Mateu 8 - ꞌRe Ihâimana Uꞌâsi Mono Zadawa Wasuꞌu

Aibâ i'wa're ré Zezusi te te ipesezé wasu'u

¹ Tawamhã Zezusi hã ma tô ẽtẽ 'rãihâ hawi si'ra. Te te si'rai wamhã, da'ahâ uptabi na ma tô isarina ai'aba'ré ni.

² Taha wamhã, aibâ i'wa're ré hã ma tô itẽme wi. Itẽme wisi wamhã, ma tô hi'rãtitõ, ipaparamhã nhamra. Ãhã wamhã, te ãne tãma tinha: — Apito, ĩma aiwaihu'u pese di, asimipese waihu'u pese na hã. Tahawa, asima ĩwẽ wamhã, te za ĩpe.

³ Tawamhã Zezusi ma tô tinhib'rada hã wahutu, te te ãma upi da. Te te upi wamhã, te ãne tãma tinha: — Tane tô. Wa tô ĩsima aiwẽ tô, te aipese da hã. Tahawa tâibâ oto aihâzé hã. Taha wamhã, awa'awi ma tô i'wa're hã tãma ai'utõ.

⁴ Tawamhã Zezusi te tãma tinha, ãne: — Ĩwapari pese, asina. Ni'wai ma, asina ĩwasu'u õ di za, te i'aipesezém na hã. Sasedoti u si hã te za aimo, aihâiba wẽ zô te te aihâiba 'madâ'â da. Taha parip si, te za duré tãma asõpru 'Re ihâimana u'âsi mono ma, Mozésihi nhimiroti zarina, aipesezém na da te ãma aiwaihu'u za'ra da, sena na. — Ãne te Zezusi hã tãma roti, aibâ te te ipese ma hã.

Da'wapéi'wa norĩ wada'uri'wai ma romhuri'wa, Zezusi te te ipesezé wasu'u

⁵ Tawamhã Zezusi hã Cafanau na 'ri nho'õmo nhisi u ma tô wi. Wisi wamhã, ma tô aibâ sõpẽtẽ, romanu hã. Ta hã da'wapéi'wa norĩ wada'uri'wa. Tawamhã te te sõpẽtẽ wamhã, ma tô aibâ hã tãma ti'ru Zezusihi ma, tãma iromhuri'wa hã te te tãma pese da.

⁶ Ãne te taha wamhã tãma tinha: — Apito, ĩma romhuri'wa hã ĩnhorõwa ãma te nomro. Hâzé uptabi di. Hâzé uptabi wa, sirési waihu'u õ di.

⁷ Tawamhã Zezusi te asa hã tãma tinha ãne: — Wa za ãma mo, te pese da.

⁸ Tawamhã romanu hã te duré tãma tinha ãne, da'wapéi'wa norĩ wada'uri'wa hã: — Tô'ã, apito. Wa hã aima ĩwapure di, ĩnhorõwa u asébré da hã. Tahawa ma'ãpé, taré ã hawi aimreme na si hã pese, séptâ'â da. Taha wamhã, te za tãma tirowẽ za, ĩma romhuri'wai ma hã.

⁹ Wa hã da'wapéi'wa norĩ wada'uri'wa zapari romhuri'wa. Ĩzapari te duré 're hâimana za'ra, da'wapéi'wa norĩ hã. Nimomo te 'mazatõrĩ wamhã, te za 'maimo. Duré sô ĩ'maihârâ wamhã, te za we ĩtẽme hã 'maimo. Duré ĩma romhuri'wai ma, marĩ hã te 'rui wamhã, te za 'manha awa'awi, ĩzadawa para.

¹⁰ Tawamhã Zezusi ãne hã te te wapari wamhã, ma tô ãma titob'uzu, isiwasu'uzém na. Tahawa, isarina idasi'aba'ré norĩ ma, ma tô tãma nharĩ za'ra ãne: — Tô sena wa aima waihu'u za'ra wa'wa. Ã hã te te sina ĩ'umnhasi hã niwa te i'madâ'â õ, Izaraéu nhihudu norĩ nhipti'ai ãma hã. Ta norĩ hã te te ãma siwi wabzu õ di, te te sina ĩ'umnhasizém na hã.

¹¹ Ãne, wa za duré aima waihu'u za'ra wa'wa. Da'ahâ uptabi na te za 're dasihutu, bâtâ pusizém hawi, duré bâtâ zasizém hawi, 'Re ihâimana u'âsi mono u, isiré 're dasaihuri mono da, da'ãma 're isib'a'uwẽ mono zéb ãma. Abra'ãhã siré te za 're dasi'ubumro, duré Izaquihi siré, duré Zacoho siré.

¹² Tane nherẽ, ni'wam norĩ hã 'Re ihâimana u'âsi mono, ãma 're sib'a'uwẽ za'ra mono da nherẽ, isiré 're si'ubumroi mono da nherẽ, te za sãmra sisiti, robra si 're isa'wari mono u. Tame te za sina 're 'ru'ru. Te za duré 're 'wasitete za'ra, te te 're robzépata za'ẽtẽ za'ra mono wa.

¹³ Tawamhã te duré da'wapéi'wa norĩ wada'uri'wai ma tinha ãne: — Mo oto aimorĩ apâ, asõrõwa u. Asina ĩ'umnhasizéb zarina, wa za aipawapto tô. Tawamhã ãne te te tãma nharĩ wi, ma tô tipese, romanuhu ma, romhuri'wa hã.

Da'ahâ uptabi na, Zezusi te te ida'apesezé wasu'u

¹⁴ Tawamhã Zezusi hã Pedruhu nhorõwa u ma tô mo. Morĩ wamhã, imaprewa hã ma tô sabu, wa'ro na waptâ wa hâzé ré, inomro hã.

¹⁵ Tawamhã ma tô sib'rata upi, Zezusi hã. Te te sib'rata upi wamhã, ma tô tiwahâ. Taha wamhã, pi'õ hã ma tô wahudu. Wahutu wamhã, ma tô isa hã tãma tisõ Zezusihi ma, sa da.

¹⁶ Tawamhã bâdâ sébrézéb u, ma tô wa'uburé ré 're idanomro mono hã da te simro, Zezusihi u, ahâ uptabi na. Tawamhã misi si te nasi dama azatõ wa'uburé hã, misi haré timreme na. Uburé ihâzé ré norĩ zama te duré apese.

¹⁷ Ãne ma tô Zezusi hã te te 're da'apawapto, Izaia hã duréihã te te ãma irob'ui'érézéb zarina te te sina uwaimrami da. Ãne Izaiaha nhimi'ui'éré hã ãma: “Wahâzé mono bâ, ma tô te te wawi 're awaibu.”

Aibâ norĩ hã Zezusihi siré ineb zahuré zé wasu'u

¹⁸ Tawamhã Zezusi hã da'ahâ uptabi na da te dasiwi i'uirĩ za'ra norĩ hã ma tô 'madâ'â za'ra. Te te da'ab'madâ'â wamhã, ma tô tisiré 're inomro mono norĩ ma rob'ru za'ra, isõ'u na te te saprĩ za'ra da, zara u.

¹⁹ Tawamhã 'Re ihâimana u'âsi mono nhimiroti na rowahutu'wa hã ma tô itẽme wi, Zezusihi u. Ãne te tãma tinha: — Rowahutu'wa, ãhã na wa ĩsima aiwẽ, asiré 're ĩmorĩ da oto, daro mono bâ.

²⁰ Tawamhã Zezusi te asa tãma tinha ãne: — Wapsã wawẽre ma, te ab're na isõrõwa hã tãma 're hâimana zara. Duré si norĩ te tizasi hã te te sima 're 'manharĩ za'ra, isõrõwa na tãma 're hâimana za'ra mono da. Tazahã, ti'ai ãma Dasiré Ipodo hã sõrõwa õ di, ãma 're iwa'utu mono zéb da hã. Hâiwi si te datẽmemhã 're morĩ u'â.

²¹ Tawamhã Zezusi ma tô duré aibâ hâiba amo 'mahâ, isarina 're imorĩ hã, isiré 're morĩ u'âsi da oto. Tawamhã aibâ hã te asa tãma tinha ãne: — Apito, a'â apâ ĩmorĩ, ĩmama hã ĩwi dâ'â wa, ĩsisa'u te ãma ti'a da. — Ãne te sina 'mahâ.

²² Tane nherẽ, te Zezusi asa hã tãma tinha, ãne: — Õne haré te za ĩsiré 're aimo oto. Idâ'â norĩ hã te za tisiré idâ'â norĩ ãma hã te te 're ti'a za'ra.

Zezusi hã rowa'u'u za'ẽtẽ ma, te te inharĩzé wasu'u

²³ Tawamhã Zezusi hã ma tô ãzé, uba're 're. Isiré 're inomro mono norĩ zama ma isiré asisi, isiré si'aba'ré da.

²⁴ Tawamhã uba're na si'aba'réi ré, ma tô rowa'u'u za'ẽne hã tiwi tiwatobro za'ra. Â sisasi hã te te iré wabzuri za'ra mono, uba're hã. Tane nherẽ, te Zezusi hã nhono.

²⁵ Tawamhã isiré 're inomro mono norĩ hã ma tô itẽme sina roptob za'ra, te te siwi utu da. Taha wamhã, te ãne siwi 'mahâ: — Wanhib'apito, ma'ãpé wanho'reptu za'ra na. Wa za ai'utõrĩ ni.

²⁶ Tawamhã Zezusi te tãma nharĩ za'ra ãne: — E marĩ da, ma aipahi za'ra wa'wa. E ĩ'umnhasi za'ra wa'aba ãna. Tawamhã ma tô wahudu, Zezusi hã. Wahutu wamhã, ma tô rowa'u'u ma, duré â sisasisi ma zama hã tinha, te te sazâri da hã. Taha wamhã, ma tô sazâ, rowa'u hã. Ma tô duré oto ti'âtu.

²⁷ Tawamhã ma tô ãma titob'uzu za'ra, isiré 're inomro mono norĩ hã. Ãne te tawamhã sima nharĩ za'ra: — Pra, e niha iwaihu'u pe, õ hã. Isadawa hawi ma rowa'u hã, duré â sisasisi zama sazâ.

Zezusi hã aibâ norĩ, wa'uburé ré 're ineb zahuré te te ipese zahuré zé wasu'u

²⁸ Tawamhã Zezusi hã ma tô mo, Dadara na danhipti'a nho'õmo nhisi u, Galiléa na isõ'u nhisi zara u. Tame ma tô aibâ norĩ hã sõpẽtẽ zahuré, wa'uburé ré 're ineb zahuré hã. Adâ'â 'ru hawi, ma we sina uzusi zahuré, ẽtẽ zahâpâ ab're siromo 're, 're isimasisi u'âsi zahuré mono zém hawi. Ta norĩ hã isipãrĩ su'u zahuré, duré simimnhasi zahuré di. Tahawa, 're ihâimana zahuré mono zé wa'wai baba 're danomro waihu'u mono õ di.

²⁹ Tawamhã rosa'rese õ ré, ma tô sa'ẽtẽ 'mahârâ zahuré Zezusi hã, ãne: — 'Re ihâimana u'âsi mono 'ra, e marĩ wa'ãma 'manharĩ da, te we aimo, wawa'wai baba. E ropsi'utõrĩzé wana wa'ahâri da, te we aimo, wa te oto robzépata mono da.

³⁰ Tawamhã romhâ prã na te uhâbâ tisa hã te te 're huri, ahâ na.

³¹ Tawamhã wa'uburé norĩ hã aibâ norĩ pẽ'ẽ 're, 're ihâimana za'ra mono hã te sa'ẽtẽ sina 'mahârâ za'ra ãne: — Nimomo wazatõrĩ za'ra da wamhã, ma'ãpé uhâbâ norĩ u wazatõrĩ za'ra na, õ norĩ hâiba 'rep si, 're wahâimana za'ra mono da.

³² Tawamhã Zezusi hã ma tô õne haré tãma rob'ru za'ra ãne: — Mo oto ai'aba'réi wa'aba. Tawamhã uhâbâ hâiba 're ma tô sisisi, wa'uburé norĩ hã. Tahawa, te sa'ẽtẽ sisa're, uhâbâ norĩ hã, i'rãsipra u. Âi ba ma tô rere. Ãhã wamhã, ma tô uburé ai'utõ, â na.

³³ Tawamhã uhâbâ 'madâ'â'wa norĩ hã ma tô isiti sisa're. 'Ri nho'õmo u ma tô sisa're. Tame ma tô uburé dama rowasu'u za'ra, aibâ norĩ ma, niha iromhâimana zahuré zém na hã, wa'uburé ré 're ineb zahuré ma.

³⁴ Tawamhã 'ri nho'õmo ãma 're idasi'ubumroi mono norĩ hã ma tô aihĩni tawairébé ni, Zezusi hã da te dasina uzusi za'ra da. Tawamhã ma tô sãmri za'ra ni. Da te dasiwi sãmri wamhã, ma tô tãma rob'ru za'ra ni: — Ma'ãpé, warom nhiti aimorĩ, nimomo. — Ãne te dasiwi satõrĩ ni, Zezusi hã.