, tiwasété na siwẽ'õ za'ra ré, duré Uburé Danhib'apito, tite za'ra 'Re ihâimana u'âsi mono ãma wata za'ra ré.

⁴ Tawamhã wede 'manharĩ na wa'ra nhisiwi ma tô levita norĩ Zesua, Bani, Cadmi'é, Sebania, Buni, Serebia, Bani, duré Quenani norĩ, hâiwi simasab sina Uburé Danhib'apito, tite 'Re ihâimana u'âsi mono ma, mreme 'rãihâ na hã mreme zu.

⁵ Tawamhã levita norĩ Zesua, Cadmi'é, Bani, Hasabnéia, Serebia, Hodia, Sebania, duré Petaia, ma tô 'Re ihâimana u'âsi mono ãma dawata za'ra da hã dazô tihârâ za'ra. Tahawa, ma tô ãne dama nharĩ za'ra: “Ma'ãpé hâiwi aipara na aimasa aba, Uburé Danhib'apito, ate 'Re ihâimana u'âsi mono ãma aiwata za'ra wa'aba da, õne u'â 'Re ihâimana u'âsi mono, 're ihâimana mono ãma! Duré isisi wẽ na uburé, ãma 're dawata za'ra mono, ãma 're idawata za'ra mono zém na da te iwab 're sa'ra mono dai õ nherẽ!”

Uburé Danhib'apito ma, idamreme zusi na idasiwẽ'õ za'ra zé wasu'u

⁶ Tawamhã Izaraéu nhihudu norĩ, ma tô ãne mreme zu: “'Re ihâimana u'âsi mono, aiwétési Uburé Danhib'apito! A hã ma tô hâiwa i'manha. Wasi norĩ hã ma tô duré i'apoto mo. Ti'a hã, âporé hã, duré iwa 're ihâimana za'ra mono hã ma tô i'apoto mo. A hã ma tô uburé asimipoto mono bâ hâiba ré, 're ihâimana za'ra mono da hã tãma i'manharĩ za'ra. Duré hâiwa ãma ihâiba ré norĩ hã te hi'rãtitõ aima 're si'ubumroi mono sina ai'ãma 're wata u'âsi za'ra.

⁷ “A hã Uburé Danhib'apito 'Re ihâimana u'âsi mono, Abrãhã pisutu'wa, ma tô Babilonia ãma Ur na 'ri nho'õmo nhisi hawimhã iwaze. Ma tô duré Abra'ã na isisi tém na da hã oto ãma isaprĩ.

⁸ Ta hã te te sina 're i'ai'umnhasi mono zém na 're waihu'u mono wa, ma tô asimiropisutu zahi hã tãma i'manha. Ma tô duré tãma iropisu, cananeu norĩ nhipti'a tãma sõmri da hã, hitita norĩ nhipti'a hã, amoreu norĩ nhipti'a hã, perizeu norĩ nhipti'a hã, zebuzeu norĩ nhipti'a hã, duré gigazeu norĩ nhipti'a hã, isihudu norĩ hã iwa 're ihâimana za'ra mono zéb da hã. A hã ma tô tãma iropisutuzé hã isuwa, sena na 're aihâimana mono wa.

⁹ “Ma tô wahi'rata norĩ Ezitu ãma te te 're robzépata za'ra mono ré hã 're i'a'madâ'â mo. Duré Âpré na â poré nhisi zaihâi ãma, sadari sina mreme 'rãihâ na te te aiwi irowaptẽrẽ za'ra zé hã, ma tô iwapa.

¹⁰ Ezitu ãma apito zada, isahâpâ dama roti'wa norĩ zada, duré isipti'ai ãma uburé a'uwẽ zada, ma tô asimiromhõsi pipa na hã nasi tãma irob'manharĩ za'ra, ta norĩ hã asib'a'uwẽ norĩ ma, te te 're i'manharĩ za'ra mono zéb zarina te te 're irobzépata za'ra mono zé hã aima waihu'u pese wa. Ãne ma tô ãhã na zama ta norĩ wasu'u hã dama sa'rese za'ẽtẽ na hã 're hâimana za'ra.

¹¹ A hã wahi'rata norĩ nhowa â poré na ma tô ãma aipo, ti'a i'ré na te te ãma saprĩ za'ra da hã. Duré isarina isisa'rei mono norĩ ma hã, ma tô i'manha, â 'rehâ uptabi u sisisi da hã, âporé sisasisi 'rowi ẽne 're isisisi mono ne.

¹² Ma tô bâtâ mono na hâiwa'a isarob'a, ipisutu pese na isimroi mo, bâdâdi te te tãma iwasu'u za'ra mono zéb da hã. Ma tô duré bara na unhama ro'o pisutu pese na te te tãma bâdâdi na rowa'a za'ra mono da hã, tãma 're ihâi'ré za'ra mo.

¹³ Sina'i na ẽtẽ 'rãihâ nhisi u we asi'rai wamhã, ma tô hâiwa hawi asib'a'uwẽ norĩ ma, we inha. Tahawa, ma tô sena na asimiroti ipire na, duré aimreme iwẽ na, tãma iroti za'ra.

¹⁴ A hã ma tô duré sabadu iwazéb zahi na te te 're i'madâ'â za'ra mono zéb da hã tãma iroti za'ra. Ma tô duré asimiroti na rob'ui'éré hã tãma isõmri za'ra, Mozésihi nho'õmoi baba.

¹⁵ Izaraéu nhihudu norĩ, mram na 're hâimana za'ra mono ré hã, ma tô i'u'ẽtẽ wapu hâiwa hawimhã tãma 're isõmri za'ra mo. Duré 'rubu na 're hâimana za'ra mono wamhã, ma tô ẽtẽ tõmo wawẽ hawimhã â hã tãma ipu'u za'ra. Duré ti'a, õ norĩ ma, sõmri da, tãma iropisutu za'ra zéb zarina, ma tô tãma i'ru za'ra, te te siwi âri da hã oto.

¹⁶ “Tane nherẽ, ma tô wahi'rata norĩ hã si'madâ'â ze na, pẽ'ẽ tete na, duré asimiroti te te 're wapari za'ra mono ãna aiwi 're hâimana za'ra.

¹⁷ Aimreme te te 're wapari za'ra mono tõ da hã, ma tô duré siwi sisisi. Duré uburé marĩ 're i'ab'manharĩ mono zém na hã, ma te po're ha'âri pese za'ra. Marĩ isa'rese'õ iwẽ 're i'ab'manharĩ mono zém na hã ma te duré po're ha'âri pese za'ra. Duré 're isi'madâ'â ze za'ra mono zarina ma tô tinhib'apito da hã 'râwi sima pisutu za'ra, Ezitu u apâ te te isimroi mono da hã, pawa'âbâ ãna duré apâ te te 're romhuri za'ra mono da dama. Tane nherẽ, a hã 'Re ihâimana u'âsi mono, tô dawasété pari'wa. Duré a hã i'aiwẽ, asimizawi pe, duré 're i'asahi su'u mono õ. Duré da'ãma 're i'aiwamri mono zé hã sa'ẽtẽ uptabi di. Tahawa tô rẽme za'ra õ di, ta norĩ hã.

¹⁸ Õ norĩ hã ẽtẽ waipo na powawẽ iba'õmore hâiba hã te te siwi 'manharĩ wamhã, ma tô nharĩ za'ra ãne, Ezitu hawi õ hã te te isani za'ra na hã. 'Re ihâimana u'âsi mono, e niha ma tô ãhã wamhã, õ norĩ hã ai'ãma wasété za'ra!

¹⁹ A'ubuni wi rop si 're irosa'wari mono ãma hã, a hã darẽme waihu'u õ di, sa'ẽtẽ uptabi na da'ãma 're i'aiwamri mono zé hã aima 're hâimana mono wa. Duré bâtâ mono na hâiwa'a, mara mono na unhama ro'o na, õ norĩ ma, te te tãma bâdâdi na irowa'a za'ra mono hã, tiwi wazere waihu'u za'ra õ di.

²⁰ Ma tô Aipẽ'ẽzani iwẽ hã tãma isõmri za'ra, niha na marĩ te te 're i'manharĩ za'ra mono zém na, te te ãma tãma 're irowasu'u za'ra mono da hã. Hâiwa hawi mana na ma tô duré i'asaihu. Ma tô duré â hã tãma ipu'u za'ra, 'rubu ãma tãma wĩrĩ za'ra da hã.

²¹ 40 na a'ubuni wi ãma wahub za'ra ré hã, ma tô 're i'a'upari u'âsi mo, marĩ zô tiwi 're rowaptâ'â za'ra mono tõ da. Tahawa, tiwi 're hâsiwamnarĩ za'ra mono õ di i'uza za'ra hã. Duré hâiwi si 're nomro u'âsi mono nherẽ, ipara hã tiwi 're dupto waihu'u za'ra mono õ di.

²² “Ma tô tãma ipisutu za'ra, a'uwẽ mono bâ iwaptoma 're ihâimana za'ra mono norĩ na te te ai'uté za'ra da. Ãhã wa, Izaraéu nhihudu norĩ hã ma tô Hesbõ na 'ri nho'õmo nhisi ãma, Seõ na apito nhisi 're ihâimana mono ãma, duré Basã na romnhisi ti'ai ãma apito Ogue na isisi ãma hã ai'uté za'ra.

²³ Wasi hâiwa na 're isimasa mono ne, ma tô duré ihi'rata nhihudu norĩ hã ahâ uptabi na 're sitébré mono da, tãma i'manharĩ za'ra mo. Ma tô duré ti'a na ihi'rata norĩ ma, iropisutu za'ra u hã isimroi mo.

²⁴ Tahawa, ta norĩ nhihudu norĩ hã ma tô oto Cana'ã ti'a na hã ãma siwi ate za'ra. Ãhã wa, a hã ma tô iwa 're idahâimana za'ra mono norĩ na hã i'ai'uté. Ma tô duré asib'a'uwẽ ma, ihâiba nhomri za'ra, sima iwẽ na Cana'ã 're a'uwẽ ãma duré apito norĩ ãma niha hã marĩ te te ãma 're 'manharĩ za'ra mono da hã.

²⁵ Asib'a'uwẽ norĩ, 'ri nho'õmo norĩ 'wawi wa'ra pe, te te siwi i'uirĩ norĩ ãma hã, ma tô ãma ai'uté za'ra. Ma tô duré ti'a iwẽ hã siwi ti'â, marĩ iwa'âbâ za'ẽtẽ na 'ri i'masisi mono ré hã, duré â zô ab're siromo mono ré hã, oriwera wede iwa 're isimasa mono ré hã, wede norĩ i'rãi pe, iwa 're isimasa mono ré hã, duré uwa 'ru, da te iwa 're izuri mono ré hã. Tawamhã ta norĩ hã ma tô sima iwẽ na uburé marĩ hã te te 're huri. Tahawa, ma tô ãma 're sihâipese za'ra. Uburé marĩ iwẽ tãma 're isõmri za'ra mono na hã ma tô duré te te sima ãma 're rowẽ za'ra.

²⁶ “Tane nherẽ, tipo're'õ zarina ma tô duré apâ asib'a'uwẽ norĩ hã aiwi 're sipizari za'ra. Ma tô duré asimiroti na rob'ui'éré wi, ba niwĩmhã tiwi 're sipizari za'ra. Ma tô duré asadawa 'mahârâ'wa norĩ hã te te siwi 're simro, apâ atẽme 're sipizari za'ra mono da, te te ãma 're ipo're pu'u za'ra mono hã. Ma tô duré asib'a'uwẽ norĩ hã te te ai'ãma 're wasété zahu ahâ za'ra.

²⁷ Tahawa ma tô isitob'ru norĩ ma, isa'ré za'ra, te te ãma ai'uté za'ra da hã, duré te te 're iwati pese za'ra mono na tãma 're hâimana za'ra mono da hã. Tane nherẽ, te te oto 're irobzépata za'ra mono 'remhã, te te aiwi 're rowaptẽrẽ za'ra mono wamhã, ma tô duré hâiwa hawi ãma 're isada'âbâ za'ra mo. Tawamhã ãma i'aiwamri za'ẽtẽ za'ra zarina, isitob'ru norĩ hawi te te nasi sani za'ra da hã ma tô i'rãnho'õmo norĩ itẽme za'ra hã 're isatõrĩ za'ra mo.

²⁸ Tane nherẽ, rowẽ apâ itẽme 're sihutu mono sidâpâsi asib'a'uwẽ norĩ, tiwasédé te te aiwi 'manharĩ zahu za'ra wamhã, ma tô duré apâ isitob'ru norĩ ma hã 're i'aza'réi u'âsi mo, te te ãma 're ai'uté za'ra mono da hã. Duré apâ sadari sina mreme 'rãihâ na te te aiwi 're rowaptẽrẽ za'ra mono sidâpâsi ma tô duré hâiwa hawi a hã 're i'awapari mo. Tahawa, ma tô duré ãma 're i'aiwamri za'ẽtẽ za'ra mono zarina, nasi 're i'anho'reptui mo.

²⁹ Asimiroti tẽme apâ 're sipizari za'ra mono da, ma tô 're i'apo're pu'u u'âsi mo. Tane nherẽ, 're isi'madâ'â ze za'ra mono zarina, ma tô asimiroti hã te te 're wẽ'õ za'ra. Ma tô duré tãma 're iwaihu'u za'ra mono zé wi hã tiwasété si te te 're 'manharĩ za'ra, asimiroti 'madâ'â pese zém na si 're idanomro u'âsi mono zé, da te dasina 're uwaimrami za'ra mono da nherẽ. Ta norĩ hã pẽ'ẽ tete wa, ma tô ba niwĩmhã aiwi 're sipizari za'ra. Tahawa, te te siwi 're i'aiwapari pese mono zé hã ma tô siwi wẽ'õ pese za'ra.

³⁰ Tane nherẽ, wahup sidâpâsi ta norĩ ãmamhã 're aiwa'a su'u mono õ di. Duré Aipẽ'ẽzani, asadawa 'mahârâ'wa nho'õmoi babamhã ma tô te te tãma 're pri'i za'ra. Tane nherẽ, ma tô asib'a'uwẽ norĩ hã po're nhidâ haré 're hâimana za'ra. Tahawa ma tô duré iwaptoma 're idahâimana za'ra mono norĩ ma, isib'ratab za'ra tãma 're i'anhomri u'âsi mo.

³¹ Tane nherẽ, da'ãma 're i'aiwamri mono zé hã sa'ẽtẽ na aima 're hâimana mono wa, ta norĩ hã duré rẽme za'ra õ di. Uprosi za'ra õ di duré. A hã, 'Re ihâimana u'âsi mono da'ãma 're i'aiwamri pese mono, duré 're idapawapto wẽ u'âsi mono, te 're aihâimana mo!

³² “Tahawa, wate 'Re ihâimana u'âsi mono, i'asa'ẽtẽ uptabi, i'asiptete uptabi, asina 're ida'apahi zani mono, asimiropisutu zahi na dama 're i'a'uwaimrami mono, duré da'ãma 're i'aiwamri pese mono, ma'ãpé taré wa'ãma airĩtĩ pese za'ra tõ, robzépada wanhisiwi iwaptã'ã za'ra zém na hã, wanhib'apito nhisiwi, wama i'rãnho'õmo za'ra nhisiwi, wate sasedoti norĩ nhisiwi, wama asadawa 'mahârâ'wa norĩ nhisiwi, wahi'rata norĩ nhisiwi, duré uburé asib'a'uwẽ nhisiwi, 're ihâimana mono zém na hã, Asiria ãma apito wazada 're ihâimana za'ra mono zém hawi, ãhã bâtâ u hã!

³³ Uburé marĩ wa'ãma 're ihâimana za'ra mono zé hã ma tô i'uwaibaba si wa'ãma 're i'a'madâ'â mo. Duré wa norĩ hã wawasété si wa te aiwi 're 'manharĩ za'ra mono nherẽ, ma tô ibâ na si wama 're i'arob'manharĩ mo.

³⁴ Wahi'rata norĩ hã, wanhib'apito norĩ hã, wama ipire za'ra norĩ hã, duré wate sasedoti norĩ hã, asimirotizé hã te te aima ãma 're uwaimrami za'ra mono õ di. Duré aimreme hã, duré 're iwa'apo're pu'u mono zé hã te te 're wapari za'ra mono õ di.

³⁵ Asimipawaptobzé iwẽ hawim na, ma tô apito norĩ, asib'a'uwẽ norĩ ma i'rãnho'õmo na 're hâimana za'ra, ti'a iwẽ isa'ẽne tãma isõmri za'ra zé wa, iwa 're si'ubumroi mono ré hã. Tane nherẽ, õ norĩ hã aima romhuri'wa na 're hâimana za'ra mono õ di. Duré tiwasété na si 're inomro mono zé hã te te rẽme za'ra õ di.

³⁶ Tahawa ti'a iwẽ wa, 're irob'rãi pese mono na 're wasaihuri mono da, wama isõmri za'ra 'remhã, wa oto taré wapawa'âbâ ãna wa te dama 're romhuri za'ra.

³⁷ Wawasété za'ra u'âbâ, te ti'ai 're rob'rã, 're i'rãi u'âsi za'ra mono hã apito norĩ, pire na wa'madâ'â'wa da, 're i'apisutu mono ma si 're hâimana za'ra. Ta norĩ hã te duré sima iwẽ na marĩ hã te te wama 're 'ru za'ra. Te duré wanhimizama powawẽ na niha hã te te ãma wama 're rob'manharĩ za'ra. Tahawa, wa te 're robzépata za'ẽtẽ uptabi za'ra mono di.”

Danhisi nhihâtâ na, ãma idasisaze za'ra zé wasu'u

³⁸ Tawamhã ãne hã uburé wama 're iromhâimana za'ra mono zarina, uburé wa norĩ Izaraéu nhihudu norĩ hã wa oto rob'ui'éré na 're idasisihâtâ za'ra mono zém na wasisazezé hã wasiwi 'manharĩ ni. Tawamhã wate dama ipire norĩ hã, levita norĩ hã, duré wate sasedoti norĩ hã te za duré taha na hã ãhã na ãma sisihâtâ za'ra.