Neemia 1 - ꞌRe Ihâimana Uꞌâsi Mono Zadawa Wasuꞌu

Neemia, Zeruzalẽ ãma imremezé wasu'u

¹ Ã hã Neemia, Hacaliasihi 'ra wasu'u. Tawamhã a'amo za'ratazé 9 ãma, apito Artazesi, Persia te, 20 na iwahum na te te 're da'a'madâ'â mono ré, wa tô 'ri nho'u isa'ẽne Susã na isisi ãma nhamra, ĩte ti'ai wa'õtõ nho'õmo ãma.

² Tawamhã ĩsisãnawã Hanani, ma tô Zuda na romnhisi hawimhã we ĩtẽme wi, aimawi zudeu norĩ nhi'aibâ ré. Tawamhã wa hã wa tô waptẽ, 'ri nho'u Zeruzalẽ na romreme hã, Babilonia ãma zudeu norĩ aré sito pese na 're ihâimana za'ra mono norĩ, Zeruzalẽ u apâ oto isihutu na hã.

³ Tawamhã ta norĩ hã ma tô ĩma wasu'u za'ra, isi'utõrĩ'õ norĩ Zuda u isihutu norĩ tãma ropire uptabi za'ra na isi'ubumro na hã. Ma tô duré ĩma wasu'u za'ra, a'uwẽ zudeu'õ norĩ iwaptoma 're ihâimana za'ra mono norĩ te te 're i'ruiwapari za'ra mono na hã. Tawamhã te duré ĩma wasu'u za'ra ãne: “Zahadu Zeruzalẽ 'wawi wa'ra 'rãihâ hã siprum haré te duré 're sa'wari. 'Ridawa za'ẽtẽ zama da te ãma sazu za'ra haré te zahadu õne haré 're hâimana, da te dasiwi 'manharĩ téb ãna.”

⁴ Tawamhã ãne hã te wapari wamhã, wa tô nhamra. Ãhã wa, wa tô aiwa'õ. Tawamhã niha bâtâ na wa tô nasi aiwa'õ, ĩsai ãna. Ãhã ré, wa tô mre, 'Re ihâimana u'âsi mono ma ãne:

⁵ — Wanhib'apito 'Re ihâimana u'âsi mono, hâiwa ãma 're i'asãmra mono, aiwaihu'u pese uptabi di. Tahawa, te da te dasiwi 're i'aiwazé pese mono zé hã asina 're isani mo. Te duré te te 're i'asawi pese za'ra mono norĩ siré, duré asimiroti te te 're iwapari pese za'ra mono norĩ siré, asimiroti na asisaze za'ra wa'aba zém na tãma ãma 're i'a'uwaimrami u'âsi mo.

⁶ 'Re ihâimana u'âsi mono, ma'ãpé we ĩ'madâ'â. Bâtâ na duré mara na zama ĩmreme na te aiwi 're irowaptẽrẽ mono zé hã ma'ãpé 're wapari mono, asib'a'uwẽ Izaraéu nhihudu norĩ hâiba na hã. Wa hã Izaraéu nhihudu norĩ me wawasédé wa te 're i'manharĩ za'ra mono na hã wa aima ĩsiwasu'u. Wahi'rata norĩ hawim na wa wawasété na hã 're wahâimana za'ra tô.

⁷ Wa te 're i'manharĩ za'ra mono zém na hã, wa tô aiwi 're wawasété za'ra tô. Duré asimiroti hã wa te wasiwi 're wapari mono õ di. Duré Mozési asib'a'uwẽ ma, asimiroti ihiri zarina 're wanomro wẽ pese mono õ na wa tô 're wahâimana za'ra.

⁸ Tahawa ma'ãpé ãhã na awa'awi na ãma aipo're pu'u, tãma iwaihu'uzém na hã ãne: “Izaraéu nhihudu norĩ, a norĩ wa'wa hã ĩ'ãma si 're anomro aba mono õ wamhã, wa za aimawi a'uwẽ norĩ tẽmemhã ai'ãma ropéi wa'wa za.

⁹ Tane nherẽ, apâ ĩtẽme 're aipizari za'ra wa'aba mono wamhã, duré ĩnhimiroti 're wapari pese za'ra wa'aba mono wamhã, wa hã wa za apâ duré te asimroi wa'wa, ro te ipisutu u hã, tame ĩ'ãma 're aiwata za'ra wa'aba mono da, daro mono bâ asisiti 're aihâimana za'ra wa'aba mono nherẽ.”

¹⁰ — Wanhib'apito, ã norĩ hã aima romhuri'wa, asib'a'uwẽ norĩ. A hã ma tô ta norĩ hã isani za'ra, sito pese na 're isi'ubumroi mono zém hawi, aiwaihu'u pese na, duré asiptete na zama.

¹¹ Tahawa, ma'ãpé ĩmreme na te ãma aiwi 're irowaptẽrẽ mono zé hã wapari ãhã na hã. Duré aima romhuri'wa hâiba amo norĩ ai'ãma 're iwata ze za'ra mono nhimirowaptẽrẽ zama te za iwapa. Ma'ãpé duré ĩma 'manharĩ, iwẽ na si ĩma romhâimana da, apito hã iwẽ na te te ĩma rowairébé da. Tô taha wamhã, wa tô uwa 'rãi wa'u isé za'wari'wa na aré 're ĩhâimana, apito ma hã.