Mateu 7 - ꞌRe Ihâimana Uꞌâsi Mono Zadawa Wasuꞌu

Dawasédé hã da te dasi'ãma 're isa'ra mono zé wasu'u

¹ — Dawasédé hã da'ãma 're isa'ra za'ra wa'aba mono zéb zarina, asiwi 're dawẽ'õ za'ra wa'aba mono õ di za, taha zarina 'Re ihâimana u'âsi mono hã te te siwi 're aiwẽ'õ za'ra wa'aba mono tõ da.

² Asi'uihâ na asiwi 're dawẽ'õ pese za'ra wa'aba mono wamhã, taha zarina te za tô duré 'Re ihâimana u'âsi mono hã te te siwi 're aiwẽ'õ pese za'ra wa'wa, iwa'rãmi. Asiwi 're dawẽ'õ za'ra wa'aba mono õ wamhã, tawapsi, te te duré siwi 're aiwẽ'õ za'ra wa'aba mono õ di za, ãne na hã aiwa.

^3-5 Ãne, wa za duré ãma aima romnhimiré'é za'ra wa'wa. Ãté wede nhipru te atõmo 'remhã nomro, aima i'madâ'â waihu'u õ hã. E niha te za bété sô itõmo 'madâ, wede nhiprubre wazere da, asisãnawã tõmo hawimhã. E ãne hã i'uwaibaba. Mare di. Wede nhipru atõmo 're inomro hã 'madâ'â õ nherẽ, e niha te za tãma inha: “Ropru hã a'â te aima wazere, atõmo hawimhã.” Mare di. Wede nhipru hã te za a'â atõmo hawimhã iwaze. Tawamhã te za sô airĩtĩ wẽ, wazere da, asisãnawã tõmo hawimhã, wede nhiprubre hã.

⁶ — Duré 'Re ihâimana u'âsi mono 'ruiwapari'wa norĩ ma, iwasu'uwẽ na tãma 're rowasu'u za'ra wa'aba mono õ di za, te te ãma 're iwasété za'ra mono norĩ ma hã. E marĩ wa. Ta norĩ hã wapsã ma, marĩ ise hã da te tãma 're a za'ra mono nherẽ, dazô 're sipizari za'ra mono wa, te te 're idahâzu mono ne, te za ta norĩ hã asada 're hâimana wasété za'ra wa'wa. Uhâbâ norĩ hã marĩ wẽ zô, sima 're sõpré waihu'u mono õ di. Marĩ iwẽ hã wa'âbâ za'ẽtẽ nherẽ, uhâbâi ma, da te 're sãmra mono wa, taré te te 're iwati'i za'ra mono ne, te za ta norĩ hã taré te te 're wapari za'ra, iwasu'uwẽ hã. Tahawa, ta norĩ ma, 're rowasu'u za'ra wa'aba mono õ di za, 'Re ihâimana u'âsi mono 'ruiwapari'wa norĩ ma hã.

'Re ihâimana u'âsi mono wi, da te 're irowaptẽrẽ za'ra mono zé wasu'u

^7-8 — 'Re ihâimana u'âsi mono wi, te za iwẽ hã 're iwaptẽrẽ za'ra wa'aba mo. Tawamhã te za tô te te aima 're anhomri 'wa. Iwẽ zô si te za duré asima 're asõpré u'âsi aba mo. Tawamhã taha zarina te za tô te te aima ãma 're a'uwaimrami 'wa, 'Re ihâimana u'âsi mono hã, 'râwi aima 're hâimana za'ra wa'aba mono da. Duré ni'wa hã 'ri tede'wa zô te te 're i'ridawa ta'a mono ne, te za iwẽ hã tiwi 're iwaptẽrẽ za'ra wa'aba mo. Tawamhã 'ri tede'wa te te tãma i'ridawa ne, te za tô 'Re ihâimana u'âsi mono iwẽ hã te te aima 're anhomri 'wa, si'uihâ na.

⁹ Ãne, wa za duré aima ãma romnhimiré'é za'ra wa'wa. Ai'ra hã i'u'ẽtẽ wapu te te aiwi 'maiwaptẽrẽ aba wamhã, e ẽne te aré tãma i'manhomri 'wa, te te iwaptẽrẽzéb upana. Mare di. I'u'ẽtẽ wapu si te aré tô tãma i'manhomri 'wa, te te 'rẽne da, ai'ra wa'wa hã.

¹⁰ Duré, tebe te te aiwi 'maiwaptẽrẽ aba wamhã, e wahi te aré tãma i'manhomri 'wa, te te iwaptẽrẽzéb upana. Mare di. Tepe si te aré tô tãma i'manhomri 'wa, te te 'rẽne da.

¹¹ Tane duré, a norĩ wa'wa hã 're anomro wẽ uptabi aba mono õ nherẽ, te marĩ iwẽ si tô ai'ra norĩ ma, 're isõmri za'ra wa'aba mo. E tawamhã Aimama 'wa hã hâiwa ãma 're isãmra mono hã wẽ uptabi na 're hâimana mono nherẽ, e ai'ra norĩ ma 're asõprub za'ra wa'aba mono zém nhipai u, te te aima 're sõmri za'ra wa'aba mono õ di za bété, tinhoprubzé iwẽ hã. Te za tô isipai u te te aima 're sõmri za'ra wa'wa iwẽ hã, tiwi 're iwaptẽrẽ za'ra wa'aba mono zéb uwaibaba.

¹² — Marĩ iwẽ si da te aima 're 'manharĩ za'ra wa'aba mono da, asima 're idawẽ za'ra wa'aba mono ne, te za marĩ iwẽ si dama 're i'manharĩ u'âsi za'ra wa'aba mo, iwa'rãmi. Ãne duréihã 'Re ihâimana u'âsi mono nhimiroti na Mozési te te ãma irob'ui'éré hã te wama wasu'u za'ra, duréihã isadawa 'mahârâ'wa norĩ nhimi'ui'éré zama.

Bâdâdi nhitobzé wasu'u

^13-14 — Duré, ropipa u 're idanhisisi mono zé hã bâdâdi hã sa'ẽtẽ uptabi di. Duré isitobzé hã, sa'ẽtẽ uptabi di. Tahawa, dama wapure di, ãma 're idanomro mono zéb da hã, bâdâdi hã sa'ẽtẽ uptabi wa. Tahawa, te da'ahâ uptabi na ãma 're danomro, ropipa u, tamomo 're danhisisi mono wa, da te 're robzépata u'âsi za'ra mono da. Tane nherẽ, 'Re ihâimana u'âsi mono 'rata 're idahâimana u'âsi za'ra mono zéb u, 're idanhisisi mono zéb da hã, bâdâdi nhitobzé hã surure di. Tamomo bâdâdi hã suru uptabire di duré, ãma 're idanomro mono zéb da hã. Dama pire di, ãma 're idanomro mono zéb da hã. Tahawa, te da'umro na si da te dasina 're uwaimrami za'ra. Tahawa, ma'ãpé, sada 're asiptete za'ra wa'aba mono, bâdâdi nhitobzé isurure na si 're asisisi aba mono da, rowẽ uptabi u.

Rob'rãi wasu'u, 'wabzéré wasu'u me

¹⁵ — Duré, 'Re ihâimana u'âsi mono zadawa wasu'u uptabi õ 'wa norĩ wi, te za 're asi'madâ'â pese za'ra wa'aba mo. Ta norĩ hã tô sena dasiré 're hâimana wẽ za'ra mono newa, te za te te dama 're roti za'ra taré. Ta norĩ hã te abaze zahi ne 're hâimana u'âsi za'ra, isazei'wa norĩ zada hã.

¹⁶ Ta norĩ hã uburé marĩ hã te te 're i'manharĩ za'ra mono zém na te za ãma 're iwaihu'u za'ra wa'aba mo, 'Re ihâimana u'âsi mono zadawa wasu'u uptabi 'wai hâimana õ zém na. E 'wabzéré hã te za rob'rã na 're 'rã za'ra, uwa 'ru 'rã na. Mare di. Uwa 'ru 'rã na 're 'rãi waihu'u za'ra mono õ di, 'wabzéré hã. Duré, e apto hã rob'rã ise na te za 're 'rã za'ra. Mare di. Ãma 're 'rãi waihu'u za'ra mono õ di, apto hã.

^17-18 Duré rowede hã wẽ wamhã, 're 'rãi wasété za'ra mono õ di za. Te za 're 'rãi wẽ u'âsi za'ra. Wasété wapsi, te za 're 'rãi wasété u'âsi za'ra. Ta norĩ hã 're 'rãi wẽ waihu'u za'ra mono õ di za.

¹⁹ Rowede hã 're 'rã za'ra mono õ wa, te za da te 're sãna'rata nhihâri za'ra, unhama u da te 're sãmra mono da.

²⁰ Tane, aibâ norĩ hã roti tô senai'õ na te te dama 're iroti za'ra mono norĩ hã uburé marĩ hã te te 're i'manharĩ wasété za'ra mono zém na, te za ãma 're iwaihu'u za'ra wa'aba mo, 'Re ihâimana u'âsi mono zadawa wasu'u uptabi 'wai hâimana õ zém na.

'Re ihâimana u'âsi mono, da'ãma 're isib'a'uwẽ mono zéb u, 're idanhisisi mono zé wasu'u

²¹ — Ãté ni'wam norĩ hã te za dama 're siwasu'u za'ra, ãne: “Zezusi hã ta hã Ĩnhib'apito. Wa hã tãma romhuri'wa na, wa tô 're ĩhâimana u'âsi.” Ãne ni'wam norĩ hã dama 're siwasu'u za'ra mono nherẽ, uburé 're sisisi mono õ di za, 'Re ihâimana u'âsi mono, da'ãma 're isib'a'uwẽ mono zéb u hã. Ni'wam norĩ si te za 'Re ihâimana u'âsi mono nhib'a'uwẽ, 're hâimana za'ra, Ĩmama hã hâiwa ãma 're isãmra mono hã te te sima 're i'awẽ mono zéb zarina, marĩ iwẽ si te te 're i'manharĩ za'ra mono norĩ si hã.

²² Nimahã bâtâ na ropsi'utõrĩzéb ãma, Ĩmama za oto da'ãma isipo'ozéb ãma hã te za da'ahâ na ĩma nharĩ za'ra ni, ãne: “Wanhib'apito, Wanhib'apito, wa norĩ hã asadawa para, wa tô wa te dama 're sadawa wasu'u za'ra, 'Re ihâimana u'âsi mono hã. Asadawa para, wa tô duré wa'uburé hã wa te dama 're sãmra za'ra. Marĩ dama i'manharĩ waihu'u'õ hã wa tô duré wa te dama 're 'manharĩ za'ra, asadawa para.” Ãne na hã da'ahâ na te za ĩma tasiwasu'u za'ra ni, ĩnhib'a'uwẽ uptabi na hã 're danomro mono newa.

²³ Tane nherẽ, wa za wa hã ĩsi'uihâ na tãma nharĩ za'ra, ãne: “Te aiwaihu'u za'ra wa'aba õ di, ĩzazei'wa na. Marĩ iwasété si ma tô 're i'manharĩ u'âsi za'ra wa'aba mo. Mo oto ai'aba'réi wa'aba, ĩnhiti.” Ãne wa za ta norĩ ma hã nharĩ za'ra, misi haré.

'Ri'wa norĩ wasu'u

^24-25 — Ãne, wa za duré ãma aima simiré'é za'ra wa'wa, 'ri'wai wasu'u na. 'Ri'wa hã tãma ãma rosa'rata waihu'u pese wa, ma tô ẽtẽ nhisiwi 'ri hã 'manha, siptete na 're sa mono da. Tawamhã tã hã pĩni za'ẽtẽ na 're ta'a mono wamhã, ma tô 're âpré. Duré 're âpré mono wamhã, ma tô 'ri u â hã 're praba. Rowa'u'u za'ẽne hã ma tô duré 're pusi, 'ri uwaibaba, te te aré ime da hã. Tane nherẽ, 'ri hã simei õ di, ẽtẽ nhisiwi te te sima 'ri wa, aibâ hã. Tane duré, ã hã te irotizé, ni'wam norĩ te te 're wapari za'ra mono wa, te te oto 're 'madâ'â pese za'ra mono wamhã, ta norĩ si te za rowẽ na 're hâimana u'âsi za'ra, 'Re ihâimana u'âsi mono 'ratamhã.

^26-27 — 'Ri'wa hâiba amo na, wa za duré ãma aima simiré'é za'ra wa'wa, tãma ãma irosa'rata waihu'u õ na. Ta hã supara nhisiwip si ma tô sima 'ri, siptete na tãma 're sab u'âsi mono da newa. Tawamhã tã hã pĩni za'ẽtẽ na 're ta'a mono wamhã, ma tô 're âpré. 'Re âpré mono wamhã, ma tô 'ri u â hã 're praba. Rowa'u'u za'ẽne hã ma tô duré 're pusi, 'ri uwaibaba. Tawamhã 'ri hã ma tô 'marõwĩ, awa'awi. Tane duré, ã hã te irotizé ni'wam norĩ tipo're na te te 're wapari za'ra mono nherẽ, te te 're 'madâ'â pese za'ra mono õ wamhã, ta norĩ si te za si'uihâ na 're sisimini za'ra, 'Re ihâimana u'âsi mono 'rata za 're idahâimana u'âsi za'ra mono zém na hã.

²⁸ Tawamhã Zezusi hã ãne na te te dama rowasu'u parimhã, ma tô ãma tatob'uzu za'ra ni, te te dama irowahutuzém na hã.

²⁹ 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ, simirowasu'u wapure na te te dama 're irowahutu za'ra mono ne, te te dama 're rowahutu mono õ di, Zezusi hã. Simirowahutu pire uptabi na ma tô te te dama 're rowasu'u. Tahawa, ma ãma tatob'uzu za'ra ni, dama iwaihu'u'õ hã te te dama wasu'u wa.