Neemia 5 - ꞌRe Ihâimana Uꞌâsi Mono Zadawa Wasuꞌu

Neemia, isimarĩ'õ te te ipawaptob za'ra zé wasu'u

¹ Tawamhã suru na we iromhâimana mono zém na ronomro pari, ma tô da'ahâ na aibâ norĩ hã duré pi'õ norĩ hã tisiré zudeu norĩ ma tisiwapsari na hã ãma sãna'rata za'ra.

² Tawamhã ni'wam norĩ hã te ãne nharĩ za'ra: — 'Ri 're, wa'ra si'aibâ norĩ hã duré wa'ra sipi'õ norĩ hã ahâ uptabi mono di. Tahawa amnho trigu wasa za'ra zéb da hã te wawi sô tirobaba za'ra, wahâiba ré wahâimanazém na wa te ãma i'uzusi za'ra da hã.

³ Te duré tawamhã isiré ihâiba amo norĩ hã ãne nharĩ za'ra: — Mrap te wasi'utõrĩ tõ da hã, wa tô waburu mono na hã duré uwa 'ru wa te 're izuri mono na hã duré wanhorõwa mono na hã ropisutu na rob'uiprazé hã dawi 'ma'âri za'ra ni, amnho trigu wa te ãma i'uipra za'ra da hã.

⁴ Tawamhã te duré isiré ihâiba amo norĩ hã nharĩ za'ra ãne: — Waburu wa'âbâ arĩ mono hã duré uwa 'ru wa te 're izuri mono wa'âbâ arĩ mono hã, apito ma, wa te wa'âbâ za'ra da hã, wa tô a'â rob'uiprazé hã taré dawi 'mai'âri za'ra ni, ropisutu na.

⁵ Tô õ norĩ, wasiré zudeu norĩ hã wasiwaprui mono. Duré wa'ra mono hã aiwa tô i'ra norĩ sine hã iwẽ. Tane nherẽ, wa za tô oto wa'ra norĩ hã pawa'âbâ ãna te te dama 're romhuri za'ra mono da hã hâiba nhomri za'ra ni. Ni'wam norĩ wa'ra sipi'õ hã wa tô umro na pawa'âbâ ãna te te dama 're iromhuri za'ra mono da hã, dama wede za'ra ni. Ãne wi hã tô wasitété waihu'u za'ra õ di, wa te 'manharĩ za'ra tõ da hã. E marĩ wa. Waburu hã duré wate uwa 'ru hã da te wawi waibu za'ra pari wa.

⁶ Tawamhã wa hã Neemia, dasiwapsari te wapari wa, ma tô sina ĩnhiti'ru waze.

⁷ Tahawa, wa tô marĩ te i'manharĩ da hã ĩsima rowairébé. Tawamhã dama ipire norĩ ma, duré dama roti'wa norĩ ma, wa ĩmreme na hã tãma pri'i za'ra ãne: — Asisãnawã norĩ wa'aba wi, ma tô rob'uiprazé ropisutu na te te aiwi 're iwaibui wa'aba mono zém na ãma tiwi 're isisiwi za'ra wa'aba mo, isipai u te te aima 're wa'âbâ za'ra wa'aba mono da hã! Tawamhã ãne na te rosa'rata pari, wa tô uburé ĩsima da'ubumro, marĩ ipire na niha na, wa te wasima rowairébé za'ra da.

⁸ Tawamhã wa tô duré ãne tãma nharĩ za'ra: — Wa norĩ hã wanhimarĩ wama 're ihâimana za'ra mono zarina, wa tô wasiré a'uwẽ zudeu norĩ, wasiré a'uwẽ'õ norĩ wi hã apâ wa te 're uipra za'ra, aré 'râwi dama 're isiwede za'ra mono norĩ hã. Ãne nherẽ, te duré oto ãhã na awa'awi na a norĩ wa'wa hã asiré a'uwẽ norĩ zada, asiptede hã sada 're i'manharĩ za'ra wa'aba mo, 'râwi aima 're siwede za'ra wa'aba mono da hã! Tawamhã dama ipire norĩ hã ma tô ari'iwi pese tihâimana za'ra, te te ãma ĩzada'âbâ za'ra ãna, niha na.

⁹ Tawamhã wa duré tãma nharĩ za'ra ãne: — Marĩ a norĩ wa'wa 're i'manharĩ za'ra wa'aba mono hã, i'uwaibaba õ di! 'Re ihâimana u'âsi mono si 're iwazéb za'ra wa'aba mono zéb da si i'ruzahi. Duré i'uwaibaba na si uburé marĩ 're i'manharĩ za'ra wa'aba mono da si i'ruzahi hã, wasiré zudeu'õ wanhitob'ru norĩ, wa'ãma 're wa'ẽ za'ra mono tõ da.

¹⁰ Tawamhã wa hã ĩsiré norĩ me hã, duré aibâ norĩ te te ĩma 're iromhuri za'ra mono norĩ me, wa tô rob'uiprazé hã duré trigu hã ropisutu na da te wawi iwaptẽrẽ za'ra hã taré dama sõmri za'ra ni. Tane nherẽ, wa za tô oto tãma sisisi za'ra ni, õne haré tãma hâimana za'ra da.

¹¹ Tahawa, ma'ãpé a norĩ wa'aba zama õ norĩ ma, sisisi za'ra wa'aba, taré ropisutu na rob'uiprazé, niha wamhã duré uwa 'rãi wa'u isé hã, niha wamhã, duré azeitona wa'u to hã, te te aiwi 're iwaibui wa'aba mono hã. Ãhã na awa'awi na te za tô iburu mono hã ite za'ra uwa 'ru hã, oriwera wede hã te te 're izuri mono hã, duré isõrõwa mono hã apâ tãma ĩsõmri za'ra wa'wa!

¹² Tawamhã dama ipire norĩ, ma te ãne asa ãma ĩzada'âbâ za'ra: — Wẽ di tô. Ãma wama inharĩ za'ra zéb zarina, wa za tô wasiwi 'manharĩ ni. Danhimarĩ mono hã wa za tô apâ wa te dama sõmri za'ra, itede'wa norĩ ma hã. Duré rob'uiprazém na da te wama ropisutu za'ra nherẽ, zahadu da te wama iwa'âbâ za'ra õ na, wa te ãma idawati zahu za'ra da hã mare di za. Tawamhã sasedoti norĩ zô, wa tô ĩhârâ za'ra. Tahawa, wa tô dama ipire norĩ ma, 'manharĩ za'ra, tinhimiropisutuzé te te ãma ĩma i'uwaimrami za'ra mono na sena na te te ĩma sina ropisutu za'ra da hã.

¹³ Tawamhã ĩsi'awasisizé isinhai ré hã wa tô waze. Te wazere wamhã, wa tô oto sãsã'ã. Tahawa, wa tô tãma nharĩ za'ra ãne: — Ãne te za 'Re ihâimana u'âsi mono hã ai'masãsã'ã 'wa, asimiropisutuzé tãma ãma 'mai'uwaimrami aba õ wamhã. Tawamhã te za asõrõwa wa'wa hã aiwi 'maiwazere 'wa. Te za duré uburé asimarĩ wa'wa hã aiwi 'mazani wa'wa, asimarĩ õ uptabi na oto 're ai'maihâimana aba mono da. Tawamhã uburé õme idahâimana za'ra hã te ãne nharĩ za'ra: — Tane tô! Tane romhâimana da hã iwẽ! Tawamhã Uburé Danhib'apito ãma te tiwata za'ra. Tawamhã tinhimiropisudu te te i'manharĩ za'ra zém na hã ma tô oto duré ãma uwaimrami za'ra.

Neemia, sena na 're ihâimana mono na isiwasu'uzé wasu'u

¹⁴ Tawamhã Zuda ti'ai ãma Artazesi ãma 20 na danhib'apito na ãma iwahubzém hawi, 32 na ãma iwahubzéb u hã, 12 wahub 're ĩsi'i'rãnho'õmo na 're ĩza mono ré, wa hã, ĩsiwapru norĩ me hã dama i'rãnho'õmo norĩ sazém na hã, wa te 're 'mai'rẽne za'ra mono õ di.

¹⁵ Ĩwana dama i'rãnho'õmo norĩ, ma tô ropire hã te te dama 're sõmri za'ra. Ma tô duré bâtâ sidâpâsi mreme tete na te te dawi 're waibu, ẽtẽ waipo prã prata 480 grama na ipire pibuzém na da te tãma ãma 're wa'âbâ za'ra mono da, dasa norĩ uiprazéb da hã duré uwa 'rãi wa'u isé uiprazéb da. Tãma romhuri'wa norĩ zama ma tô duré te te 're dawati za'ra. Tane nherẽ, wa hã wa tô romhâimanazé aimawi na tãma ãma romhâimana za'ra, 'Re ihâimana u'âsi mono hã, te 're wazé pese mono wa.

¹⁶ Wa hã wa tô duré aimawi ĩsima romhâimana, 'ri 'wawi wa'ra 'manharĩzé pese na si. Taha na si wa tô te 're romhuri pese. Te duré 'mai'uipra õ di, roptede'wa norĩ wi ti'ai wa'õno hã. Ma tô duré uburé ĩma romhuri'wa norĩ hã te te siwi 're ĩpawapto pese, 'ri 'wawi wa'ra na hã.

¹⁷ Wa tô duré zudeu 150 na ihâiba norĩ zô hâ, isib'apito norĩ zô zama, duré a'uwẽ aimawi wawaptoma 're ihâimana za'ra mono norĩ ĩtẽme 're inomro u'âsi mono zô zama, nasi ĩhârâ za'ra, ĩnhorõwa 're nasi saihuri da hã.

¹⁸ Tawamhã bâtâ sidâpâsi wa tô misi powawẽ hã, 6 na pone'ẽrebâ iwẽ norĩ hã duré si'a norĩ hã dasazéb da, te dama 're a'ru. Tawamhã 10 na bâdâ iwa waptã'ã mono sidâpâsi, wa tô duré uwa 'rãi wa'u isé itéb ré iwahuré hã da te we ĩma 're sõmri mono da hã, te 're 'ru. Ãne hã te 're 'manharĩ mono nherẽ, romhuri pire na da te 're iromhuri za'ra mono zém na ĩma waihu'u pese wa, dama i'rãnho'õmo norĩ sazé hã te 're 'maiwaptẽrẽ mono õ di.

¹⁹ “Ĩte 'Re ihâimana u'âsi mono, ma'ãpé ĩ'ãma aipo're pu'u, uburé ã hã a'uwẽ norĩ ma, marĩ te 're i'manharĩzé mono na hã.”