Mateu 4 - ꞌRe Ihâimana Uꞌâsi Mono Zadawa Wasuꞌu

Zezusi hã, Wa'uburé te te ipibuzé wasu'u

¹ Tawamhã 'Re ihâimana u'âsi mono pẽ'ẽzani ma tô Zezusi hã saprõ a'ubuni u, tame Wa'uburé hã te te nasi pibu da.

² Tawamhã a'ubuni wi sãmra ré, ma tô bâdâ hã 40 na duré 40 mara na hã ãma ai'utõ, sai ãna sãmra ré hã. Tahawa tãma hã mrab uptabi di.

³ Tawamhã Wa'uburé ma tô itẽme wi. Itẽme wisi wamhã, te tãma tinha ãne: — Sena a hã 'Re ihâimana u'âsi mono 'ra wamhã, ma'ãpé ẽtẽ ma nharĩ, i'u'ẽtẽ wapu na aima si'manharĩ za'ra da.

⁴ Tawamhã Zezusi asa te tãma tinha, ãne: — 'Re ihâimana u'âsi mono mreme na rob'ui'éré hã ãne: “Dasa na si 're danhiptete za'ra mono õ di za. 'Re ihâimana u'âsi mono te te dama 're i'awaihu'u mono zém na zama, te za duré 're danhiptete za'ra.”

⁵ Taha pari, Wa'uburé hã ma tô Zezusi saprõ Zeruzalẽ u, 'ri nho'u iwẽ uptabi u, te te duré pibu da. 'Re ihâimana u'âsi mono nhorõwa 'ri u, te saprõ, 'ri nhisi u, sab da hâimo, 'ri 'rãihâ uptabi nhisi.

⁶ Tawamhã ãne te tãma tinha, Wa'uburé hã: — Sena a hã 'Re ihâimana u'âsi mono 'ra wamhã, ma'ãpé atobro, ti'ai u. 'Re ihâimana u'âsi mono, te za, u, hâiwa hawi we atẽme satõrĩ za'ra, tãma iromhuri'wa norĩ hã, te te ai'madâ'â za'ra da. Tinhib'rata na te za, u duré siwi asapa, ẽne hã te te ai'u'a õ'umnhasite, aipara wi. Ãne 'Re ihâimana u'âsi mono zadawa 'mahârâ'wa nhimi'ui'éré hã, duréihã, ibaihâ na hã.

⁷ Tawamhã Zezusi hã te asa tãma tinha: — Mare di. “Asib'apito za'ra wa'wa hã, 'Re ihâimana u'âsi mono hã marĩ hã te te aima 're pisutu za'ra wa'aba mono õ nherẽ, 're pibu za'ra wa'aba mono õ di za, te te 're aipawaptob za'ra wa'aba mono zô.” Ãne duré imreme na rob'ui'éré, ibaihâ na hã.

⁸ Taha pari, te duré Wa'uburé Zezusi hã saprõ, ẽtẽ 'rãihâ u, danhib'apito norĩ nhipti'ai mono bâ te te rob'madâ'â mono da, ro iwẽ uptabi uburé te te ab'madâ'â mono da.

⁹ Tawamhã Wa'uburé te ãne tãma ropisutu, Zezusihi ma: — Asib'apito na ĩ'ãma aiwata da, te za aihi'rãtitõ ĩma asã. Tawamhã ã hã uburé wa za aima tisõ, ate da.

¹⁰ Tawamhã Zezusi te asa tãma tinha ãne: — Satanasi, mo oto ĩnhiti aimorĩ. 'Re ihâimana u'âsi mono zadawa 'mahârâ'wa, ma tô ãne rob'ui'éré: “Uburé Danhib'apito uptabi ãma si, te za 're aiwata za'ra wa'aba mo, 'Re ihâimana u'âsi mono ãma si. Taha ma si te za 're iromhuri za'ra wa'aba mo, Asib'apito za'ra wa'aba ma si.” Ãne imreme na rob'ui'éré, ibaihâ na hã. — Ãne te rob'ui'éré 'rada hã tãma 'rãzarõtõ Zezusi hã, Satanasihi ma.

¹¹ Tawamhã Wa'uburé ma tô ihawi oto mo. Morĩ wamhã, hâiwa ãma romhuri'wa norĩ hã ma tô we itẽmemhã oto aihutu, te te siwi pawaptob da, Zezusi hã.

Zezusi hã, romhuri na te te isãna'ratazé wasu'u

¹² Tawamhã Zezusi hã Zuwã da te isẽrẽzé wasu'u te te wapari wa, ma tô mo, Galiléa u.

¹³ Tawamhã Nazaré ãma 're isãmra mono da hã, te te sima rowẽ õ di oto. Tahawa, Cafanau na 'ri nho'õmo nhisi u si ma tô mo, tame oto 're sãmra mono da, Galiléa ãma isõ'u zapodo 're ihâimana mono 'rata, Zébulõhõ nhihudu norĩ nhipti'a niwĩmhã, duré Naftalihi nhihudu norĩ nhipti'a niwĩmhã.

¹⁴ Ãne ma tô Zezusi hã 'manha, duréihã 'Re ihâimana u'âsi mono zadawa 'mahârâ 'rata 'wa Izaia te te ãma irob'ui'érézé te te sina uwaimrami da. Ãne isimi'ui'éré hã 'Re ihâimana u'âsi mono mreme na hã:

¹⁵ “Zébulõhõ nhihudu norĩ nhipti'ai ãma 're idahâimana za'ra mono norĩ hã, duré Naftalihi nhihudu norĩ nhipti'ai ãma zama, isõ'u tẽme bâdâdi wa, 're idahâimana za'ra mono norĩ hã, Zodã na pa nhisi zara niwĩ 're idahâimana za'ra mono hã, Galiléa ãma zudeu'õ norĩ dawazari 're ihâimana za'ra mono norĩ hã,

¹⁶ te uburé robra na 're dahâimana za'ra. Tane nherẽ, te za oto taha 'remhã rowa'a za'ẽne hã da te 're 'madâ'â za'ra. Te za oto duré dama rowa'a, dapẽ'ẽ 're robra na 're idanomro mono norĩ ma hã.”

¹⁷ Tawamhã ta hawim haré ma oto romhuri na sãna'rata Zezusi hã, Timama zadawa wasu'u na. Ãne ma tinhimirowasu'u na dama ãma sãna'rata: — Aiwasété wi te za oto 're aipizari za'ra wa'aba mo. Ãhã na bâdâ hã ma tô oto iwa waptãrã, 'Re ihâimana u'âsi mono da'ãma 're isib'a'uwẽ mono zéb da hã.

Zezusi hã, maparane si'uiwa na tepe na romhuri'wa norĩ zô ihârâzé wasu'u

¹⁸ Tawamhã Zezusi hã Galiléa na isõ'u nhisi zaihâi baba 're morĩ wamhã, ma tô aibâ norĩ hã sãmri zahuré, tepe mrami na romhuri'wa norĩ hã, tisisãnawãi me: Sima na isisi hã, Pedru na isisi amo hã. Duré ino hã Ãdré na isisi hã. Isõ'ui wa, te nasi ta norĩ hã abazipara hã wabzuri zahuré, tepe zô.

¹⁹ Tawamhã Zezusi hã te sô tihârâ zahuré ãne: — We ane wa'aba, ĩsiré 're ane wa'aba da oto, romhuri na aima ĩsisanho wa'aba da, ĩma 're ida'awaibui wa'aba mono zéb da na.

²⁰ Tahawa, ma te awa'awi tãma marẽme zahuré abazipara ma, Zezusihi siré 're neb zahuré da oto.

²¹ Tawamhã suru na sina pahâ wi, ma duré 'madâ'â zahuré, Tiagu norĩ Zuwãhã me. Ta norĩ hã Zebedehe 'ra zahuré. Timama siré te abazipara sisinarĩ hã te te apâ ãma a'rã'õtõ zahuré, uba're wa. Tawamhã te duré sô tihârâ zahuré ta norĩ zô hã.

²² Sô hârâ zahuré wamhã, awa'awi ma tô tinhimiromhuri ma hã marẽme zahuré. Taha wamhã, timama zama hã ma duré oto rẽme zahuré, Zezusihi siré si 're neb zahuré da oto.

Zezusi hã da'ahâ na te te ida'apesezé wasu'u

²³ Tawamhã daza'rui mono bâ te 're mo Zezusi hã, Galiléa ãma hã. zudeu norĩ te, rowahutuzé mono bâ, ma tô te te dama 're rowahutu. 'Re ihâimana u'âsi mono, da'ãma 're isib'a'uwẽ mono zé wasu'u na te duré te te dama 're rowasu'u, iwasu'uwẽ na. Duré dahâzé da te 're isépata za'ra mono bâ hã ma da'apese. Hâzé u'âsi wa, sib'uware na 're inomro mono norĩ zama ma duré apese, Zezusi hã.

²⁴ Tawamhã Zezusi te te ida'apesezém na, ma tô rowasu'u hã te te ropé, Siria na danhipti'a nho'õmo nhisi ãma. Tahawa, ma tô itẽme da te 're 'wasari dahâzé mono bâ, uburé aimawi hã dahâzé da te 're isépata za'ra mono norĩ hã, wa'uburé te te 're iwamnarĩ za'ra mono norĩ hã, duré da'rã siwamnarĩ wa, 're idahâiba popo'o za'ra mono norĩ hã, duré imorĩ'õ norĩ hã. Uburé ma tô taha wamhã da'apese, Zezusi hã.

²⁵ Tahawa, ma tô da'ahâ uptabi na isarina dasi'ré, Galiléa hawimhã, duré Decapori hawimhã, duré Zeruzalẽ hawimhã, duré Zudéa na danhipti'a nho'õmo nhisi hawimhã. Duré Zodã pa zara niwĩ 're idasi'ubumroi mono norĩ zama ma tô itẽme hã dasito.