Mateu 9 - ꞌRe Ihâimana Uꞌâsi Mono Zadawa Wasuꞌu

Imorĩ'õ, Zezusi te te iwahutuzé wasu'u

¹ Tawamhã Zezusi hã ma tô uba're 're ãzé, zara u te te saprĩ da. Te te saprĩ wamhã, ma tô 'ri nho'õmo u hã wi, tirob u.

² Tamomo ma tô ni'wam norĩ hã we siwi ti'â, imorĩ'õ hã isimiwaptâ ré. Imorĩ'õ za te te ipesezém na hã ma tô ãma siwi umnhasi, Zezusi hã. Tawamhã Zezusi hã taha na ma tô sina simirosa'rata waihu'u za'ra, aibâ norĩ hã. Tahawa, te imorĩ'õ ma tinha ãne: — Ĩsiwadi, aiwi robzei'õ tõ. Aiwasédé hã 're i'ab'manharĩ wasété mono zé hã te ai'ãma 're ab'madâ'â mono õ di za oto.

³ Tawamhã ni'wam norĩ 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã ma tô 'râwi sima rowasu'u za'ra, ãne: — Õ hã te 'Re ihâimana u'âsi mono ãma wasété.

⁴ Tane nherẽ, ma tô Zezusi hã sina waihu'u, isimirosa'rata za'ra hã. Tahawa, te ãne tãma nharĩ za'ra: — E marĩ da, ma tô ãne ĩ'ãma irosa'rata wasété za'ra wa'wa.

⁵ Wa hã dawasédé hã te dama 're i'apari waihu'u pese mono zém na hã, sena na ĩwaihu'u za'ra wa'aba da hã, e niha te za iwaihu'u za'ra wa'wa. Aibâ ma hã, wa tô tinha ãne: “Aiwasédé hã 're i'ab'manharĩ mono zé hã te ai'ãma 're ab'madâ'â mono õ di za oto.” Ãne si ĩmreme na wamhã, aima pibu prã za'ra wa'aba di. Ã hã imorĩ'õ hã wahutu da, duré oto morĩ da, te tãma nharĩ wapsi, te za iwaihu'u za'ra wa'wa, ĩwaihu'u pese na sena na ĩwaihu'u pese za'ra wa'aba da oto. Taha wapsi, aima pibu pese za'ra wa'aba di za.

⁶ Ti'ai ãma Dasiré Ipodo hã waihu'u pese di, dawasédé te te dama 're i'apari mono da hã, 'Re ihâimana u'âsi mono zadawa para. Ãne na asiwi waihu'u za'ra wa'aba da, wa za ihi'ré ma tinha, wahutu da. Tawamhã imorĩ'õ ma, te tinha Zezusi hã oto ãne: — Ma'ãpé, aiwahutu. Asa'warizé hã âri, asõrõwa u aimorĩ da oto.

⁷ Tawamhã awa'awi ma tô wahudu aibâ hã, tinhorõwa u morĩ da.

⁸ Tawamhã ãne hã da te 'madâ'â za'ra wamhã, ma tô tãma tapẽ'ẽwara za'ra ni, dama sa'rese õ wa. Ma tô duré 'Re ihâimana u'âsi mono ãma tawata za'ra ni, tiwaihu'u pe hã te te dama 're anhomri mono wa.

Mateuhu zô Zezusi, sisarina ihârâzé wasu'u

⁹ Tawamhã Zezusi hã ma tô mo, dahawi. Morĩ ré, ma tô tisã, danhib'apito ma, rob'uiprazé arĩ ubumroi'wa hã, Mateu na isisi hã. Tinhimiromhurizéb ãma te nhamra, rob'uiprazé te te dawi 're i'a'ubumroi mono zéb ãma. Tawamhã Zezusi hã te 'mahâ ãne: — We aimorĩ, ĩsiré 're aimorĩ da oto. Tawamhã awa'awi ma tô wahudu, isiré 're morĩ da oto.

¹⁰ Tawamhã bara na ma tô isiré 're inomro mono norĩ hã Zezusihi me tisaihu. Mateuhu nhorõwa ãma te taha wamhã tisaihu. Saihuri ré, ma tô rob'uiprazé arĩ ubumroi'wa norĩ hã itẽme asisi 'ri para u, ahâ na, isiré saihuri da. Ni'wam norĩ hã zudeu nherẽ, farizeu norĩ nhimiroti zarina 're ihâimana za'ra mono õ norĩ zama ma tô duré itẽmemhã aihutu, Zezusihi u hã.

¹¹ Tawamhã farizeu norĩ hã ãne hã te te 'madâ'â za'ra wamhã, ma tô Zezusihi siré 're inomro mono norĩ hã sadanharĩ za'ra, ãne: — E niha bâ, te asib'apito za'ra wa'wa hã rob'uiprazé arĩ ubumroi'wa norĩ siré tisa, dawasété na 're idahâimana za'ra mono norĩ siré zama.

¹² Tawamhã Zezusi hã te te sina wapari za'ra wa, ma tô tãma nharĩ za'ra, ãne: — Hâzé ãna 're inomro mono norĩ zô, dawede'wa hã 're siwasutu za'ra mono õ di, te te 're wede za'ra mono da hã. Ihâzé ré norĩ zô si te za 're siwasutu za'ra, te te 're pese za'ra mono da.

¹³ Duréihã ma tô 'Re ihâimana u'âsi mono zadawa 'mahârâ'wa hã ãne na rob'ui'éré, 'Re ihâimana u'âsi mono mreme na: “Asimizama hã ĩma 're izata za'ra wa'aba mono zô hã, sô 're ĩnhimipari mono õ di oto. Asimizawi pese zarina, da'ãma 're aiwamri za'ra wa'aba mono da si, wa ĩsima te 're aiwẽ za'ra wa'wa oto.” Ãne duréihã 'Re ihâimana u'âsi mono mreme na rob'ui'éré hã sô sabu za'ra wa'aba ibaihâ hã, waihu'u pese za'ra wa'aba da. Dawẽ na 're idanomro mono norĩ zô ĩsitẽme sô 're ĩhârâ za'ra mono da, we ĩmorĩ õ di. Dawasété na 're idanomro mono norĩ zô si ĩsitẽme sô 're ĩhârâ za'ra mono da si, wa tô wei mo.

Dasai ãna bâtâ na a'â 're idahâimana za'ra mono zé wasu'u

¹⁴ Tawamhã Zuwã Batistaha siré 're inomro mono norĩ hã ma tô Zezusihi u ai'aba'ré. Taha wamhã, te ãne siwi sadanha: — Wa norĩ hã, farizeu norĩ me hã 'Re ihâimana u'âsi mono ma, 're wamreme zusi mono da hã, wasai ãna wa a'â 're wahâimana za'ra, bâtâ na hã. E marĩ wa, bété a'â sai ãna asiré 're inomro mono norĩ hã wasine 're hâimana za'ra mono õ di.

¹⁵ Tawamhã te Zezusi asa hã tãma nharĩ za'ra ãne: — Aibâ hã imrozéb u, sô ihârâ za'ra norĩ sihutu wamhã, e aibâ imro da hã isiré sãmra za'ra ré, te za robzei'õ na hã tihâimana za'ra, ta norĩ hã. Mare di. Ãne hâimana za'ra õ di za. Niwapsi te za bâdâ hã iwa waptãrã, aibâ imro da hã isiwadi norĩ wa'wa hawi, da te tiwi i'âri za'ra zéb da hã. Tawapsi te za tô sai ãna hã, duré tãma za'ra robzei'õ na hã 're si'ubumro za.

¹⁶ — Duré da'uza hâ'ratare wamhã, te za hâihata. E tawamhã ihâté hânhihâri na te za ãma hâiwa'aba ni. Mare di. Ihâté hânhihâri na da te hâiwa'aba wa, duré oto da te iré hâ'upsõi wamhã, te za tihâzahutu za, ihâiwa'aba zébre hã. Taha wamhã, te za oto duré hâsisinarĩ pese, da'uza hâ'rada hã.

¹⁷ Tane duré uwa 'rãi wa'u isé hã 're wa'ui ware mono õ ré, da te 're séme waihu'u mono õ di, romhâ 'manharĩ 'ratare 'remhã. Wa'ui ware õ ré, da te 're séme mono nherẽ, oto wa'ui ware wamhã, te za romhâ 'manharĩ 'ratare hã sina wazu. Tawamhã uwa 'rãi wa'u isé hã te za asa'wa. Romhâ 'manharĩ zama hã te za oto duré sina hâiwamna. Itép si'uiwa wap si, te za da te 're sé, dawi 're sisa'wari za'ra mono tõ da, rob'rãi wa'u ité hã. Tawapsi, romhâ 'manharĩ hã dawi 're hâsiwamnarĩ za'ra mono õ di za duré. — Ãne ma tô Zezusi hã ãma romnhimiré'é, uwa 'rãi wa'u isé, da te 're iséme mono zém na hã.

Zezusi hã pi'õ norĩ te te ipese zahuré zé wasu'u, azarutu me

¹⁸ Tawamhã Zezusi hã te te dama rowasu'u ré, ma tô aibâ hã itẽme wi, dama roti'wa hã. Itẽme wisi wamhã, ma tô hi'rãtitõ ipaparamhã nhamra. Tawamhã te ãne tãma tinha: — Ĩ'ra hã azarudu hã ma tô ĩwi dârâ, ãhã na si. Tane nherẽ, ma'ãpé ãma ĩme aimorĩ, asib'rada hã ãma hiri da, hâiwa'utu da, duré ĩma 're morĩ da apâ a'â.

¹⁹ Tawamhã Zezusi hã ma tô wahudu. Wahutu wamhã, ma tô isiré mo. Isiré 're inomro mono norĩ zama, te duré taha wamhã isiré ai'aba'ré.

²⁰ Tawamhã morĩ ré, te we pi'õ hã isarina mo, ibabarãi hawi. Pi'õ hã ihâzé te te isazâri'õ, 12 na ma tô ãma tiwahu, ihâzé te te 're 'manharĩ mono ré hã. We isarina morĩ wamhã, ma tô i'uza hânhisudu hã tiwi upi.

²¹ Ta hã ma tô ãne sima rosa'rata: “I'uza si te tiwi upi nherẽ, wa za séptârâ.” Ãne te sima rosa'rata, pi'õ hã.

²² Tawamhã pi'õ, i'uza te te upi wamhã, ma tô Zezusi hã sô aipi'ra. Sipi'rai wamhã, ma tô pi'õ hã 'madâ. Ãne te tãma tinha: — Ĩsiwadi, aiwi robzei'õ tõ. Za te i'aipesezém na, ĩ'umnhasi wa, ma tô aihâzé hã aima apa. Tawamhã awa'awi ma tô pi'õ hã séptârâ.

²³ Taha pari, te mo Zezusi hã, dama roti'wa nhorõwa u. Morĩ wamhã, rowamreme'wa norĩ hã ma tô sõpẽtẽ za'ra, adâ'â ãma simnhihãsi ré. Da'ahâ na ma tô da'anhopẽtẽ, ãma ida'ru'ru norĩ hã.

²⁴ Tawamhã ãne te dama tinha: — Mo oto aiwairébé aba. Azarudu hã dâ'â õ di. Taré te nhono. Tawamhã ma tô ãma tato za'ra ni, dâ'â uptabi nherẽ, taré isõtõ na te te waihu'u wa, Zezusi hã.

²⁵ Tawamhã rob u ma tô tawairébé ni. Dawairébé wi, ma tô Zezusi hã ãzé 'ri 're wa'wa u, azarudu inomrozéb u. Tawamhã awa'awi ma tô pa'â. Te te pa'âri wamhã, ma tô awa'awi wahudu, azarudu hã.

²⁶ Tawamhã iwasu'u hã ma tô te te ropé daro mono bâ, Galiléa 'remhã.

Itob'a norĩ, Zezusi te te ipese zahuré zé wasu'u

²⁷ Tawamhã 'ri para hawi watobro wamhã, morĩ ré, ma tô aibâ norĩ hã isarina tineb zahuré, itob'a zahuré hã. Tawamhã te 'mahârâ zahuré, ãne: — Dawihi nhihudu, ma'ãpé wa'ãma aipẽ'ẽzé na.

²⁸ Tawamhã 'ri para u ma tô ãzé, Zezusi hã. Sébré wi, ma tô itob'a norĩ hã itẽme aimasisi zahuré. Tawamhã Zezusi hã te sadanharĩ zahuré ãne: — E te asina ĩ'umnhasi 'wa, te ato pese aba da hã. Tawamhã asa ma te ãma tãma wa'rãmi zahuré ãne: — Ĩhe, wa tô wasina ai'umnhasi ni, apito.

²⁹ Tawamhã Zezusi hã ma tô tõmo upi zahuré. Te duré tãma nharĩ zahuré ãne: — Asina ĩ'umnhasi aba zéb zarina, wa za tô ato pese 'wa.

³⁰ Tawamhã ma tô oto tito pese zahuré, aibâ norĩ hã. Ma tô duré sadawa uwati zahuré, ãne: — Te aima i'manharĩ wẽ wa'aba zém na, dama ĩwasu'u wa'aba õ di za. Tô'ã. — Ãne te sina sadawa uwati zahuré.

³¹ Tane nherẽ, oto neb zahuré wamhã, ma tô tisiwasu'u na te te ropé zahuré ropâ, Zezusi te te ipese zahuré zém na hã.

Imreme'õ, Zezusi te te ipesezé wasu'u

³² Tawamhã Zezusi te te ito pese zahuré neb za'u si, ma tô aibâ hã we itẽme dasiwi saprõni ni Zezusihi u, wa'uburé ré wa, mreme'õ u'âsi 're ihâimana mono hã.

³³ Tawamhã Zezusi hã ma tô wa'uburé ma rob'ru, ihawi watobro da, isiti. Te te tãma rob'rui wi, ma tô aibâ hã mreme watobro. Tahawa, ma ãma tatob'uzu za'ra ni. Te duré dasima nharĩ za'ra ni, ãne: — Niwa, wa te i'madâ'â za'ra õ, ãne hã, Izaraéu nhihudu norĩ nhipti'ai 'remhã.

³⁴ Tane nherẽ, ma tô farizeu norĩ hã taré iwasédé hã ãma hiri za'ra, ãne: — Wa'uburé norĩ nhib'apito zadawa para, te õ hã wa'uburé hã te te dama 're anhamra, Satanasihi zadawa para.

Zezusi hã da'ãma isiwamrizé wasu'u

³⁵ Tawamhã Zezusi hã ma tô datẽme 're mo, 'ri wa'õtõ mono bâ, te te dama 're rowahutu mono da, zudeu norĩ te, rowahutuzé mono bâ. 'Re ihâimana u'âsi mono, da'ãma 're isib'a'uwẽ mono zé wasu'u na te te dama 're rowasu'u, iwasu'uwẽ na hã. Dahâzé mono bâ hã ma tô duré te te da'apese. Hâzé u'âsi wa, sib'uware na 're inomro mono norĩ zama hã te te duré apese, Zezusi hã.

³⁶ Tawamhã da'ahâ uptabi na te te da'ab'madâ'â wamhã, ma tô Zezusi hã da'ãma aiwamri tipẽ'ẽ na, pone'ẽrebâ 'madâ'â ãna 're inomro mono ne, robzei ãna 're dahâimana za'ra mono wa, iwẽ na hã 're dasipawapto waihu'u za'ra mono õ zarina.

³⁷ Tawamhã tisiré 're inomro mono norĩ ma, te tinha, ãne: — Amnho hã sa'ẽtẽ uptabi di, da te 're i'ubumroi mono da hã. Tane nherẽ, sada hã da'umrore di, i'ubumroi'wa da hã.

³⁸ Tahawa, ma'ãpé tiwi 're rowaptẽrẽ u'âsi za'ra wa'aba mono, rob're tede'wai wi, romhuri'wa da hã we te te da'azatõrĩ da da'ahâ na, rob're hã te te 're ubumro za'ra mono da.