Mateu 3 - ꞌRe Ihâimana Uꞌâsi Mono Zadawa Wasuꞌu

Zuwã Batista te te dama 're irowahutu mono zé wasu'u

¹ Tawamhã wahub ahâ na ãma wahu pari, ma tô Zuwã Batista hã mo a'ubuni u, Zudéa ãma, 'Re ihâimana u'âsi mono zadawa wasu'u na te te dama ãma sãna'rata da.

² Taha wamhã, te ãne dama rowasu'u: — Ma'ãpé, aiwasété wi aipizari za'ra wa'aba. 'Re ihâimana u'âsi mono, da'ãma 're isib'a'uwẽ mono zéb u hã romhuture di oto. — Ãne te dama rowahutu, Zuwã Batista hã.

³ Duréihã Izaia hã ma tô Zuwã Batistaha ãma rob'ui'éré siro, 'Re ihâimana u'âsi mono zadawa 'mahârâ 'rata 'wa hã. Ãne isimi'ui'éré hã: “Ni'wa te te dama 're rob'mahârâ, ãne a'ubuni wi: Bâdâdi hã ma'ãpé asiwi pese aba mono, Wanhib'apito zô. Imana 'rãmi duré ma'ãpé awa'awi bâdâdi sô sa'ra wa'aba mono.”

⁴ Zuwã hã awaru ba'õmore zéré 'manharĩ na te 're si'uza. Duré romhâ 'manharĩ hâiwaré na te 're si'usisi. 'Riti na si te duré 're sa. Rom na ropĩni na zama hã te duré 're sai mono.

⁵ Tawamhã Zeruzalẽ ãma 're idasi'ubumroi mono norĩ hã, duré Zudéa ãma daza'rui mono bâ 're idahâimana za'ra mono hã, duré Zodã na pa nhisi 'rata 're idahâimana za'ra mono norĩ zama, ma tô itẽme hã 're dasito daro mono bâ, isimirowasu'u, da te 're wapari za'ra mono da.

⁶ Tahawa, dawasété na sõ'awimhã ma tô 're dasiwẽ'õ za'ra 'râwi, 'Re ihâimana u'âsi mono ma. Dawasété na 're dasiwẽ'õ za'ra mono sidâpâsi, ma tô Zuwã Batista â dawabzuri hã te te dama 're ab'manharĩ, Zodã pa ãma.

⁷ Tawamhã Zuwã, farizeu norĩ, saduseu norĩ me ahâ uptabi na hã ma tô 'madâ'â za'ra, itẽme isi'aba'ré, â dawabzuri te te dame 'manharĩ za'ra da. Tawamhã Zuwã, te te 'madâ'â za'ra wamhã, te ta norĩ ma nharĩ za'ra ãne: — A norĩ wa'wa hã wahi ne te 're anomro aba mo. E 'wa simiroti zarina, te we ĩtẽme ai'aba'réi wa'wa bété, â dawabzuri si i'manharĩ za'ra wa'aba zém na, 'Re ihâimana u'âsi mono nhimihâzé wi, asisõ'reptu za'ra wa'aba da hã, aiwasédé rẽme za'ra wa'aba õ nherẽ.

⁸ Sena na aiwasédé hã irẽme za'ra wa'aba zém na, da te 're aiwaihu'u za'ra wa'aba mono da, te za oto 're anomro wẽ wa'aba mo.

⁹ Duré Abra'ãhã nhihudu wẽ te, asina 're rosa'rata za'ra wa'aba mono õ di za, 'Re ihâimana u'âsi mono te te 're i'aihâ za'ra wa'aba mono õ na hã. 'Re ihâimana u'âsi mono ma, waihu'u pese di, ã ẽtẽ norĩ ma, te te nharĩ da, tãma si'a'uwẽ za'ra da, Abra'ãhã nhihudu oto 're hâimana za'ra mono da, ẽne hã.

¹⁰ Hâtâra hã te za oto ni'wa hã sarõtõ, wedepa nhihârizéb da hã. Uburé wede hã 're i'rãi pese za'ra mono õ hã te za te te ãma 're anhihâri. Tawamhã unhama u te za te te 're anhamra. — Ãne te dama ãma simiré'é Zuwã hã, 'Re ihâimana u'âsi mono nhimihâzém na hã.

¹¹ Te duré dama tinha: — Wa hã wa tô â uptabi na si, â dawabzuri hã te aima 're ab'manharĩ 'wa, aiwasété wi 're aipizari za'ra wa'aba mono zém na, da te oto ãma 're aiwaihu'u za'ra wa'aba mono da. Tane nherẽ, ĩza'u si te za ĩma ipire uptabi hã wei wi. Taha si te za oto 'Re ihâimana u'âsi mono pẽ'ẽzani na te te duré 're aihâiba ubu za'ra wa'wa, unhama ne na zama, â na te aima 're i'ab'manharĩ aba mono ne hã. Ta hã ĩma pire uptabi wa, ipara'uza hã te tãma mrami waihu'u õ di za, tãma ĩwapure wa, wa hã.

¹² Wei morĩ wapsi, te za da'ãma aipo'o. Amnho trigu, da te 're upõrĩ za'ra mono parimhã, te za da te 're sa'wari za'ra, isa'warizéb 're. Tawamhã itomhâ na te za da te ãma 're ro'o za'ra. Iro hã sa'ẽtẽ nherẽ, da te wĩrĩ waihu'u õ di za. Tane ĩma ipire hã wei morĩ wapsi, te za da'ãma aipo'o, trigu upõrĩ za'wari ne, duré itomhâ za'wari ne.

Zezusi, â dawabzuri te te i'manharĩzé wasu'u

¹³ Tawamhã Zezusi hã ma tô mo, Galiléa hawi, Zodã pa u, tame Zuwã Batista, â dawabzuri hã te te tãma 'manharĩ da.

¹⁴ Tane nherẽ, Zuwã Batista, isimirosa'rada te te ãma tiwi saprĩ da, ma tô aré pibu, â dawabzuri te te tãma 'manharĩ tõ da. Tahawa te ãne tãma tinha: — E marĩ da, te ĩma aipire uptabi nherẽ, ĩma asi'ru, â dawabzuri te aima 'manharĩ da. A hã te aré ĩma i'manha.

¹⁵ Tawamhã Zezusi ma te asa ãne ãma tãma wa'rã: — Wẽ nherẽ, tane hã tô aré. Tane nherẽ, te za tô a hã ĩma i'manha, 'Re ihâimana u'âsi mono te te wama ipisutuzéb zarina, wa te wasina uwaimrami da. Tahawa, Zuwã hã ma tô ãma saze. Duré te te ãma sazei wa, ma tô â dawabzuri hã Zezusihi ma 'manha.

¹⁶ Tawamhã â dawabzuri te te tãma 'manharĩ pari, ma tô Zezusi â hawi oto watobro. Watobro wi, ma tô hâiwa hã tãma si'ridawa. Tawamhã Zezusi hã ma tô tisã, 'Re ihâimana u'âsi mono pẽ'ẽzani we itẽme imorĩ hã hâiwa hawi, utu'u ne hã. Tawamhã ma tô ãma za.

¹⁷ Tawamhã hâiwa hawi te we tinha ãne: — Ã hã ĩ'ra. Ĩma sawi uptabi di. Tãma ĩto za'ẽtẽ uptabi di. — Ãne te we tinha, Imama hã.