Neemia 13 - ꞌRe Ihâimana Uꞌâsi Mono Zadawa Wasuꞌu

Dasiré a'uwẽ'õ norĩ ãma idasiwãnhizari za'ra zé wasu'u

¹ Tawamhã taha bâtâ na Mozésihi nhimi'ui'éré, sa'ẽtẽ damreme 'rãihâ na da te dasima sõré za'ra wa, ma tô amonita norĩ hã duré moabita norĩ hã 'Re ihâimana u'âsi mono nhib'a'uwẽ norĩ me, za niwamhã sina za'ra isihâibatob'õzém na rob'ui'éré hã siwi sõpẽtẽ.

² E marĩ wa. A'uwẽ norĩ Amo ãma hã duré Moabi ãma hã, Izaraéu nhihudu norĩ Ezitu hawi wairébé wa, oto si'aba'réi wamhã, â hã duré dasa hã te te tãma sõmri za'ra õ wa. Taha wa'rãmi, ma tô ta norĩ hã Balaãhã ma, wa'âbâ za'ra, niha hã iwasédé te te tãma pisutu za'ra da. Tane nherẽ, ma tô 'Re ihâimana u'âsi mono hã te te aré dama irob'manharĩ wasété za'ra zé, iwẽ u hã ãma tiwi saprĩ za'ra.

³ Tawamhã ãne hã Izaraéu nhihudu norĩ, roti na rob'ui'éré nhoré te te wapari za'ra wamhã, ma tô tisiré a'uwẽ'õ norĩ, isiré 're ihâimana za'ra mono zém hawimhã sani za'ra.

Neemia, romhâimanazé te te ipesezé wasu'u

⁴ Tawamhã ãne na romhâimana wana ré, sasedoti Eriasibe, 'Re ihâimana u'âsi mono nhorõwa 'ri ãma marĩ 're isimi'wara mono 'madâ'â'wa hã te Tobiaha sisãnawã siwadi na 're hâimana.

⁵ Tahawa ma tô 'ri 're wa'õtõ za'ẽne hã tãma sa'ré, amnho na danhoprubzé, iro'o da, wede wa'u zadaze na danhoprubzé iwa 're isimi'wara mono hã, 'Re ihâimana u'âsi mono nhorõwa 'ri 're, marĩ da te ãma 're i'manharĩ za'ra mono iwa 're isimi'wara mono hã, sasedoti ma danhoprubzé nhimi'warazé hã, 10 na amnho tehâri wasi, misi iwasi iwa 're isimi'wara mono hã, duré uwa 'rãi wa'u isé nhimi'warazé hã, levita norĩ ma, azeitona wa'u to, da te tãma 're isõmri za'ra mono iwa 're isimi'wara mono hã, isõ're'wa norĩ ma hã, duré 'Re ihâimana u'âsi mono nhorõwa 'ri 'madâ'â'wa norĩ ma hã.

⁶ Tane nherẽ, ãne na romhâimana wamhã, wa hã Zeruzalẽ ãma ĩhâimana õ di. E marĩ wa. Babilonia te, apito Artazesi ãma i'rãnho'õmo na 're ihâimana mono zém na 32 na ãma iwahub ãma, wa tô õwamhã apâ ĩsina siri, ĩsi'uihâ na te tãma ĩsina robzanhamri da, apito ma. Tawamhã niha bâdâ we si'utõrĩ mono pari, ma tô bâdâ hã ĩma sa'ré, apâ ĩmorĩzéb da hã.

⁷ Tahawa Zeruzalẽ u apâ te ĩsina siri wamhã, wa tô Eriasibe tiwasédé te te i'manharĩzé hã waihu'u, 'Re ihâimana u'âsi mono nhorõwa 'ri 're wa'õno, Tobia iwa hâimana da, te te tãma isa'rézém na hã.

⁸ Tahawa, wa hã ĩnhib'rui pese wa, wa tô 'ri 're wa'õtõ hawimhã Tobiaha nhimarĩ hã, rob u sãmra.

⁹ Taha pari, wa tô dama ti'ru, 'ri 're wa'õno da te dasiwi pese da, 'Re ihâimana u'âsi mono nhorõwa 'ri 'remhã uburé marĩ iwaipo norĩ, amnho na 're idanhoprub za'ra mono hã, duré wede wa'u zadaze hã iwa apâ da te dasiwi sa'ra za'ra da.

¹⁰ Tawamhã 'Re ihâimana u'âsi mono nhorõwa 'ri 're, dama 're isõ're za'ra mono, duré Zeruzalẽ hawi levita norĩ iwairébézém na, apâ rom na te te 're irobzuri mono u, isi'aba'rézém na zama wa tô waihu'u. E marĩ wa, ma tô apâ ai'aba'ré. A'uwẽ norĩ, õ norĩ uparizé, ibâ na te te tãma 're sõmri za'ra mono õ wa, ihâimana za'ra zéb da hã.

¹¹ Tahawa wa hã, dama ipire norĩ, 'Re ihâimana u'âsi mono nhorõwa 'ri, te te siwi rẽme za'ra wa, wa tô tãma pẽtẽ za'ra. Taha pari levita norĩ zô, duré dama isõ're'wa norĩ zô, wa tô ĩhârâ za'ra, apâ 'Re ihâimana u'âsi mono nhorõwa 'ri u sihutu da hã. Tawamhã wa tô apâ we te te 're irob'ma'wamarĩ mono zé mono bâ hã te anhoré.

¹² Tawamhã uburé Izaraéu nhihudu norĩ, ma tô apâ ro'wasari na ãma sãna'rata za'ra, 'Re ihâimana u'âsi mono nhorõwa 'ri 're, 're iromnhimi'wara mono zéb u 10 na amnho wasi misi iwasi mrami na hã, uwa 'rãi wa'u isé mrami na hã, duré azeitona wa'u to mrami na hã.

¹³ Tahawa, romnhimi'warazé 'madâ'â'wa da hã wa tô aibâ norĩ hã waibu za'ra: sasedoti Selemia, Zadoqui dama romnhihâtâ 'manharĩ'wa hã, duré levita Pedaia na isisi hã. Tawamhã ipawaptob za'ra 'wa na tãma 're ihâimana za'ra mono da hã wa tô duré pisutu, Hana Zacuhu 'ra, Mataniaha nhihudu hã. Tawamhã wa tô waihu'u siro, za aibâ norĩ, te 're i'umnhasi za'ra mono na hã, tisiré romhuri'wa norĩ ma, dasa na duré rob'uiprazém na i'uwaibaba na za ãma tãma 're isipo'o za'ra mono na hã.

¹⁴ “Ĩte 'Re ihâimana u'âsi mono, ma'ãpé asõrõwa 'ri 're ma, duré iwa ai'ãma 're idawata za'ra mono zé ma, uburé marĩ te 're i'ab'manharĩ mono zém na ĩ'ãma aipo're pu'u.”

¹⁵ Tawamhã Zeruzalẽ ãma tô taha bâtâ mono na ni'wam norĩ hã wa tô nasi 'madâ'â za'ra, uwa 'ru 'rã iwa'u zô tipara na sabadu na nherẽ, te te 're iwati za'ra mono hã. Ni'wam norĩ hã te tite awaru po're pore na amnho hã, uwa 'rãi wa'u isé hã, uwa hã, figuera wede 'rã hã, duré aimawi tinhimarĩ hã Zeruzalẽ u, te te 're 'wasari. Tahawa, wa tô tãma waihu'u za'ra, sabadu na nherẽ, te te 're rowede tõ za'ra mono da hã oto.

¹⁶ Tawamhã ni'wam norĩ aibâ, Tiru na 'ri nho'õmo nhisi hawimhã Zeruzalẽ ãma 're ihâimana za'ra mono hã ma tô tepe norĩ hã duré sipu'u pese na marĩ norĩ hã 'ri nho'õmo 're ma, te te 're 'wasari, wanhib'a'uwẽ norĩ ma, sabadu na te te 're wede za'ra mono da hã.

¹⁷ Tawamhã wa hã wa tô zudeu norĩ ma, ipire norĩ ma tãma pẽtẽ za'ra. Tahawa, wa tô tãma nharĩ za'ra, ãne: — E niha ma tô iwasédé hã asiwi i'manharĩ 'wa! Sabadu bâdâ hã ma tô duré asiwi iwasété 'wa!

¹⁸ Ãne wa, ma tô duré tô 'Re ihâimana u'âsi mono hã aihi'rata za'ra wa'wa hã hâ za'ra, 'ri nho'u da te prub da, te te dama sa'réi wamhã. Tane nherẽ, te awa'awi na sabadu hã nasi duré asiwi iwasété 'wa. Taha zarina ma tô 'Re ihâimana u'âsi mono, Izaraéu nhihudu norĩ zada 're isiti'rui pusi mono zé hã te te sina 're hâimo.

¹⁹ Tahawa, sabadu bâdâ 're sãna'rata mono wana ré, robra wi 'ri nho'õmo te, 'ridawa za'ẽtẽ mono hã da te 're sitob za'ra mono da, duré sabadu bâdâ si'utõrĩ wapsi apâ da te 're 'ridawa za'ra mono da hã wa tô dama waihu'u. Tahawa, ĩte aibâ norĩ 'ridawa za'ẽtẽ norĩ ãmamhã wa tô sõré, te te rob'madâ'â za'ra da hã, 'ri nho'õmo u hã sabadu na hã da te oto 're ro'mazasi za'ra mono tõ da.

²⁰ Tawamhã sipu'u pese na marĩ wede'wa norĩ, sexta romhuri 'rãsudu bara na 'ri nho'õmo 'wawi wa'ra 'rãihâ babarã na hã ma tô ãma ti'awẽ za'ra, misi mara na niha wamhã, maparane mara na.

²¹ Tane nherẽ, wa tô po're pu'u za'ra ãne: — 'Ri 'wawi wa'ra 'rãihâ babarã na ai'ãma awẽ za'ra wa'aba õ di za. Ãne hã duré asiwi 'manharĩ aba wamhã, ĩnhiptede hã wa za tô 'manha, asada za'ra wa'aba hã. Tawamhã tahawim haré sabadu na hã te te sina siri za'ra õ di apâ hã.

²² Tawamhã levita norĩ, sipese za'ra da, duré 'ridawa za'ẽtẽ norĩ hã te te 'madâ'â za'ra da, wa tô tãma waihu'u za'ra, wazé pese na sabadu bâdâ hã hâimana da, wẽ uptabi na. “Ĩte 'Re ihâimana u'âsi mono, ma'ãpé ãhã wab zama ĩ'ãma aipo're pu'u. Duré ma'ãpé asimizawizéb za'ẽtẽ zarina hã ĩ'ãma aiwamri na.”

²³ Tô taha bâtâ mono na hã, zudeu norĩ ahâ uptabi na, Asidodi norĩ sipi'õ na, amonita norĩ sipi'õ na duré moabita norĩ sipi'õ na 're imro za'ra mono zéb zama hã wa tô a'upsibi me.

²⁴ Tahawa i'ra norĩ aiwa ãma isipo'o na, te Asidodi mreme na hã, duré damreme ihâiba amo na hã 're mreme zusi. Tahawa duré zudeu norĩ mreme na hã 're mreme zusi waihu'u mono õ di.

²⁵ Tahawa aibâ norĩ ma, wa tô pẽtẽ za'ra. Wa tô duré 'Re ihâimana u'âsi mono nhimi'ahârizé hã sada waptẽrẽ za'ra. Tahawa, wa tô duré hâ za'ra. Wa tô duré séré zano za'ra. Tawamhã 'Re ihâimana u'âsi mono nhisi na wa tô tiwi waptẽrẽ za'ra, niwamhã i'ra norĩ hã wasiré a'uwẽ'õ norĩ nhipi'õ na hã 're mro zahu za'ra mono tõ da.

²⁶ Tahawa wa tô tãma nharĩ za'ra ãne: — Wasiré a'uwẽ'õ norĩ sipi'õ na 're imro za'ra mono zarina, ma tô apito Saloma tiwasédé hã te te 're 'manharĩ. Aré dama isa'rese za'ẽtẽ uptabi, uburé daro mono bâ dama 're isi'apito za'ra mono norĩ nhipai u hã. 'Re ihâimana u'âsi mono hã te te 're sawi pese mono wa, ma tô uburé Izaraéu nhihudu norĩ ma si'apito da hã pisutu. Tane nherẽ, ma tô tiwasété u waptãrã.

²⁷ E wa norĩ zama, wa za ãne na hã bété duré 're wanomro wasété, wate 'Re ihâimana u'âsi mono, wa te 're iwapari za'ra mono õ zarina, wasiré a'uwẽ'õ norĩ sipi'õ na ãma 're wamro za'ra mono da hã.

²⁸ Zoiada hã, Eriasibe sasedoti ipire 'ra, te 're hâimana. Tane nherẽ, Zoiadaha 'ra hã ma tô Sãbalatihi 'ra na hã timro, 'ri nho'u Bete-Horõ na isisi hawib 'ra na. Tahawa, wa tô Zoiada, Zeruzalẽ hawimhã waze.

²⁹ “Ĩte 'Re ihâimana u'âsi mono, ma'ãpé a'uwẽ norĩ ãmamhã aipo're si'âri za'ra tõ. E marĩ wa. Sasedoti nhimiromhuri na te te wasété za'ra wa, duré sasedoti norĩ ma, levita norĩ me asimiropisutu zahi tãma i'manharĩ za'ra zém na zama te te duré wasété za'ra wa.”

³⁰ Ãne wa tô sasedoti norĩ hã levita norĩ me, uburé wasiré a'uwẽ'õ norĩ te na 're ihâimana wasété za'ra mono zém hawimhã oto pese za'ra. Duré tahawa, wa tô roti hã tãma 'manharĩ za'ra, tite mono bâ romhuri na hã te te 're rob'ma'wamarĩ mono da.

³¹ Wa tô roti hã tãma 'manharĩ za'ra, bâdâ iwa 're tobro mono wa, mi da te 're i'wasari mono na hã, za danhimizama da te ãma 're izata za'ra mono zém na hã. Tawamhã duré amnho imorĩ'rata na ãma danhoprubzém na, wa tô rowaihu hã tãma 'manharĩ za'ra, duré rowede 'rã, imorĩ'rata na da te 're isinarĩ za'ra mono na hã. “Ĩte 'Re ihâimana u'âsi mono, ma'ãpé, uburé marĩ na hã ĩ'ãma 're aipo're pu'u u'âsi mono. Ma'ãpé duré iwẽ na si we 're ĩpawaptob u'âsi mono!”