Neemia 8 - ꞌRe Ihâimana Uꞌâsi Mono Zadawa Wasuꞌu

Esdra, 'Re ihâimana u'âsi mono nhimiroti na rob'ui'éré te te dama isõrézé wasu'u

¹ Tawamhã Izaraéu nhihudu norĩ, oto 7 na a'amo si'utõrĩ pari, te oto tite za'ra 'ri nho'õmo 'remhã 're si'ubumro. Tawamhã a'amoi 're bâdâ isãna'rata hawi ma tô uburé Zeruzalẽ ãma tasi'rã'õtõ ni, 're idasisõpẽtẽ pese za'ra mono zéb ãma, Â na 'ridawa za'ẽtẽ nhisim nho're. Tawamhã Esdra hã rowaihu'u pese 'wa, duré Uburé Danhib'apito, Izaraéu nhihudu norĩ te 'Re ihâimana u'âsi mono, Mozésihi ma, tinhimiroti na rob'ui'éré hã te te tãma isõmri waihu'u wẽ 'wai uptabi wi, ma tô tiwi waptẽrẽ za'ra ni, 'Re ihâimana u'âsi mono nhimiroti na rob'ui'éré itepãiwasi hã te te dama âri da.

² Tawamhã Esdra, 'Re ihâimana u'âsi mono nhimiroti na rob'ui'éré ré hã ma tô ti'â, aibâ norĩ, pi'õ norĩ, duré ai'uté norĩ rob'ui'éré te te isadaihu'u za'ra da zama isi'rã'õtõzéb u.

³ Tawamhã tame 're idasisõpẽtẽ pese za'ra mono zéb ãma 'ridawa za'ẽtẽ nho're, ma tô Esdra bâdâ i'rãi watobrozém hawi, abzuma wa'wa u hã, Uburé Danhib'apito nhimiroti na rob'ui'éré hã dama sõré. Tahawa, uburé ari'iwi pese ma tô wapari za'ra ni, te te isõrézé hã.

⁴ Tawamhã Esdra te hâiwi wede 'manharĩ nhisiwi za. Tahawa, te isimire niwĩ, aibâ norĩ hã aimasa, ãne isisi za'ra hã: Matitia, Sema, Anaia, Uria, Hilquia duré Maaséia. Duré isimi'e niwĩ, aibâ norĩ hâiwi isimasam norĩ nhisi hã ãne: Pedaia, Mizaéu, Malquia, Hasu, Hasbadana, Zacaria duré Mesulã.

⁵ Tawamhã Esdra, tame wede 'manharĩ na danhisi hâimo sa wamhã, ma tô uburé dasiwi 'madâ'â ni. Tawamhã ibaihâ te te oto sõ'a wamhã, ma tô uburé pese aihĩni tawahutu za'ra ni, hâiwi dasimasab da, dapara na.

⁶ Tawamhã te Esdra hã ãne dama tinha: — Ma'ãpé Uburé Danhib'apito, 'Re ihâimana u'âsi mono iwaihu'u pese uptabi ãma aiwata za'ra wa'aba! Tawamhã uburé hâimo danhib'rada da te wẽ za'ra sina, ma tô ãma sada'âbâ za'ra ni ãne: — Tane tô! Tane tô! Tawamhã dahi'rãtitõ dasi'ubumro sina, duré ti'ai u da'ubu na da te roptob za'ra sina, ma tô 'Re ihâimana u'âsi mono Uburé Danhib'apito ãma hã tawata za'ra ni.

⁷ Tawamhã apâ dawahutu za'ra wamhã, ma tô dasimasabzé mono bâ apâ dasimasa. Tawamhã levita norĩ ma tô 'Re ihâimana u'âsi mono nhimiroti na rob'ui'éré na hã ãma dama saprĩ za'ra. Ãne isisi norĩ hã: Zesua, Bani, Serebia, Zami, Acube, Sabeta'i, Hodia, Maaséia, Quelita, Azaria, Zozabade, Hana duré Pelaia.

⁸ Tawamhã ta norĩ, 'Re ihâimana u'âsi mono nhimiroti na rob'ui'éré te te dama siwi isõré hã ma tô ãma dama saprĩ za'ra. Ma tô duré nasi ãma dama rowasu'u za'ra, romnhihâdâ da te sadaihu'u wẽ za'ra da, te te siwi isõré hã.

⁹ Tawamhã 'Re ihâimana u'âsi mono nhimiroti na rob'ui'éré, da te wapari za'ra wamhã, ma tô ta'ru'ru ni. Tawamhã Neemia dama i'rãnho'u hã, Esdra, 'Re ihâimana u'âsi mono nhimiroti waihu'u wẽ 'wa uptabi hã, duré levita norĩ hã, rob'ui'éré na te te ãma dama saprĩ za'ra da, ihâimana za'ra norĩ hã ma tô dama nharĩ za'ra ãne: — Ã hã bâdâ iwazéb zahi, te tihâiba, Uburé Danhib'apito, wate 'Re ihâimana u'âsi mono ma. Tahawa a norĩ wa'aba wi aiwi irobzei'õ za'ra wa'aba da hã mare di za. Duré nasi i'ai'ru'ru wa'aba da hã mare di za.

¹⁰ Ma'ãpé oto aiwairébé aba, 'ri tẽme ai'aba'réi aba da, rowẽ te, dato isa'ẽne hã asiwi 'manharĩ aba da. Tawamhã te za dasa norĩ hã, duré uwa 'rãi wa'u isé hã, ni'wam norĩ wi, tiwi sô irobaba za'ra norĩ ma, isõmri za'ra wa'aba mo. Ã hã bâdâ, te tô iwazéb zahi hã tãma tihâiba, Uburé Danhib'apito ma. Tahawa duré aiwi robzei'õ za'ra wa'aba tõ. E marĩ wa. Rowẽ isa'ẽne hã Uburé Danhib'apito te te aima isõmri za'ra wa'aba si te za asiptete za'ra wa'wa.

¹¹ Tawamhã levita norĩ hã, ma tô atãma na dahâimanazé hiri za'ra. Ãne te tahawa, dama nharĩ za'ra: — Ma. Atãma aihâimana za'ra wa'aba, ã hã bâdâ iwazéb zahi, hâimana wa. Duré aiwi robzei'õ za'ra wa'aba tõ!

¹² Tawamhã aihĩni danhorõwa u oto dasi'aba'réi wamhã, ma tô dasa hã huri ni. Ma tô duré dato sina nasi âhuri ni, dasa nhimihârizé hã. Tahawa, ma tô duré ni'wam norĩ wi, dasa norĩ zô tiwi sô irobaba za'ra norĩ ma hã da te sõmri. Ãne ma tô 'manharĩ za'ra ni, rob'ui'éré, da te dama isõré za'ra, da te sadaihu'u za'ra wa.

Romhâ 'manharĩ 'ri na dasima romhu'u nhisi wasu'u

¹³ Tawamhã a'amo nhana'rata hawi maparane bâtâ ãma, uburé a'uwẽ wa'õtõ ma ipire norĩ hã, sasedoti norĩ hã, duré levita norĩ hã ma tô Esdra ihâimanazéb u hã ai'aba'ré, 'Re ihâimana u'âsi mono nhimiroti na rob'ui'éré na taha siré te te ãma romnhoré za'ra da.

¹⁴ Tawamhã 7 a'amo ãma Romhâ 'manharĩ 'ri na dasima romhu'u nhisi wa, a'â romhâ 'manharĩ 'ri 're, 're ihâimana za'ra mono zéb da hã, Uburé Danhib'apito, Mozésihi nho'õmoi baba Izaraéu nhihudu norĩ ma, te te i'ruzém na ãma irob'ui'éré hã ma tô siwi tisã, tô taha na te te ãma iromnhoré za'ra na.

¹⁵ Tahawa uburé 'rinho'u Zeruzalẽ ãma 're ihâimana za'ra mono norĩ ma, uburé 'rinho'u ihâiba amoi 're, 're ihâimana za'ra mono norĩ ma, duré uburé 'ri wa'õtõ 're, 're ihâimana za'ra mono norĩ ma, dapo're pu'uzé da te ãma tãma ropéi mono da, ma tô ta norĩ hã ãne na dama 'ru za'ra: — Ma'ãpé ẽtẽ u aiwairébé aba, pinheiro wede panhipti hã, oriwera wede panhipti hã, murta wede panhipti hã, norõwede su ne panhipti hã, duré aimawi wede panhipti mono hã, we 'wasari aba da, romhâ 'manharĩ na 'ri hã ãma asiwi 'manharĩ aba da, 'Re ihâimana u'âsi mono nhimiroti na ãma irob'ui'éré zarina.

¹⁶ Tawamhã uburé dawairébé wamhã, ma tô wede panhipti hã dasiwi 'wasari ni. Taha pari ma tô õne haré romhâ 'manharĩ na 'ri hã dasiwi ãma 'manharĩ za'ra ni, danhorõwa 'ri nhisi hâpâ mono bâ, 'Re ihâimana u'âsi mono nhorõwa 'ri zahâpâ ãma, Â na 'ridawa za'ẽtẽ nhisi nho're, 're idasisõpẽtẽ pese za'ra mono zéb ãma, duré Efraĩ na 'ri za'ẽtẽ nhisi nho're, 're idasisõpẽtẽ pese za'ra mono zéb ãma zama.

¹⁷ Uburé Babilonia ãma danhito pese na 're idasi'ubumroi mono hawi, apâ we idasi'aba'ré norĩ hã ma tô romhâ 'manharĩ na 'ri hã da te dasima 'ri, a'â niha bâtâ na iwa 're dasi'ubumroi mono da. Nuhu 'ra, Zozué 're ihâimana mono zém hawim haré, ãhã bâtâ u hã ãne na da te dasima romhu'u za'ra õ di. Tahawa, te uburé dasima rowẽ pese za'ra ni.

¹⁸ Tawamhã Esdra, dasima romhu ihâimana na'rata zém hawi, i'rãsutuzéb u te bâtâ sidâpâsi 'Re ihâimana u'âsi mono nhimiroti na rob'ui'éré hã nasi dama sõré. Tawamhã 7 bâtâ 're ma tô dasima romhu hã 'manharĩ za'ra ni. Duré 8 bâtâ ãma hã ãma irob'ui'éré zarina ma tô dasi'rã'õno ipire hã dasiwi 'manharĩ ni, da te dasiwi i'rãsutuzéb na, bâtâ pisutu zahi ihâimana ãma.