Mateu 27 - ꞌRe Ihâimana Uꞌâsi Mono Zadawa Wasuꞌu

Zezusi hã, apito Pilatuhu u, da te dasiwi isaprõnizé wasu'u

¹ Tawamhã mararé ma uburé sasedoti ipire norĩ hã, duré zudeu norĩ ma roti'wa norĩ hã si'rã'õtõ, te te sima ãma roti za'ra da, Zezusihi ãma, te te dama sõmri za'ra da, da te dasiwi wĩrĩ da. Taha da, te roti hã sima 'manharĩ za'ra, Zezusihi hâiba na.

² Tawamhã sasedoti ipire norĩ zadawa para, ma tô Zezusi hã dasiwi pawasisi ni, da te dasiwi saprõni da, Pilatuhu u. Ta hã Zudéa ãma da'madâ'â'wa, romanu norĩ nhib'apito uptabi nhimipisudu. Tawamhã itẽme da te dasiwi ãwisi wamhã, ma tô tãma hâiba nhomri ni, Zezusi hã, Pilatuhu ma.

Zudaha dâ'âzé wasu'u

³ Tawamhã Zuda, dama ihâiba nhomri'wa hã, Zezusi dâ'â da, da te dasiwi ipisutu na siwaihu'u wamhã, ma tô si'ruiwapa. Tahawa, 30 na rob'uiprazé isapotore hã ẽtẽ waipo prã prata 'manharĩ hã ma tô apâ tãma sõmri za'ra, sasedoti ipire norĩ ma, duré zudeu norĩ ma roti'wa norĩ ma zama.

⁴ Tawamhã ãne ma tô tãma siwaihu'u za'ra: — Ĩwasédé hã wa tô 'manha, ãhã na hã. Marĩ hã te te 'manharĩ wasété õ nherẽ, wa tô aima hâiba nhomri za'ra wa'wa, asiwi wĩrĩ aba da. Tawamhã asa te tãma nharĩ za'ra, ãne: — E marĩ, wa te wasiwi ãma 'manharĩ da bâ. E wate za'ra bâ oto. Ta hã ate hã. Asiwaprosi ma aiwasédé hã ãma i'manha.

⁵ Tawamhã Zuda hã rob'uiprazé isapotore ma tô sãmra, 'Re ihâimana u'âsi mono nhorõwa ãma, 'ri para. Te te sãmra pari, ma tô watobro rob u. Tawamhã siwĩrĩ da, ma tô 'râwi sisõ'reti, wedenhorõ na.

⁶ Tawamhã 'Re ihâimana u'âsi mono ma, da'ãma romhuri'wa norĩ ipire za'ra hã ma tô rob'uiprazé isapotore hã siwi waibu, sasedoti ipire norĩ hã. Te te siwi waibui wamhã, ma tô sima ãma roti za'ra, ãne: — Ã hã rob'uiprazé hã dawaprui wa'âbâzé. Tahawa, 'Re ihâimana u'âsi mono nhimiroti na Mozési te te ãma irob'ui'érézéb zarinai õ wa, rob'uiprazé nhemezéb 're, wa te wasiwi sẽrẽ waihu'u õ di za, wedehâpâ 're, 'Re ihâimana u'âsi mono nhorõwa 'ri te, danhoprubzé wazari nomro tõ da.

⁷ Tahawa, ãma sisaze za'ra parimhã, tô õhõ na rob'uiprazém na ti'a hã ma tô siwi uipra, zé na piza 'manharĩ'wa nhipti'a hã. Darob amoi hawi, Zeruzalẽ u 're idasihutu mono norĩ hã tame 're dadâ'â za'ra mono wa, adâ da te 're iséme mono zéb da hã, ma siwi uipra, ãma.

⁸ Tahawa, ti'a hã Dawaprui wa'âbâ na da te dasiwi i'uipra na te oto da te 're sisi za'ra.

^9-10 Ãne ma tô tiromhâiba, duréihã 'Re ihâimana u'âsi mono zadawa 'mahârâ 'rata 'wa hã te te ãma irowaihu'u siromo zéb zarina, Zeremia na isisi hã. Ãne na ma tô ãma rob'ui'éré siro, duréihã: “Tawamhã 30 na rob'uiprazé isapotore hã ma tô ubuni na siwi ti'â, zé'a na piza 'manharĩ'wa nhipti'a hã te te siwi ãma uipra da. Tahawa, ma tô Izaraéu nhihudu norĩ hã siwi pisutu, 30 na te te tãma iwa'âbâ za'ra zéb da hã. Ãne ma tô 'manharĩ za'ra, 'Re ihâimana u'âsi mono te te ĩma i'ruzéb zarina, te tãma 'ru za'ra da.”

Apito Pilatu, Zezusi te te isadanharĩzé wasu'u

¹¹ Tawamhã Zezusi hã Zudéa ãma da'madâ'â'wa nho're, te oto za, Pilatuhu nho're. Tawamhã Pilatu te sadanha, ãne: — E a hã, zudeu norĩ nhib'apito. Tawamhã Zezusi te asa tãma tinha, ãne: — Tahata ma tô tane hã tô ĩ'ãma iwaihu.

¹² Tawamhã sasedoti ipire norĩ hã duré dama roti'wa norĩ hã ma tô siwi wasu'u wasété za'ra Zezusi hã, Pilatuhu ma. Tane nherẽ, Zezusi hã tizadawa na te te tãma ãma wa'rãmi za'ra õ di, asa.

¹³ Tawamhã Pilatu te oto duré sadanha, ãne: — E asina dazadawa 'rui õ di bété, da te nasi dasiwi aiwasu'u wasété za'ra zém na hã. E asi'uihâ na asadawa na wa'rãmi ãna, dama.

¹⁴ Tawamhã dama ipire norĩ hã te te nasi siwi wasu'u wasété za'ra nherẽ, tizadawa na te te ãma wa'rãmi õ di, Zezusi hã. Te te ãma wa'rãmi õ uptabi di. Ãne wa, ma tô apito Pilatu hã ãma titob'uzu, Zezusihi ãma.

Zezusi, da te dasiwi wĩrĩ da, Pilatu te te dama ihâiba nhomrizé wasu'u

¹⁵ Pascowa na dasai 'manharĩzép sidâpâsi, ma tô apito Pilatu hã misi si te te 're da'azani, dazazém hawi, da te tiwi 're iwaptẽrẽ za'ra mono zéb zarina.

¹⁶ Aibâ hã dazazéb 're, te dame 're sa, Barabasi na isisi hã, ihâimana wasété na dama iwaihu'u pe hã.

^17-18 Zezusi hã iwẽ na si te te dama 're rowahutu mono 'ru te, ma tô zudeu norĩ ma ipire za'ra norĩ hã te te siwi 're 'ruiwapari, õ norĩ upana Zezusihi ãma si 're datob'uzu za'ra mono 'ru te. Ãne zarina ma tô siwi hâiba nho tãma, apito Pilatuhu ma. Ãne na da te dasiwi 're i'ruiwapari za'ra mono zéb zarina, da te tãma ihâiba nhomri na ma tô apito Pilatu hã ãma da'awaihu'u. Tahawa, te ãne ãma da'azadanha, da'ahâ na, itẽme dasi'rã'õtõ wa: — E 'wa hã te tawamhã asima iwẽ za'ra wa'wa, te tãma irob'ru da hã. E Barabasi. E Zezusi, Danho'reptui'wa da, 'Re ihâimana u'âsi mono te te ipisutu na da te 're isisi za'ra mono.

¹⁹ Tawamhã Pilatu hã te te 're ida'awaihu'u mono zéb da, roti ma, 're isimasisi mono zéb ãma sãmra ré, ma tô imro hã timreme hã tãma tisõ. Ãne ma te ihâiba na hã tãma waihu'u: — Ma'ãpé ãma rosazâri, aibâ ãma. Ta hã tiha te te 're ab'manharĩ mono õ di. Bara na hã ĩnhotõ 'rowi te isawẽrẽzém na hã wa tô ãma robzépata za'ẽtẽ, taha na hã. Ãma ĩpẽ'ẽzé uptabi di. Tahawa, te za ãma irosazâ.

²⁰ Ãne ré, ma tô sasedoti ipire norĩ hã duré dama roti'wa norĩ hã da'ahâ norĩ ma 're sadawa si'aba'ré za'ra, Barabasihi si Pilatuhu wi, da te waptẽrẽ za'ra da, dazazém hawi te te tãma rob'ru da, duré Zezusihi si te te dama hâiba nhomri da, taha si da te dasiwi wĩrĩ da, isadawa para.

²¹ Tawamhã apito Pilatu hã ma tô duré da'mahârâ na sahu, ãne: — E 'wa hã te tawamhã asima iwẽ za'ra wa'wa, te aima tãma irob'ru za'ra wa'aba da hã, dazazém hawi aima watobro za'ra wa'aba da. Tawamhã asa ma te ãma tãma wa'rãmi za'ra ni, ãne: — Barabasihi ma, rob'ru na, taha si dazazém hawi watobro da.

²² Tawamhã Pilatu te duré ãma da'azadanharĩ zahu, ãne: — E marĩ, wa za tawamhã aima ãma pisutu za'ra wa'wa, Zezusihi ãma hã, Danho'reptui'wa da, 'Re ihâimana u'âsi mono te te ipisutu na da te 're isisi za'ra mono ãma hã. Tawamhã aihĩni ma tô ãne ãma 'mahârâ za'ra ni: — Wedepo'o nhonhi'rãmi na da te dasiwi sasõmri, dâ'â da.

²³ Tawamhã Pilatu te duré asa dama tinha, ãne: — E marĩ te te 're ab'manharĩ wasété mono bâ. Tane nherẽ, ãne na hã da te wapari õ di. Dahârâ 'rãihâ na te oto nasi 'mahârâ za'ra ni: — Wedepo'o nhonhi'rãmi na da te dasiwi sasõmri, dâ'âre da.

²⁴ Tawamhã Pilatu, niha na hã marĩ te te oto ãma waihu'u õ di, da te ãma dasiwi irosazârizéb da hã. Aihĩni te oto Zezusihi da si tahâimana za'ra ni, dazahi uptabi na. Ãne na te te sina waihu'u wamhã, ma tô piza'a zô da'mazatõ, ãma sisimisõ da, uburé danho'a. Tawamhã Zezusihi ãma marĩ iwasédé hã te te i'manharĩ õ na aihĩni da te iwaihu'u za'ra zéb da hã, ma tô danho'a sisimisõ. Ãne te duré taha wamhã dama tinha: — Zezusi hã da te wĩrĩ da, te dama 'rui wamhã, ĩwasédé hã te i'manharĩ da hã mare di za, wa hã. Ate za'ra wa'aba si, ta hã.

²⁵ Tawamhã asa te tãma nharĩ za'ra ni, ãne: — Wẽ di tô. Wa te wasiwi iwaptẽrẽzéb zarina, da te dasiwi wĩrĩ wamhã, 'Re ihâimana u'âsi mono te te tô pé wahâ za'rare, wa'ra norĩ zama, duré wanhihudu norĩ zama hã pé tô te te hâ za'ra, wawasédé hã wa te ãma 'manharĩ za'ra di pâ.

²⁶ Tawamhã da te tiwi ihâiba waptẽrẽ za'ra zéb uwaibaba, ma tô Pilatu hã da'wapéi'wa norĩ ma 'ru za'ra oto, Barabasihi ma si te te tãma rob'ru da, dazazém hawi dama watobro da. Ma tô duré tãma 'ru za'ra, Zezusi hã powawẽ hâiwaré na te te siwi 're pré'é mono da, taha pari te te duré siwi sasõmri da, wedepo'o nhonhi'rãmi na dâ'â da oto.

Zezusihi ãma, da'wapéi'wa norĩ hã nasi iwa'ẽ za'ra zé wasu'u

²⁷ Tawamhã Pilatuhu ma da'wapéi'wa norĩ hã ma tô Zezusi hã siwi 'mazé isõrõwa u, 'ri 'rãihâ u. Te te siwi 'mazébré wamhã, tame da'wapéi'wa norĩ hã ma tô aihĩni ãma si'rã'õtõ.

²⁸ Tawamhã i'uza hã ma tô siwi waze. Taha pari tisi'ubuzém na ma iwa'rãmi siwi ãma hâiba ubu, ti'uza hâpa ihâ pré na, danhib'apito ãma 're isi'uza za'ra mono zém ne na.

²⁹ 'Wabzéré panhipti hã ma duré sada 'ma'manharĩ za'ra, i'wa ahâ hã. Taha pari, ma duré i'rã nhisiwi tãma hiri za'ra, te te ãma siwi sõpre da, danhib'apito hã ãma 're isisõpre za'ra mono ne. Wedehu ma duré isib'rata tãma hiri za'ra, isib'rata nhimire niwĩ, danhib'apito hã tinhiwedehu ré, 're isimasisi mono ne. Tawamhã hi'rãtitõ ma tô nasi isõ're tãma asimro, ãma wa'ẽ za'ra sina te te nasi sawi za'ra da, ãne: — Zudeu norĩ nhib'apito, rowẽ na 're aihâimana mono.

³⁰ Tizadaipro na te duré nasi siwi upto. Wedehu te duré nasi tiwi mrami za'ra, i'rãi wi, te te nasi siwi ãma ahâri da.

³¹ Tawamhã nasi ãma wa'ẽ za'ra parimhã, zazahâ hâpa ihâpré hã ma tô apâ tiwi wazere za'ra. Apâ ma duré siwi ãma uza, 're isi'uza mono zém na. Taha pari, te oto siwi saprõ, te te siwi sasõmri da oto, wedepo'o nhonhi'rãmi ré.

Zezusi hã da te isasõmrizé wasu'u, wedepo'o nhonhi'rãmi na

³² 'Ri nho'õmo nhiti Zezusi hã te te oto siwi wazere wamhã, aibâ hã ma tô siwi tisã, Sima na isisi hã. Sireni na isa'ru nhisi hã. Te te siwi sãmri wamhã, ma tô tãma 'ru za'ra da'wapéi'wa norĩ hã, wedepo'o nhonhi'rãmi hã tinhisé te te tãma âri da, Zezusi te te sisada i'âri hã.

³³ Tawamhã ma tô oto siwi ãwisi, Gogota na sa'a nhisi u, tame da te 're idanhimroi mono zéb u. Gogota hã wasimremezém na Da'rãihi na sa'a nhisi, te wasu'u.

³⁴ Tamomo te te siwi ãwisi wamhã, uwa 'rãi wa'u isé hã ma tô aré tãma sõmri za'ra Zezusihi ma, wedewa'u isé na iwazari ré hã, te te hâ'rẽne da. Tane nherẽ, te te téiwai wamhã, te te sima wẽ õ di, te te hâ'rẽne da, Zezusi hã.

³⁵ Tawamhã ma tô oto siwi sasõ, wedepo'o nhonhi'rãmi na. Te te siwi sasõmri pari, ma tô ẽtẽ zapotore i'ui'éré ré hã nasi sima sãmra da'wapéi'wa norĩ hã, Zezusihi uzazéb zô. Taha zarina, ma tô sima ãma aipé.

³⁶ Taha pari, te oto duré i'ratamhã asimro, Zezusi hã te te dawi 'madâ'â za'ra da, hâiwi sa'o ré.

³⁷ Tawamhã Zezusihi 'rã nho'õmoi baba ma tô siwi sasõ, wedepo'o na rob'ui'éré hã, iwasédé hã da te ãma ihirizéb ui'éré ré hã. Ãne ãma irob'ui'éré hã: “Ã hã Zezusi, zudeu norĩ nhib'apito.”

³⁸ Zezusihi me ma tô aibâ norĩ hã dasiwi sasõmri zahuré ni, isiré dâ'â zahuré da. Danhibrob zô dapãrĩ'wa, aibâ norĩ hã. Te ãma aiwa'aba zahuré isimire niwĩ, duré isimi'e niwĩmhã.

³⁹ Iwa'wai baba, da te nasi iro'rahâri za'ra norĩ hã te nasi ãma tawa'ẽ za'ra ni, Zezusihi ãma. Nasi ãma da'rãsiwanarĩ za'ra sina, te nasi ãma wasété za'ra ni.

⁴⁰ Ãma dawa'ẽ sina, te duré nasi ãne tãma nharĩ za'ra ni: — Oro a hã asima roti za, 'ri hã sãmra da, 'Re ihâimana u'âsi mono nhorõwa hã, duré apâ 'ri da, si'ubdatõ bâdâ hã ai'ãma si'utõrĩ õ ré. A hã tô sena 'Re ihâimana u'âsi mono 'ra wamhã, ma'ãpé asisõ'reptu na. Duré ma'ãpé wedepo'o nhonhi'rãmi hawi we si'ra na, atâ'â tõ da.

⁴¹ Sasedoti ipire norĩ zama te duré nasi ãma tiwa'ẽ za'ra, 'Re ihâimana u'âsi mono nhimiroti 'rata na rob'ui'éré na dama rowahutu'wa norĩ hã, duré dama roti'wa norĩ zama hã te nasi ãma tiwa'ẽ za'ra. Ãne te nasi ta norĩ hã ãma tiwa'ẽ za'ra:

⁴² — Oro õ hã Izaraéu nhihudu norĩ nhib'apito za. E niha hã bété, tinhimiromhõsi na te te 're da'anho'reptui mono nherẽ, 'râwi sisõ'reptu waihu'u õ di bété oto. Ãhã na wedepo'o nhonhi'rãmi hawimhã, we pé te te si'ra, wa te wasina 're i'umnhasi za'ra mono zéb da hã wa te ãma waihu'u za'ra da.

⁴³ Õ hã ma tô 'Re ihâimana u'âsi mono hã te te sina 're umnhasi, isiré 'râwi 're imorĩ u'âsi na. Ma tô duré dama 're siwasu'u, 'Re ihâimana u'âsi mono 'ra na. Ma'ãpé ãhã na 'Re ihâimana u'âsi mono te te sõ'reptu oto, wanho'a.

⁴⁴ Tawamhã danhibrob zô dapãrĩ'wa norĩ hã ma tô duré nasi dasiré ãma tiwa'ẽ zahuré, isiré dâ'â zahuré da, da te dasiwi isasõmri zahuré hã.

Zezusihi dâ'âzé wasu'u

⁴⁵ Tawamhã ma tô oto ti'abzuma. Abzuma wamhã, ma tô tirobra, daro mono bâ. Bâdâ siprazéb u, te oto robra si nomro.

⁴⁶ Tawamhã bâdâ sipra wi, te Zezusi hã Timama hã sa'ẽtẽ sina 'mahâ: — Eri, Eri, rema sabatani. Ãne wamremezém na hã: “Ĩnhib'apito, Ĩnhib'apito, e marĩ da, ma tô oto ĩsiwaprosi ĩrẽ.”

⁴⁷ Tawamhã ni'wam norĩ hã i'rata isimasam norĩ hã Zezusihi hârâ te te wapari za'ra wamhã, ma tô sima rowasu'u za'ra, ãne: — Õhõta Eliasihi zô te hâ, te te we pawaptob da.

⁴⁸ Tawamhã ni'wa hã i'rata isimasam norĩ siré hã si'aba'ré na ma tô piza 're upsõzém ne hã 'mai'â, uwa 'rãi wa'u isé na te te tãma ãma di'i da, Zezusihi ma, iwa'âbâ suru na. Tawamhã wedewaré 'rãsutu na ma tô ãma sapu'u, Zezusihi ma, te te wẽ da, te te upsõmri da.

⁴⁹ Tane nherẽ, isiré isimasam norĩ hã ma tô ãma sipa'uwati za'ra, ãne: — A'â pé, wanhimipari za'ra wa'aba, Eliasi we itẽme morĩ õ'umnhasite, te te sõ'reptu da, dâ'â tõ da.

⁵⁰ Tawamhã Zezusi hã ma tô duré tihârâ 'rãihâ na ãma sahu, irẽme ma. Taha pari ma tô oto pẽ'ẽ hai'utõ.

⁵¹ Dâ'â wi, zazahâ ihâpa hã 'ri 're wa'wa nhitobzé hã ma uihâ na hâihaipo'o aiwa, hâimo hawi pi'reba, 'Re ihâimana u'âsi mono nhorõwa ãma hã. Ti'a hã te duré sãsã'ã. Sãsã'ã wamhã, ẽtẽ tõmo wawẽ hã ti'a 're isimi'wara mono zama ma tõmo sipo'o.

^52-53 Tahawa, ma tô duré adâ'â 'ru hã si'ridawa za'ra. Si'ridawa za'ra wamhã, 'Re ihâimana u'âsi mono nhib'a'uwẽ norĩ hã aré 're idâ'â za'ra mono hã ma tô apâ ahâiwa'utu ahâ uptabi na, 'Re ihâimana u'âsi mono hã. Ta norĩ hã, Zezusi hã ab're hawi za hâiwa'utu parimhã, te za ab're hawi wairé. Tawamhã Zeruzalẽ u te za asisi, 'ri nho'u iwẽ uptabi u, dama sihâi'ré za'ra da. Tawamhã da'ahâ uptabi na te za ãma tanhopré ni, tamemhã.

⁵⁴ Tawamhã Zezusi te te dawi i'madâ'â za'ra norĩ hã da'wapéi'wa norĩ hã, duré da'wapéi'wa norĩ wada'uri'wai me, ti'a isãsã iwatobro hã te te 'madâ'â za'ra wamhã, duré uburé ropipa iwairébé mono te te 'madâ'â za'ra wamhã, ma tô tipẽ'ẽwara pese za'ra. Tawamhã ãne te sima nharĩ za'ra: — Nare õ hã, tô sena 'Re ihâimana u'âsi mono 'ra.

⁵⁵ Tawamhã pi'õ norĩ hã ahâ na te 'madâ'â za'ra romhâ na, Zezusi hã hâiwi sa'o ré. Ta norĩ hã ma tô isiré 're nomro Galiléa hawi, Zeruzalẽ u, te te siwi 're pawaptob za'ra mono da.

⁵⁶ Ta norĩ me, te Maria Madaréna hã za. Mariaha hâiba amo zama te duré isiré za'ra hã za. Taha 'ra hã Tiagu, duré Zuzé. Zebedehe mro zama te duré pi'õ norĩ me hã za.

Zezusi dâ'â pari, da te dasiwi isẽrẽzé wasu'u

⁵⁷ Tawamhã ma tô bâdâ hã aipra pese oto. Tahawa, aibâ isibro pe hã ma tô mo Pilatuhu u, Zuzé na isisi hã. Ta hã Arimatéa na 'ri nho'õmo nhisi ãma 're isãmra mono. Ta hã Zezusihi nhimiroti si te te 're i'madâ'â pese mono.

⁵⁸ Tawamhã Pilatuhu u oto morĩ wamhã, ma tô Zezusihi hâiba hã tiwi waptẽ, ab're 're, te te sẽrẽ da. Tawamhã apito Pilatu ma tô dama ti'ru, Zezusihi hâiba hã da te tãma 'ru da.

⁵⁹ Tawamhã Zuzé hã Zezusihi hâiba, ma tô ti'â. Taha pari ma tô ubu, zazahâ ihâirã na.

⁶⁰ Te te hâiba ubu pari, ma oto tite ab're siromo wa tisẽ Zuzé hã, sa'a zahâpâ da te aré tãma i'ab're siromo wa. Taha pari ma tô ẽtẽ tõmo zapodo hã te te pizari, ab're te te ãma iré sitob da. Tawamhã te te iré sito pari, ma tô oto mo, õne haré.

⁶¹ Zuzé hã Zezusihi hâiba te te sẽrẽ ré, te pi'õ norĩ hã ab're nho'õmoi baba aimasisi zahuré, Maria Madaréna norĩ hã, Maria na isisi hâiba amoi me. 'Râwi te te ãma 'madâ'â zahuré da, te i'rata aimasisi zahuré.

Da'wapéi'wa norĩ hã, ab're nhitobzé te te siwi i'madâ'â za'ra zé wasu'u

⁶² Tawamhã oto ãma awẽ wamhã, sasedoti ipire norĩ hã, duré farizeu norĩ hã ma tô Pilatuhu nhorõwa u si'rã'õtõ, sabadu na romhuri zahârizém na.

⁶³ Itẽme si'rã'õtõ wamhã, ãne te tãma nharĩ za'ra: — Apito, õ hã isadawa nhipe hã zahadu 're morĩ ré, dama 're isiwasu'u mono zém na wa tô ãma wapo're pu'u za'ra ni, ãhã na hã. Ãne te dama 're siwasu'u: “Bâdâ si'ubdatõ ĩ'ãma si'utõrĩ õ ré, wa za apâ hâiwa'udu.” Ãne dama 're isiwasu'u mono zé hã.

⁶⁴ Tahawa, ãté isiré 're inomro mono norĩ hã te za apâ siwi waze ihâiba hã, pi'uriwi. Tawamhã ãté sadawa nhipese na te za duré dama wasu'u za'ra, apâ ab're hawi ihâiwa'utu na hã. Zezusi hã 're morĩ ré, sadawa nhipese na te tô dama 're siwasu'u. Tane nherẽ, isiré 're inomro mono norĩ hã ãne na te te dama wasu'u za'ra wamhã, taha nhipai u te za duré dama sadawa hapese za'ra. Tahawa, te za dama i'ru, sa'a zahâpâ ab're nhitobzé hã da te iré dasiwi 'madâ'â pese da, si'ubdatõ bâdâ hã, ãma isi'utõrĩzéb u, ihâiba hã te te siwi wazere za'ra õ'umnhasite, pi'uriwi.

⁶⁵ Tawamhã Pilatu te asa tãma nharĩ za'ra, ãne: — Tane tô. Da'wapéi'wa norĩ hã wa za tô pisutu za'ra, asiré si'aba'réi wa'aba da, ab're u. Mo oto itẽme ai'aba'réi wa'aba pé, da'wapéi'wa norĩ ma, 'ru za'ra wa'aba da, ab're nhitobzé hã te te siwi 'madâ'â pese za'ra da, dawi.

⁶⁶ Tawamhã ab're u te oto ai'aba'ré, da'wapéi'wa norĩ siré. Tawamhã ẽtẽ tõmo zapodo hã, ab're nhitobzé hã marĩ na ma tô siwi upto, sitop tete na iré sab da, da te dasiwi sa'ré tõ da. Da'wapéi'wa norĩ ma, ma tô duré roti za'ra, ab're nhitobzéb 'rata simasab da, te te siwi 'madâ'â u'âsi za'ra da, sõtõ za'ra ãna.