Neemia 6 - ꞌRe Ihâimana Uꞌâsi Mono Zadawa Wasuꞌu

Neemiaha zada idahâimana za'ra zé wasu'u

¹ Tawamhã Sãbalati norĩ, Tobiaha me, Gesẽhẽ me, duré wanhitob'ru ihâiba amo norĩ me ma tô 'ri 'wawi wa'ra 'manharĩ pese zé wa te oto wasiwi i'uprosizé hã siwi waihu'u, duré isipru mono zém na 'ridawa mono hã oto ihâimana õ zé hã. Tane nherẽ, zahadu 'ridawa za'ẽtẽ mono hã wa te ãma sasõmri za'ra mono õ di.

² Tawamhã ma tô Sãbalati norĩ, Gesẽhẽ me, romreme hã we ĩma me zahuré, ãne: “Ma'ãpé we aimorĩ, ẽtẽ siwa'aba wa romharé Ono na isisi ãma, nimahã 'ri wa'õtõ ãma wasisõpẽtẽ za'ra da.” Tane nherẽ, ma tô õ norĩ hã 'rã nhipese na ĩzada rosa'rata zahuré, ĩma isimiza're pese zahuré zéb da.

³ Tawamhã wa tô ãne ré romreme 'wapéi'wa norĩ hã, itẽmeb zahuré hã 'mazatõrĩ za'ra: — Romhuri ipire hã wa 'manha. Tahawa tamomomhã te ãma atẽme wa'aba si'rai waihu'u õ di. E marĩ da, wa za bété ĩnhimiromhuri hã sazâ, a'â ãma atẽme ĩmorĩ aba da, te asõpẽtẽ aba da hã.

⁴ Tawamhã romreme hã maparane si'uiwa na te te nasi ĩma wabzuri zahuré wamhã, wa tô duré tô õhõ na si nasi ãma sada'âbâ zahuré.

⁵ Tawamhã Sãbalati, romreme na 5 na we te te ĩma imezéb ãmamhã ma tô tãma iromhuri'wa hã we ĩtẽmemhã iré 'mazatõ, isib'ratamhã romnhihâdâ hã sitob ãna haré.

⁶ Ãne imreme na rob'ui'éré hã: “Gesẽ hã ma tô ĩma aiwasu'u, aiwaptoma a'uwẽ norĩ 'remhã te te ai'ãma sima irobâsi za'ra zém na hã ãne: A hã zudeu norĩ me, te u, dama ipire norĩ zada aihâimana za'ra wa'aba da, rosa'rada hã asima i'manharĩ za'ra wa'wa. Duré tahawa te u, apâ 'ri 'wawi wa'ra hã asiwi i'manharĩ pese 'wa. Te duré u, asima irosa'ra, dama i'asi'apito da hã.

⁷ Ma tô duré u, ni'wam norĩ 'Re ihâimana u'âsi mono zadawa 'mahârâ'wa hã ipisutu za'ra, Zuda ti'ai ãma i'asi'apitozém na te te siwi dama aiwasu'u da hã Zeruzalẽ ãma. Tawamhã ãne na aiwasu'u hã te za tô apito Artazesi u wi. Tahawa wa norĩ si iwasisõpẽtẽ da hã wa ãma aipẽ'ẽ pibu, wa te wasima robzanhamri da, ãne mono na.”

⁸ Tawamhã asa te ãma isada'âbâzé wa tô ãne tãma tisõ: — Uburé we ĩma iwaihu'uzé mono hã uburé senai'õ si. Asi'rãi hawip si ma tô taré uburé we ãne na hã ĩma iwaihu.

⁹ Õ norĩ hã ma tô aré wapahi te te wama sõmri za'ra da hã wapibu za'ra, romhuri na wa te ãma 'rãiwa'õmo za'ra tõ da. Tane nherẽ, wa tô ãne na 'Re ihâimana u'âsi mono ma mre: “'Re ihâimana u'âsi mono, ma'ãpé ãhã na ĩnhiptetezé hã sa'ẽtẽ na ĩma sõmri!”

¹⁰ Tawamhã taha mono na Semaia, Delaiaha 'ra, Me'etabehe nhihudu wi hã, ma tô tinhorõwa hawi watobro da hã tiwi sawi ni. Tahawa te sabu da, wa tô itẽmemhã mo. Itẽme ĩmorĩ wamhã, ma tô ãne ĩma tinha: — 'Re ihâimana u'âsi mono nhorõwa ãma 'ri're wa'wa iwazéb zahi 're, aré wasima'uri. Tawamhã wa za wasiré hã tété ni, õ norĩ hã za we si'aba'réi wa, te te siwi aiwĩrĩ da hã. Siwa'ru mara na te te siwi aiwĩrĩ da, te za tô õ norĩ hã we asô ai'aba'ré.

¹¹ Tawamhã wa tô ãma tãma wa'rã ãne: — E marĩ zarina bâ, wa za dawi aimani. Duré 'Re ihâimana u'âsi mono nhorõwa 'ri ãma ĩsima'uri wa, ĩsisõ'reptu da hã, e tô isarina. Ãne hã te i'manharĩ da hã mare uptabi di.

¹² Tawamhã wa tô upsibi me, Semaia, 'Re ihâimana u'âsi mono we te te ĩtẽme isatõrĩ õ na hã. Duré Tobia norĩ, Sãbalatihi me, 'Re ihâimana u'âsi mono zadawa wasu'u zarina newa, te te ĩma waihu'u da, wa tô duré upsibi me, õhõ ma, te te tãma iwa'âbâ zahuré zém na hã.

¹³ Ta norĩ hã ma tô rob'uiprazé tãma sõmri zahuré, te te ãma ĩpahi wazere da hã aré, taha zarina ĩwasédé te i'manharĩ da hã. Ãne 'wa'âhã, te aré ĩnhisi wẽ hã ĩwi uprosi zahuré. Te aré duré ãma ĩnhisém hiri zahuré.

¹⁴ “Ĩte 'Re ihâimana u'âsi mono, ma'ãpé Tobia norĩ ãma, Sãbalatihi me ãma aipo're pu'u zahuré na, te te ĩma irob'manharĩ zahuré zém na hã niha na ahâri zahuré da. Asadawa 'mahârâ'wa sipi'õ Noadiaha ãma, duré aimawi ihâiba amo asadawa 'mahârâ'wa norĩ te te aré siwi ĩpahi da, te te siwi ĩpibu norĩ ãma, ma'ãpé ta norĩ ãma zama duré aipo're pu'u za'ra na.”

'Ri 'wawi wa'ra 'manharĩ pese zé isi'utõrĩzé wasu'u

¹⁵ Tawamhã apâ 'ri 'wawi wa'ra 'manharĩ pese zé hã ma tô ai'utõ bâdâ 25 na, elul na a'amo nhisi ãma, bâdâ hã 52 na wa'ãma morĩ za'ra pari.

¹⁶ Tawamhã uburé wanhitob'ru norĩ ãne hã te te waihu'u za'ra wamhã, ma tô uburé wawaptoma 're ihâimana za'ra mono norĩ hã tipẽ'ẽwara pese za'ra. Ma tô duré siwazé pese za'ra, romhuri isi'utõrĩzé 'Re ihâimana u'âsi mono nhimipawaptobzém hawimhã te te waihu'u za'ra wa.

¹⁷ Tawamhã taha ré, ma tô Zuda ãma dama ipire norĩ hã nasi Tobiaha ma rob'ui'éré hã ahâ na tãma sãmra za'ra. Taha sidâpâsi te te ãma isada'âbâ za'ra zém na hã te duré nasi asa tãma ãma siri za'ra, Tobia hã.

¹⁸ Zuda ti'ai ãma te da'ahâ uptabi na Tobiaha niwĩmhã 're hâimana za'ra, zudeu Araha 'ra, Secaniasi na isisi isa'õmo na 're hâimana mono wa, duré i'ra Zoãna na isisi Berequiaha 'ra, Mesulãhã 'ra sipi'õ na mro wa.

¹⁹ Ta norĩ hã ma tô duré ĩ'ubu nho'a hã Tobia marĩ iwẽ te te 're i'ab'manharĩ mono zé hã dama wasu'u za'ra. Ma tô duré uburé te 're inharĩ mono zéb zama õhõ ma, tãma wasu'u za'ra. Tawamhã Tobia, ĩma rob'ui'éré nhomri na hã ma tô te ãma uzusi, te te ãma ĩpahi wazere pese da.