Mateu 28 - ꞌRe Ihâimana Uꞌâsi Mono Zadawa Wasuꞌu

Zezusi ihâiwa'utuzé wasu'u

¹ Tawamhã sabadu hawi i'awẽ na rowa'a wi, dumigu na ma tô Maria Madaréna norĩ hã sisaprõni zahuré Mariaha me, sa'a zahâpâ ab're u, Zezusi da te isẽrẽzéb u.

² Tawamhã simiza'rese õ ré, ma tô ti'a hã iré 're tiwara zahuré, hâiwa hawi Wanhib'apito ma romhuri'wa hã itẽme wisi zahuré wamhã. Tawamhã hâiwa ãma romhuri'wa hã ma tô ab're nhitobzé hã sa'ré, ẽtẽ tõmo wawẽ hã. Te te sa'réi wamhã, ma tô duré isisiwi nhamra.

³ Tã si'ubuzi ne ihâiba hã. I'uza hã duré rã uptabi di.

⁴ Tawamhã ab're 'madâ'â'wa norĩ hã ma tô tipahi za'ra. Pahi uptabi za'ra wa, ma tô duré tirẽrẽ'ẽ za'ra. Tawamhã ti'ai u ma tô tãma ana. Dadâ'â wa, darési ãna 're idanhimi'wara mono ne, ma tô rési ãna daba'wara.

⁵ Tawamhã hâiwa ãma romhuri'wa hã ma tô tãma nharĩ zahuré, pi'õ norĩ ma, ãne: — Ĩma aipahi wa'aba tõ. Zezusi hã da te dasiwi wĩrĩ wa, wedepo'o nhonhi'rãmi na da te dasiwi isasõmri zô robzabui wa'aba da, te we ane wa'wa. Wa hã wa tô aiwaihu'u 'wa, we sô irobzabui wa'aba mono na hã.

⁶ Tane nherẽ, ãme hâimana õ di. Te te sina irotizéb zarina ma tô hâiwa'udu. We ane wa'aba pé, inomrozé hã sabui wa'aba da.

⁷ Taha parip si, te za sa'ẽtẽ ane wa'wa za, isiré 're inomro mono norĩ ma, wasu'u wa'aba da. Ãne te za tãma iwasu'u za'ra wa'wa za: “Ma tô hâiwa'udu. Galiléa u ma tô duré asõwab za'ra wa'aba hã mo. Tamep si te za asiwi i'madâ'â 'wa za.” Ãne na ĩmreme na hã ãma aipo're simrami aba tõ za. Tô'ã!

⁸ Tahawa, te sa'ẽtẽ oto asamro zahuré ab're hawi, pahi te. Pahi zahuré nherẽ, tãma rowẽ zahuré di, pi'õ norĩ ma hã. Zezusihi siré 're inomro mono norĩ ma, te te rowasu'u zahuré da, te asamro zahuré.

⁹ Tawamhã sisamroi ré, ma tô Zezusi hã sõpẽtẽ zahuré, pi'õ norĩ hã. Duré simiza'rese ãna sisamroi ré, ma sõpẽtẽ zahuré. Tawamhã Zezusi hã ma tô sawi zahuré, ãne: — Rowẽ na 're aihâimana aba mono. Tawamhã pi'õ norĩ hã ma tô oto 'râwi itẽme aima'wara zahuré. Tinhib'rata na te te para zawi zahuré sina, ma tô ãma tiwata zahuré, tãma pire zahuré wa.

¹⁰ Tawamhã Zezusi te tãma nharĩ zahuré, ãne: — Aipahi wa'aba tõ. Mo oto ane wa'aba, ĩsisãnawã norĩ ma, ĩwasu'u wa'aba da, Galiléa u ĩzarina ãma si'aba'ré da. Tamep si te za siwi ĩ'madâ za.

Ab're 'madâ'â'wa norĩ, Zezusihi zô ab're baba wa, 'ri tẽme oto isi'aba'rézé wasu'u

¹¹ Tawamhã Maria Madaréna norĩ hã zahadu neb zahuré ré, ma tô ab're 'madâ'â'wa norĩ ni'wam norĩ hã ai'aba'ré, Zeruzalẽ u. Zahadu te duré taha wamhã ni'wam norĩ hã asimro, ab're 'rata. Tawamhã Zeruzalẽ u isi'aba'ré norĩ hã, sasedoti ipire norĩ ma, ma tô rowasu'u za'ra, uburé iromhâimana mono zém na hã.

¹² Tawamhã sasedoti ipire norĩ hã ma tô duré si'rã'õtõ, zudeu norĩ ma roti'wa norĩ me, te te sima ãma roti za'ra da. Tawamhã ma tô rob'uiprazé hã sa'ẽtẽ na tãma sõmri za'ra, da'wapéi'wa norĩ ma, ab're 'madâ'â'wa norĩ ma, dama sadawa nhipese za'ra mono da, Zezusihi wasu'u na.

¹³ Te te tãma sõmri za'ra sina, te ãne nasi tãma nharĩ za'ra: — Ãne te za dama irowasu'u za'ra wa'wa, Zezusihi hâiba na hã: “Isiré 're inomro mono norĩ hã bara na ma tô we sô aihutu. Tahawa, wanhotõ ré za'ra ma tô siwi waze.” Ãne te za dama irowasu'u za'ra wa'aba mo za.

¹⁴ Tawamhã Zudéa ãma danhib'apito hã ãne hã te te wapari wamhã, wa za tãma aiwasu'u wẽ za'ra wa'aba ni, asada sahi za'ra wa'aba tõ da, duré marĩ na i'upa za'ra wa'aba õ zarina, niha na te te aima rob'manharĩ za'ra wa'aba tõ da.

¹⁵ Tawamhã ab're 'madâ'â'wa da'wapéi'wa norĩ hã ma tô rob'uiprazé hã waibu. Te te waibui wamhã, 'Re ihâimana u'âsi mono ma da'ãma romhuri'wa norĩ nhib'apito, te te tãma iroti za'ra zéb zarina, ma tô 'manharĩ za'ra, imreme hã. Ãne ma tô Zezusihi hâiba na rowasu'u zadawa nhipe hã te te ropé, zudeu norĩ nhipti'ai 'remhã. Ta hawim haré te zahadu rowasu'u zadawa nhipe hã 're hâimana, Zezusihi hâiba na hã.

Zezusi hã tisiré 're inomro mono norĩ ma, isihâi'rézé wasu'u

¹⁶ Tawamhã Zezusihi siré 're inomro mono norĩ hã ma tô ai'aba'ré Galiléa u, 11 na ihâiba za'ra hã. Ẽtẽ 'rãihâ u te ai'aba'ré, Zezusi te te tãma ipisutu za'ra zéb u.

¹⁷ Tawamhã Zezusi hã te te siwi sãmri wamhã, ma tô ãma tiwata za'ra. Tane nherẽ, nima norĩ hã ma tô wawã za'ra, õ hãi õ newa.

¹⁸ Tawamhã Zezusi hã ma tô 'râwi itẽme timorĩ za'ra oto. Taha wamhã, ma tô tãma nharĩ za'ra, ãne: — Ĩmama hã ma tô ĩma pisutu, isadawa para dama ĩpire na 're ĩhâimana mono da, ti'ai ãma, duré hâiwa ãma zama.

¹⁹ Tahawa, te za 're iropéi wa'aba mo a'uwẽ mono bâ, dama 're ĩzadawa wasu'u za'ra wa'aba mono da, duré a'uwẽ mono bâ da te 're ĩzaze za'ra mono da, taha zarina ĩnhimiroti 'madâ'â'wa 're dahâimana za'ra mono da oto. Da te 're ĩzaze za'ra mono sidâpâsi, te za â dawabzuri hã dama 're i'manharĩ za'ra wa'aba mo, Ĩmama nhisi na, duré ĩnhisi na, duré Ĩmama pẽ'ẽzani nhisi na, ta norĩ zadawa para wa.

²⁰ Te za duré dama 're iroti za'ra wa'aba mo, uburé te aima 're iroti za'ra wa'aba mono zéb zarina, ĩnhimiroti si da te 're 'madâ'â u'âsi za'ra mono da. Õne u'âsi, wa za asiré 're ĩmorĩ u'âsi za'ra wa'wa, ro isi'utõrĩzéb u. Ãne na aipo're si'âri za'ra wa'aba õ di za.