Neemia 11 - ꞌRe Ihâimana Uꞌâsi Mono Zadawa Wasuꞌu

Zeruzalẽ ãma 're idahâimana za'ra mono zé wasu'u

¹ Tawamhã Izaraéu nhihudu norĩ ma, i'rãnho'õmo norĩ hã Zeruzalẽ ãma 're rob za'ra mono da, ma tô sima pisutu za'ra. Duré a'uwẽ isõ'uma norĩ, 'rinho'u Zeruzalẽ, 'Re ihâimana u'âsi mono tite da, te te ipisutu wa, da'ra norĩ ré misi si 10 na dawa'õtõ za'rata ãma, nima norĩ iwa 're rob za'ra mono da, te te dapisutu za'ra da hã ma tô datozébre nasi siwi wabzu. Duré 9 na da'ra norĩ ré dawa'õtõ na ma tô, 'ri nho'u ihâiba amo norĩ ãma 're dahâimana za'ra.

² Tawamhã Zeruzalẽ ãma 're hâimana za'ra mono da, te te sima irowairébé za'ra norĩ hã, ma tô dapẽ'ẽ to sina dasima wasu'u wẽ za'ra ni.

³ Ni'wam norĩ Izaraéu nhihudu, sasedoti norĩ, levita norĩ, duré Salomahã nhib'a'uwẽ nhihudu 'Re ihâimana u'âsi mono nhorõwa 'ri 're te te 're iromhuri za'ra mono, ma tô 'ri nho'u ihâiba amo norĩ ãma tite ti'ai wa'õtõ mono wa, 're si'ubumro. Ã hã Zuda na daza'rui wa'õtõ nhisi ãma dama ipire Zeruzalẽ ãma 're isi'ubumroi mono norĩ nhisi na irob'ui'éré hã:

⁴ Zudaha nhihudu 'rem norĩ hã ãne: Ataia, Uziaha 'ra, Zacariaha nhihudu. Taha hi'rata norĩ hã duré ãne; Amaria, Sefatia, Ma'alaléu duré Peresi Zudaha 'ra nhihudu hã.

⁵ Maaséia, Baruquihi 'ra, Col-Hozéhe nhihudu. Taha hi'rata norĩ hã duré ãne; Hazaia, Adaia, Zoiaribe, Zacaria duré Sela Zudaha 'ra nhihudu hã.

⁶ Peresihi nhihudu Zeruzalẽ ãma 're ihâimana za'ra mono norĩ, 468 na ihâiba za'rata za'ra isiptete norĩ hã.

⁷ Bẽzamihĩ nhihudu 'rem norĩ hã duré ãne: Salu, Mesulãhã 'ra, Zoedehe nhihudu. Taha hi'rata norĩ hã ãne duré; Pedaia, Colaia, Maaséia, Iti'é, duré Zesaiasi.

⁸ Gabaihi norĩ, Sala'ihi me, Saluhu siwapru zahuré 'râwi pesere hã. Tawamhã Bẽzamihĩ nhihudu aibâ norĩ Zeruzalẽ ãma 're isi'ubumroi mono za'rada hã, ma tô uburé hã watobro, 928 na.

⁹ Zuéu, Zicrihi 'ra, ma tô ta norĩ nhib'ihâ'a na hã tãma 're hâimana za'ra. Duré Zuda, Senuaha 'ra, ma tô taha zapari danhib'ihâ'a na tãma 're sab za'ra, Zeruzalẽ ãma.

¹⁰ Sasedoti 'rem norĩ hã ãne: Zedaia, Zoiaribehe 'ra, duré Zaqui.

¹¹ Seraia, Hilquiaha 'ra, Mesulãhã nhihudu. Taha hi'rata norĩ hã duré ãne; Zadoqui, Meraiote, duré Aitubi, 'Re ihâimana u'âsi mono nhorõwa 'ri 're romhuri 'madâ'â'wa hã.

¹² Ã hã uburé ãma isitom na simisutu isa'rada hã 822 na, 'Re ihâimana u'âsi mono nhorõwa 'ri na romhuri'wa norĩ hã. Duré Adaia, Zero'ãhã 'ra hã, Pelaliaha nhihudu. Taha hi'rata norĩ hã duré ãne; Anzi, Zacaria, Pasu, duré Malquia.

¹³ Ã hã uburé ãma isitom na simisutu isa'rada hã 242 na, a'uwẽ iwa'õtõ mono bâ danhib'ihâ'a mono hã. Amasai, Azareuhu 'ra, Aza'ihi nhihudu. Taha hi'rata zahuré hã, Mesilemote norĩ, Imehe me.

¹⁴ Ã hã a'uwẽ wa'õtõ 'remhã te aibâ norĩ dasi'wapéi 'manharĩ'wa isib'ru hã 're hâimana za'ra, 128 na. Ta norĩ nhib'ihâ'a hã Zabdi'é na isisi, dawa'õno ipire 'remhã 're ihâimana mono.

¹⁵ Levihi nhihudu 'rem norĩ hã ãne: Semaia, Hasubehe 'ra, Azricãhã nhihudu. Taha hi'rata zahuré hã Hasabiasi norĩ, Bunihi me.

¹⁶ Levita tisiré norĩ ma, ipire norĩ, Sabeta'ihi norĩ, Zozabadehe me, 'Re ihâimana u'âsi mono nhorõwa 'ri ãma rowi romhuri 'madâ'â'wa dama zahuré.

¹⁷ Matania, Micaha 'ra, Zabdihi nhihudu, duré Asafihi nhihudu hawimhã a'uwẽ. Ta hã ma tô 'Re ihâimana u'âsi mono nhorõwa 'ri 're tãma 're idamreme zusi mono zéb ãma danho're na ãma 're iwata za'ra mono da hã, danho're te te dama 're 'wani. Duré Baquebuquia hã, Mataniaha pawapto'wa na 're ihâimana mono. Abda, Samuaha 'ra, Gala'oho nhihudu hã, Zedutu nhihudu hawimhã a'uwẽ.

¹⁸ Tawamhã 'rinho'u Zeruzalẽ, 'Re ihâimana u'âsi mono tite da, te te ipisutu ãma 're ihâimana za'ra mono norĩ za'rada hã, ma tô uburé hã watobro 284 na, levita norĩ hã.

¹⁹ 'Re ihâimana u'âsi mono nhorõwa 'ri 'madâ'â'wa norĩ hã ãne: Acube, duré Talmo tisisãnawãi me hã. Ã hã uburé 172 na isa'rata za'ra hã ma tô watobro.

²⁰ Tawamhã Izaraéu nhihudu norĩ, sasedoti norĩ, duré levita norĩ isõ'uma hã ma tô tite ti'ai wa'õtõ mono bâ 'ri nho'õmo mono na 're hâimana za'ra, Zuda ti'ai 'remhã.

²¹ Zeruzalẽ ãma 'Re ihâimana u'âsi mono nhorõwa 'ri na romhuri'wa norĩ, ma tô Zeruzalẽ 're Ofe'u na 'ri wa'õtõ 'rare nhisi ãma 're hâimana za'ra. Ta norĩ ma tô Zia norĩ nhimi'madâ'â zapari Gispaha me te te 're romhuri za'ra.

²² Levita norĩ nhib'ihâ'a Zeruzalẽ ãma 're ihâimana mono, Uzi na isisi, Banihi 'ra, Hasabiasihi nhihudu. Taha hi'rata zahuré hã Matania, duré Mica. Ta hã ma tô Asafihi te a'uwẽ wa'õtõ ãma hã 're hâimana, 'Re ihâimana u'âsi mono nhorõwa 'ri 're dama isõ're'wa na.

²³ Tawamhã niha, bâtâ sidâpâsi 'Re ihâimana u'âsi mono nhorõwa 'ri 're, danho're nhamra na, da te dasima 're irẽme za'ra mono da, te apito nhimiroti hã ãma tihâiba.

²⁴ Petaia, Mesezabehe 'ra, Zeraha nhihudu, Zudaha 'ra. Ta hã ma tô Izaraéu nhihudu norĩ ma rowaihu'u'wa na Persia ãma apito nhimiromhurizéb ãma te te 're romhuri.

'Ri nho'õmo norĩ ihâiba amoi ãma, duré ti'ai wa'õtõ ãma 're idasi'ubumroi mono zé wasu'u

²⁵ Izaraéu nhihudu norĩ hã te ahâ uptabi na rom na tiburu 'rata 're si'ubumro, 'ri nho'õmo mono bâ. Tawamhã Zudaha nhihudu norĩ hã 'ri nho'u Quiriate-Arba ãma, Dibõ ãma, Zecabzee'u ãma, duré ti'ai wa'õtõ mono bâ 'ri nho'õmo norĩ 'rata ma tô 're hâimana za'ra.

²⁶ Tawamhã 'ri nho'u Zesua ãma, Molada ãma, Bete-Palete ãma,

²⁷ Haza-Sual ãma, Beseba ãma, duré taha uirĩ na ti'ai wa'õtõ mono na te duré 're hâimana za'ra.

²⁸ 'Rinho'u Zicradi ãma, Mecona ãma, taha uirĩ na ti'ai wa'õtõ mono na,

²⁹ 'ri nho'u En-Rimo ãma, Zora ãma, Zamute ãma,

³⁰ Zanoa ãma, Adurã ãma, duré taha 'ri nho'õmo norĩ 'rata 'ri wa'õtõ mono na ma tô 're si'ubumro. Ma tô duré Laqui na 'ri nho'õmo nhisi ãma, duré taha 'rata rom na tiburu ãma 're hâimana za'ra. 'Ri nho'u Azeca ãma, taha uirĩ na 'ri wa'õtõ mono na te duré 're si'ubumro. Ãne ma tô Zudaha nhihudu norĩ hã hâiwa nhimi'e niwĩ Beseba norĩ wa'wamhã, hâiwa nhimire niwĩ Hino na ẽtẽ siwa'aba nhisi wa'wa me 're hâimana za'ra.

³¹ Tawamhã Bẽzamihĩ nhihudu norĩ, ma tô hâiwa nhimi'e niwĩmhã Zeba ãma 're hâimana za'ra, Mitima ãma, Aia ãma, Bétéu ãma duré taha uirĩ na 'ri wa'õtõ mono na,

³² Anatoti ãma, Nobi ãma, Anania ãma,

³³ Hazo ãma, Rama ãma, Gita'ĩ ãma,

³⁴ Hadide ãma, Zebo'ĩ ãma, Nebalate ãma,

³⁵ Rode ãma, duré Ono ãma, Artesã na ẽtẽ siwa'aba wamri 're isa'wari mono ãma.

³⁶ Tawamhã nima norĩ levita, Zuda ãma 're ihâimana za'ra mono hã ma tô pisutu za'ra ni, Bẽzamihĩ nhihudu norĩ siré oto 're si'ubumroi mono da.