Mateu 5 - ꞌRe Ihâimana Uꞌâsi Mono Zadawa Wasuꞌu

Zezusi hã, ẽtẽ 'rãihâ ãma te te dama irowahutuzé wasu'u

¹ Tawamhã Zezusi hã da'ahâ uptabi na te te da'madâ'â wamhã, ẽtẽ 'rãihâ na ma tô sai'u, tame a'â sãmra da. Tawamhã isiré 're inomro mono norĩ hã ma tô 'râwi itẽme ubumro.

² Taha wamhã, tame ma tô Zezusi hã tinhimirowahutu na tãma ãma sãna'rata za'ra, ãne:

³ — Ni'wam norĩ hã 'râwi 're isipawapto waihu'u za'ra mono õ na 're siwaihu'u za'ra mono wamhã, duré 'Re ihâimana u'âsi mono si za ta norĩ hã i'upana te te 're ipawapto wẽ za'ra mono na te te sina 're waihu'u za'ra mono wamhã, ta norĩ si te za rowẽ na 're hâimana za'ra, ãma 're sib'a'uwẽ za'ra mono wa.

⁴ — Duré, ni'wam norĩ hã ti'ab ré dawasété u'âsi 're danomro mono wa, da'ãma 're ipẽ'ẽzé za'ra mono norĩ hã ta norĩ ma si tãma 're rowẽ za'ẽtẽ za'ra mono di za. Ta norĩ ma si te za 'Re ihâimana u'âsi mono hã te te tãma 're pisutu za'ra, toi u'âsi ãma 're ihâimana za'ra mono zéb da hã.

⁵ — Duré, ni'wam norĩ hã tiwaihu'u pese na 'râwi 're isi'madâ'â ze za'ra mono õ norĩ hã, 'Re ihâimana u'âsi mono si te te sima 're i'madâ'â za'ra mono norĩ hã, ta norĩ ma si, tãma 're rowẽ za'ẽtẽ za'ra mono di za. Ta norĩ ma si te za 'Re ihâimana u'âsi mono hã iwẽ hã te te tãma 're anhomri, te te tãma 're iropisutu za'ra mono zéb zarina.

⁶ — Duré, ni'wam norĩ hã 'Re ihâimana u'âsi mono te te sima 're iwẽ za'ra mono zéb uwaibaba, uburé marĩ iwẽ hã te te tãma 're i'manharĩ za'ra mono da si, te te sima 're wẽ za'ra mono wamhã, ta norĩ ma si, tãma 're rowẽ za'ẽtẽ za'ra mono di za. Ta norĩ ma si, te za 'Re ihâimana u'âsi mono hã te te tãma ãma 're a'uwaimrami, rowẽ te te tãma 're i'apisutu mono zém na hã.

⁷ — Duré, ni'wam norĩ hã da'ãma 're ipẽ'ẽzé za'ra mono zéb zarina, da'ãma 're isina mono norĩ hã, ta norĩ ma si, tãma 're rowẽ za'ẽtẽ za'ra mono di za. Ta norĩ ãma si te za 'Re ihâimana u'âsi mono hã ãma tipẽ'ẽzé za'ra, za da'ãma isipo'ozéb ãma hã.

⁸ — Duré, ni'wam norĩ hã marĩ wasété zô 're sipizari za'ra mono ãna 'Re ihâimana u'âsi mono ma si, tãma 're isihâiba nhomri u'âsi za'ra mono norĩ hã ta norĩ ma si, tãma 're rowẽ za'ẽtẽ za'ra mono di za. Ta norĩ si te za titõmo na 'Re ihâimana u'âsi mono hã te te 're 'madâ'â za'ra, 'râwi.

⁹ — Duré, rowẽ na dasiré 're dahâimana za'ra mono da, ni'wam norĩ hã tinhimiroti wẽ na te te 're dapawaptob u'âsi za'ra mono wamhã, ta norĩ ma si, tãma 're rowẽ za'ẽtẽ za'ra mono di za. Ta norĩ si te za ti'ra na te te 're sisi za'ra, 'Re ihâimana u'âsi mono hã.

¹⁰ — Duré, ni'wam norĩ hã 'Re ihâimana u'âsi mono te te sima 're iwẽ za'ra mono zéb zarina, uburé marĩ iwẽ hã te te 're 'manharĩ za'ra mono da si, te te sima 're wẽ za'ra mono wa, da te tãma 're irob'manharĩ wasété za'ra mono norĩ ma si, tãma 're rowẽ uptabi za'ra mono di za. E marĩ wa. 'Re ihâimana u'âsi mono hã ta norĩ ãma 're sib'a'uwẽ za'ra mono wa. — Ãne ma tô Zezusi hã tãma rowasu'u za'ra, tisiré 're inomro mono norĩ ma.

¹¹ Tawamhã ãne te duré tãma rowahutu za'ra: — Ĩzazei'wa oto 're anomro aba mono wa, da te ai'ãma 're wasété za'ra wa'aba mono nherẽ, duré da te aima 're rob'manharĩ wasété za'ra wa'aba mono nherẽ, duré dazadawa nhipese na taré da te dama 're aiwasu'u wasété za'ra wa'aba mono nherẽ, ĩwi 're aipizari za'ra wa'aba mono õ wamhã, aima 're rowẽ uptabi za'ra wa'aba mono di za.

¹² Tahawa, ma'ãpé atoi u'âsi, ãma 're anomro aba mono za. 'Re ihâimana u'âsi mono hã te za marĩ iwẽ hã sa'ẽtẽ na te te aima 're sõmri za'ra wa'wa, hâiwa ãma asô 're isimi'wara aba mono hã. Duréihã 'Re ihâimana u'âsi mono zadawa 'mahârâ 'rata 'wa norĩ ma, ma tô da te tãma 're rob'manharĩ u'âsi za'ra, da te aima 're irob'manharĩ wasété za'ra wa'aba mono ne. — Ãne na ma tô Zezusi hã tãma waihu'u siromo za'ra romhâ ré, te te waihu'u zara da.

Dasai warĩrĩzé wasu'u, rob'uiwẽzé wasu'u me

¹³ Tawamhã ãne te duré tãma rowasu'u za'ra, tisiré 're inomro mono norĩ ma: — Ãne wa za duré aima ãma romnhimiré'é za'ra wa'wa. A norĩ wa'wa hã sa ne, te za dama 're aihâimana za'ra wa'aba mo. Sa na hã dasa hã ãma se ti, dasai warĩrĩzé wa. Tane nherẽ, oto 're sé si'utõrĩ mono wamhã, niha apâ hã da te 'manharĩ waihu'u õ di, isé na ihâimana da hã, dasa da te ãma 're iwarĩrĩ za'ra mono zéb da hã. Marĩ dai õ di oto, dama hã. Taré te za da te 're sa'wari za'ra rob u, marĩ dai õ wa oto. Tahawa, te za oto taré ti'ai wa 're simi'wara mono wa, isisiwimhã 're danomro, dapara na. Tane duré, a norĩ wa'wa hã ĩzadawa wasu'u na dama 're romhuri wẽ za'ra wa'aba mono nherẽ, oto romhuri hã 're sahâri za'ra wa'aba mono wamhã, marĩ dai õ di oto, 're i'aihâimana za'ra wa'aba mono zé hã za, ĩma hã.

¹⁴ — Ãne wa za duré aima ãma romnhimiré'é za'ra wa'wa. A norĩ wa'wa hã rob'uiwẽzém ne, te za dama 're aihâimana za'ra wa'aba mo. 'Re dasimani za'ra mono tõ da, da te dasima 're irob'uiwẽ za'ra mono ne, te za 're idanhimroi wẽ wa'aba mo, 'Re ihâimana u'âsi mono u. 'Rinho'u hã sa'a nhisiwi, da te 're i'ri za'ra mono hã dawi 're sima'uri waihu'u za'ra mono õ di. 'Madâ'â pese di, dama hã. Tane duré, a norĩ wa'wa hã dawi 're aimani waihu'u za'ra wa'aba mono õ di za. Sõ'awi te za dama 're ĩwasu'u wẽ u'âsi za'ra wa'aba mo.

¹⁵ Duré, rob'uiwẽzé hã da te ro'o wamhã, e piza'a na te za upsibi ni. Mare di. Isima'warazém na si te za sõ'awi da te 're sõré, 'ri paramhã te te dama 're rob'uiwẽ za'ra mono da, 'ri 're, 're idasi'ubumroi mono norĩ ma.

¹⁶ Tane duré, a norĩ wa'wa hã te za sõ'awi dama 're aihâimana za'ra wa'aba mo, rob'uiwẽzé hã sõ'awi te te dama 're irob'uiwẽ za'ra mono ne. Uburé marĩ hã te za dama 're i'manharĩ wẽ u'âsi za'ra wa'aba mo, dama 're i'manharĩ wẽ za'ra wa'aba mono zé hã da te 're i'madâ'â za'ra mono zéb zarina, Aimama za'ra wa'aba ãma 're dawata za'ra mono da, hâiwa ãma 're isãmra mono ãma.

'Re ihâimana u'âsi mono nhimiroti 'rata na, Mozési te te ãma irob'ui'érézé wasu'u

¹⁷ — Duré, ĩ'ãma rosa'rata upa za'ra wa'aba õ di za, asima rosa'rata za'ra wa'aba na hã, duréihã 'Re ihâimana u'âsi mono nhimiroti 'rata na Mozési te te ãma irob'ui'érézé, duré isadawa 'mahârâ'wa norĩ nhimiroti na zama te te irob'ui'érézé te dawi sawi da, we ĩmorĩ na hã ti'ai u. Ta norĩ nhimirowasu'u 'rada hã te dawi sawi da, we ĩmorĩ õ di. Mare di. 'Re ihâimana u'âsi mono nhimiroti 'rata na rob'ui'éré hã te ĩsina i'uwaimrami da si, wa tô wei mo.

¹⁸ Tô sena, wa za ãne aima waihu'u siromo za'ra wa'wa. Hâiwa norĩ hã ti'ai me 're sa'wari zahuré mono ré hã, duréihã 'Re ihâimana u'âsi mono nhimiroti 'rata na rob'ui'éré hã pire na te za tô dama 're hâimana u'âsi. Nima hã dawi 'masi'utõrĩ waihu'u õ di za, iwaptẽrẽ mono bâ hã i'ui'éré misi hã, duré i'ui'éré 'rãzazazé hã. Za niha dama 're iromhâimana mono zéb da hã, ibaihâ na duréihã isadawa wasu'u'wa norĩ te te ãma irob'ui'éré siromo za'ra zéb zarina, rob'rãsutuzéb u za niha dama 're romhâimana uptabi za'ra mono õ ré, si'utõrĩ za'ra õ di za, isimiroti na rob'ui'éré 'rata norĩ hã.

¹⁹ Duré, ni'wam norĩ hã 'Re ihâimana u'âsi mono nhimiroti 'rata na rob'ui'éré hã nima hã roti hã taré dama 're 'maihâimana mono newa, te te 're 'madâ'â za'ra mono õ wamhã, duré isine da te 're 'madâ'â tõ za'ra mono da, te te dama ãma 're roti za'ra mono wamhã, ta norĩ si te za dama wapu na 're hâimana za'ra, 'Re ihâimana u'âsi mono, da'ãma 're isib'a'uwẽ mono zéb ãma hã. Tane nherẽ, ni'wam norĩ si isimiroti na rob'ui'éré 'rada hã te te 're 'madâ'â pese za'ra mono wamhã, duré isine da te 're 'madâ'â pese za'ra mono da, te te dama ãma 're roti za'ra mono wamhã, ta norĩ si te za dama pire na 're hâimana za'ra, da'ãma 're isib'a'uwẽ mono zéb ãma hã.

²⁰ Ãne wa za duré aima waihu'u za'ra wa'wa. Farizeu norĩ hâimanazém nhipai u, duré 'Re ihâimana u'âsi mono nhimiroti na rob'ui'éré na dama rowahutu'wa norĩ hâimanazém nhipai u, Wamama te te sima 're i'aiwẽ za'ra wa'aba mono zéb zarina si, 're aihâimana wẽ za'ra wa'aba mono wamhã, tawapsi, te za dame 're asisisi aba mo, 'Re ihâimana u'âsi mono, da'ãma 're isib'a'uwẽ mono zéb u hã.

Dasisada 're idanhiti'rui wairébé mono zé wasu'u

²¹ — Ãne hã ma tô duré 're iwapari za'ra wa'aba mo, duréihã 'Re ihâimana u'âsi mono te te dama irotizé hã: “'Re danhimroi wa'aba mono õ di za. Ni'wam norĩ hã te te 're danhimroi mono wamhã, te za dawasété na dawaihu'u'wa norĩ u da te 're simro, ta norĩ hã iwasété na te te siwi 're waihu'u za'ra mono wa, te te dama 're 'ru za'ra mono da, da te dasiwi 're simroi mono da.” Ãne duréihã aihi'rata norĩ wa'aba ma, ma tô roti.

²² Ãne na roti hã tô sena nherẽ, wa za oto wa hã aimawi na aima waihu'u za'ra wa'wa, ãne na roti na hã. Ni'wam norĩ hã tisiré 're ihâimana za'ra mono norĩ da, 're siti'ru za'ra mono wamhã, ta norĩ hã te za 'Re ihâimana u'âsi mono hã te te siwi 're awẽ'õ, iwasété na te te 're i'awaihu'u mono zéb zarina. Duré ãté ni'wa hã te za tisiré ma tinha, ãne: “A hã, marĩ da, 're aihâimana mono õ.” Ãne ni'wam norĩ hã te te dama 're nharĩ za'ra mono wamhã, te za da te 're simro, zudeu norĩ ma roti'wa norĩ u, dawasété na dawaihu'u'wa norĩ tẽme, ta norĩ hã te te siwi 're wẽ'õ za'ra mono da, iwasété na te te siwi 're waihu'u za'ra mono wa. Duré ni'wa hã ãté ãne te za tisiré ma tinha: “E niha asimiza'rese'õ a hã, 'Re ihâimana u'âsi mono wasu'u na hã.” Ãne ni'wam norĩ hã tisiré ma, te te 're nharĩ za'ra mono wamhã, ãté ta norĩ hã te za ropipa u 're sisisi, unhama ro'o u'âsi u.

²³ Ãté a norĩ wa'wa hã te za 're anomro aba mo, 'Re ihâimana u'âsi mono nhorõwa u, marĩ hã tãma asõprubzéb da hã, wedeza ne nhisiwi 're sa'ra za'ra wa'aba mono da, tãma danhoprubzé nomrizé nhisiwi. Tawapsi ãté te za asina 're aipo're pu'u za'ra wa'aba mo, marĩ hã asiré ma, 're 'manharĩ wasété za'ra wa'aba mono wa, asisada 're aihâimana za'ra wa'aba mono zém na hã.

²⁴ Ãhã wamhã, te za a'â asisô 're isa'ra wa'aba mo, 'Re ihâimana u'âsi mono ma, asõprubzé hã wedeza ne nho're, asiré u a'â asitẽme 're anomro aba mono da, asima 're asiwasu'u za'ra wa'aba mono wa, apâ duré asina 're asiwadi za'ra wa'aba mono da. Taha parip si te za apâ 're anomro aba mo, 'Re ihâimana u'âsi mono nhorõwa u, tãma asõprubzé hã oto tãma 're sõmri za'ra wa'aba mono da.

²⁵ — Ãté ni'wa hã te za sima ãma ai'ãma 'mairosa'rata 'wa, da'ãma rowairébé'wai u te te ai'mazaprõni aba da, marĩ tiwi i'mai'manharĩ wasété aba zém na te te tãma ai'maiwasu'u wa'aba da. Ãne wamhã, te te ai'mazaprõni aba õ ré, te za tãma ai'masiwasu'u wa'wa, te te ãma ai'mazazei wa'aba wa, da'ãma rowairébé'wa norĩ u, te te ai'mazaprõni aba tõ da, damrami'wai ma, te te duré ai'mai'rui wa'aba tõ da, dazazéb 're, da te ai'manherẽ aba tõ da hã.

²⁶ Dazazéb 're, da te ai'manherẽ aba wamhã, marĩ hã dawi i'mai'manharĩ wasété aba wa'rãmi, dama asi'maiwa'âbâ 'rãsutu pese aba õ nherẽ, ta hawi ai'maiwatobro waihu'u aba õ di za. Tô sena, wa ãne na hã aima rowasu'u za'ra wa'wa.

Damro na dasiwi danhimisaihurizé wasu'u

²⁷ — Ãne hã ma tô duré 're iwapari za'ra wa'aba mo, duréihã 'Re ihâimana u'âsi mono te te dama irotizém na hã: “Aimro na asiwi 're asimisaihuri za'ra wa'aba mono õ di za.”

²⁸ Ãne na roti hã tô sena nherẽ, wa za oto wa hã aimawi aima roti za'ra wa'wa, tô õhõ rotizém na hã. Ni'wam norĩ hã pi'õ, titõmo na te te 're 'madâ'â ze za'ra mono wa, te te 're waibui mono da, te te sima ãma 're rosa'rata za'ra mono wamhã, taha na zama te za tiwasédé hã te te 're 'manharĩ za'ra, tinhimirosa'rata na si nherẽ.

²⁹ Duré marĩ hã atõmo nhimire niwĩm na 're 'madâ'â za'ra wa'aba mono wa, aiwasédé hã 're waibui wa'aba mono wamhã, tawamhã atõmo nhimire niwĩ asiwi 're sani za'ra wa'aba mono wa, romhâ na asisiti oto 're isãmra aba mono ne, te za oto 're anomro wẽ wa'aba mo. Ato hã sahuré aima 're hâimana za'ra wa'aba mono õ nherẽ, aima 're rowẽ uptabi za'ra wa'aba mono di za. Aihâiba wahuré ré, duré atõmo zahuré ré, 'Re ihâimana u'âsi mono hã ropipa u, te te 're asãmra aba mono wamhã, aima 're rowẽ za'ra wa'aba mono õ di za.

³⁰ Duré, asib'rata nhimire niwĩm na aiwasédé hã 're waibui wa'aba mono wa, asiwi 're isihâri za'ra wa'aba mono wam ne, romhâ na oto asisiti 're isãmra aba mono ne, te za oto 're anomro wẽ wa'aba mo. Asib'rada hã sahuré aima 're hâimana za'ra wa'aba mono õ nherẽ, aima 're rowẽ uptabi za'ra wa'aba mono di za. Aihâiba wahuré ré, duré asib'rata zahuré ré, ropipa u 're asisisi aba mono wamhã, aima 're rowẽ za'ra wa'aba mono õ di za.

Damro, da te 're irẽme za'ra mono zé wasu'u

³¹ — Duréihã 'Re ihâimana u'âsi mono te te duré dama irotizé hã, ãne: “Aibâ norĩ hã timro te te 're rẽme za'ra mono õ ré, te za rob'ui'éré hã te te tãma 're sõmri za'ra, za te te irẽmezém na. Taha parip si, te za oto timro hã te te 're rẽme za'ra, pibui pese na.” Ãne duréihã Mozési te te ãma irob'ui'érézé hã, ãne na hã.

³² Ãne na roti hã tô sena nherẽ, wa za oto wa hã aimawi aima waihu'u za'ra wa'wa, tô õhõ rotizém na hã. Pi'õ norĩ hã aibâ aimawi na 're simisaihuri za'ra mono õ nherẽ, imro te te 're rẽme za'ra mono wamhã, tiwasédé hã te za te te 're 'manharĩ za'ra, aibâ norĩ hã. E marĩ wa. Pi'õ norĩ hã imro te te 're rẽme za'ra mono nherẽ, aibâ aimawi na duré apâ 're mro zahu za'ra mono wamhã, tawapsi te za tiwasédé hã te te 're 'manharĩ za'ra, pi'õ norĩ hã. Tahawa, aibâ norĩ hã tiwasédé te te tãma 're i'manharĩ za'ra mono zém hawi wa, te za duré õ norĩ zama aibâ aimawi na 're mro za'ra mono wa, tiwasédé hã te te 're 'manharĩ za'ra. Duré aibâ norĩ hã, pi'õ, da te 're irẽme za'ra mono na 're mro za'ra mono wamhã, tawapsi, te za duré ta norĩ zama tiwasédé hã te te ãma 're 'manharĩ za'ra, aibâ norĩ hã.

Marĩ na da te dasima 're iropisutu za'ra mono zé wasu'u

³³ — Ãne hã ma tô duré 're iwapari za'ra wa'aba mo, duréihã 'Re ihâimana u'âsi mono te te dama irotizém na Mozési te te ãma irob'ui'érézé hã: “'Re ihâimana u'âsi mono nho'a, marĩ na dama 're ropisutu za'ra wa'aba mono wamhã, te za tô dama ãma 're i'uwaimrami za'ra wa'aba mo.” Ãne duréihã 'Re ihâimana u'âsi mono te te dama irotizém na rob'ui'éré hã.

^34-35 Ãne na roti hã tô sena nherẽ, wa za oto wa hã aimawi aima waihu'u za'ra wa'wa, tô õhõ rotizém na hã. Marĩ pire na taré dama 're ropisutu za'ra wa'aba mono õ di za oto, 'Re ihâimana u'âsi mono nho'a. Mare di. Duré ãne na dama 're ropisutu za'ra wa'aba mono õ di za: “Hâiwa hã tô sena wahuré 're isa'wari mono ne, wa duré wa hã tô sena aima ropisutu.” Ãne wasu'u zarina taré dama 're ropisutu za'ra wa'aba mono õ di za. E marĩ wa. Hâiwa hã taré hã 're ihâimana mono õ wa, tame 'Re ihâimana u'âsi mono hã 're sãmra u'âsi mono wa, ta hawi te te we duré 're da'ab'madâ'â mono wa. Duré ãne na dama 're ropisutu za'ra wa'aba mono õ di za: “Ti'a hã tô sena wahuré 're isa'wari mono ne, wa duré wa hã tô sena aima ropisutu.” Ãne wasu'u zarina taré dama 're ropisutu za'ra wa'aba mono õ di za. E marĩ wa. Ti'a zama pire wa, 'Re ihâimana u'âsi mono te si wa. Duré ãne na dama 're ropisutu za'ra wa'aba mono õ di za: “Zeruzalẽ na 'ri nho'õmo nhisi hã tô sena 're isa'wari mono ne, wa duré wa hã tô sena aima ropisutu.” Ãne wasu'u zarina taré dama 're ropisutu za'ra wa'aba mono õ di za. E marĩ wa. Ta hã 'Re ihâimana u'âsi mono, uburé Danhib'apito uptabi te si wa.

³⁶ Duré ãne na dama 're ropisutu za'ra wa'aba mono õ di za: “Ĩ'rã hã tô sena ĩma 're ihâimana mono ne, wa duré wa hã tô sena aima ropisutu.” Ãne wasu'u zarina taré dama 're ropisutu za'ra wa'aba mono õ di za. E marĩ wa. Ai'rã za'ra wa'wa hã ate za'ra wa'aba õ wa, 'Re ihâimana u'âsi mono te si wa. Asi'uihâ na aséré hã asima 're 'rãdâ'â waihu'u za'ra wa'aba mono õ di. Duré asi'uihâ na 're asiséré'a waihu'u za'ra wa'aba mono õ di.

³⁷ Marĩ hã dama 're 'manharĩ za'ra wa'aba mono da, asina dama 're ropisutu za'ra wa'aba mono wamhã, ãne si te za dama 're inharĩ za'ra wa'aba mo: “Ĩhe. Wa za tô 'manha.” Duré marĩ hã dama 're 'manharĩ za'ra wa'aba mono da, asima 're wẽ za'ra wa'aba mono õ wamhã, ãne si te za duré dama 're inharĩ za'ra wa'aba mo: “Mare di. Wa hã te 'manharĩ õ di za.” Ãne si te za dama 're inharĩ za'ra wa'aba mo. Ãne si dama 're nharĩ za'ra wa'aba mono õ wamhã, Wa'uburé nhimiwada'uri zarina te za aiwasédé hã 're i'manharĩ za'ra wa'aba mo.

Marĩ na da te dasima 're iwa'rãmi za'ra mono zé wasu'u

³⁸ — Ãne hã ma tô duré 're iwapari za'ra wa'aba mo, duréihã 'Re ihâimana u'âsi mono te te dama irotizém na hã: “Ni'wam norĩ hã te te 're datõmo wamnarĩ za'ra mono wamhã, te za asa da te 're tõmo wamnarĩ za'ra iwa'rãmi, aiwab da. Duré ni'wam norĩ hã da'wa te te dawi 're prub za'ra mono wamhã, te za duré asa iwa'rãmi da te 're 'waprub za'ra, aiwab da.” Ãne na duréihã roti hã.

³⁹ Tane nherẽ, wa za duré wa hã aimawi aima waihu'u za'ra wa'wa, tô õhõ na rotizém na hã. Da te aima 're rob'manharĩ wasété za'ra wa'aba mono nherẽ, asa dama ãma 're wa'rãmi za'ra wa'aba mono õ di za. Atob'rata nhimire niwĩ da te 're aihâ za'ra wa'aba mono wamhã, dama ãma 're wa'rãmi za'ra wa'aba mono õ di za. Taré te za 're aipizari za'ra wa'aba mo, atob'rata amo niwĩ, da te duré 're aihâ za'ra wa'aba mono da.

⁴⁰ Ãté ni'wa hã te za ai'ãma wa'aba sima rosa'rata, dawasété na dawaihu'u'wa norĩ u te te ai'mazaprõni aba da, marĩ tiwi i'mai'manharĩ wasété aba zém na te te tãma ai'maiwasu'u wa'aba da. Tawamhã ãté te za tãma ai'maiwasu'u wa'wa, ta norĩ hã te te aima 'maipisutu aba da, asõ'utu'u iwa'âbâ surure hã iwa'rãmi tãma 'manhomri aba da, tiwi i'mai'manharĩ wasété aba wa'rãmimhã. Ãne wamhã, te te aiwi 'mai'âri aba wamhã, asi'ubuzéb zama te za tãma hã i'mai'manhomri 'wa, wa'âbâ za'ẽtẽ nherẽ, te te aiwi 'maiwaptẽrẽ aba õ nherẽ.

⁴¹ Duré, ni'wam norĩ hã bâdâdi na marĩ hã misi ti'ai pibuzém na tãma 're 'wasari aba mono da, te te aima 're 'ru za'ra wa'aba mono wamhã, asi'uihâ na te za asima 're iwẽ za'ra wa'aba mo, taha nhipai u, maparane ti'ai pibuzém na tãma 're 'wasari aba mono da a'â.

⁴² Duré marĩ hã da te aiwi 're waptẽrẽ za'ra wa'aba mono wamhã, te za dama 're isõmri za'ra wa'aba mo. Duré marĩ hã asibro hã taré a'â da te aiwi 're waptẽrẽ za'ra wa'aba mono wamhã, dawi 're sawi za'ra wa'aba mono õ di za, asimarĩ 'wa hã. Te za tô taré dama 're isõmri za'ra wa'aba mo, a'â.

Da'ruiwapari'wa norĩ, da te 're isawi pese za'ra mono zé wasu'u

⁴³ — Ãne hã ma tô duré 're iwapari za'ra wa'aba mo: “Asiré 're aihâimana za'ra wa'aba mono norĩ si te za 're isawi pese za'ra wa'aba mo. Ai'ruiwapari'wa norĩ si te za asa asiwi 're iwẽ'õ pese za'ra wa'aba mo.”

⁴⁴ Tane nherẽ, wa za duré wa hã aimawi aima waihu'u za'ra wa'wa, tô õhõ na rotizém na hã. Ai'ruiwapari'wa norĩ hã te za 're isawi pese za'ra wa'aba mo. Duré te te aima 're irob'manharĩ wasété za'ra wa'aba mono norĩ ãma, te za 're aimreme zusi aba mo, 'Re ihâimana u'âsi mono ma, iwẽ si te te tãma 're apisutu mono da, ta norĩ ma.

⁴⁵ Ãne te za dama 're i'manharĩ za'ra wa'aba mo, Aimama aba 'ra na sena na da te 're aiwaihu'u za'ra wa'aba mono da, hâiwa ãma 're isãmra mono 'ra na. E marĩ wa, te za ai'ruiwapari'wa norĩ hã 're isawi pese za'ra wa'aba mo. Ni'wai ma, isawi hã te te 're ba'a mono õ wa, 'Re ihâimana u'âsi mono hã. Uburé te te 're da'azawi pese, te te 're isawi pese za'ra mono norĩ hã, duré te te 're isawi õ za'ra mono norĩ zama. Aiwapsi te bâdâ hã te te dama 're rob'uiwẽ za'ra, 're inomro wẽ mono norĩ ma, duré 're inomro wasété mono norĩ ma zama, 'Re ihâimana u'âsi mono nhimipisutuzéb zarina. Aiwapsi te duré tã hã dama 're ta'a za'ra, 'Re ihâimana u'âsi mono nhimiroti te te 're i'madâ'â pese za'ra mono norĩ ma, duré te te 're iwapari za'ra mono õ norĩ ma zama, isimipisutuzéb zarina.

⁴⁶ Rob'uiprazé arĩ ubumroi'wa norĩ hã bété. Ta norĩ hã dawi 're simisaihuri u'âsi za'ra mono wa, te 're nomro wasété. Ta norĩ hã te tizawi pese 'wa norĩ si te te 're sawi za'ra. Tawamhã asawi pese 'wa norĩ si, 're sawi pese za'ra wa'aba mono wamhã, e te za 'Re ihâimana u'âsi mono hã iwẽ hã te te aima 're sõmri za'ra wa'wa. Mare di. Iwẽ hã te te aima 're sõmri za'ra wa'aba mono õ di za.

⁴⁷ Duré 'Re ihâimana u'âsi mono waihu'u'õ'wa norĩ hã te te 're saze za'ra mono õ nherẽ, te tisiwadi norĩ ma, marĩ iwẽ hã te te tãma 're 'manharĩ za'ra, siré 're ihâimana za'ra mono norĩ ma hã. A norĩ wa'wa hã bété, asiré 're aihâimana za'ra wa'aba mono norĩ ma si, marĩ iwẽ hã tãma 're 'manharĩ za'ra wa'aba mono wamhã, aiwapsi te aiwasété na dame 're aihâimana za'ra wa'aba mo, 'Re ihâimana u'âsi mono waihu'u'õ'wa norĩ siré.

⁴⁸ Tahawa, te za a norĩ wa'wa hã uburé 're idazawi pese za'ra wa'aba mo, 'Re ihâimana u'âsi mono hã te te da'ãma 're a'upai mono ãna, uburé te te 're ida'azawi pese mono ne.