Neemia 7 - ꞌRe Ihâimana Uꞌâsi Mono Zadawa Wasuꞌu

¹ Tawamhã 'ri 'wawi wa'ra 'rãihâ 'manharĩ pese zé si'utõrĩ wa, duré uburé 'ridawa za'ẽtẽ mono hã imono bâ da te ãma sasõmri pari za'ra mono wa, ma tô 'ridawa za'ẽtẽ 'madâ'â'wa da hã, isõ're'wa da hã, duré levita norĩ hã tinhimiromhuri za'ra mono bâ te te 're iromhuri za'ra mono da hã, pisutu za'ra ni.

² Tawamhã 'rinho'u Zeruzalẽ ãma dama isi'i'rãnho'õmo zahuré da hã, wa tô maparane aibâ norĩ pisutu zahuré; ĩsisãnawã Hanani norĩ hã, 'ri isiptete 'madâ'â'wa Hananiaha me. Ta hã te marĩ i'uwaibaba si te te 're ab'manharĩ. Te duré 'Re ihâimana u'âsi mono hã te te 're wazé pese, danhipai u.

³ Tawamhã wa tô tãma nharĩ zahuré, bâdâ na're zarõtõ wapsi, 'ridawa za'ẽtẽ mono bâ da te dasiwi 'ridawa za'ra mono da hã te te dama 'ru zahuré da. Rob'madâ'â'wa norĩ, romhuri te te siwi sazâri za'ra wana ré, 'ridawa za'ẽtẽ mono hã bâdâ isébrézéb ãma da te duré dasiwi sito mono pari, da te dasiwi tété mono da hã, te te dama 'ru zahuré da hã, wa tô duré tãma waihu'u zahuré. Tawamhã wa tô duré tãma 'ru zahuré, Zeruzalẽ ãma 're idahâimana za'ra mono norĩ 'remhã rob'madâ'â'wa da, ni'wam norĩ te te apisutu zahuré da hã. Tawamhã te za nima norĩ rob'madâ'â'wa 'ri 'wawi wa'ra 'rãihâ nho're tisimasisizé mono bâ hâimana za'ra, niha wamhã duré nima norĩ tinhorõwa nho're mono na.

Apâ idasihutu mono norĩ nhisi nhoré na rob'ui'érézé wasu'u

⁴ 'Rinho'u Zeruzalẽ hã sa'ẽtẽ uptabi nherẽ, iwa 're idasi'ubumroi mono hã da'umro di. Duré 'ri, apâ da te iwahutu za'ra mono hã umrore di.

⁵ Tahawa ĩpẽ'ẽ 're ĩnhimirosa'rada hã ma tô 'Re ihâimana u'âsi mono hã ĩma tisẽ, uburé te da'ubumro da hã, dama i'rãnho'õmo norĩ hã, duré dama ipire norĩ hã, da'upsãtã mono bâ danhisi na te te ãma irob'ui'éré za'ra da hã, ipire na. Tawamhã wa hã itepãi wasi hã wa tô sõpẽtẽ, imorĩ'rata na Babilonia hawi apâ we isihutu norĩ nhisi na rob'ui'éré ré hã. Ãhãta ãne na danhisi na rob'ui'éré:

⁶ Tawamhã Izaraéu nhihudu norĩ 'remhã, Babilonia te apito Nabucodonozo te te idanhimroi mono siré, ma tô Zuda ti'ai hawimhã da'ahâ na dame ai'aba'ré. Tawamhã ta norĩ hã ma tô Zeruzalẽ u, duré Zuda u ti'ai wa'õtõ nhisi u hã apâ dasina siri za'ra ni, date mono bâ 'ri nho'õmo mono u.

⁷ Isiré isib'ihâ'a isi'aba'ré norĩ hã, Zorobabé, Zozué, Neemia, Azaria, Ra'amia, Naamani, Mordecai, Bisã, Misperete, Biva'i, Ne'u, duré Ba'ana.

⁸ Ã hã Babilonia hawi we apâ idasihutu norĩ nhisi i'upsãtã mono bâ ãma irob'ui'éré za'ra. Imorĩ'rata na a'uwẽ upsãtã hi'rata nhisi mono hã. Taha pari, duré dahawi a'uwẽ upsãtã za'rata mono hã ãne: Paroho hawi a'uwẽ hã ãne: 2.172 na ihâiba hã

⁹ Sefatiaha hawi a'uwẽ hã ãne: 372 na ihâiba hã

¹⁰ Araha hawi a'uwẽ hã ãne: 652 na ihâiba hã

¹¹ Zesua nhihudu, Zoabihi nhihudu me Paate-Moabihi hawi a'uwẽ hã ãne: 2.818 na ihâiba hã

¹² Elãhã hawi a'uwẽ hã ãne: 1.254 na ihâiba hã

¹³ Zatuhu hawi a'uwẽ hã ãne: 845 na ihâiba hã

¹⁴ Zaca'ihi hawi a'uwẽ hã ãne: 760 na ihâiba hã

¹⁵ Binu'ihi hawi a'uwẽ hã ãne: 648 na ihâiba hã

¹⁶ Beba'ihi hawi a'uwẽ hã ãne: 628 na ihâiba hã

¹⁷ Azgadehe hawi a'uwẽ hã ãne: 2.322 na ihâiba hã

¹⁸ Adonicãhã hawi a'uwẽ hã ãne: 667 na ihâiba hã

¹⁹ Biva'ihi hawi a'uwẽ hã ãne: 2.067 na ihâiba hã

²⁰ Adĩhĩ hawi a'uwẽ hã ãne: 655 na ihâiba hã

²¹ Atehe hawi a'uwẽ hã ãne: 98 na ihâiba hã, Ezequiaha nho'õmoi babamhã

²² Hasuhu hawi a'uwẽ hã ãne: 328 na ihâiba hã

²³ Beza'ihi hawi a'uwẽ hã ãne: 324 na ihâiba hã

²⁴ Harifehe hawi a'uwẽ hã ãne: 112 na ihâiba hã

²⁵ Gibiãhã hawi a'uwẽ hã ãne: 95 na ihâiba hã

²⁶ Belẽ ãma a'uwẽ hã, Netofaha ãma me a'uwẽ hã ãne: 188 na ihâiba hã

²⁷ Anatotihi ãma a'uwẽ hã ãne: 128 na ihâiba hã

²⁸ Bete-Azmaweti ãma a'uwẽ hã ãne: 42 na ihâiba hã

²⁹ Quiriate-Zearĩ ãma, Cefira ãma me, duré Be'erote ãma me a'uwẽ hã ãne: 743 na ihâiba hã

³⁰ Rama ãma, Zeba ãma me a'uwẽ hã ãne: 621 na ihâiba hã

³¹ Mitima ãma a'uwẽ hã ãne: 122 na ihâiba hã

³² Bétéu ãma, Ai ãma me, a'uwẽ hã ãne: 123 na ihâiba hã

³³ Nebo na 'ri nho'õmo nhisi amoi ãma a'uwẽ hã ãne: 52 na ihâiba hã

³⁴ Elã na 'ri nho'õmo nhisi amoi ãma a'uwẽ hã ãne: 1.254 na ihâiba hã

³⁵ Harĩ ãma a'uwẽ hã ãne: 320 na ihâiba hã

³⁶ Zerico ãma a'uwẽ hã ãne: 345 na ihâiba hã

³⁷ Rode ãma, Hadide ãma me, duré Ono ãma me a'uwẽ hã ãne: 725 na ihâiba hã

³⁸ Sena'a ãma a'uwẽ hã: 3.930 na ihâiba hã

³⁹ Ã hã duré sasedoti hawimhã, Babilonia ãma sito pese na 're ihâimana za'ra mono zém hawi, apâ isihutu norĩ hã: Zesua nho'õmoi baba, Zedaiaha hawi a'uwẽ hã ãne: 973 na ihâiba hã

⁴⁰ Imehe hawi a'uwẽ hã ãne: 1.052 na ihâiba hã

⁴¹ Pasuhu hawi a'uwẽ hã ãne: 1.247 na ihâiba hã

⁴² Harĩhĩ hawi a'uwẽ hã ãne: 1.017 na ihâiba hã

⁴³ Ã hã duré levita norĩ, Babilonia ãma sito pese na 're ihâimana za'ra mono zém hawi, apâ isihutu norĩ hã: Hodewaha nhihudu norĩ, Zesuaha hawi a'uwẽ hã ãne: 74 na ihâiba hã, Cadmi'éhé nho'õmoi babamhã

⁴⁴ Ã hã duré dama isõ're nhamra'wa norĩ: Asafihi hawi a'uwẽ hã ãne: 148 na ihâiba hã

⁴⁵ Ã hã duré 'ridawa za'ẽtẽ 'madâ'â'wa norĩ: Saluhu nhihudu norĩ hã, Atehe nhihudu norĩ hã, Talmoho nhihudu norĩ hã, Acubehe nhihudu norĩ hã, Hatitaha nhihudu norĩ hã, duré Soba'ihi nhihudu norĩ hã simisutu ãma isitom na hã ãne: 138 na ihâiba hã

⁴⁶ Ã hã 'Re ihâimana u'âsi mono nhorõwa 'ri 're, romhuri'wa norĩ hã ãne, ã norĩ nhihudu mono hã, Babilonia ãma sito pese na 're ihâimana za'ra mono zém hawi, apâ isihutu norĩ hã: Zia, Hasufa, Tabaote

⁴⁷ Querosi, Sia, Padõ,

⁴⁸ Lebana, Hagaba, Salma'i,

⁴⁹ Hana, Gide'u, Ga'a,

⁵⁰ Reaiasi, Rezĩ, Necoda,

⁵¹ Gazã, Uza, Paséia,

⁵² Besa'i, Me'uni, Nefisĩ,

⁵³ Baquebuque, Hacufa, Haru,

⁵⁴ Baslide, Meida, Harsa,

⁵⁵ Barcosi, Sisera, Tama,

⁵⁶ Nesia, duré Hatifa.

⁵⁷ Ã hã duré Salomahã ma romhuri'wa norĩ nhihudu norĩ hã ãne, ã norĩ nhihudu mono hã, Babilonia ãma sito pese na 're ihâimana za'ra mono zém hawi, apâ isihutu norĩ hã: Sota'i, Soferete, Perida,

⁵⁸ Za'ala, Dacõ, Gide'u,

⁵⁹ Hati'u, Poquerete-Hazeba'ĩ, duré Amo.

⁶⁰ 'Re ihâimana u'âsi mono nhorõwa 'ri 're romhuri'wa norĩ, Salomahã ma romhuri'wa nhihudu norĩ me hã ãma isitom na hã Babilonia ãma sito pese na 're ihâimana za'ra mono zém hawi, apâ isihutu norĩ hã, duré ãne: 392 na ihâiba hã

⁶¹ 'Rinho'u Tel-Mela na isisi hawi, Tel-Harsa na isisi hawi me, Querube na isisi hawi me, Adõ na isisi hawi me, duré Ime na isisi hawi me isihutu norĩ hã, Izaraéu nhihudu norĩ ma ihâimana ne, isisi za'ra na rob'ui'éré hã tãma hâimana za'ra õ di, iwaihu'uzéb da hã. Ã hã ta norĩ nhisi mono hã ãne:

⁶² Delaiaha nhihudu norĩ, Tobiaha nhihudu me, duré Necodaha nhihudu me ãma isitom na ãne: 642 na

⁶³ sasedoti norĩ 'remhã ãne: Habaiasihi nhihudu norĩ, Hacozihi nhihudu norĩ me, duré Bazira'ihi nhihudu norĩ me, ta hã tinhipsara Bazira'i na isisi 'ra na imro, Ziliadi ãmam na. Taha aibâ hã ma tô, tô timaprebaba nhisi na hã sisisi.

⁶⁴ Ã norĩ hã ma tô aré tô tinhib'a'uwẽ upsãtã mono na ãma romnhihâtâ za'ra zô hã 're rĩtĩ za'ra. Tane nherẽ, te te sãmri za'ra õ di. Taha zarina, sisasedoti za'ra da hã da te iwaibu da hã dama wẽ õ di.

⁶⁵ Tahawa dama i'rãnho'u zudeu hã ma tô timreme hã ãma hiri za'ra, 'Re ihâimana u'âsi mono ma, danhoprubzém na dasa hã te te dame 're huri tõ mono da, nima hã sasedoti ẽne i'ui'éré ré Urĩ norĩ Tumihi me te te wabzuri da, wisi õ ré, te te ãma irowairébézéb da hã.

⁶⁶ Tawamhã uburé pese aibâ norĩ za'rada apâ isi'aba'ré norĩ hã ma tô watobro, 42.360 na ihâiba hã.

⁶⁷ Tãma iromhuri'wa norĩ si'aibâ, tãma iromhuri'wa norĩ sipi'õ za'ratazé me hã, 7.337 na ihâiba hã. Ta norĩ 'remhã dama isõ're'wa si'aibâ norĩ, dama isõ're'wa sipi'õ za'ratazé me hã ma tô watobro, 245 na ihâiba hã.

⁶⁸ Isimizama za'ra awaru norĩ hã, 736 na ihâiba hã. Duré isimizama za'ra burrure norĩ hã, 245 na ihâiba hã.

⁶⁹ Isimizama za'ra awaru ba'õmore norĩ hã, 435 na ihâiba hã. Duré isimizama za'ra awaru po're pore hã, 6.720 na ma watobro, isa'ratazé hã.

'Re ihâimana u'âsi mono nhorõwa pesezéb da, danhoprubzé wasu'u

⁷⁰ Tawamhã nima norĩ a'uwẽ wa'õtõ ma ipire norĩ hã ma tô 'Re ihâimana u'âsi mono nhorõwa 'ri pese zé wa'âbâzéb da rob'uiprazé hã sõmri za'ra. Tahawa, dama i'rãnho'u hã ma tô ẽtẽ waipo pré oru, 8 kilu na ipire pibuzém na, 50 na piza 're zapoto wawẽ hã, duré 530 na sasedoti norĩ nho'utu hâ'ubuzé hã sõmri za'ra.

⁷¹ Nima norĩ a'uwẽ wa'õtõ ma ipire norĩ hã ma tô ẽtẽ waipo pré oru 160 kilu na ipire pibuzém na hã, duré ẽtẽ waipo prã prata 1.320 kilu na ipire pibuzém na hã sõmri za'ra, romhuri te te nasi ãma iwa'âbâ za'ra zéb da hã dama.

⁷² Tawamhã a'uwẽ isõ'uma norĩ hã ma tô oru 168 kilu na ipire pibuzém na, duré 1.142 kilu na prata na, duré 67 na sasedoti norĩ nho'utu hâ'ubuzé hã sõmri za'ra.

⁷³ Tawamhã uburé a'uwẽ norĩ hã tite za'ra 'ri nho'õmo mono bâ duré 'ri wa'õtõ mono bâ 're isi'ubumroi mono zém na hã ma tô oto ãma sãna'rata za'ra, sasedoti norĩ hã, levita norĩ hã, 'ridawa za'ẽtẽ 'madâ'â'wa norĩ hã, isõ're'wa norĩ hã, 'Re ihâimana u'âsi mono nhorõwa 'ri 're romhuri'wa norĩ hã, ni'wam norĩ a'uwẽ taré 're isi'ubumroi mono norĩ hã, duré isõ'uma Izaraéu nhihudu norĩ hã.